jueves, 3 de marzo de 2022

Entragu - Pena Gradura (Teberga)

Antroxu 2022

Un nuevu antroxu nel qu'escapámonos hasta Teberga, conceyu montañeru y escalador por escelencia, nel que como ye vezu, asitíamonos n'Entragu, nel so area recreativa, que como pudimos comprobar ya pasó per meyores momentos, gracies a la mala xestión del ayuntamientu teberganu, con un claru abandonu de les istalaciones.

En cuantu a la escalada, dividímos los díes pente Entecampos y Bóvedas, centrándonos los dos primeros díes, por desgracia, na Molinera (7a+), la cual escapóse esi primer día, anque sintiera que pudiera salir al segundu pegue.

Pegues intensos a la Molinera (7a+) nel seutor Entecampos (semeyes d'Ani)

El casu ye qu'enguedeyéme nun par de pegues na parte media, dándo un bon últimu intentu y hasta'l día siguiente, teniendo males sensaciones con otru vuelu, nun pude facela magar de relaxame y baxar a dar un paséu con Kíla y ye que pente la 3er y 4ª chapa nun mola cayer y fízome dir mui tensu, faciendo la parte dura d'arriba más centráu y llevándomela al novenu pegue en total y cuartu del día.

Ambientín de collacios pelos seutores con pegues fanáticos (Anna, Rubén)

Demientres el restu del grupu de collacios, daba los sos pegues a les víes qu'escoyíen tanto Anna como Suco tuvieren conmigo na Molinera, sacando Anna un métodu, pa echar de comer aparte, saliendo al rectu na parte dura y como non, encadenándola con eficiencia y una pegada fuera de bolos, anque hai que dicir que'l día anterior tamién se-y escapó saliendo a la placa final.

Pegue d'encadene a la Molinera (semeyes d'Anna y Richie)

Llueu de los dos primeros díes, tocó camudar de seutor averándonos hasta Bovedas, onde'l Dream Team resacosu (Iso, Suco, Lau y yo) fuimos a echar un tientu a Derecho de Pernada (7c). Que puede salir mal de metese nun 7c, nunes condiciones pocu favoratibles pa escalar, pues qu'algamamos a montala al tercer paisanu que pasó pela vía, que nesti casu fuí yo.

La perrada asoleyando pelos seutores

La verdá ye que'l trabayu n'equipu furruló y al día siguiente cola vía montada, pero con un día gafu con amenaza continua de llover y un rescate d'una chica gallega pol mediu, tan sólo-y metí otru pegue pa encadenando hasta'l pasu desplomáu, previu al bloque de placa, repitiéndolu col mesmu métodu y viéndo-y munchu color, poro tocará dir a por ella y restolar dalguna rodiella de reposu.

A la preba de Derecho de Pernada (7c) en Bóvedas

Demientres, taba con Derecho, Anna engorilóse n'encadenar la Chimos, un 6c+/lo que quieras facela de dura, que cayó al segundu pegue del día, dempués del llargu parón pol rescate. Dende equí, dar les gracies a los Bomberos d'Asturies, pola rapidez n'aportar col helicoteru y la profesionalidá pa rescatar a la compañera gallega, la cuál franciera un todiellu nun mal vuelu.

Deséa-y una bona recuperación y que veámosla nos seutores ceo de nuevu.
 
Kíla feliz nel pié de vía d'Entecampos

 
Croquis modificaos por mi de la escuela d'escalada de Entragu, alcontraos en La noche del Loro, el Club Aguja de Sobia, Desnivel del añu del tabacu... Gracies y col so permisu.
---------------------------------------------------------------------

Tolosantos de 2021 y 1 de Xineru de 2022

Dende'l branu que nun tornara per Teberga, tando muncho más centráu n'esguilar per Morcín, pero siempre qu'hai un puente, apetez averase hasta Entragu y llantase cola furgo nel aparcaderu, lloñe de les llocures braniegues ya insostenibles dafechu.

Per tolos santos mazcaritos al cantu

Lo que sí que ye menos normal, ye veme trepando pela Esplanada, ya que nun soi mui amigu nin de les aglomeraciones trepando nin de los milenta ciclistes o caleyeros, parándose a mirar si pringues nuna vía o si das el vuelín de turnu p'agasayu pa los espectadores.

Na esplanada sofriendo nel Rampéi

El casu ye que nel puente de Tolosantos, tuviéramos un bon garrapiellu xente pela Esplanada, caún a los sos proyeutos y otros a penar guápamente, por liase al birréu de más nes post-esguilaes, lo que significa trepar al día siguiente de resaca y nun ser malpenes a encadenar un par de 6c+ (El Rampéi y Enredando).

Anna y Andrea plaqueando fino, fino

Col añu nuevu, motiváu llueu de dellos encadenes n'Arnea, tornamos a Teberga cola calma, llueu d'una nuechevieya moderada y ente ponte bien y tate quietu, terminamos por plantanos de nuevu na Esplanada, al ver que tábase mui tranquilín, dedicándose Anna a tachar la Willy, la cual tenía pendiente y metiéndome yo por facer dalgo a la Lady Di.

Díes de tranquilidá na Esplanada y Entecampos

Coses inesperaes, metese nuna placa tan finísima del estilu teberganu y encadenala a vista poniendo cintes, diz munchu del estáu físicu y mental que tenemos nel intre. Nun quier dicir qu'al día siguiente cagues arenón nun 6b, pero fice esta vía, trepando finu, centráu y asumiendo de chapa en chapa, casi ensin descansu.

Visitina a nuevu seutor na Pena Gradura

D'esti xeitu, quedándome a gustu magar de los encadenes, tuviemos dando un paséu pela senda, dando  vista  y garrando dalgo d'info (gracies Hector) d'un nuevu seutor na Pena Gradura, del que'l club Aguja de Sobia dará info, cuando considere oportuno.

Dicir qu'encantónos, tanto'l patéu llargu como'l requexín nel que tan asitiaos los parés y por dar un pocu d'info, la placa de gota d'agua ye de gran calidá, faciendo víes al nuesu paecer pente'l V+ y el 6b+ mui buenes toes elles.

---------------------------------------------------------------------

24 de Xunu de 2021

Escapada esprés hasta Teberga con Iván col envís de trepar onde se pueda y camudar un pocu'l sen de la escalada per Morcín. Camentando que teníemos una vía montada n'Otura, dende va 2 selmanes y taría pingando la parte de chorreres, tocaba camudar de valle sí o sí.

Decidimos entós, averanos hasta'l Río, onde facía munchu tiempu que nun trepaba, teniendo en mente probar Frenando al Osu (7a+). Yo siempre voi pol llibru, xubiendo de grau pali pali, pero Iván tenía en mente probar un 7c, asína que dexelu que caleciera manes onde meyor viese.

Esguilando nel seutor del Río nos parés de Pena Gradura

A la fin, metióse en Frenando al Osu, montándome la vía, de manera pocu flasheante, nun viendo mui bien como diba la vía. Al siguiente turnu, metíme yo, dafechu a vista, pero coles cintes puestes, non esperando esguilar tan precisu saliendo de la parte más plaquera ensin munchos problemes, llegando al reposu ensin manes, onde ya tocó centrase, ya intentar l'encadene.
 
Continué trepando lleendo la vía bastante bien y plantéme a falta d'una chapa onde ya sí o sí nun podía cayer, saliendo per bones preses hasta la cadena. Nesti sen, son pegues que nun esperes, que pa calecer músculos entres a la vía y te la lleves al primer pegue.

D'esti xeitu, como suel ser vezu en mí, nun esguilé más y dediquéme a asegurar a Iván en prósimos proyeutos y series físiques varies y ye que lo bono si breve dos vegaes bono jeje.

---------------------------------------------------------------------

2 de Mayu de 2021

Un finde más, tornábemos a Teberga a intentar esguilar, pero la meteo yera gafa enforma, faciendo un pocu de monte'l sábadu cola ascensión a Peña Cruzada, pasando llueu demasiáu tiempu de vermú, xinta y chigréu como pa poder apretar seriu de domingu.

Andre probando Raska y Gana... algamando un proyeutu bien prestosu

Aún así, llevantámonos, almorzamos y decidimos aprovechar les hores de solín hasta que llegase la lluvia de nuevu de tarde. Pa ello, xubimos hasta la parte alta d'Entecampos el Tres Pates pa un Bancu Team, pa esguilar nesa ablucante caliza que tien esta muria.

Anna caleciendo manes y encadenando Raska y Gana
 
Siendo la primer vegada que tan nel seutor, Anna y Andre, anímo-yos a probar Raska y Gana, un 6c+ de lo meyor de Teberga. Métense con xeitu, primeru Andrea aportando hasta la metá de la vía pa llueu completar el montaxe Anna, encadenándola nun pegue apretón onde los haya.
 
Col escaquéu por bandera, por mor de la resaca y contando cola lluvia, dexo paso a Andrea pa que termine de matizar la vía nun segundu pegue, pudiendo probala con calma y dexándola llista pa otra visita.

Sufriendo pa facer la Ardilla Roja... vía sicolóxica de la vieya escuela tebergana

Como nun terminaba de llover y nun taba pa meteme en proyeutos serios, decídime a intentar la Ardilla Roja poniendo cintes. Ya la probara otru domingu soleyeru va unos mesinos y esta vegada sí que la pude encandenar, nun pegue de puru sufrimientu y pasando más mieu que'l que lu inventó... la vieya escuela tebergana con pires de 3 metros llargos te pon nel sitiu.

Entragu - Pena Gradura (Teberga)
Croquis modificaos por mi de la escuela d'escalada de Entragu, alcontraos en La noche del Loro, el Club Aguja de Sobia, Desnivel del añu del tabacu... Gracies y col so permisu.

---------------------------------------------------------------------

1, 2 d'Abril de 2021

Continuábemos col rock trip astur y magar de colar del Val.le en Somiedu y pasanos pal siguiente valle a Teberga, entrábemos nel retu de llevanos dalgo pal bolsiellu na dureza tebergana. El día 1 d'Abril, día del mió 40 cumpleaños, aportábemos a Entragu a mediudía y decidimos dir hasta la Esplanada, más que nada por ver a tola xente.

Llueu de repartise tol mundiu pela escuela, sobretou n'Entecampos y Esplanada, Anna y yo quedámonos con Iso y Laura, aprovechando que teníen montáu la Sudoku, una vía que ya probara en dos ocasiones y teníala pelín travesada.

Ellí metímonos, dando un mui bon primer pegue, llevantándonos de la bañerina, pero pringando al salir por nun tener claros los pies. Lo que paecía un pegue de revisión pa encadenar al siguiente, dió pasu a la entrada del sol, un tactu nes güeveres romes horrible y nun ser a llevantame de la bañera nos dos siguientes pegues.

Probando la Sudoku unos mesinos atrás
 
Anna, metióse a la Hiroshima, vía que tenía encadenada con un allargue na reunión y quería facela en condiciones, asína que la montó y dió otros dos bonos pegues, pero güei nun yera'l día. Poro, terminamos por colar pal aparcaderu onde cellebraríemos de tranqui mi cumple con unes birres y una tartina.

Al día siguiente, tampoco pensamos muncho, garramos los trastos pela mañana, magar del almuerzu y con unos diez gradinos a la solombra, primeru fice poniendo cintes la Sudoku y llueu Anna, enchufó poniendo cintes tamién la Hiroshima.

Día perfectu, d'esti xeitu, tornamos al aparcaderu d'Entragu a redesayunar y tomar el solín coles perrines hasta'l mediudía que tocó xintar un menú y descansar hasta'l día siguiente, que ya sedría l'últimu de les vacaciones.

5 Xunetu de 2020

Una vía que tuviera como una referente a facer n'Entecampos, yera'l Cantón de Manila. De xuru que pasó per momentos meyores, menos sobada na parte baxa, pero aún así, garrándola nel día adecuáu ye una vía percompleta.

Por dalgún motivu, ya tuviera un escesu de pegues pa encadenala, pero a la fín, magar de montala y non con demasiaes bones sensaciones, fuí a llevámela d'una vegada. Los pegues, ya nin los conté, porque siempre que diba montaba y al segundu pegue entraba'l sol y tocaba pringada al cantu, nunca meyor dicho.

Muncho meyor-y fué a Anna con ella, que probárala conmigo, el branu pasáu dándo-y un par de pegues, nel tiempu que tábemos cola Tormenta Perfecta tamién, pero esti día, probóla sacando los pasos y nun pegue d'esos antolóxicos llevósela pal bolsiellu, faciéndose con un 7a sólidu enforma.

Actualización 2019 

Munchos, munchísimos fueron los díes que pasé per Teberga trepando dende finales del 2018 hasta'l 2020 y ye qu'esti iviernu pasáu fuera secu enforma y pudiéramos trepar casi tol añu, cosa qu'a final del 2019 nun pudo ser por mor de les lluvies, anque nesta segunda metá del añu casi nun pasé pol valle.

Fon siempre motiváu mientres otros descansen jeje

Falando de la parte de la Pena Gradura, aparte de facer monte per ella encadenando esi mesmu día, nel covachón de Gradura la mítica Arte Primitivo, tamién tuviera trepando un pocu más abaxo n'Entecampos, onde tamién ficimos Valle de Lokos, prestándome pola vida esti seutor.

Momentos perrunos en bóvedas

Na parte baxa d'Entecampos tamién llevámonos otru guapu sétimu como ye la Tormenta Perfecta y na Esplanada, a la fín, me tóme en serio encadenar quiciás la vía más guapa de placa de Teberga, la Hiroshima, imprescindible nel so grau.

La esplanada... plaques y desplomes al empar

Na fastera de Bóvedas y paré Negra ficimos bastante trabayu, terminando los 7as de chorrera de la Bóveda alta y aparte de probar delles víes más dures como Chamón, nos llevamos nun finde de rises y fanatismu de váter, Disfruta Manguta (7a+) bloquera como ella sóla.

---------------------------------------------------------------------

Xunetu 2018

Como ya comenté na entrada de la fastera del Sobia, en Xunetu, tuviemos la selmanina de rigor trepando per Entragu, pero ensin tener demasiaes satisfacciones y muncho menos, éxitos por mor del gafu branu que tabemos sofriendo.

Prestosu cartelu nel aparcaderu d'Entragu

Asina que pente calores, tormentes, dies d'orbayu y parés moyaos fuimos faciendo lo que pudimos, anque hai que dicir, que nuna selmana entera, casi tuviemos los meyores momentos nel primer finde, onde mayormente trepamos en Entecampos, La Esplanada y el Río.

Vistes dende la Paré Negra

N'Entecampos, aparte de montar Ciudadano Terrorista, una vía que personalmente, quedábame mui grande, pude encadenar el primer llarguín de los Techos, un 6c preciosu y realmente pocu más, faciendo víes de calentar bien conocíes y pringando na parte final del Cantón de Manila, magar de 3 pegues, asina que tenemos una vía qu'hai que rematar nun futuru.

Delles trepaes en Paré Negra y Entecampos

Na Esplanada, dimos-y un par de peguinos pa enchufar Canal de Trea, enantes de qu'entrase de nuevo'l calorón y nun pudiéramos trepar más. Como non, cada día que tuviemos al sol pela mañana, colábemos pela tarde al seutor del Río, onde cuéstame enforma pillá-y el puntu por mor de la so roca poco sólida.

Kíla a su bola en Entecampos

Sicasí, sí que pudimos enchufar la 5 Estrellas, un 7a con un bloque de placa al entamu y llueu munchos metros de bon cantu, onde toca aguantar el tirón hasta la cadena. A lo postreru, sedría'l meyor encadene de la selmana y eso qu'esi día taba toltamente desmotiváu y casi tenía pensáu quedame a sobar nel pié de vía.

Guapu accesu al Covachón de Gradura

Nel río, tamién dexamos pendiente d'enchufar un 7a mui bloqueru a la manzorga, teniendo una primer parte podre de roca y un bloquín pa salir a cadena mui prestosu y físicu, con dos pinces romes como máximes protagonistes.

 Kíla esfrutando del paisaxe

Como nota positiva, más pol patéu que polos resultaos, quédome con conocer la Paré Negra, onde fice un 6b llargu preciosu y sobretou, con dir una mañana hasta'l Covachón de Gradura, onde pude probar un 7a míticu, anque taba totalmente reventáu del día anterior y nun fuí capaz de moveme siquiera.

Tornaremos a Teberga pa la seronda de xuru o eso esperamos, si la motivación y les lesiones permítenlo.

---------------------------------------------------------------------

Branu 2017

Si ya ficiera un adelantu, de los munchos díes que pasé per Teberga esti branu, cola entrada de la fastera de la Pena Sobia, pa la fastera de la Pena Gradura, dediquéme a conocer tolos seutores nos que'l mió nivel d'escalada ye a movese.

La verdá ye que tenemos un mundu calizu n'Asturies y en Teberga, en concretu, pa ser un referente mundial, pero muncho meyor que la xente diga, fai fríu, siempre ta lloviendo.... menos xente. Anque, los últimos años ya se va viendo dalgo de masificación nel aparcaderu, sobretou en Xunetu y Agostu.

En Bóvedas con un ambiente de rises y apretaes tremendu

Dicir, que nun too ye escaladores, hai ciclistes, btteros, montañeros, senderistes y autocaravanistes, que simplemente saben que l'abellugu nel aparcaderu ye'l más afayaizu de tolos del Estáu. Poro, xente, hai que ser xenerosos, que los baños y la duchina nun se llimpien solos.

No qu'al deporte refiérse, podemos entamar per un seutor que namoróme casi dende'l primer día: Entecampos. Esti paré, asitiáu a la manzorga de la foz de Valdezreizales, dixébrase en tres seutores: superior, mediu ya inferior.

Descansando na xubida a Bóvedas per Paré Negra

Nós tuviemos trepando nel mediu, destacando los encadenes de la Doble J (7a+), La Tijeruca (7a/+), Waikiki (6c) y Diábolo (6c+) y unos mui bonos pegues a Entetantos (7b/+) que queda como proyeutu de xubir grau.

Embaxo del seutor inferior d'Entecampos, tenemos la Esplanada y el Tunelín, onde alcuéntrense obres maestres de la placa. Nun pude meteme en graos curiosos, pero cayó dalguna plaquina mui prestosa como la Willy (6c) y la Woman del Callao (6b+/c).

Unes vegaes trepando nel Río

Dalgún día tuviemos tamién pel Eléctricu, anque ensín dengun encadene que destacar, namás quiciás un Verano Tebergano con munchos metros de bona caliza xuntando dos llargos mui prestosos. Igualmente, pasamos per Cabra Muerta destacando un 6c cortín como ye Grifa de Tarifa.

Y dende estos sectorinos, pasamos a ún de los requexos más guapos de Valdezreizales, como ye Bóvedas, cola so forma mítica del Grito de Munch. Equí axúntense tres cuevones onde les víes de chorrera son una delicia y pa los que nun mos canteamos tou un retu.

Otres descansando con Kílina

Al final, acabamos por pillá-y el puntu al asuntu y ficimos dos versiones curties de 6c de les dures víes Bombé Violent y Dragón de Comorr, a la que sumamos pal bolsiellu tamién la versión curtia tamién de la Forres que te corres (7a) al tercer pegue.

Tou esto na bóveda de la manzorga y na de la mandrecha abaxo, tuviemos trabayando tola fastera plaquera, na qu'enchufamos a vista tolo escalable pa mín, destacando el Patán (6b+) y Ladilla nel deseo (6c)... ablucantes ambes.

Faciendo dalgo pela esplanada

Per últimu, tuviemos nel seutor de "moda", de moda porque nel branu siempre se ta fresquín, y qu'acabará siendo un clásicu pero que necesita muncho rodaxe y munches escalaes, ya que la roca ta rotina, sobretou nes víes de la manzorga.

Namás que tuve un par de díes faciendo los dos víes más cencielles: Caminos Paralelos (6b+) y Holkus Polkus (6c) les dos a vista, pero con esi calter rotu costábame tener ganes de meteme en hestories más apretones.

La perdura vida nel aparcaderu d'Entragu

En resume, aparte de les visites obligaes de findes y puentes, reservaré siempre que pueda unos diez díes al añu p'apalancame nel aparcaderu d'Entragu en Teberga ya hinchame a facer víes, tomar birres cola collación d'escaladores y esfrutar del bon rollito teberganu.

Mil gracies a Carla Huélamo poles semeyes y tola xente que conocí nesos díes y que tanta motivación esguiladora gastaben, al igual que de tar de folixa tamién, jeje... una selmana nel cielu calizu.

-----------------------------------------------------------------------------
26 de Xunetu y 10 de Setiembre de 2016

Les ganes d'esguilar esti añu lleváronmos hasta Teberga en más d'una ocasión, pero bono, ciertamente tuviemos mui motivaos casi tol añu, colo que yera normal acabar nel conceyu más míticu pa la escalada deportiva.

Richar apretando nun 6a+ con una entrada perruna
 
Un día sueltu, que daben mediu malu pa toa Asturies, menos pa Teberga, decidimos tirar hasta Entragu col envís de comprobar si ye verdá qu'hai una especie de microclima nesa fastera asturiana y fué real dafechu.

Increyible llibrar el día cola ñube metida de la foz hacia Pruaza

Esi primer día, aguantónos la ñuve metida a la escontra de la foz de Valdezreizales, pudiendo trepar en Eléctrico, ensin mayores problemes tola tarde, esguilando dalguna vía más como Aroma a hierbabuena (6a+) o Camellos de Altura (V+).

La siguiente visita centróse nel alcuentru de bloqueros de Teberga, organizáu pel collaciu Orlando, pero como nun somos na bloqueros, fuimos a pasar el finde, tar de comedia y de pasu trepar con cuerda tanto'l sábadu como'l domingu.

Probando les plaques de la manzorga n'Eléctrico

El sábadu pela tarde metímonos de nuevu nel seutor Eléctricu, dempués de picar dalgo y tomar una cervecina, faciendo delles víes enchufando esta vegada ensin Verano Tebergano (6b+), que se me resistiera na anterior visita, saliendo cómodamente pel segundu llargu (6a+).

Día de sol y calor nel alcuentru Teberga Block

Llueu tocó pegase un bon ratu con Day al May (6c) sacando'l pasu, pero dempués de bregar tola mañana na Depuradora y bona parte de la tarde n'Eléctrico, ya nun dió pa más y decidimos dir a montar tranquilamente'l chiringuitu pa pasar la nueche de folixa.

-----------------------------------------------------------------------------
 
21 de Xunu y 1 d'Agostu de 2015

Nun suelo ser mui animosu pa colos llugares más mediáticos na escalada. Dame vergoña, soi tímidu y nun soi a concentrame n'escueles onde hai muncha xente esguilando, sobretou xente que trepa muncho y yo ando a lo mío... como siempre... a facer les víes más cencielles d'una escuela o seutor que seya nuevu pa mí.

Ye la mió forma d'escalar, de conocer la escuela... nunca faigo una vía de grau más altu, hasta que nun faigo les más cencielles. Nun tengo esi afán por apretar nel grau másimu míu, tengo la estraña motivación por conocer toles víes... seyan guapes o non... hasta que les encadeno y paso al siguiente nivel... como nun xuegu d'ordenador.

Aún así, dalgún día había que dir hasta Teberga, conceyu onde xunto a Quirós, alcuéntrase'l mayor númberu de seutores y víes del país. Pa ello, aprovechamos que yera la xuntanza d'escaladores de Teberga y col envís de conocer dalgún seutor y tamién l'ambiente que vívese ellí, fuimos hasta Entragu.

Amañosu paséu pela senda l'Osu hacia los seutores d'Esplanada, Tunelín...

A lo bestia, pudiéramos dixebrar en dos partes baxes los seutores más averaos al pueblu: la fastera de Pena Gradura y la de Pena Sobia. Más enriba, en Gradura tendríemos otru grupu de seutores en Marabiu y más enriba en Sobia, taríen los seutores de Sobrevil.la... en total cuatru zones diferenciaes.
Nestes visites centrámonos nel seutor Eléctrico na fastera baxa de Gradura, ya que tien graos asequibles y amás alcontrámonos con un pie de vía cómodu na que la solombra entra a partir del mediudía al tar en plena foz de Zreizales siempre cuerre un airín bien agradable hasta en branu.

El primer día que fuimos, en plena xuntanza, tuviemos faciendo Pau y yo, dalgunes víes demientres falábemos con xente qu'aportare dende milenta llugares del estáu. Había bon ambiente y fice Tres son multitud (6b) a vista, al igual qu'un par de quintos más, prestándonos muncho'l tipu d'escalada asemeyáu al L.lano en Quirós.

Fenomenal pie de vía en Eléctrico con vistes a Piedra Carcel

Tamién probé Jasón y los Argonautos (6b), con entrada mui bloquera a vía que desgasta un montón, sacándola casi a vista, pero la cagué na parte final a cadena, intentándola un par de vegaes pero sin fuercia tuve que dexala pa otru día.

Esi otru día, vino en compaña de Haritz, que lleva tol branu de collaciu d'escalada, menos mal, porque'l restu'l grupu anda dafechu desapaecíu y de Pau. Otru día soleyeru, encadenaré Jasón y los Argonautas como postre enanes de colar a tomar unes cerveces, ya que nun me dexaron la vía llibre hasta bien tarde.

Enantes, tuvieron escalando Pau y Haritz los quintos y probando en polea lo que diba faciendo. Entamé caleciendo deos nun V+ que nun ficiera'l dia anterior al qu'améstase un segundu llargu de 6b+ (Ojo Pocho), el cuál salió a vista prestándome pola vida facer una vía tan llarga.

Trepando nel primer llargu de Ojo Pocho (V+, 6b+)

Con tal calecer, llueu salió un 6a+/b a vista tamién, con un pasín mui finu y col comentáu 6b de Jasón del final, ya dexé d'escalar dedicándome a asegurar a Pau y Haritz que ficieron un día mui bonu d'escalaes tamién.

La verdá ye que diónos bon tastu esti seutorín y nun sé si ye por casualidá o que, a la baxada tamién teníemos folixa con carpa nel prau del aparcaderu d'Entragu. Paez ser que Teberga muévese y los escaladores son una fonte d'ambiente y recursos pal conceyu.

Deberíen deprender otros conceyos y ver como la llibre acampada bien xestionada atráe turismu, xenera bon ambiente al pueblu, aumenta'l númberu d'actividaes y too ello nun entornu ñatural preciosu... sobretou gracies el grupu montaña Aguja de Sobia que fai un llabor tremendu.

-----------------------------------------------------------------------------------------------------------------

No hay comentarios:

Publicar un comentario