7 de Setiembre de 2026
Track: Sesanes (Valdión) - Los Hojaos - Sedu La Garcia - Senda'l Rabicu - Asotín - Cordiñanes
Dempués d'un domingu de llibrar el día, nel que dimos un paséu pela senda'l Cares, conociendo'l camín de la Electra, que tién un pocu l'interés hestóricu y montañéramente d'accesu a delles canales como Saigu o Avareras, tocaba volver a l'actividá más seria, ya que dexónos un pocu a medies, anque nun daba'l día pa más, ya que tuviemos a la vuelta que metenos nos túneles p'abelluganos de los bastiazos que cayeren de torbón.
Magar de pasar el domingu tarde de descansu, ficimos un pocu cambiu de cromos, colando Marcos que tenía que volver al trabayu y xuniéndose al grupu, Mario y Sara con enerxíes renovaes. Pa contentá-yos, díbemos repetir pela mió parte la ruta al Sedu la Garcia, que ya ficiera va dellos años, pero que camentaba diba paecié-yos increyible y mui divertía.
Alborez col día pelín borrinosu, tovía colos restos de mal tiempu del día anterior, asina qu'almorzamos con calma y averámonos na furgo hasta Sesanes, ya que tenemos l'envís de facer la circular hasta colláu Solano pela senda'l Rabicu, anque si tuviéremos con munches más ganes, pudiéremos empatar la Garcia col final de la Traviesa'l Llaz y baxar per Mueñu hasta Caín, faciendo'l camín hasta Sesanes pel tramu de senda'l Cares que tan arreglando nel intre, pa nun tener que facer tocar asfaltu, lo que va dar muncha vida a los pueblos de Valdión, en cuanto a senderistes.
Dende Sesanes, saldremos hacia les cabañes de los Pontones, pa'l pocu lianos como siempre tirando pedrera arriba, teniendo que facer travesía a la mandrecha pa tornar al camín, que siguimos durante un ratín, volviendo a tirar a pinchu per una guapa viesca, hasta topar de nuevu el camín que vien de los Manzanedos, siguien ya sin fallu hasta Los H.oyaos, onde una vegada más volvemos a liala y ye que'l borrín mañaneru nun aida muncho, pinchándonos un pelín, hasta salir al senderu buenu, qu'empobínanos a la riega Mermejo.
Dempués d'esta primer hora de líos y pérdides, tamos ya centraos na riega Mermeyu, aportando a la entrada de la foz onde vemos un h.itu que sácanos a la manzorga, hacia una pindia viesca, de la que tengo alcordanza tamién, anque entráremos un pelín antes, teniendo que bregar par tarrén pindiu y pinchudo, siendo esta vegada muncho meyor, per tarrén pindiu namás, más pegadinos a los parés pembaxo del sedu La Garcia.
Daquella, díbemos ensin referencies y esta vegada namás que plantámonos embaxo la entrada, alcordábame d'una trepadina per roca bermeya, acolumbrando al pocu el míticu barrenáu del sedu La Garcia, que vamos esfrutar enforma, tanto polos pasos aéreos como pol mar de ñubes que tenemos en tol valle de Valdión, poro les milenta semeyes fue la tónica, anque siempre con munchu curiáu de dar dengún pasu en falsu.
Saldremos del sedu más "artificial" pa continuar otra parte bien espuesta, con grande cayíes sola riega La Garcia, ya que la riega Mermeyu dixébrase na propia foz anicial. Nesti tramu, tendremos qu'andar sollerte, ya que pesie a lo espectacular de la primer parte, esta segunda nun tendremos tan claro onde písase nin si la roca ye sólida, poro lo meyor ye nun perder nin una migayina de concentración.
Saliendo d'esta segunda parte del sedu ya toca garrar una vallina yerbosa y baxar hacia lo fonderu de la riega la Garcia, onde podremos parar a echar un tragu y baxar vueltines dempués d'estos dos tramos tan aéreos. La xente va encantada y darréu entama la parte, quiciabes más téunica en cuanto a trepaes pero menos espuesta y claramente en moyáu puede ser un gran problema intentar xubir per estes peñes nidies de la riega.
Un pasu tres d'otru vamos superando trepes per llambries nidies, bloques empotraos, escoyendo la meyor opción según veamos y controlando con tol mundiu pase colos menores problemes, topándonos quiciás el pasu más complexu nun gran bloque empotráu que llibramos pela manzorga per una llambria nidia, que tien de facese con munchu curiáu y fiándose munchu de la suela de los playeros.
Superaremos tolos pasos de la riega, echándonos unes bones rises y saldremos al solín, pa siguir sudando enforma ya que tenemos un día con munchísima humedá. Nel intre tocará, navegar un pocu y yo decídome siguir pela riega el másimu de tiempu posible, mientres que'l restu de collacios van tomando delles vallines hacia la mandrecha, topándose con tramos de muncha cotoya baxa.
Pocu más arriba, enllazamos toos y ya vamos averanos hacia la cabecera del argayu Mermeyu, que nun fai otra cosa que picame enforma, tanto pa conocer la parte baxa hacia'l Cuetu Bellán como la parte alta, hacia'l Llaz onde tengo visto que puede tener salida tola riega Mermeyu arriba. Con estos camientos, paramos a la solombra de la torre del Llaz parando a xintar un ratín, camudar la camiseta sudadísima y descansar de les 4 hores y cuartu de ruta que llevamos.
Dende equí entraremos, nel senderu'l Rabicu propiamente dicho y sentaos na xinta, alcordámonos muncha de la ruta que ficiéramos va pocu, empatando'l Rabicu y la traviesa del Llaz faciendo l'accesu más increyible a H.ermosu qu'esiste. Nel día de güei va tiempu que desdexamos esta opción, ya que'l día sigue subiendo en temperatura y lo más sensatu ye abandonar hacia'l colláu Solano, metiéndonos nel tramu más aéreu y guapu de la senda'l Rabicu, qu'esfrutamos una vegada más.
Dende'l colláu Solano, tenemos ya'l descensu míticu hacia la Vega d'Asotín, que vien del Argayu Congostu y vamos facelo a la carrera echándonos unes rises pente excorredores, montañeros y corredores actuales, pa xuntanos na Vega y ya continuar a un ritmu relaxáu, con ganes de garrrar el fayéu d'Asotín pa siguir a la solombra na mayor parte del descensu pela Rienda hasta Cordiñanes.
Caún al so ritmu vamos baxando y pararemos nel hostal de Cordiñanes a tomar unos refrixerios baxo un guapu horru, pa sofocar un pocu la calufa que tamos pasando, enantes de continuar pel camín del Cares hacia'l monte la Corona., pasando como non pel mirador del Tombu pa siguir pel remocicáu camín, por suerte a la solombra, hasta los coches al pie del Chorcu los Llobos, na braña de Sesanes.
D'esti xeitu, completamos otra ruta increyible, qu'anque ya conociese al 100 % nun me pesó nin media, ya que pude ver como tolos collacios del grupu pudieron esfrutar d'esti percorríu increyible de malpenes 11,5 km, superando un desnivel téunicu acumuláu de +/- 1010 m, nun total d'un pocu más de 8 hores, onde conocieron otra parte más d'esta xabazada que ye esta fastera de los Urrieles.
No hay comentarios:
Publicar un comentario