jueves, 17 de enero de 2019

H.uentedé (Llébana) - Peña Remoña - Tiru Pedabeh.u

10 Ochobre de 2018
 
Track: H.uentedé (Llébana) - Peña Remoña - Tiru Pedabeh.u


Dempués d'un mes, dende que ficiéramos la circular per Picos, teniendo como mayor protagonista a una meteo repunante enforma, Ana y yo tuviemos la suerte, de tener entá unos pocos díes más de vacaciones y decidimos dar una vuelta de tuerca so l'anterior aventurina per Picos.

Esta vegada, la idega yera tener un campu base dende'l que poder salir a metenos xataes y descubrir nuevos requexos de Picos, ensin tener que cargar con una mochila pa dellos díes que mermase les nueses capacidaes pa trepes y grandes desniveles.

Entamamos en H.uentedé nun día pelín raru de sol y ñubes amenazantes


De primer día, tuviemos en mente facer un calentamientu entreteníu, poro dempués d'un bon madrugón plantámonos en H.uentedé. Ya son delles vegaes les que salgo a facer monte dende l'aparcaderu de H.uentedé pero siempre alcuérdome de la primer vegada, n'ascensión a la Torre Las Coteras y quiciás tamién fízome ilusión cuando xubiéramos corriendo Kíla y yo hasta la Peña Vieya.

Esta vegada nun tiraríemos hacia'l Cable nin pel Hacheru nin pela H.enduda, sinon que fadríemos camín pelos Tornos de Lliordes ascendiendo la canal del Embudu, tal como ficiéramos n'ascensión a la torre Salinas, que lloñe de facésenos pesáu, danos pa dir charrando un pocu más si cabe y de pasu calecer pates.

Facemos la clásica ascensión pelos Tornos de Lliordes

Como ye vezu, siempre que voi cola cabritina d'Ana, nun soi a tar nes meyores condiciones, ya que dempués de la llesión nel xemelu, pasando pelos díes en Picos y la posterior xatada a la Cabra Blanca, esti paisanu que vos fala, camentó que ya taría recuperáu del too y entamó a entrenar pa volver a les carreres pel monte.

Sicasí, magar de 3 o 4 entrenos potentes, faciendo casi los meyores tiempos de siempre en percorríos que tengo pilotaos, el xemelu dixo basta de nuevu y dió sensaciones de frañase, aportando a esta nueva aventura en condiciones pocu favoretibles pa dase caña.

Na boquera de la canal del Embudu entamamos l'ascensu hacia Peña Remoña

Asina que plantámonos na boquera de la canal del Embudu a un ritmín tranquilu, con cuidadín pa que'l xemelu calezca sele y ya vemos que'l día nun diba tar tan soleyeru como plantegaba la meteo. Poro, toca abrigase pa nun llevar más allá, un catarrón que nun soi a quitar dende va bona y que nel día anterior a colar pa Picos, fízome poner la calefacción en casa, porque tiritiaba ensin parar demientres preparaba los tracks.

Ensin más, averámonos hacia la primer cota del día, que nun ye otra que la Peña Remoña, cota más oriental d'esti xerru que cierra la Vega de Lliordes pel Sur. Pa ello, ensin baxar a la vega, caleyamos travesando los restos de les mines de Lliordes col envís d'empobinanos per una clara canal, pa facer pocu dempués una envuelta que por tarrén amestáu tien de llevanos hacia la cumera del crestéu.

Trepamos nel crestéu hacia la Peña Remoña (2229 m)

Aportaremos a l'arista xusto pente'l cumal E de la Torre d'Alcaceru y el crestéu mediu descendente que nos lleva hacia la Peña Remoña. Ensin mayores dificultaes, salvo poner les manes en dalgún trepe qu'otru, avanzaremos gayoleramente hasta los 2229 m de la Peña Remoña.

Nun pueu falar de dificultaes, ya que nun soi atalantar dengún pasu reseñable pa la xente que ta d'andar por Picos y esto sedrá una costante en tol crestéu. Coles mesmes, esfrutando d'un día cuanto menos estrañu, nel que pocu a pocu les ñubes prietes van arrodiándonos con ciertu toque d'amenaza, desfacemos el camín hacia la torre d'Alcaceru Este de 2231 m.

Siguimos cordal alantre peles peñes d'Alcaceru (2751 m) y de Regaliz (2224 m)

Siguiremos pel evidente crestéu nun tramu más cenciellu si cabe, hasta aportar al cumal de la torre d'Alcaceru Oeste de 2750 m, la más alta de tol cordal. Equí darános por parar un puquiñín y nun podemos facer otra cosa que sacar semeyes pal cielu azul y blancu del sur y pa lo prieto de les ñubes qu'envuelven les cotes más altes del macizu central.

Nun de los trepes anteriores, tiraría d'adherencia de más y avisárame'l xemelu, asina qu'andaba cola mosca tres de la oreya, anque nun quise decí-y nada a Ana, ya que lo menos apetecíame nesti mundiu yera que se me fadiasen les siguiente rutes.

El día tórnase murniu y amenazante hacia Pedabeh.u

Siguimos controlando muncho la pisada y los trepes, pa dir faciendo camín dende los cumales de les Torres d'Alcaceru y les peñes de Regaliz. Nesti tramu, el crestéu córtase nun par d'amplios collaos onde topámonos con manaes de robezos, que tampoco ye qu'asústense muncho per venos per ellí.

Con pocu más esfuerzu, fadremos les dos cotes de les Peñes de Regaliz Este (2224 m) y Oeste (2200 m) y tocará descender per una amplia collada, enantes de facer l'ascensión final hasta los 2190 m del Tiru Pedabeh.u, onde tomaremos un pelín d'aliendu, anque la meteo convídanos a colar d'ellí cuanto antes.

Cume nel Tiru Pedabeh.u (2190 m)

Aldericamos un ratín, coincidiendo en que danos pena acabar el día ya, teniendo una sensación de sabenos a pocu tol crestéu, non por ello, siendo menos guapu de lo esperáu, pero sí que fízosenos un pelín curtiu y quiciás muncho más cenciellu de lo que teníemos na tiesta.

D'otra miente, con mirar na nuesa redolada pa les ñubes gafes que tapecen lo que pudiera ser una guapa continuidá a l'actividá, como ye la Torre Salinas, diz a les clares que meyor retirámonos sele y de pasu nun-y doi caña de más nel primer día, a mi desigüau xemelu.

Despedímonos de la vega Lliordes y baxaremos per Pedabeh.u hacia H.untedé

Despedímonos d'esti guapu crestéu y de la so cabera cota, el Tiru Pedabeh.u, pa descender per tarrén amestáu hacia'l norte y bordiando la xabaz paré SO de la torre, aportaremos al colláu onde seguimos pensando no guapo que sedría siguir pel guapu filu de l'arista Este de la Torre Salinas continuando hasta la Torre de Lliordes y volviendo atrás pelas Traviesas de Salinas.

El día nun lo quiso así y los planes que gastábemos pa los siguientes díes, tampoco encomendaba a facer escesos, asina qu'entamamos el descensu pela canal de Pedabeh.u hasta la mayada Remoña y dende ellí cola calma siguiremos per pista hasta H.uentedé.

Aportamos a H.uentedé de nuevu con ganes de más caña

Llueu de 8h y 45 min d'actividá disfrutona, quiciás a un ritmu más tranquilín dende que notara'l xemelu, aportamos a H.uentedé, con un total de 12,9 km de percorríu y un desnivel acumuláu positivu de 1470 m, que siendo sinceros súponos un pelín a pocu pero fue un calecimientu pa los posteriores díes casi perfeutu.

Darréu, quedábanos facer milenta paraes pa echar unes cervecines nel llarguísimu camín per carretera dende H.uentedé hasta Caín. Paez mentira, que baxando caleyando hacia Santa Marina, tuviéramos en Valdión en menos tiempu qu'en coche, pero como non, hai que facer dos puertos pa xunir Cantabria y Llión, cuando habilitando una pista pel Caben de Remoña, xuntaríense dos fasteres de población casi aisllaes entre sí.... coses de los parques y de los maldirexentes.

Camudando'l Camín nes Peñes Cih.uentes

No hay comentarios:

Publicar un comentario