Taxa (Teberga) - La Berza - Picurredondu

19 de Marzu de 2016

Track: Taxa (Teberga) - La Berza - Picurredondu

Siguimos con rutes alternatives al plan de calendariu pa esti añu y los nuesos pasos tienen de llevanos a conocer un par de cotes nomaes por dos motivos: la primera ye'l Picu La Berza que ye puntu más altu de Grau y la segunda ye'l Picurredondu, monte guapu astur y vértice xeodésicu de Teberga.

Poro, saldremos de Xixón pel camín davezu hacia'l valle del Trubia, primeru pela autovía Y griega, garrando n'Uviéu l'autovía que va pa la Espina, saliéndonos nel desvíu hacia'l Trubia, travesando los conceyos de Santu Adrianu y Proaza, siendo nel pueblu de Caranga Baxu, onde tomamos direición a Teberga entrando n'él pol pueblu d'Entragu, hasta parar na capital tebergana de La Plaza.

Grupu reducíu en Taxa, guapu y altu pueblu (972 m)

Oles (Villaviciosa)

17 de Marzu de 2016

Pues magar de mercar una colcho pa poder blocar a mi puta bola, siempre que quisiese ensin depender de naide pa da-y a la cuerda, tocaba probala y vinímonos arriba pesie que tovía nun camudaron la hora pa tener más hores de lluz.

El casu ye que Alberto y yo, plantámonos n'Oles nel conceyu de Villaviciosa, col envís de probar dalguno de los bloques qu'hai nel cantil. Ellí, quedáramos cola familia Astuwaterman, que ya llevaben un bon ratu per ellí.

Baxando a lo Bob Esponja hacia'l cantil d'Oles

Nós, tardamos tanto n'alcontrar el senderu de baxada correutu, que perderíemos casi un hora dando vueltes pente les cases "illegales", baxando y xubiendo per tolos senderos qu'alcontrábemos. Al final, el bono yera saltando una pequeña portiella que zarra un prau con un burrín y un caballu y travesando un enorme argayu hasta'l cantil.

Blocando con nocturnidá y alevosía

Pa cuando aportamos a les peñes, tuviemos el tiempu xustu pa blocar un pocu nuna peña por turnos, probando la colcho un ratín y con pocu más fízose de nueche y tuviemos que tirar p'arriba. Pa otra vegada, tocará tornar y probar dalguno de los bloques propuestos nel blogue Me Mola el Bloque.

Dacuando, échase en falta un llibrín coles meyores zones bloqueres n'Asturies, croquis y estes coses, ya que por suerte, de deportiva tenemos llibros y más info nes redes, pero de bloque sigue siendo dalgo minoritariu y con poca info pa los que quieran dir animánodose pa con esta especialidá.

Hasta la próxima... que nun diera pa más esto

Belerda (Casu) - El Visu La Grande

12 de Marzu de 2016

Track: Belerda (Casu) - El Visu La Grande

Seguimos nel añu de buscame la vida con rutes alternatives pal grupu. Esto ye pol altor de les propuestes de calendariu, poro toca restolar en blogues, montes pendientes y demás hestories p'alcontrar lo siguiente del collaciu Xistras nel Visu La Grande.

Paecióme una ruta de muncho interés, asína que con esi envís saliéramos de Xixón bien ceo pela autovía minera, saliéndonos al corredor del Nalón como ye vezu, travesando Llangréu, Samartín del Rei Aurelio, Llaviana y almorzando nel chigre de Rusecu en Sobrescobiu.

Partimos dende Belerda (646 m) cola cota ñeve baxísima

Aguamía (Llanes) - Costa de Llanes - Cuevas (Llanes)

5 de Marzu de 2016

Track: Aguamía (Llanes) - Costa de Llanes - Cuevas (Llanes)

Finde completísimu ya que teníemos la visita de los collacios vascos col envís de ver el partíu futbol pente l'Sporting y l'Athletic. Aparte, teníemos ruta col GM Xuan de la Borrina, pero'l tiempu yera perinestable pa intentar dalguna ruta nin tan siquiera alternativa a les de calendariu.

Asína que xuntámonos Bittor, Fernan, Ana, Benjamín y yo, con ganes d'aprovechar lo que se pudiera de la mañana y picar dalgo per Llanes. Pa ello, averámonos hasta Nueva onde almorzamos y fuimos dexar un coche hasta San Antolín, dexando otru más en Nueva por si les mosques.

Partimos penriba del Ríu Mía (18 m)

La Molina (Cabrales) - Cabeza Pandescura - Casañu

21 de Febreru de 2016

Track: La Molina (Cabrales) - Cabeza Pandescura - Casañu

Alborecemos, Kíla y yo, na habitación del pisu de Fernan en Colombres, magar d'un increyible día de monte nel H.ucantu, con posterior cena, cerveces y partíu del Sporting. Güei, quedamos a les 8 y media n'Arenas pa facer ruta de calendariu con tol grupu Xuan de la Borrina, asina que toca entainar y garrar carretera hasta Arenas.

Dende Xixón, sedría'l viaxe típicu.... pero nós tenemos que dir per Unquera y Panes, pa entrar a Cabrales pel Valle Bah.u de Peñamellera, xuntándonos toos como siempre nel café Cares. Llueu del almuerzu, siguimos hasta'l pueblu cabraliegu de la Molina, pero cagámosla dexando los coches en Canales, ya qu'anque nun hai muncho sitiu p'aparcar nel propiu pueblu, podemos de camín dexalos en varios apartaderos ensín comenos 5 km de más de ruta.

GM Xuan de la Borrina en La Molina (360 m)

Redipollos (Porma)

15 de Payares de 2015

Como l'iviernu nun quería aportar a les Asturies, tiramos pa Llión a una guapa escuelina na qu'asoleyar fino y trepar con tranquilidá. Asina que tiramos hasta Redipollos en Liyo, onde tuviera va más d'un añu conociendo la escuela.

Vicen estrenando reversu pa rapelar

Esta vegada xuntámonos un bon garrapiellu xente, con muncho "novatu", poro'l llugar yera l'indicáu col seutor de los Guajes onde nun pasen les víes de V casi. D'esti xeitu, tuviemos tol día turnándonos vía tres vía hasta dempués del bocata cuanda pasámonos al seutor d'al llau Violet Carson.

Richar nun día brutal trepando con bones víes a vista

Tampoco ye qu'apretáremos a morrer nin muncho menos, pero diónos pa conocer un par de V+ nuevos pal currículum ún d'ellos de placa con un pasín que fizo les delicies del respetable. Como anéudota, dicir que me comí con patatines un 6a+ de placa que dióme a entender que cuando hai que ser especialista n'adherencia llionesa ye por dalgo...

Tornaremos... con más fuercia y ganes

Redipollos (Seutores visitaos)
 
Croquis modificaos por mi de la escuela d'escalada de Redipollos, por mor del C. D. El Local de "El Húmedo" y amosáu en Infoescalada. Gracies y col so permisu.

-------------------------------------------------------------------------------

Carrera Coto - Musel (Llaviana)

2 de Payares de 2015

Track: Carrera Coto - Musel (Llaviana)

Web del Trail: http://quebrapates.com/coto-musel/
 
Clasificaciones: Clasificaciones 2015  

Pues como ya dixera na anterior carrera pel monte en Nava enxamás digas d'esti agua nun beberás. Si tovía teníemos fresquino la carrera anterior, una selmanina, decidimos correr a la selmana siguiente la Coto - Musel en Llaviana pa que'l mió hermanu pudiera debutar.

Entamu de carrera y rápidina tol tiempu

Ésta ye una carrera perfeuta pa debutar, con pocu desnivel y muncha pista pela qu'andar como chiflaos y eso fué lo que pasó, que pal mió gustu nesta carrera córrese demasiáu y ya voi viendo que nun ye'l mió estilu.

Baxaes rápides y cómodes enforma

Aún así, fuí finu y llevamos unos ritmos estupendos, tan estupendos qu'acabamos los últimos dos kilómetros per asfaltu a unos 4 min y pocu'l kilómetru, abondu pa min y de más pal mió hermanu que diba resoplando jeje.

Caberos kilómetros a fueu hasta la meta

El casu ye pasalu bien... el día que nun seya asína, tengo claro qu'acabóse, pero pol momentu, una carrerina rápida y curtia nunca nun vien mal pa dir fuera de puntu tol tiempu, anque paezme a min que lo meyor van ser les carreres llargues y que'l cuerpu decida.

Ta la próxima...

Ponte Bidosa (Ponga) - H.ucantu

20 de Febreru de 2016

Track: Ponte Bidosa (Ponga) - H.ucantu

Cuantayá que nun quedábemos Fernan y yo pa una escapada montuna y magar de dellos cambios na mió vida, facíame falta colar de Xixón, con Kíla pa llevala de monte a ella y pa llevame a mí, y que meyor qu'en compaña de Fernan, al que tengo qu'agradecer que Kíla durmiese na so casa en Colombres..

Pa onde tirar... pues nin siquiera decidímoslo nós, ya que diba venir otru collaciu vascu, Carlos y anque finalmente nun s'animó, sí que nos dexó la ruta a facer: el H.ucantu, auténticu balcón sol escobiu de los Beyos.

Enantes, como non, teníemos per delantre un paséu en coche pola autovía'l Cantábricu y la N-625, hasta Cangues d'Onís onde quedamos p'almorzar na Huera como vien siendo davezu. Magar del cafetín, siguimos pela N-625, hasta cruciar la ponte Dobra entrando nel conceyu d'Amieva.
 

Salimos de la Ponte Bidosa (290 m) 

La Feriona del Pilar - Peña Los L.lanos (L.luna)

3 d'Ochobre de 2015

Ya perdí la cuenta de les vegaes qu'Abel convidárame a dir dalgún a facer alpina y por un motivu u otru, fue quedando pa prau dende cuantayá. A la fín, un finde d'Ochobre, fuimos hasta L.luna en Llión y más en concretu hasta la Peña Los L.lanos onde esperábanos La Feriona del Pilar.

Ye la primer vegada que métome nel tarrén alpín, sacante de xeres más montunes como'l Picu Urriellu y collacies de la redolada como Torre L'Osu o Carnizosu, onde alcuéntrome como pexe nel agua, xubiendo casi ensin proteición.

Averamientu hasta'l pilar con camín pindiu pero cómodu

Pero en víes d'alpina hai controlar de meter trastos y sobretou metelos bien, al igual d'andar sollerte con montar reuniones con seguridá. Nun yera'l casu d'esta vía, na que les reuniones tan montaes con parabolts al igual que les proteiciones nes plaques... eso sí... too con un toque picante a base d'alloñes considerables.

Nesti sen, ye un placer vese mover a Abel, con una tranquilidá suprema pa navegar nes plaques d'adherencia llioneses y tamién p'acerar si un pasu lu pide y ta forzándose de más. Too esto y muncho más dediqueme a deprendelo nes hores d'escalada de segundu.

La Feriona del Pilar... más info en El Maquis

El Condao (Llaviana)

26 de Setiembre de 2015 

Esti añu dexamos un pocu abandonada a la escuela d'El Condao en Llaviana y ye una pena ya qu'anguaño ta siendo reequipada y esi esfuerzu bien paga la pena nun escaecela como fuera antaño quedando casi nel total abandonu.

Namái qu'un día pasamos en tol branu per ellí, coincidiendo con un certame de cerveza artesano en Rusecu. Nun fai falta dicir que dimos un paseín hasta'l seutor de Los Quintos onde calecía'l sol enforma, quitándonos les poques ganes d'esguilar y pidiéndonos a glayíos que fuésemos a echar unes cañes cuanto antes.

Esí día tuve pegándome con un 6a, si oyístis bien, un 6a con un pasu cabrón a más non poder y cuando rompí un presa y frayé un deu ya tuve abondo y colamos d'El Condao con bastante mal rollu pela mió parte.

Poro... necesito tornar per ellí esti añu y quitar esti mal tastu.

31 d'Ochobre de y 7 de Payares 2014

Equí tamos, intentando caltener un mínimu de dignidá na escalada y pa ello restolamos escueles onde fogueanos nos sestos baxos ensín sofrir de más. Con esi envís, vamos a conocer la escuela d'El Condao, que gracies a unos mozos ta tornando a la vida con munchísimu trabayu de desbroce y requipamientu.

Perguapu seutor de los Quintos

Nesta escuela fogueóse muncha xente de la cuenca'l Nalón garrando tan bon nivel que fueron dexándola per nuevos retos más duros quiciás y eso que ye difícil, na Cueva Deboyu por exemplu. Y digo que difícil, porque los graos tan durinos con pasos en dalgún 6a+ mui difícil de lleer a vista.

Munchísima calidá na peña y nes víes de los Quintos

Nós, simplemente ficimos dos visites, tando'l primer día nel seutor Quintos dafechu, faciendo un par de cuartos, un V+ y un 6a. Toos ellos, mui bonos, con muncha calidá na peña y siendo unes víes perguapes.

Poca lluz ya nesta dómina del añu, así que un par de pegues y paséu pela escuela

Al día siguiente, magar de peganos con un 6a+ que dió pa tres pegues pola mio parte, viendo les demás víes a seguir intentando moyaes, decidimos dar una paséu pela escuela. Dicir que dar un "paséu" pela escuela, ye facer una ruta de montaña y de les espuestes... así que muncho güeyu colos senderos que xunen unos seutores y otros.

Salida de los seutores más pegaos a la carretera.... una pequeña ferrata y too

Sobretou, si tirais de los Quintos hacia Cuento de Hadas o Cadillac Solitariu, ya que los destrepes son peligrosos con mochiles pesaes d'escalada. Meyor, garrar senderos d'abaxo hacia Taberna Galática y llueu a los anteriores.

Lo dicho... esta escuela ye toda una aventura tan sólo con conocela... sólo hai que ver lo aéreu de les siendes so la carretera que va pal parque de Reres..., munchu güeyu xente y disfrutái d'esta remocicada escuela.

El Condao
 
Croquis modificaos por mi de la escuela d'escalada d'El Condao, por mor de la páxina del facebook de Recuperación de la Escuela d'Escalada d'El Condao. Gracies y col so permisu.