9 Payares de 2024
Track: Teyeo (L.lena) - Monte Tixirúa - La Escrita - La Tesa - La Caviyera - Treslacruz
Ruta que tenía preparada dende va tiempu, ya que quería que'l grupu conociese la guapa foz de la Caviyera, que yo conociera baxando a fueu na Güeyinos del Diablu y que paecíame que paga la pena facela con calma y esfrutando de cada pasu. Sicasí, prestábame preparar una circular montañera y potente, poro púnxeme a investigar como ascender a la Tesa, de dalguna manera diferente, ya que la normal ficiéramosla cuantayá dende l'Alto'l Palo.
Como non, la poca info qu'algamé vino del blogue del collaciu Victor "Pindio" qu'anduviera a la recoyeta de nomes, na faldera de les canales que quería conocer. Poro, fícieme cola parte del track que servíame de referencia y tiré de "mapa y llapiceru" pa trazar la llínea a siguir peles pindies vallines que queríemos ascender.
Sábadu de madrugar, tomando'l cafetín en Mieres, onde dexamos coches pa dir na furgo hasta Teyeo, preparándonos nun día pelín frescu y húmedu nel entamu, saliendo a caleyar pocu más alantre les 9 la mañana, cruciando'l rigu Güerna pa salir hacia les cabañes de Rucao, entamando a calecer músculos y dándonos cuenta de la sudada qu'espéranos güei por mor de l'altísima humedá.
Siempre per pista, diramos ganando desnivel, algamando vistes hacia la fastera contraria del valle'l Güerna, distinguiéndo guapos montes como la Carba Valsecu o el Tapinón y Siegalabá, que ficiéramos en travesía va dellos años, casi nestes feches, daquella con ñeve na parte alta y esti añu escosu dafechu y sin pinta d'entamar l'iviernu nel intre.
Siguiremos camín alantre, tapeciéndose'l suelu del prestosu mantu de fueya serondiega, teniendo que dir sollerte pa nun meter la pata en dalguna llamarga escondía. Los nuesos pasos, son cada vez más guapos, superando dellos mayaos y cabañes pente la viesca, hasta aportar al Rebel.léu onde paramos un segundín a esfrutar de tan guapu llugar y cabaña, bien conservada pel momentu.
Siguiremos per pindios senderos, siempre intentando llibrar el barru,
hasta aportar a la fín a un claru, nel Mayéu Baxo, onde damos vista a
los ablucantes muros norte de la Tesa y a lo que ye más importante, a les
vallines peles que pretendemos ascender, faciéndonos una idega de lo muncho que nos queda por bregar.
Hasta equí, llevamos hora y cuartu de camín y dalgo más de 500 m de desnivel, poro echamos un tragu d'agua y ascendemos un pelín pel mayáu, ensin ver mui bien per onde continuar, hasta qu'atopamos un senderu a la mandrecha, cortáu per un árbol cayíu, que trespasamos, siguiendo dellos metros pel senderu, enantes de camudar el sentíu y volver ascender pela viesca a pinchu, pel tarrén más llimpiu que vamos alcontrando.
Pesie a lo pindio del tarrén, el monte Tixirúa va dexándose facer, siguiendo dalguna traza de senderu, que n'envueltes permítenos ganar desnivel y colo guapu del llugar, vamos tirando y tirando hasta salir de la viesca, plantándonos embaxo de les muries de la Tesa, onde somos a pescanciar un rastru de senderu que desciende hacia la faldera los muros.
Tamos plantaos embaxo de la Val.lina'l Seltu, pela que vamos a entamar a xubir, siguiendo'l rastru de senderu que baxa, faciendo dalgo menos de cien metros de desnivel, hasta que vemos que pudiera tener un embudu delles decenes metros penriba. Falámoslo y dedicimos nun arriesgar, saliéndonos a la mandrecha per rastru d'animales que llévenmos de nuevu al fayéu na so parte alta, pel qu'avanzaremos enantes de metenos n'otra vallina, nomada como Lo Ancho.
Una vegada que tamos fuera del fayéu de Tixirúa, toca tirar de pata y bastones, como poques vegaes, clavando éstos pa dar cada pasu ensin resbariar y metíendole muncha presión a les sueles de les botes. Pesie a lo vertical de les playes herboses, tamos encantaos polo guapo d'estes vallines que tamos conociendo, sudando y sufriendo per con una sorrisa na cara, demientres navegamos pela Val.lina Lo Ancho.
Nun momentu, vamos ascendiendo pel cantu pentes les dos vallines, pudiendo observar que l'embudu dende la parte alta, nun pintaba meyor, asi que cola decisión correuta de dir pa lo Ancho, continuamos pel cantu, topánodonos un tramu de peña más vertical, qu'amáblemente convídanos a salir a la vallina drecha, quiciás nel pasu más espuestu de l'ascensión, anque pudiérase ascender pel interior de la mesma vallina.
Llueu d'esti pasete vamos alcontrar una pequeña morra onde sentámonos a
descansar, hidratar y xintar daqué ya que'l desnivel que tamos
superando, ta pasando factura y los calambres pudiera facer actu
presencia. Ensin más continuaremos pelo Ancho, navegando un pelín na
parte final, hasta atopar a la nuesa mandrecha senderos de robezos, que
lleven bien tiempu observándonos, con pinta de nun tar mui avezaos a ello.
A la fin, saldremos per senderu de tierra, pente delles aguyes saliendo pela fastera norteste del Quentu Las Planas, pela que faldiaremos con muncho menos desnivel, hasta aportar a la Yana la Escrita, onde algamamos vistes hacia tola Val.lota y a los sos cumales (Magrera, Mesa, Penón de Vachalampo) y a lo que quédanos per delantre, col puntu más altu La Tesa hacia l'Oriente.
Esfrutando de llanear ya inclusu descender un pocu, vamos averándonos hacia'l cumal de la Tesa, cruciando dalgún montañeru más y viendo movimientu tamién pelos mayaos de Meruxales, dándonos a entender que l'ascensión pela foz de la Caviyera debe tar bastante de moda.
Nós, llueu de la bregada que llevábemos enriba, tan sólo tábemos pensando nel bocadillu, asina que tiramos ensin más miramientos hasta'l vértice de la Tesa, onde sentámonos cansaos, mudando la persudada camiseta o poniéndola a secar, lo que nun llevamos muda.
Los seles rayos de sol y una brisa refrescante, recíbenos con ciertu respetu, dexándonos xintar con calma, ya que los 1300 metros de desnivel direutos, en menos de 4 hores y 6 km de percorríu, dexa a les clares l'esfuerzu que ficimos y lo pindio de l'ascensión. El descansu de casi media horina yera más que merecíu y la tableta de turrón de chocolate pa cellebralo tamién.
Con ciertu dolor nes pates, vamos dir preparándonos antes de que nos pueda la galvana, ya que tenemos un llargu descensu per delantre. Ponemos les mochiles, enantes de qu'aporten más montañeros al cumal, llueu nel chigre enterámonos que yera Yonatán de los de las Claras y entamaremos descensu pela arista sureste.
La verdá ye que sacante de dalgún tramín onde baxar con más cuidáu, alcontramos traza de senderu tol tiempu, hasta'l Val.linón, onde creyemos qu'alcontraremos un senderu más curiosu p'algamar la parte baxa del enorme valle de los Meruxales. N'efeutu, vamos topar al final del Val.linón, en senderu que faciendo una llarga envuelta pembaxo d'una pena, déxanos na Carba La Mata, que n'otra envuelta ya empobínanos a la sienda a la vera la riega la Foz nos Yanicos.
Con esta rápida baxada, darréu toca esfrutar del espeutáculu y ye que
tenemos la suerte de descender la Caviyera, nun momentu increyible, con
bien d'agua en caún de los tabayones que vamos alcontrando y cola viesca
tapecía pela fueya y el mofu nes peñes, que dan un festín de collores
pa los nuesos güeyos.
Nin que dicir queda, que si corriendo a fueu nuna carrera de monte, paeciérame guapa la Caviyera, en plenu mes d'un Setiembre bien seco, esta vegada que pudimos baxar cola calma, parando en cada saltín d'agua, nel branu más lluviosu del que soi a alcordame nos últimos tiempos, la meyoría ye bultable.
Ensin más, siguiremos el descensu parando a comentar la guapísima ruta que tábemos faciendo, saliendo pocu a pocu de la Caviyera, p'adientranos nel enorme fayéu de Fornos, onde díbemos gayoleros removiendo coles nueses pisaes tola fueya, hasta qu'otru ser tuvo a bien remover más fueya nuna alloquecida baxada peles vallines que caen dende la fastera Este de la Tesa.
El sustu fue de reblagu y ye que non tolos díes, atópeste enmediu d'un camín y una osa baxa a fueu hacia'l to grupu, teniendo que salir por pates nun esprín, como poques vegaes ficiéramos dengún de los collacios. A lo postreru, charrando nel chigre de Sotiel.lo, comentáronmos qu'había tres oses enormes nesa fastera y que pudiera tener a los esbardos baxo'l camín y por eso baxó en mou proteición hacia nós.
Col subidón de la carrera, ficiéramos el restu del camín pente rises nervioses y dacuando echando un vistazu a la espalada, demientres salíemos del fayéu ya a caminos más transitaos, pasando peles cabañes de la Canal y la L.linar, enantenes d'emponinanos per bon camín hacia Treslacruz, onde ya tendríemos a vista el pueblu de Teyeo.
En resume, ruta que quedará na memoria de los participantes durante munchos años, ya que pueu dicir que fue de lo meyor que fice nos últimos tiempos, paeciéndome una circular imprescindible, mui montañera, con desnivel y llugares pocu frecuentaos, pero tamién col regalu final de la Caviyera, más transitada pero igualmente preciosa de conocer.
El pagu por conocer esta maraviyosa ruta, pues sedrán unos 13 km con +/- 1400 m de desnivel acumuláu, nun total de 6 hores y 40 min. Anque toca dicir que fuimos a mui bon ritmu pesie a ser un ascensu de puru monte astur, que repetiría mil vegaes, conociendo más canales y vallines d'esti pequeñu mundiu que ye la fastera norte del cordalín de la Val.lota.
No hay comentarios:
Publicar un comentario