miércoles, 11 de mayo de 2011

Tueya (Xixón) - Picu'l Sol - Picu Samartín - El Xigal

19 d'Abril de 2011

Track: Tueya (Xixón) - Picu'l Sol - Picu Samartín - El Xigal



Ruta pelín desastre no que cinca al desendolcu d'un itinerariu prestosu ya atrautivu, anque no que foi l'algame d'oxetivos fuera correutu dafechu. De toes formes, paga la pena xubila ya intentar desplicala anque ya de primeres digo que'l track colgáu nun ye mui afayaizu pa siguilu, así que como muncho usá-ylo como referencia namái.

Partiríamos del pueblu de Tueya na parroquia xixonesa de Llavandera, dexando'l coche vien cerquina del Llagar de Trabanco. P'aportar a Tueya, salimos del centru Xixón, en direición al Llano y d'ellí a Contrueces, onde garraremos la As-248 qu'en direición a la Pola Siero, fadrános pasar poles parroquies de Granda ( y sus pueblos Granda de Baxo y Riba), Vega ( y sus pueblos Vega de Riba y Baxo) y finalmente Caldones, onde pasaremos por Villares y cuando veamos un desvíu que ponga Llavandera, dempués d'una parada de bus, saldrémonos pa tomar una carretera llocal.


Entamando a caleyar dende Tueya na parroquia de Llavandera (160 ms)

Nesta carretera siempre en xubida, va facenos pasar pol pueblu de Llinares onde ta'l Llagar de Canal (ún de les sidres que más me presten) pa siguir siempre pela caleya principal hasta dar nun crucie nel pueblu de Tueya, onde a la fín dexaremos el coche aparcáu y prepararémonos pa caleyar un bon ratu.

Namái que damos el primer pasu, ya sáltanme les duldes, ya que nun tenía pensáu xubir al Picu'l Sol, pero alcontrame'l cartelu de frente, fízome camentar como bona esa alternativa, y pusímonos a caleyar pela carretera hacia'l Picu'l Sol.


Xubiendo al Picu'l Sol

Al entamu ye too caleyu asfaltáu, hasta qu'al kilómetru y mediu, topámonos con una pista tierra que dará xubida ya, hacia la pista formigonada y mui pindia que va llevanos a ver primeru les antenes del Picu'l Sol, y pocu dempués a facer los 440 ms d'altor que tien, magar de media horina de camín.


Picu Samartín dende'l Picu'l Sol (440 ms)

Dende'l Picu'l Sol, aparte de ver too Xixón al norte, podremos agüeyar la siguiente cota a dar preste al sur, el Picu Samartín, coronáu per un montón d'antenes tamién. Ensín más, tornamos so los nuesos pasos, pa baxar polos Llagos en direición al Monte, colláu que pónenos en disposición de tomar la xubida per pista de tierra al picu Samartín.


Dexando atrás el picu'l Sol nel averamientu al Samartín

Fadremos la pista selemente, agradecíos de dexar l'asfaltu y el formigón por un ratín, hasta qu'aportamos a un crucie onde un camín sigui alantre arrodiando'l picu Samartín y metiéndose dafechu nel conceyu de Siero, otru pocu más alantre baxará a la mandrecha hacia l'Altu la Madera y otru xubirá hacia'l picu Samartín, pero ta torgáu per una valla.

Esta última escoyeta, sedría la que yo fadría si fuese de nueu per estes fasteres, pero non fue asína y dimos tola vuelta al picu a la gueta d'un camín meyor y finamos saltando dos valles envede una, jeje, y sumándo-y a la ruta unos 45 minutos tranquilamente.


Nel vértice xeodésicu del Picu Samartín (517 ms)

Dos hores dempués, dende que partiéramos de Tueya tamos nel primer finxu tachable de la ruta, el Picu Samartín de 517 ms, y como tamos nun tarrén vedáu polo que paez, con tanta portiella torgando'l pasu, tócanos colar d'ellí lo más rápidu posible y siguir camín alantre hacia'l Monte d'El Xigal.

Nun vos penséis que ye más fácil andar polos conceyos poco montañosos que por picos d'Europa, jaja. A vegaes, hai que trepar valles, saltar sebes d'artos, agacháse pembaxo d'allambre d'espinu o lleváse un trallazu d'un pastor llétricu, jeje. Too esto y más pues alcontrar a la "gueta del vértice perdíu", jeje.


Empobinándonos al monte d'El Xigal

Nós, ficímos práuticamente tou eso, pa salir d'esti cumal de la parroquia de Samartín de Güerces en direición Este, hasta qu'algamamos la carretera que vien de los pueblos de Siero de Les Fontes a El Monte, llugar onde garramos de nueu bon camín.

D'equí siempre diremos per carretera pasando peles cases de Les Cabañes cola vista puesta nel picu que tenemos enfrentu nuesa y que nun ye otru que'l picu La Carbonera, cima más alta d'El Xigal, pero que nun pertenez a Xixón, polo que la cota nuesa será la más al Norte.


Fariu y Cerru Gaviu con Valdornón y Siero dende El Xigal (562 ms)

P'arribala, nós xustu enantes d'una casa, vamos cruciar una pequeña portiella, y per onde meyor se vea, xúbese per un prau primeru y llueu pente siendes, ente cotolles, hasta dar col cumal peláu d'El Xigal de 562 ms.

A estes altures (6 y cuartu de la tarde) ya entamaba l'amenaza de la lluvia, y el total de tiempu camináu ya sumaba más de 3 hores, así qu'envede baxar al sur hacia'l Rebollal en Siero, pa garrar camín hacia Cadianes en Xixón, decidimos tirar direutos hacia Cadianes, na parroquia de Fano.


Baxando d'El Xigal hacia Cadianes

Esta baxada será a güevu faciendo envueltes pel monte peláu, hasta topános con un senderu qu'en direición norte métenos más na vexetación, y que baxará hasta un prau, pel que salimos dempués d'abrir una portiella, col envís de garrar delantre d'una casa, una pista de tierra.


El Xigal dende Cadianes

D'esta pista, ya con orbayu cansinu cayéndonos penriba, vamos baxar en varies envueltes hasta travesar l'arroyu Carbonero, onde garraremos carretera en la Bovia y sumósenos al paséu un setter preciosu y mui activu qu'andaba aburríu por cerca de la so casa.


Aportando de nueu a la parroquia de Llavandera

De la Bovia, siguiremos pela carretera hasta un crucie, pocu dempués de les Matuques, onde garramos el ramal de la manzorga, que ya en baxada primeru hasta cruciar l'arroyu les Pedraces y llueu'l de la Fonte los Berros, va facenos entamar la xubida final, pente los llagares de Trabanco, hacia'l nuesu destín, Tueya, onde dexáremos el coche va más de 5 hores.

A la fín, con unos 15 kms andaos, sol papel, ya que na rialidá, con tolos erros nel camín, fadríamos 20 kms, fícimos esos tres cumales de Xixón, en dalgo más de 5 hores y superando un desnivel positivu acumuláu de 600 ms.


Camudando'l Camín nel Xixón más sidreru

Nesta ruta dimos preste a la tercera cota xixonesa: Monte d'El Xigal (562 ms) y al Picu Samartín (517 ms): cuarta cota de Xixón y vértice xeodésicu

Ver progresos en: Retos montañeros

No hay comentarios:

Publicar un comentario en la entrada