Fayacaba (Bimenes) - Peñón d'Orosu - Peñamayor

9 d'Avientu de 2011

Track: Fayacaba (Bimenes) - Peñón d'Orosu - Peñamayor

Tamos a vienres y garré un día de vacaciones, ya qu'esti finde vamos facer la xuntanza asturvasca y tócanos preparala a los astures esti añu. Poro, garramos l'albergue de Fayacaba que ta nin más nin menos, que nel faldón de Peñamayor nel conceyu de Bimenes.

Como a Paula, tóca-y pringar el sábadu y domingu pela mañana y descansaba'l vienres, pedí vacas y nos fuímos hasta l'albergue pa facer una rutina corta, col envís de ver l'edificiu, calecelu y preparar les coses durante la tarde.

Delantre l'albergue de Fayacaba (778 ms)

Pa llegar a él, salimos de Llugones y tomamos l'autovía del Cantábricu hasta la salida de Nava, aportando a la capital sidrera al travíes de la N-634. D'equí garramos la As-251 que llévanos al conceyu de Bimenes, travesando los pueblos de Pozucorderu, La Puente y El Lloréu onde entramos nel conceyu yerbatu, pasando por Puentevega, Santuyano, Martimporra, Xenra y en Rozaes tomaremos la Bi-3.

Equí, toca tener paciencia, ya que tendremos 5 kms de curva y más curva hasta'l pueblu de Melendreros y pa ello travesaremos les siguientes pueblos: Piñera, Pedríu y La Envesná. De Melendreros tendremos al fin, la pista que durante dalgo más d'un kilómetru dexarános en Fayacaba.

Entamando a caleyar pela pista

Son les 12 menos cuartu de la mañana y hasta les 4 que quedamos pa recibir les llaves del albergue tenemos cuatru horines pa dar un paseín, asína que preparámonos nel coche con tranquilidá o non tanta, ya que va facénos una visitina una gocha de tamañu considerable que primeru urniónos y llueu escorriónos pa dientru'l coche, jajaja.

Asína que, con unes llárimes de risa, entamamos a caleyar pela pista, qu'en sele ascensu, parte de Fayacaba hasta les cabañes de Los Fograones, onde tendremos guapes vistes del pueblu de Melendreros a lo baxo.

Averándonos al ascensu al Peñón d'Orosu

El camín ta claru y la pista va empobinános a la campa de Peñamayor, arrodiando'l propiu picu, pero la nuesa intención ye dir hacia'l Peñón d'Orosu, el cual ta encumáu per una caseta. Pa ello, desviámonos de la pista per un camín que sal a la manzorga y dempués de travesar una llamarga como si xugásemos al cascayu, aportamos a unos praos onde vamos garrar una canal a la esquierda del paredón sur del peñón.

Xubiendo y trepando al peñón

Aportaremos con una bona sudada a l'arista del Peñón d'Orosu y como tamos animaos, trepamos per una paredina, anque podríase arrodiar pel norte, encaramándonos con pocu más de caleyar al llau del casetón de duldosa utilidá que forma parte d'esti cumal de 935 ms.

Nel Peñón d'Orosu (935 m)

Paez mentira, pero esta cume, tien nel so haber, unes mui prestoses vistes de la llanura central d'Asturies, repartía pelos conceyos de Uviéu, Siero, Nava,... así como de parte de la costa astur, y al igual que tol cordal de Peñamayor, una prestosa vista y pocu avezada del cordal del Sueve, amosando tola so anchura pente'l conceyu de Colunga y Parres.

Descendemos a la campa de Peñamayor

Menos de 45 minutinos de pasu relaxáu, fainos tar nesti cumal y darréu, cola fastera nortiza de Peñamayor de frente, vamos baxar pela vía normal de xubida a esti peñón hasta la Campa de Peñamayor, onde tornaremos a pisar la pista qu'agora en baxada empobinaríase hacia les Praeres.

Vamos bordiando Peñamayor pela pista con guapes cabañes

Ensín priesa, vamos dexándonos dir pela formigonada pista y siempre en baxada, pela zona de Llames Llagar, diremos viendo delles guapes cabañes, hasta aportar a un crucie embaxo'l Picu La Cota (picu que paez la corona d'un flaire), que va mandános pa Les Praeres o pa les cabañes d'Ortigosa.

Nel nuesu casu, vamos xubir hasta Ortigosa, onde entamaremos a ver bonísimes vistes de picos como'l Vizcares, la Llambria, la Peñe Crespa y el Cuetón de les Travieses, el Tiatordos o la reciente Peña Maciédome, quedándome cola forma ablucante del Cuetón de les Travieses dende esta fastera de Peñamayor.

Salímonos de la pista y xubimos desnivel cola vista nes cotes casines

Tamos na parte trasera de Peñamayor y ya vamos teniendo ganes de da-y preste a esti picu, que ya xubiera va unos cuantos añinos. Pa ello, tirando d'alcordances deberíamos xubir pela pista hasta Les Espines y d'ellí a Braniella, onde pente mediu de les viesques de texu y carrascu y praos, aportaríemos ensín mayores problemes hasta l'amiestu de caliza y prau que ye los altos de Peñamayor.

Pero por contra, nun tuve mui acertáu y separteme n'Ortigosa de la pista principal, garrando un camín qu'en xubida va aparar nuna cabaña. Asína que, dende equí, decidimos salir del camín y xubir a degüeyu, en munches envueltes, al traviés d'un tarrén semáu de cotolla baxa, pero que siempre darános posibilidá de llibrales, nun ascensu ensín descansu.

Xubiendo pela parte trasera de Peñamayor

En tornu a la cota mil, dexaremos esti ascensu a sacu y tendrémos una ayalga pa los güeyos magar del nuesu desaciertu inicial, ya qu'entraremos nuna viesca práuticamente virxen, que ta a los pies del picu Los Fayacones.

Como bien diz el so nome, nesti tramu de la ruta vamos alcontranos con unes fayones ablucantes, asína como con una pequeña llaguna. Nun hai sienda dalguna, en nengún momentu, asína que guiaos pol GPS, vamos dir al alcuentru de les cotes más altes del Picu Los Fayacones, dempués d'esfrutar de pisar la fueya cayío en suelu, y de pasar penriba y pembaxo de fayes centenaries.

Metémonos nesta ablucante viesca

A la fin, topáremonos cola caliza que da puntu más altu a Los Fayacones, y dende ellí, veremos al fin el cumal de Peñamayor y pente medies un fueyu con viesca pel que tendremos que pasar pa poder acometer la pequeña arista que nos dexará nel Picu Peñamayor.

Aportando al cumal del Picu Fayacones (1079 ms)

Llevamos dos horines faciendo pata y nel intre, tenemos a tiru l'oxetivu del día, poro nun perdemos tiempu y baxamos al fueyu del qu'enantes faláremos, alcontrándonos con dellos carrascos nel so mayor esplendor y con varios texos etiquetaos con plaquines metáliques, de les que supongo que será una forma de saber esáutamente cuantos sobreviven a la gafienta man humana.

Caleyando pente acebos bien guapos

Hai fame abonda, poro fadremos los caberos pasos per esti tarrén de yerba y caliza tan carauterística de los cumales asturianos y daremos preste, dempués de casi 2 hores y media de ruta, a la cota más alta del conceyu de Bimenes, el Picu Peñamayor de 1144 ms.

Caberos pasos al cumal de Peñamayor (vistes al cordal enteru y Ubina)

Si tuviera que responde-y a dalguien que m'entruga qu'au llevaría a una persona pa que s'enamore de la montaña asturiana, pues por dificultá y vistes, camiento qu'encomendaría-y a venir hasta Peñamayor o al Picu Mofrechu poles vistes de Picos. Si nun día espeyáu, nun-y presta la montaña, meyor dexalo, jeje.

Cume del Picu Peñamayor (1144 m)

El picu Peñamayor, pesi a que nun ye la cota más alta del cordal al que-y da nome siquiera, ye un perfeutu mirador de toda Asturies, por tar nel mesmu centru d'ella, y miremos pa onde miremos, acolumbraremos dende'l macizu d'Ubina a Picos d'Europa, o tolos montes d'Ayer, Casu, Ponga y como non, la llarguísima costa asturiana y sus cordales costeros (Sueve, Cueva Negra, Mofrechu, Benzúa, Cuera...)

Como'l día nun ta pa tirar voladores, ponémonos a refuxu'l vientu, detrás d'unes peñes y taremos un bon ratu xintando y descansando pa facer tiempu, hasta poder disponer del albergue de Fayacaba, del cual tan solo nos separten unos 350 ms de desnivel direutu dende la nuesa posición.

Paula baxando del Peñamayor

Pasaes les 2 y media de la tarde, ponémonos a baxar y pa ello, tirámonos hacia'l colláu que dixebra la peñona de Peñamayor de tol restu del cordal, col envís de restolar una xubida direuta pal domingu, ya que fadremos el picu un día más con tolos collacios vascos.

Dempués de casi una hora de rabilar en milenta canales que baxen, formaes pente delles aguxes y estribos de Peñamayor, teniendo inclusu dalgún destrepe y too, y de facer unes cuantes más envueltes, pente cotolles primeru y felechos dempués, topámonos con una sienda que paez arrodiar tol cordal de Peñamayor.

Tornando al albergue de Fayacaba

Garraremos esta sienda un ratín, hasta que vemos embaxo nuesa l'albergue y decidimos tirános abaxo per praos hasta llegar a ésti, unos venti minutos enantes de les 4, la cuenta pa mudános de ropa y ponénos dalgo más cómodos pa conocer tan guapu edificiu.

La verdá ye que la baxada fízose más pesada y abegosa per onde lo intentamos y a posteriori apoyaos nel coche y mirando de frente pal picu, paez ser que lo meyor será tirar a güevu p'arriba, porque nun paga la pena, averáse al colláu de nenguna manera.

En resumen, ruta cenciella y tranquila, na qu'en casi 4 hores vamos percorrer 6 kms arrodiando Peñamayor y conociendo como parte más prestosa d'ella la viesca de Los Fayacones, faciendo un desnivel acumuláu de 525 ms d'altor.

Con esto y unos frixuelos que nos zampamos pa cenar nel albergue.... hasta'l prósimu día...

Camudando'l Camín dende Peñamayor

Nesta rutina per tierres yerbates ficimos: Picu Peñamayor (1144 ms) que ye primer cota de Bimenes y el Peñón d'Orosu (935 ms) como cuarta cota yerbata.
Ver progresos en: Retos montañeros