L'Azorera (Llangréu) - Xerra La Paranza

3 de Xunu de 2011

Track: L'Azorera (Llangréu) - Xerra La Paranza

Vienres con un día soleyeru como pocos... que meyor pa entamar l'horariu de branu nel trabayu, que salir a caleyar un ratín na fastera central d'Asturies. Nesti casu, siguimos col restole de vértices xeodésicos de Siero y ya de pasu, como píllanos na mesma xerra, vamos da-y tamién al puntu más altu de Noreña.

D'entamu tenía pensáu partir de dalgún pueblu de Siero, averáu a los túneles de Riañu, pero como tola falda sierense de la Paranza, ta n'obres por mor de los túneles, pasámonos al llau llangreanu pa dexar el coche nel pueblu de L'Azorera.

Pa ello, salimos del campu base de Llugones y tomamos la SI-2 col envís de garrar la As-17, al traviés de la cual travesaremos el conceyu de Siero hasta topános colos túneles de Riañu, onde entraremos nel primer túnel y enantes de garrar el segundu, saldrémonos a la mandrecha per una caleya hasta topános con un crucie, onde tomarémos el ramal esquierdo p'aportar al nuesu destín.

Saliendo del pueblu llangreanu de L'Azorera (393 ms)

Nós travesamos el pueblu y dexámos el coche xunto a un llavaderu, pa dempués de garrar les mochiles, entamar a caleyar primeru per carretera y dempués d'un par d'envueltes, per camín de tierra, pasando al llau d'una paré onde prautícase muncho'l búlder.

Siguiremos alantre, siempre en xubida, hasta un crucie onde meterémonos nun prau a la manzorga col envís de travesalu, y al final d'él, alcontraremos un senderu dalgo tapecíu qu'entre cotolles con más o menos ganes de pinchar, aportarános al nuesu primer finxu del día: La Peña'l Cadabal de 513 ms.

Vistes dende la Peña'l Cadabal (513 ms)

Paez mentira, qu'esta cume tan modesta, tenga unes vistes tan prestoses nun día espeyáu, y ye que podemos a les clares ver tola llanura de Siero y Llanera, Uviéu, cotes altes de Xixón (Samartín, Riosecu,...), Picu Fariu o la siempre presente Peñamayor pal oriente. Asína pues, yera un bon sitiu, pa garrar el bocata y xintalu con tranquilidá, ya que nun tuviera tiempu inda, dende salir del trabayu.

Peña Mayor siempre presente nel llanu astur

Dende equí, vamos baxar de nuevu, per un cotollal prestosísimu pa la escoyeta de dir en pantalón cortu, hasta aportar al camín qu'arrodia esta peña, y que nos dexará de nuevu na carretera que va dende l'Azorera al pueblu de Bobia. Tou esti tramu, será per carretera, y pertenez al Gr-105 que paez ser nómase ruta de les peregrinaciones, ya que va dende Uviéu a Cuadonga.

La Bobia

Llevamos una hora y cuartu caleyando cuando dexamos d'agüeyar una panerona en la Bobia, y siguimos carretera hacia'l conceyu de Noreña, y más en concretu a la estaya más pequeña d'esti conceyu tan especial que ta formáu por tres estensiones de tarrén, toes dientro del conceyu de Siero. Nel nuesu casu, vamos a meténos na parroquia de Santa Marina y más en concretu nel pueblu de La Pasera, onde xústamente tan los primeros indicios d'asentamientu nesti conceyu, como son los sos túmulos funerarios que daten del neolíticu.

Nel cumal más altu de Noreña, Peña L'Agua (537 ms)

Si tan per ehí esos túmulos?? pues nun lo se ya que dende'l nuesu pasiar dende La Pasera a les cases de Santu Medero, y d'esti últimu a la vuelta que-y damos a la Peña L'Agua, hasta dar col so cumal de 537 ms, nun hai más qu'un mar d'escayos.

Asína que, dempués d'una horina y 40 minutos tamos nel cumal de la Peña L'Agua nomáu tamién como picu Santu Medero, pola cercanía del llugar, y si hai que dicir dalgo guapu d'esta peña, ye'l gochín que tien como buzón de cumes, ya que la Peña'l Cadabal, tenía meyores vistes qu'ésta, la cual quiciás ta demasiáu tapecía pol picu Villa, superior n'altor, y con vistes direutes sol pueblu llangreanu del mesmu nome.

Dexando atrás Santu Medero en Noreña

La verdá ye que'l posible interés d'esta peñuca, sedría a lo meyor alcontrar esos túmulos funerarios que-y den mayor puxu al averamientu senderista per esti cachín de conceyu noreñense. Ensín más, sacamos la semeya de turnu y colamos hacia l'entamu de la ruta ensín alcontrar nenguna posibilidá de ruta circular, cola obligación de pasar de nuevu polos pueblos de la Pasera y Bobia, onde acortamos pela carretera que lleva direutos a L'Azorera.

Finalmente, caleyamos un pelín más de 2 hores y media faciendo unos 6,5 kms y superando unos 300 ms de desnivel acumuláu. Nun foi una gran ruta, pero pasamos la tarde y asoleyamos más de lo debíu casi, pa facer estes dos cotes que ya con esto alón.

Camudando'l Camín dende la Peña'l Cadabal

Nesta ruta ficimos la mayor cota del conceyu de Noreña: Peña L'Agua (537 ms) y el vértice xeodésicu de Siero: Peña'l Cadabal (513 ms)

Ver progresos en: Retos montañeros