Track: Caín (Valdión) - H.errera - H.uracáu - Peña'l H.ultayu - Trea
Dempués del día de calecer pates pela Peña Remoña, como ya esperábemos según la info de la meteo, alborez con un día murniu enforma. D'esti xeitu, esperezamos y almorzamos nel requexín que nos preparen nel Albergue de Caín.
Les mios sensaciones el día anterior nun fueron les meyores, avisándome de nuevu'l xemelu, así que nun se mui bien que puedo esperar físicamente de la patuca. Lo que sí que tengo claro, ye que'l catarru nun ameyoró demasiáu, pesie a les melecines y col día que tenemos per delantre, nun va dir a meyor de xuru.
Da lo mesmu, a les 8 y cuartu aproximádamente tamos preparaos p'arrancar a caleyar y como ye vezu facémoslo garrando agua de la fonte'l Caineh.u. Baxo la vixilancia de Don Gregorio, atrevémonos a salir hacia'l barriu altu de Caín, col envís claru d'al menos facé-y conocer a Ana, tolo que podamos de la canal de la H.errera.
Partíemos de Caín (455 m) baxo una lluz pocu alendera
Va dellos años, ya baxara per ella nuna d'eses xornaes perllargues de les nueses traveseres de Picos, convirtiéndose nel final d'un ciclu pa un collaciu montañeru, al llegar a les mil a Xixón con una rapacina bien pequeñina al cargo de la so ma... Simón, alcordarase bien d'ello, jajaja tardó en tornar de monte'l probe.
Güei nun vamos con priesa y somos lo suficientemente gayasperos p'avanzar a la escontra'l vientu y la marea. Una marea en forma d'orbayu continuu, que malpenes déxanos aportar a l'entamu la canal la H.errera, ensin moyanos muncho, pa dempués de les envueltes pa llibrar el calce la riega, ya tener que parar baxo un paré poniendo un goretex que nun mos abandonaría en tol día.
Dempués de costanos un pelín alcontrar la sienda correuta, perpasaremos penriba'l tabayón de la riega y entraremos nun mundiu d'humedá y yerba llargo, que va facer les delicies de les nueses botes y pantalones, durante la llarga travesía que tien de llevanos decenes de metros penriba de la riega.
Facemos camín hacia l'entamu de la canal la H.errera
Hai que dir siempre atento, tanto al tarrén pel que nos movemos como a la posible perda del senderu penmediu de les viesques d'ablanos, que cada día más, va tapeciendo estos caminos. Ye la realidá de los Picos, la realidá del desaniciu ganaderu y poro del caltenimientu de les siendes que dende cuantayá lleven usándose nel pastoréu del Cares y que si l'escaezu xeneracional nun acaba con elles, quier facelu l'alministración, prohibiendo'l pasu per canales tan prestoses como la H.errera.
Nun sé lo que va deparanos el futuru a los montañeros d'Asturies, quiciás, amestá-y al toque d'aventura qu'alcontramos en conocer requexos qu'anguaño yeren el día a día de la vida en Picos, una posible sanción por saltanos les prohibiciones... nel mió casu, camiento que siguiré faciéndolo y si quieren multame que me vengan buscar penmediu d'una d'estes canales.
Nun acolumbramos más que negrén averándonos hacia'l Seu d'Oliseda
Magar d'un tramu más llanu onde la vexetación móyanos a esgalla, vamos viendo como los parés y les pindies riegues van zarrándonos el pasu, lo que significa qu'andamos mui cerquina ya de los sedos d'Oliseda, costándonos aportar al primeru d'ellos por mor de los ablanos tapeciendo'l camín.
A dicir verdá si nun fuera con Ana, nun me metería nestos fregaos con estes condiciones, pero vamos de rises, moyaos, pero de rises y esfrutando munchísimu de la ruta y de cualesquier plizcu d'esperanza que nos da'l día, con dalgún claru nel cielu, como los que veíamos penriba'l picu Cuvicente de xemes en cuando.
Alcuérdome bien, de Fernan y mía baxando al grupu con curiáu per estos sedos, en condiciones seques, asina qu'aportamos con ciertu tientu al entamu d'ellos, alcontrándonos nel primeru con un pasamanos nuevu prácticamente, que non usamos como non, paeciéndonos quiciás, una bona decisión si anímase más xente a venir per esta canal y les siendes caltiénense abiertes.
Salvamos los seos d'Oliseda con curiáu pa nun resbariar
Llueu siguiremos trepando, xixilantes a pisar curiosu y garrar preses moyaes ensin tirar, pasando a la parte alta del espolón onde non hai seguridá y anque'l tarrén paeza más cenciello, hai que tar sollerte porque un resbarión lleva una llarga cayida con fatal destín de xuru.
Baxo'l capuchón y el gorru de monte, achísbase una sorrisa de continuu, Ana ta esfrutando y yo más, enseñándo-y un pocu llugares que pude conocer gracies a grandes montañeros como Fernan. Ensin más, saldremos de los sedos y tendremos otru tramu llargu pegaos a delles muries baxes que tienen d'aportar al mayáu d'Oliseda, un pequeñu paré de color robrizu.
Pararemos un ratín pa picar daqué y tomar decisiones, aldericando sele y desdexando dellos planes A y B, quedándonos col C. Hai que ser sensatos y los planes A y B son de muncha aventura con final inciertu, poro tiramos del C, que ye xubir hacia'l H.uracáu, sabiendo que salida lo que ye salida tenemos.
Magar de desdexar planes A salimos pel mayáu d'Oliseda hacia'l H.uracáu
Tamos a menos de la metá de la ruta y nun paramos de caleyar baxo l'orbayu, anque por suerte, fríu nun tamos pasando. Lo que sí tenemos claro, ye que nun ta'l día pa forciar la máquina con pasos complexos, asína qu'aprovechando que'l nuesu optimismu ye insaciable, salimos d'Oliseda en direición contraria a la continuación de la canal la H.errera.
Sedrá un tramu breve, hasta alcontrar pasu, pa upanos, a traviés d'un pindiu canalizu herbosu, penriba d'un espolón que déxanos enfrente d'una llarguísima, resbariosa y pindia canal con salida pente los cumales del Cuvicente y de la Peña'l H.ultayu.
Abegosu l'avance y la navegación nestes condiciones baxo l'enorme H.uracáu
El día nun mos quier dar aliendu y tórnase más gafu, teniendo que navegar de terraza en terraza y fozar de pasu en pasu, fiándonos de les botes p'avanzar per estes playes de yerba moyao. L'únicu agasayu que tenemos, ye la visión d'esi arcu enorme que ye'l H.uracáu na paré del picu Cuvicente y tamién la confianza que gastamos l'unu nel otru, pudiendo ocupanos namái de los nuesos movimientos.
Por suerte, en toles hores d'ascensión que son muches, el xemelu nun se resiente y pueu tirar con xeitu, guiando per onde meyor voi viendo pa superar les terraces herboses y empobinándonos correutamente hacia la salida de la canal.
Tramu mui espuestu y pindiu saliendo hacia la h.orcada pente'l Cuvicente y la Peña'l H.ultayu
La salida sedrá per un final más pindiu y estrechu, perpasando dalguna terraza de peña y saliendo al final del embudu pela mandrecha pasando pente aguyes y espolones que cayen dende la Peña'l H.ultayu, hasta aportar a l'arista onde alcontramos restos de muria, sabiendo que salimos intautos, de munchos, munchos metros d'ascensión complexos.
Como dixe, nun me metería per estos tarrenes si nun confiara dafechu na compañerina, que como ye una titana, pues nun tengo que tar pendiente de si ye capaz de superar esti pasu o non, o si fíase de lo que ta pisando ya que va como un tiru y nun tien una rispia de dulda en tirar p'alantre.
Otra vegada ensin querer facemos cume na Peña'l H.ultayu (1939 m)
Una vegada más, alcontrámonos na Peña'l H.ultayu como'l primer día de los nuesos díes per Picos y ye que una vegada más, el cumal ye lo de menos, sinon como aportar a él y nesta ascensión, nun se puede tener un tarrén más pindio y prestoso al empar, eso sí, menos moyao, tamién diba paecénos bien, jeje.
Alcontrámonos a casi dos mil metros, totalmente pingando y esta vegada nun vamos durmir na Vega d'Ariu, colo que sacamos semeya de rigor y salimos pitando, apeteciéndo-y a la meteo ponese a llover más fuerte, de camín hacia'l colláu Les Cruces.
Facemos tola baxada pela canal baxo un orbayu intensu
Per delantre, una llarga baxada pela canal de Trea, pela que casi nun se dicir cuantes vegaes baxé, pero pensándolo bien, paezme que nunca l'ascendí. Cosiquines del monte que pasen y non porque nun seya de les canales más guapes que fice enxamás, sinon que ye que nun cuadró enllazar denguna ruta pa finar n'Ariu xubiendo Trea.
La baxada, ficiímosla seliquina, intentando nun forciar res, nun resbariar y sobretou nun pisar les milenta sacaveres que fuimos teniendo de collacies tol día. Cuando quiximos danos cuenta, ya tábemos destrepando na fonte'l Peyu y más alantre, saliendo a la manzorga pela viesca p'arribar al camín del Cares al altor de la ponte Bolín.
Con pocu más paséu baxo l'orpín pel Cares, una sorrisa na cara y munches ganes d'una duchina caliente, aportaremos a Caín nun de los díes más fanáticos de monte de mió vida, con unes condiciones permales, pero que ficiéronmos bregar y andar finos, p'algamar esta brutal ruta de 11,5 km y 1750 m de desnivel acumulaos tanto positivos como negativos nun total de 10 hores y 30 minutinos.
Camudando'l Camín esfrutando del mal tiempu
No hay comentarios:
Publicar un comentario