viernes, 6 de mayo de 2011

L'Acebal (Samartín del Rei Aurelio) - Cordales de Llorinte y Casures

16 d'Abril de 2011

Track: L'Acebal (Samartín del Rei Aurelio) - Cordales de Llorinte y Casures



Otru "capítulu" más d'a la gueta del vértice perdíu y más en concretu, díbemos tirarnos a pola última cota más alta del conceyu de Siero que me quedaba nel llibretu de tachar. Asína que, tuve restolando pente los mapes y la forma más prestosa de conocela sería empatar los cordales de Llorinte y Casures dende'l pueblu samartiniegu de L'Acebal.

Poro, dende'l campu base de Llugones, tomaríemos la SI-2 col envís de garrar la As-17, al traviés de la cual travesaremos el conceyu de Siero hasta topános colos túneles de Riañu, onde entraremos nel conceyu de Llangréu, pa xuntanos col corredor del Nalón, hasta tomar la salida de L'Entregu (Samartín del Rei Aurelio) onde desayunaremos un cafetín con daqué dulciayu.



Partimos de L'Acebal (439 ms)

De L'Entregu, deberemos travesar el Nalón nuna ponte, pa tomar la SM-4, na cual siempre n'ascensu, fadrános pasar pelos pueblos de La Revenga, Llantero y El Colláu, enantes d'aportar al nuesu puntu de salida: L'Acebal.

Ponémonos les botes, garramos los palos y sacamos la semeya de salida, y a les 9 en puntu de la mañana ya tamos dando pasu pola carretera, travesando primeru L'Acebal y más tarde los Fornos, a la gueta del desvíu de la Teyerina, onde dexaremos l'asfaltu, pa meténos nun camín de tierra, que faínos calecer pates demientres nos empobinamos hacia'l Picu'l Mayáu Solís, primer finxu del día.


Xubiendo hacia'l Mayáu Solís

Sacante, de dalgún perru curiosu, esti tramu ye pocu más qu'una pista pindia, na que por suerte la última parte ta recién abierta pel mediu d'una viesca, poro nun tuviemos mayor problema p'aportar a un crucie, no alto del Mayáu Solís. D'esti crucie vamos a la manzorga, col envís de facer el vértice xeodésicu d'El Picu'l Mayáu Solís de 635 ms, pero ta dientru d'un restaurante y con ello, zarráu per una portiella grande.


Agüeyando'l vértice del Mayáu Solís (635 ms)

Nun hai que dicir, que la moza nun me dexó coláme nel restaurante pa marcálu dafechu, pero la cantidá de perros y un coche dientro, nun lo facía mui encomendable. Ensín más, retírome musgu, anque doi por fechu'l vértice, ya que tampoco tenía un interés supremu xubíme a una llomba d'un restaurante.

Pocu más de media hora, tardamos en facer esti vértice, y nun perdíemos más tiempu, tornando so los nuesos pasos, pa pasar pol crucie, y esta vegada tiramos de frente, pa por pista de tierra cómoda dir conociendo les mayores cotes del Cordal de Llorinte.


Dexando'l Mayáu Solís atrás mientres vemos al Sur el Retriñón, Crespón y Peña Mea pente les ñubes

Caleyaremos pelos altos selemente, agüeyando al Norte, el pueblu de Tiuya embaxo y la llanura de Siero, y al Sur estremarémos pente les ñubes cotes tan guapes, como'l Retriñón, la xerra'l Crespón y Peña Mea.


Hacia'l Cordal de Casures dende'l de Llorinte

Dempués de dexar la Plana'l Cordal, onde tuviemos tales vistes, vamos xubir un pocu hasta la cota másima del cordal, que nun ye otra que la Campa los Llobos (682 ms). A partir d'equí, vamos abandonar el conceyu de Samartín y el propiu cordal nuna baxada que n'envueltes averarános a les cases d'El Monte primeru y a la Braña'l Río dempués nel conceyu de Llangréu.

Tamos otra vegada, nuna cota perbaxa (460 ms), y tenemos per delantre unos cuantos metros d'altor a recuperar. Pa ello, vamos dexar les cases de la Braña'l Río embaxo, y xubiremos per pista de formigón, pa llueu baxar per sienda hasta otru camín, que nos dexará na primer sorpresa del día, la Llaguna la Braña'l Río.


Llaguna de la Braña'l Río y la Campa los Llobos a lo lloñe

Como bien dixe, la conocencia de tolos conceyos asturianos poquín a pocu, faite descubrir llugares que nin en suaños, albidrabes qu'esistiesen. La verdá ye qu'esta llaguna ye bien guapa, poro percorrimos selemente'l camín que va a la so vera, y tornamos de nuevu a tastiar l'asfaltu de la carretera baxo los nuesos pies.

Nesti tramín que tenemos de carretera, siempre n'ascensu, vamos dir arrodiando'l Picu d'El Ciacal, pela so base, pero tamién metéremos un pocu nel pueblu d'El Ciacal nel nuesu caleyar y pocu más arriba, veremos que sal una pista a la mandrecha, que métese hacia'l picu.


Comandante Che Guevara nel pueblu d'El Ciacal (Llangréu)

Nel intre, metémonos nella, y atoparémonos con otru agasayu pa la vista, sobretou si yes un pelín d'esquierdes nes tos idegues. Como non, ya metíos nel conceyu de Siero, alcontrarémonos con una escultura en madera del mesmísimu Comandante Che Guevara. Hasta Siempre Comandante!!!

Paez mentira, pero amás de sacános unes semeyes con él, amosónos el camín de xubida al picu, ya qu'hasta'l momentu dellos intentos fueren en baldre al traviés de caleyes dende'l pueblu o la carretera. Asína que, garramos un senderu que sal direutu hacia'l vértice xeodésicu del Picu d'El Ciacal de (665 ms).


Vértices del Picu d'El Ciacal (665 ms) y de La Rina (699 ms)

Llevamos 2 hores y 20 minutinos, y en pocu más de 10 minutos vamos pasar del Conceyu de Siero, al de Llangréu, llueu al de Samartín y de nueu a Siero, onde topámonos col vértice xeodésicu de La Rina (699 ms), onde tenemos una prestosa vista del cordal de Peñamayor al completu.


Cordal de Peñamayor

Magar de tener fechos los dos vértices del Cordal de Casures, picamos dalgo y echamos un traguín d'augua, pa empobinanos nuna baxada de nueu hacia'l pueblu de L'Acebal. Pa ello, entamamos a caleyar per pista hacia L'Altu Casures pa llueu pasar polos Fontanes dexando a la manzorga'l picu Llamadera hasta llegar al colláu pente esti últimu y el picu Cimiru onde agüéyase bien unes pequeñes llagunes averaes a les cases de La Correoria.

Vamos siguir per pista, arrodiando'l Cimiru, y como nun alcontramos una sienda que supuéstamente baxaba a l'Argustín y d'ellí a Villacedré, siguimos en xubida ya nel cordal de Llorinte de nueu, hasta aportar a los Picos Xuetos (681 ms), onde entamaremos una baxada hacia ún de los llugares más guapos de tola ruta.


Campa de la Correoria y Llagunes de L'Argustín

Esti llugar alcontrámoslu pente'l picu Argustín y la Campa los Llobos, y n'él tenemos unes cuantes llagunes perguapes, que van servinos p'atopar un baxada afayaiza, ensín tener que tornar al mesmu camín de xubida dende L'Acebal.

Esto ye porque, si nos averamos hasta la llaguna más fonda y guapa y siguimos el so cursu ñatural de perda d'augua, vamos poder siguir una senduca casi tapecía en baxada, que con un pocu de tientu a la hora d'escoyer nos crucies, va llevanos al traviés d'una viesca preciosa hasta la parte alta del pueblu de Villacedré.


Sienda tapecía de les Llagunes de L'Argustín a Villacedré

Son d'estes caxigalines que solo pues alcontrales, si-y eches paciencia y faes prebes sobre mapes y sobretou nel propiu tarrén, anque la mayor de les vegaes tengas que tornar so los pasos. Nesti casu, tuviemos suerte y pudimos esfrutar d'un mui prestosu senderu que dexónos nes Llaneces, viendo a la nuesa esquierda la ilesia de Villacedré, y más tarde na carretera.


Finando la sienda en Villacedré pa tomar la carretera a L'Acebal

A la fín, de la carretera ya caleyaremos un pocu en xubida, hasta arribar de nueu al pueblu de L'Acebal dempués d'unes 5 hores, nos que ficimos 17 kms y superamos un desnivel acumuláu de 500 ms y faciendo en definitiva un mui prestosa ruta, qu'encomiendo encarecídamente, pa ver si ente toos nun se pierde del tou la sienda dende los llagos d'Argustín a Villacedré.


Camudando'l Camín dende la Rina

Nesta ruta dimos preste a 3 vértices xeodésicos: Picu'l Mayáu Solís (635 ms) de Llangréu, Picu d'El Ciacal (665 ms) de Siero y La Rina (699 ms): vértice xeodésicu de Llangréu y tercera cota de Siero

Ver progresos en: Retos montañeros

2 comentarios:

  1. Kaixo Berto!!!!!
    Que envidia me das viendote ir al monte con tu "mocina"....quien pudiera.
    Espero que te vaya todo bien.
    Ikusi arte lagun.

    ResponderEliminar
  2. Que pasa Iván!!!

    A ver si te sueltan un pocu, y te vienes p'Asturies que tenemos muncho trabayu por facer, jajaja.

    Como vas pal Urriellu, preparáu??

    Un abrazu

    ResponderEliminar