Caín (Valdión) - Mueñu - Camín de les Oveyes - Torre Pamparrosu - Dobresengos

5 de Setiembre de 2026 

Track: Caín (Valdión) - Mueñu - Camín de les Oveyes - Torre Pamparrosu - Dobresengos

Sábadu a les 6 y media la mañana, suena'l despertador dempués d'una nueche d'aguantar de fondu la musiquina de les fiestes de Caín, asina que llevantámonos dafechu reventaos, facemos una cafetera como podemos y preparamos p'almorzar de nueche zarráu entá. Metemos pal cuerpu lo que podemos, facemos el pinchu pa la ruta y a partir de les 7 entamen a llegar los compañeros que durmieren nel albergue.

Con galbana ponemos les mochiles y les pates entamen a caleyar dormíes hacia la salida de Caín, el día anterior caleciéremos perbien peles siendes antigües del Cares, pero paez que'l cuerpu nun descansó les hores debíes y cuesta arrancar hacia los Praos de Castro, puntu nel que la canal de Mueñu entama y amuésase perllarga delantre de los nuesos güeyos. 

Salida de Caín (460 m) coles primeres lluces

Ye una vieyísima conocida, asina que nun voi detallar muncho la so ascensión, ya que ficiérales va munchos años como enllaz hacia H.ermosu, ascendiendo la Palanca y el Llambrión y tamién la descendiera dempués d'una llocura de ruta hasta la Torre La Celada dempués de xintanos Arzón y parte Dobresengros o baxando dende la parte media al venir dende les Travieses del Llaz cola Torre del Mediu nel menú.

Averámonos pelos praos de Castro al entamu la canal de Mueñu

Pa los collacios ye la novedá y la verdá ye que van alloriando col paisaxe y yo voi acolumbrando pequeñes caxigalines, como les travieses que vienen d'Arria y tengo pendiente o por exemplu, qu'arreglaron les cabañes de la mayada Mueñu. Cuando lleves tantos años dando pata pel monte, vas quedándote coles coses nueves, nun ye too la novedá d'antaño, vas conociendo otres ayalgues, como va ser nel intre, el camín de les Oveyes.

Continuamos ascendiendo nesta increyible canal hasta la mayada Mueñu

Esti senderu percuerre una traviesa, pel desbentíu que son los parés que caen dende'l Pamparrosu y restu de cumales pente les canales de Mueñu y Dobresengos, ún d'esos caminos qu'abluquen y que disfrutes a cada pasu que dás. La entrada alcuéntrase a unos 1800 m d'altor y facémosla trepando a un espolonín per un pequeñu canalizu, dalgo vertical pero sin mayores problemes, anque pudiérase pillar más arriba bordiando una morrina, anque pidieríanos xubir y baxar más desnivel.

Trepamos un pequeñu canalizu pa empatar col camín de les Oveyes

Una vegada qu'atopamos el rastru de sienda, toca poner los güeyos a furrular de h.itu en h.itu y tamién restolando cada traza de senderu, anque a dicir verdá nun tuviemos dengún problema al menos na primer parte si tamos d'andar per Picos. La verdá que voi esfrutando tanto, que nun sé dicir de dificultaes, asina que vamos pasando de h.orcaína en h.orcaína, travesando pindies canales que cayen al vacíu baxo los nuesos pies, pero sin una sensación aérea grande y con unes vistes del Cornión ablucantes.

Ablucante senderu colgáu esti camín de les Oveyes pel que vamos esfrutando a tope

La mayor de les dificultaes alcontrámosla trepando a una h.orcadina que creyemos puédese bordiar pembaxu pero quisimos siguir la traza orixinal y dempués el camin de les Oveyes empobinarase a una gayaspera aguya, que nel nuesu casu, va marcanos al pocu la final del Camín de les Oveyes, ya qu'esti baxa enforma a una canal y torna a xubir penriba de las Cabezas Altas y esi nun ye'l nuesu destín, ya que somos a atopar un canalizu herbosu a la mandrecha que va sacanos hacia una canal d'accesu hacia'l Pamparrosu.

Percorriendo'l camín pente aguyes, h.orcaos y pasos increyibles pa salir hacia'l Pamparrosu

Los tracks ya entraes de blogues que manexábemos de los collacios Monchu y Xistras, facíen tol camín enteru que sáquente mui abaxo y vimos la posibilidá d'atayu, que finalmente algamamos con ésitu, trazando una ruta per guapa, superando sin mayor problemes dellos resaltes de tarrén amestáu, hasta enllazar cola ascensión "normal" a la Torre de Pamparrosu.

Perguapa ascensión hacia la Torre'l Pamparrosu con dos canalizos yerbosos como puntu téunicu

Les vistes hacia les Torres de la Llera son una pasada, col marcáu güeyu según superamos desnivel per tarrén amable hasta dar col primer canalizu, que podremos escoyer si subir per yerba o per canalizu más pedregosu, saliendo al siguiente pasín que ya será de yerba, superándolo tamién ensin mayor problema, nun teniendo creo yo, dengún pasu superior a II, teniendo qu'usar les manes un pelín.

Salimos a la parte alta onde navegamos hacia'l cumal de la torre Pamparrosu

Saldremos a la parte alta y tocará ascender per amiestu de lleres y tierra nel que tendremos de tener munchu cuidáu de nun tiranos piedres ente nós y sobretou tando sollerte de nun perder referencies p'alcontrar a la baxada los canalizos yerbosos. Ensin más que tirar de pata, plantámonos nel cumal de la Torre Pamparrosu (2211 m) a les 12 y media la mañana, ensin pasar una gota de calor.

Brutal mirando de los Urrieles nos 2211 m de la Torre Pamparrosu

Aciertu total colos horarios ya impresionante mirador esta Torre Pamparrosu, ya que nunca viera tan cerca tola cara oeste de la Torre Cerredu y de tol so grupu hasta los Dobresengos, asina como tol seutor del Llambrión. pasando pela Celada y Palanca. La verdá qu'un auténticu disfrute de cumal, onde, como non, paramos a xintar con calma el pinchín tomando'l sol un ratín, enantes de que'l día punxérase a caldiar duro.

Los dos seutores más altos de Picos (Llambrión y Torre Cerredu) enantes de baxar del Pamparrosu

Más de media horina na Torre Pamparrosu descansando y decidímonos a baxar faciendo los distintos pasinos pelos canalizos yerbosos y enseguida garramos senderu nuevu, faciendo una travesía espuesta hasta una marcada h.orcadina onde vamos tener una la visión d'una pindia pedrera que llévanos hasta l'enllaz col Camín de les Oveyes, alloriando colo baxo que queda y teniendo claro, que tuviemos un aciertu mayúsculu col nuesu atayu.

Descendemos hacia la canal de Dobresengos pel enllaz del camín de les Oveyes

Una vegada que plantámonos na collaína onde termina'l camín de les Oveyes tendremos una pindia canalina primeru de yerba y dempués una llerona pa descender hasta la parte alta de Dobresengros, un pelín pembaxo de la Garganta del H.ou Grande y a dicir verdá, más cenciella que la baxada de Cabezas Altas, que ye más inestable y rota, plantándonos en Dobresengos y entamando un penosu descensu pol calor.

Baxada llarga y calurosa pela canal de Dobresengros

Dobresengos más que conocida por tolos compañeros, menos por Marcos, que la sufrió baxando quiciás pol cansanciu y pol calor, vamos descendela ensin más problemes que tener paciencia y tamién tuvi la oportunidá d'echar un vistazu cola mirada a la baxada dende la torre La Parada, teniendo más o menos claro per onde van los posibles pasos.

Por mor del calor, Rubén y Marcos acabaron pegándose un bañín nel Cares, mientres que Montse y yo, cansaos pol descensu lentu y colos pies ferviendo de la baxada, tiramos pa Caín a cambianos, poner les chancles y echar una birra coles pates nel rigu, pa descansar de les 9 hores y media de ruta, na que superamos un desnivel acumuláu de +/- 1770 m nun total de 13 km percorríos, siendo una ruta increyible.

Camudando'l Camín refrescando les pates nel Cares