Track: Caín (Valdión) - Arzón - Cabezas Altas - H.ou Grande - Torre La Celada - Mueñu
Dicía'l mayestru Rosendo, qu'a vegaes cuesta llegar al estribillu. Supongo, que pa los que describimos les nueses pequeñes aventures nos blogues pásenos lo mesmu. Pudiera dicir, qu'enxamás sufrí y esfruté tanto, como nesta ruta que vos presento y quiciábes por eso, cuéstame contala, porque hai dellos momentos que casi quieres quedártelos pa ti, pa dientro.
Siguíamos Ana y yo, nos nuesos particulares meses de fanatismu montañeru per Picos y si'l día anterior, saliéramos al monte porque tamos un puquín chiflaos, güei teníamos un día soleyeru, de los que nun tuvimos nin en Setiembre nin nos díes anteriores.
Tamos en Caín, preparaos pa salir y nun sé, si la semeya ye una amuesa de lo que teníemos per delantre, sentándonos pa salir como si nos fuera facer falta tar lo más descansaos posible. El casu, ye qu'arrancamos, a la fín, hacia la canal d'Arzón, idega que ya tenía pa la estaya de llegada a Colláu H.ermosu de Setiembre y que tornáranosla la meteo.
Partimos dende Caín (452 m) con tola ilusión
Esta vegada nun tenemos problemes y polo que vamos comprobando, pesie a la lluvia del día anterior, la yerba ta sequino, asína qu'averámonos hacia la canal d'Arzón, compartiendo los primeros pasos col accesu a la canal de Mueñu o col camín del Cares hacia Cordiñanes.
Al facer un par d'envueltes, pel PR del Cares, tendremos enseguida que desvianos hacia la entrada a la canal d'Arzón. Ye un momentu abegosu, porque podemos entrar por varies vires, más o menos complicaes, anque camiento que'l bon accesu ye bordiando pembaxo l'espolón que vien d'Arzón y entrándo-y pela manzorga.
Nós, como somos un pelín cabritinos, diónos por garrar un vires a la manzorga del barrancu que cae d'Arzón y entramos per un tarrén perpindio onde nun se puede fallar, ya que'l fogón ye curiosu, anque pa entrar en calor vino estupéndamente.
Entramos per pindiu tarrén hacia la canal d'Arzón
Como siempre, salimos a la canal y vemos per onde pudiera ser la entrada más sele, echándonos unes rises, pa relaxanos dempués y meter la reductora pa lo que nos quedaba per delantre, que nun ye otra cosa qu'una enorme canal de yerba llargo y pindia enforma.
Personalmente, llevaba munchísimu tiempu con ganes d'abordala y voi esfrutándola a tope, llevando un ritmín curiosu y sin problemes de catarru y muncho menos d'adherencia, non como la compañerina que forró dos vegaes y baxó esnalando pela yerba dellos metros.
Muertu risa, fuimos ganándo-y metros per onde meyor se va dexando, ya que nun hai res de senderu, hasta que na parte final asela un pelín, pa aportar a una collada onde acábense los casi 1000 metros de desnivel direutu dende Caín, algamando una de les meyores vistes del Cornión que podemos tener.
Durísima y pindia canal la d'Arzón... na que nos divertimos a esgaya
Dicir que nun ye mui encomendable de facer en moyáu, porque ye realmente dura y podemos aportar al colláu de 1355 m, totalmente fundíos del esfuerzu. Sólo, tar d'andar nestos tarrenes y llevar unes botes Salewa totalmente nidies de suela, a la escontra d'unos La Sportiva Trxnunsecuanto nuevinos, puede facer que llegues frescu como una llechuga o al menos eso pensaba, jaja.
Col nivel de repunancia másimu d'Ana y yo picándola poles patinaes que dió per Arzón, siguimos, magar de casi 3 hores d'ascensu, una llarga travesía penriba de la collada d'Arzón hacia la collada L'Armellán, alcontrándonos con un rebañu d'oveyes pel camín.
El castrón que taba al mandu les oveyes tuvo a bien atacar a Ana. Nunca viera dalgo así, ya que veníen detrás nuesa como si les pastoriásemos y cuando me doi la vuelta veo a Ana parando al castrón col palu na testera, lo dicho p'alloriar.
Facemos la travesía herbosa dende Arzón y entamamos l'ascensu a Cabezas Altas
Na collada L'Armellán, tendríamos la opción de facer travesía hacia la canal de Mueñu y facer el restu de l'ascensión hasta la puertas de Mueñu, pero esa nun yera la nuesa intención. Nós, queríemos conocer el pasu de las Cabezas Altas hacia la canal de Dobresengros, asina que saldremos con ganes pela manzorga d'un claru contrafuerte que cae dende'l cumal de la Bermeya.
Pudiera describir mil vistes, tolos cumales, canales y posibles rutes que pasen pela mió tiesta, pero nel intre sólo diba esfrutando a tope y Ana, ya tirando per tarrén más calizu, diba xubiendo como una titana, dándome a entender que quiciás apretara yo de más per Arzón.
El tarrén, amestáu de yerba, peña y piedra sueltina, va faciéndose duru pol desnivel y la falta de senderu y avanzo con ciertu cansanciu, camentando que l'efeutu del ibuprofenu va pasándose y entamo a toser con una frecuencia cada vegada más pequeña.
Aportaremos hasta los 1886 m de la Bermeya, llueu de sufrir durante dalgo más d'una hora, entre ataque de tós y ataque tós. Menos mal que les vistes hacia los grande Urrieles, relaxan y casi faen esnalar hacia ellos.
Magar d'alendar una migaya conoceremos el pasu de Cabezas Altas a Dobresengros
Tola llínea dende los Trabes, Dobresengros, Cabrones y la Torre Cerredu preséntase antes nós faciéndonos suañar con nueves aventures. Sicasí, pel momentu, tocaba conocer el pasu de Cabezas Altas, que nun ye otra cosa qu'una canalina escarnada totalmente, pela que baxaremos con curiáu de nun tiranos piedres ente nós.
Alcontrarémonos nel descensu con dellos parabolts, que supusimos úsense pa meter una cuerda guía nel Desafíu Caineh.u y que los corredores puedan baxar con seguridá, ya que damos alcordanza según baxamos, de la muerte non va munchos años d'un voluntariu y ye que nun ye pa menos polo roto del tarrén.
Descendemos hacia'l final de la canal de Dobresengros y voi meyorando en sensaciones per tarrén más llanu, algamando dempués, un bon ritmu hacia'l H.ou Grande pasando incluso en botes de monte y con mochila a unos trailruneros que veníen faciendo tola canal de Dobresengros.
Na Gargantada del H.ou Grande y al solete, pararemos a xintar daqué, magar de dalgo más de 5 hores de ruta. Equí, decidimos que cumales vamos atacar y pese a tener a tiru dalgunos más baxos como les torres de Pamparrosu, la Torrezuela o la de las Puertas de Mueñu, vamos decidinos peles cotes de la torre la Celada.
Fadremos l'ascensu pindiu pa salir del H.ou Grande hacia La Celada
Pa ello, bordiamos el H.ou Grande Baxeru pela so mandrecha y entraremos nuna amplia fastera d'empináu terracéu herbosu, que na parte superior camuda a calizu típicu de Picos, alcontrándonos llambries, torques y afilaes cuchielles de caliza peles qu'hai qu'andar sollerte pa nun tener dengún sustu.
Esti tramu faéseme pesadísimu, cuéstame trepar les llambries y los ataques de tós, tan al borde de faceme arroxar en delles ocasiones. La cara d'Ana ye d'esmolecimientu total y na mió tiesta, pasa la visión d'una baxada penosa per Mueñu abandonando l'ascensión a la Celada.
Con 6 hores y media de ruta, siéntome a mirar el GPS y calcular toles posibilidaes, ya que los miós ritmos nun tan siendo buenos, con paraes a toser continues. Ana siéntase conmigo, dizme que coma y que tome otru ibuprofenu a ver si meyoro dalgo... faigo casu totalmente derrotáu.
Ascendemos hacia'l colláu La Celada y bordiamos el primer cumal
Tamos cerquina de la collada la Celada, como mínimu tengo qu'intentalo, merecémonos esti día, llevamos saliendo xuntos con unes condiciones meteorolóxiques pergafes y güei tenemos un día d'espatarrar y toi nuna condición física pésima.
Salimos p'arriba y enantes d'una canalina rota, decido dexar la mochila, alcanzando nun par de trepaes l'accesu a la collada la Celada, onde alcontramos de frente'l nuesu oxetivu del día. La vista vásenos hacia ella, pero nun podemos dexar de mirar a tol Cornión y a les Peñes Cih.uentes col Frieru sobresaliendo.
Paez qu'anímome y entamamos a descender pa bordiar la fastera sur de la torre la Celada, intentando alcontrar un puntu feble per onde podé-y entrar. Dellos h.itos guíenmos, hacia una llambria fina, que trepamos con una sensación d'ascendela mediu n'adherencia y que ya veremos como baxamos per ella de nuevu.
Ascensu finu al cumal sur de la torre La Celada
Vamos comentando la xugada, pero col subidón que llevamos por metenos en zona de trepes, escaecemos esa baxada y siguimos hacia'l primer cumal Sur, non sin antes echar una güeyada per onde podríemos dir al más altu, el Norte.
Con munchu curiáu de nun mover bloques, metemos unes trepaduques hacia una h.orcadina que marca'l puntu, onde facer una vira aérea, pela mandrecha d'un bloque enorme. Con tientu, abordo'l pasu cola espalda mirando pal canalizu y encumaremos nel intre los 2450 m de la torre sur de la Celada.
Cume mínima Sur de la torre La Celada (2450 m)
Esti pequeñu y aéreu cumal, pon fin a los miós sufrimientos y véngome arriba felizmente. Tamos onde queremos tar y eso que sabemos que nos queden más de 2000 m de baxada a Caín de nuevu y lo lloñe que tenemos les cerveces de dempués.
Toca siguir camín, faciendo los destrepes y pasos llaterales con cuidadín aportando de nuevu al final del rotu canalizu, pa enantes de les llambries fines, salinos en travesía a la mandrecha, onde tendremos la referencia d'un h.itu colocáu de manera impecable.
Restolamos p'alcontrar l'accesu al cumal norte per una entretenida crestería
Dende equí, tendremos un faldéu per una llera y siguiremos camín hacia la crestina que tien de llevanos hacia'l cumal norte de la Celada. Como cambia'l monte y l'estáu d'una persona en cuestión de minutos, de sufrir a dir esfrutando al máximu.Tamién la química que furrula que nun veas, jaja.
Metémonos en plena arista, onde alcontraremos dellos pasos mirando pal vacíu n'ambos llaos, pero ensin mayor dificultá que nun tocar bloques sueltos y dir controlando cada pasu. Motivaos dafechu, darémonos un abrazu nos 2459 m del cumal más altu de la Torre La Celada.
Brutal l'ascensión al cumal cimeru de la Torre la Celada (2459 m)
Llevamos 7 hores y 50 minutos de ruta y 2450 m de desnivel positivu acumuláu y quédenmos menos de tres hores de lluz. Danos esactamente lo mesmu, tendremos de tirar de frontal, poro dámonos unos minutinos de tregua relaxada nuna torre completamente espectacular, con unes vistes increyibles y que supón una actividá guapísima.
Facía tiempu, que nun tenía tantes sensaciones distintes, pero toca baxar de la ñube y desfacer tol camín hacia la llambria que tantu respetu nos daba. Aportaremos a ella, metiéndome primeru a destrepar sacando un métodu en travesía que resultónos hasta cenciello.
Relaxaos, casi vamos corriendo hacia'l colláu la Celada y dende él, destrepar la canalina hasta la mió mochila y entamar a llambriear y navegar pente fondes torques, hasta tener nas Puertas, por primer vegada en tol día, tola canal del Mueñu enfrente nuesa... unos 1850 m de desnivel a descender, casi na.
Desfacemos tol camín p'aportar a la Puerta de Mueñu y entamar el descensu
9 hores de ruta nel llombu y 1850 m de desnivel por descender... mirámonos y a ello, comentando que va esmolecese por nós el pastor de les oveyes d'Arzón, col que tuviéramos falando animósamente enantes de salir y que sabía de les nueses intenciones... o al menos de parte d'elles, jeje.
Ciertamente, ún nun sabe de lo que ye capaz el so cuerpu hasta que póneste a esprimilu, asina que tirámonos abaxo, baxando con curiáu de las Puertas de Mueñu, siempre intentando siguir una traza nos canalizos a la mandrecha de la canal.
Alcordábame, que nesta parte cimera de la canal de Mueñu, xubiéramos pegadinos a los parés que cayen dende la torre de la puerta de Mueñu, poro fuimos descendiendo d'esti xeitu hasta aportar a una amplia terraza, que convídanos a facer una envuelta a la manzorga y baxar a l'amplísima fastera central de la canal.
Esfrutamos de les caberes lluces del día per Mueñu
Baxamos a bon ritmu, pero al empar vamos cero esmolecíos, intentando esfrutar cada pasu, cada nueva visión que la baxada de lluz, va amosándonos en forma de collores nos cumales que dexamos atrás y nos que tenemos enfrente nel Cornión.
Nun momentu, veo qu'Ana paez perder fuelle y paro a contá-y per onde éntrase a les Travieses del Llaz les cuales impresionáron-y cuando tábemos na Celada, pero pocu más alantre comenta que necesita parar pa meter combustible pal cuerpu.
Tengo que reconocer que tien tola razón, soi de beber y comer mui pocu nel monte, faciendo de les actividaes una cuestión de rapidez y resistencia. Menos mal que dalguien tien dos deos de frente nel equipu y anque la nueche ta echándosenos enriba, llevamos munchu bregáu como pa nun parar cincu minutinos y picar dalgo pal tramu final.
Una paradina pa xintar daqué y ... a correr de rises
Recuperaos una migayina, echo una güeyada al gps, marcándome casi 10 hores d'actividá y lo que ye pior, dizme que quédanos 1150 m por descender y tenemos menos d'una horina de lluz de xuru. Continuaremos navegando pela fastera central, más menos de h.itu en h.itu a la gueta del senderu qu'aporta hasta una fonte con bebederu, onde podríemos garrar agua si nos fuera necesariu.
Nun ye'l casu y con senderín per primer vegada, vamos dir garrando ritmu, munchu ritmu, hasta qu'ensin danos cuenta, echámonos una miradina a la cara y entamamos a baxar corriendo, nun se mui bien, si col envís d'intentar nun sacar los frontales siquiera.
Los minutos pasen y los metros de desnivel comémoslos como si nun costaren, baxando peles lleres esnalando, p'acortar envueltes del camín na parte más tendida de la canal. Dacuando, voi mirando p'atrás... y Ana va pegadina ensin perder nin ritmu nin aliendu... vaya titana pienso, jaja.
Tola canal con senderu pa correr como chiflaos
Col pasu los años y les carreres pel monte, vas garrando esa facilidá pa baxar corriendo pero lo d'esti día fué mui gordo, patinando en dalguna llera y llevantándome ensin parar, dempués d'arrastrar dellos metros p'abaxo, coles rises d'Anina que me la tenía guardada dende Arzón más menos jaja.
Cuando queremos danos cuenta, tamos al final de la canal del Mueñu y tovía somos a ver, al aportar a los Praos de Castro, onde ya decidimos entamar a caminar un pocu, pa nun paecer unos chiflaos al aportar a Caín, onde como non, taba esperándonos el pastor caineh.u pa entruganos tolo que ficiéramos, quedando ablucáu l'home... sois bravos dixera.
Nun sé si bravos o non, si inconscientes o non, pero al aportar a Caín, dímonos un abrazu porque xuntos, regalámonos un día de monte de los que siempre quedarán n'alcordanza. Les 11 hores y 15 min de ruta, con 1 hora raspiada de carrera alloquecía pa facer 1150 m de baxada antes de l'atapecer, fueron la guinda a 17 km de percorríu total con 2450 m d'ascensión y otros tantos de descensu.
Los datos sólo son datos, acaben por escaecese y superase dalgún día... les sensaciones y los recuerdos son pa siempre... gracies Ana.
Camudando'l Camín nel paraísu de los Urrieles
No hay comentarios:
Publicar un comentario