viernes, 17 de junio de 2011

Maraña (Maraña - Llión) - Macizu del Mampodre Occidental

28 de Mayu de 2011

Track: Maraña (Maraña - Llión) - Macizu del Mampodre Occidental



Una vegada más, teníemos un desplazamientu llargu pa da-y preste a una ruta de montaña y nesti casu, los invitaos a que-yos pateásemos un pocu yeren los picos que formen el macizu del Mampodre. La ruta planteada por Carlos, yera conocer un pocu esti guapu macizu, perasemeyáu al macizu de Penaubina n'Asturies, y como quedábanos un pelín lloñe, decidimos garrar una casa rural y de pasu pasar un bon finde con montaña, escalada, turistéu, sidre, parrillada, final de champions, etc...

Nós, garramos una preciosa casa rural en Boca de Güerganu nel conceyu de Riañu, de nome Casar del Puente, a la cual vamos da-y un pocu de publicidá, porque ye comodísima, y ta nun sitiu perguapu, aparte de tener un preciu-calidá más qu'afayaizu.


En Maraña (1246 ms) col Mampodre glayándonos

De toes maneres, pa llegar dende'l nuesu puntu d'aniciu normal, Xixón, sería lo siguiente: Tomaríamos la As-I (autovía minera), hasta'l desvíu del corredor del Nalón, onde travesaríamos los conceyos de Llangréu, Samartín del Rei Aurelio, Llaviana y Sobrescobiu, pa meténos en Casu onde vamos xubir al Puertu Tarna, dempués de pasar polos pueblos de Tañes, Abantru, El Campu, Sotu, Bezanes, La Foz y Tarna.

No altu'l Puertu, garraremos la C-635, pasando pola Urbanización Monte Lluengos, La Vega'l Pinu y La Uña onde pocu más alantre, tendremos el desvíu que llévanos dafechu al pueblu de Maraña, onde tendremos bon sitiu p'aparar el coche y preparános pa la ruta.


Xubiendo hacia'l colláu de Maraña

Nós, dende Boca de Güerganu, tardamos una media horina, n'aportar a Maraña, y pasaes les 8 y media la mañana, ya tábemos dando-y al zapatu, peles cais de Maraña, agüeyando con ilusión les peñes que nos asperaben nel macizu del Mampodre.

La primera intención yera dir xubiendo al colláu de Maraña, así que salimos del pueblu, y xustu al altor de la paré de la peña Hoguera, vamos garrar un camín a la manzorga, que nos llevará paralelos primeru al ríu Maraña y llueu al arroyu Valverde.


Ablucante cara norte de la Polinosa (mandrecha) col valle Valverde

A dicir verdá, esa primer intención, de llegar al colláu Maraña, va facenos tener un averamientu llarguísimu hasta l'arista que dexaríanos en disposición de xubir al primer picu del día, la Polinosa.

Asína que travesaremos praos d'un verdor increyible, arrodiaremos dalgún cercáu y travesaremos el propiu arroyu Valverde, pa danos cuenta a la fin, que la Polinosa ye un picu, cuya cara norte asusta dafechu, y que nun ta nin siquiera mediu cerca del colláu Maraña, colo qu'escaeceremos tal colláu, y faldiaremos el picu que parte d'ésti,pola manzorga, cola intención de xubir al colláu Valverde, per una canal de yerba bien pindia.


Cumales de Ponga na xubida al Valverde

Demientres, tomamos esti nuevu rumbu, nun dexamos d'almirar, cotes ponguetes como les Peñes Ten y Pileñes, otres casines un pocu más al occidente ya inclusu d'Ayer. Tamién miramos pembaxo hacia'l mesmu valle Valverde, que vamos dexando adulces.


Ganando la cresta del Valverde

Llevamos casi dos hores y 5 kilómetros, cuando ganamos el crestéu que pasará pol colláu Valverde y pol picu de 1885 ms, col mesmu nome, nel qu'alcontramos una placa y muncho fierru colocáu pol grupu de montaña de Llaviana, va munchos años, quiciás demasiaos, y como siempre dixe, abonda ferralla tenemos nes ciudaes como pa llevala tamién pal monte.


Dura xubida a la Polinosa

D'esti cumal, empobinámonos a la fin, hacia la Polinosa, a la cual atacaremos dempués d'arrodiar un puquiñín esa cara norte, y alcontrarémonos con un ascensu pindiu y llargu que nos tendrá ocupaos durante una hora aproximáu.


Faciendo'l fatu na Polinosa (2161 ms)

A estes altures de la película, Carlos y yo, ya nos quedáramos atrás y non por nun poder llevar el ritmu de César y Pangua, sinon porque nun aguantábemos más les charres que llevaben dende que saliéramos de la casa rural, jaja. Hai que dicir, qu'entá nos quedaba lo meyor, y ye que nun tien preciu, tener a dos persones del grupu, falando con nomes de montañes pa cualquier tema,... alloriante dafechu.

Aún así, al llegar a los 2161 ms de la peña La Polinosa, nun-yos tiramos embaxo, y picamos dalgo xuntos pa continuar con tolo que mos quedaba por facer, que nel intre, ya paecíanos muncho, ya que tol macizu'l Mampodre, antoxábase percomplicáu.


Otros cumales del Mampodre baxando de la Polinosa

Aún así, vamos dir pasín a pasu, y lo primeru n'axenda yera baxar de la Polinosa, pela so vertiente sureste, la cual ye una arista de piedra descompuesto, que nun fai mui agradable l'avance hasta'l colláu Cervunal, llevándonos media hora la xera.

D'equí, dempués d'agüeyar los dos valles qu'ábrense ante nós, al norte'l de Valverde y al sur el de Murias, vamos entamar por xubir a la primer antecima que tenemos enfrente, el cual pudiera ser, el picu Cervunal de 2136 ms, pa baxar un pelín, y entamar otra ascensión a unu más altu, que ye'l Picu Valcerrao de 2166 ms.


Colláu Cervunal y Charly nel cumal del Valcerrao (2166 ms)

Menos de media hora, llevónos estes dos cimes, y ya tenemos nidiu, que metése a la fastera más oriental del Mampodre, diba ser una xera cansada y pelín fea, ya que p'aportar a les peñes del Mediodía, tendríemos enantes que facer la peña'l Convento y la Peña la Cruz, y desandar camín hasta'l Valcerrao de nuevu, col consiguiente desgaste físicu y mental. Aparte d'esto, Charly ta dalgo cansáu de pates, y nun vamos dexar a naide solu baxando hacia Maraña.



De camín a la peña'l Convento (Peñes del Mediodía, Valcerrao y Polinosa)

Asína que, magar de la baxada del Valcerrao, vamos averános a la Peña'l Convento, la cual paez tener dos cimes, con un pasu pelín aéreo entrambes, dando-y un puntín d'alegría. Tirámonos a ella, y Charly, prefier esperános a baxo y reservase pa la Cruz, qu'entá sigue mirándonos desafiante dende so cara sur.


Maraña dende la cume del Convento (2149 ms)

Otra media horina, necesitamos pa facer camín del Valcerrao al cumal del Convento y d'ésti a la so base de nuevu, onde espéranos Carlos. Al final, nel Convento alcontramos unos trepes y destrepes bien prestosos, pero'l pasu aéreu, nun yera tan fieru como paecía dende lloñe.


Mediodía soleyeru

Ensín más, cuando xuntámonos con Carlos, ya llevamos un total de 4 hores y 45 minutos, y tamos enfrente del picu más altu d'esti macizu, al cual dende cuantayá qu'intentamos pescanciar cuala ya la vía de xubida, ya que solo vemos peña y más peña.


Xubiendo a la Cruz

Finalmente, como casi siempre, una vegada que te metes nes entrañes de la paré, alcuentres siendes y pasos, que faen muncho más cenciello l'ascensu que lo que paecía. La verdá, ye que ye una peña bien guapa, y la so xubida de lo más entreteníu, con un percorríu con dalgún balconín y canalizu, nel que ties que poner manes, hasta ganar la guapa arista, que nos dexa nel vértice xeodésicu de 2194 ms.


Nel cumal de la Peña La Cruz (2194 ms)

Son casi les 2 de la tarde, y llevámonos dos grandísimes allegríes: la primera ye que vamos xintar los bocatas y la empanada que sobró de la cena na casa rural y la segunda ye que la baxada, pola fastera norte de la Cruz, ye perafayaiza, y podremos facer una d'eses rutes circulares que tanto mos presten.

Facía tiempu que nun tirábemos tantu tiempu nun cumal, pero ye que nun teníemos priesa, así que xintamos con tola tranquilidá del mundiu, y como nun facía casi fríu, a pesar de qu'entamáremos la ruta con un día soleyeru, y poquín a pocu cubriérase tol cielu, la temperatura yera agradable igualmente.


Arista norte de baxada de la Cruz

Tamos ya fartucos y descansaos, y va tocános aniciar la baxada. Ésta la fadremos, per una arista qu'en sentíu noroeste, va dexanos cómodamente, nun colláu, nel que garramos a la mandrecha la amplia canal, que contien l'arroyu la Fuentona.


Baxando hacia la canal de la Fuentona

Lo mesmu, que l'arista foi sele y relaxada, la canal, tuve un entamu cenciellu, pero foi poníendose más pindia, y difícil de siguir un camín correutu pente les calices afilaes, colo qu'hasta qu'aportamos a los praos averaos al ríu Maraña, pasó más d'una hora.

Finalmente, la baxada dende la Cruz, hasta'l pueblu de la Maraña llevónos dos hores y cuartu, faciendo un total de casi 8 hores de ruta, nos que caleyamos casi 14 kms y superamos un desnivel acumuláu de 1330 ms.


Dexamos lloñe'l macizu p'aportar a Maraña de nueu

Darréu, aportamos al coche, mudámonos de ropa, echamos unes cerveces pa cellebrar esta prestosa ruta, y tiramos pa la casa rural, onde teníemos por delantre, más sidra y cerveza nel xardín de la casa, una parrillada por preparar y una final de champions Barça-Manchester, pa despedir "al fin", la temporada futbolera.


Camudando'l Camín dende'l puntu más altu del Mampodre

1 comentario:

  1. Bonita ruta amigo,yo estuve pocas veces por el, pero siempre fueron muy productivas las rutas que hicimos.
    Es un macizo que se puede recorrer en el día.
    Un saludo

    ResponderEliminar