4 de Setiembre de 2026
Track: Caín (Valdión) - Cantu Mabro - Casielles - Puntedo -Cámara - Trescámara - La Tránvia - Cares
Tornamos a Picos d'Europa dempués de la Travesera 2025 - 2026 col envís de conocer dalgunos llugares y pasos que me queden na contorna de Caín. Siendo sinceros, cada día cuéstame más alcontrar rutes motivantes y ye que ya son munchos años de pateos y personalmente Picos, ye dalgo que trabayé muncho, coles traveseres y dalgunos díes d'especiales.
Sicasí, dempués de dar munches vueltes y preparar munchos tracks, con milenta posibilidaes, tiramos el vienres a Caín cola idega de tar una selmana patiando, nun día de munchu calor, asina que dexamos pa prau cualesquier monte del cordal y decidimos dar un paséin aéreu pel Cares, pa que los collacios vayan metiéndose en farina.
La idega ye estirar les pates dempués del viaxe y cansar un pocu, ya qu'enriba tenemos les fiestes de Caín y suponemos que la música nun mos va dexar descansar pa la ruta del sábadu, que presentábase potente. Nel intre, preparámonos y salimos caleyando per Caín, pasaes les 4 y media la tarde, pegando entá la solana con fuercia, averándonos hasta la Jarda, onde garraremos el senderu del sedu Mabro.
La calufa ye terrible y sudamos enforma, pero tenemos la esperanza de garrar solombra un pelín más alantre cuando empocemos na garganta, asína que tiramos alantre pel senderu, garrando nos Lleraos el desvíu hacia'l Cantu Mabro, que ya percorriera la primer vegada que conocí Dobresengos nun error que fízonos superar más desnivel del deseyáu, por nun tomar bien el Sedu Mabro.
Esfrutaremos munchísimu de tola traviesa del Cantu Mabro, alloriando coles guapes armaures de los pastores cainejos, devolando hacia la riega Casielles, onde tendremos una baxadina pa enllazar cola canal de Dobresengos, echando un vistazu al senderu que xube hacia Puntedo, el cual vemos claramente y al que nos tiramos, primeru per senderu yerbosu pa continuar per un sedu talláu preciosu, que sácanos a Puntedo, dempués d'un últimu tramu bien aéreu pero preciosu.
Una vegada que tamos en Puntedo, cuéstanos un pelín alcontrar el senderu, perdiendo un pelin de tiempu, hasta que lu topamos más en travesía sin ganar muncha altura, llevándonos a un pasu increyible, nel Barrenáu de Cámara, dándonos pasu a cruciar un barrancu saliendo per un sedu aéreu que sácanos a la canal de Cámara, onde'l sol va peganos con fuercia, teniendo tamién que bregar con delles espineres pa salir a la parte alta de la canal.
Esti tramu ye nuevu pa min, ya que va unos años, nun fui capaz de baxar de la Cueva Cámara hacia Puntedo, al non alcontrar pasu de baxada por mor de lo tomáu que taba la cueva, teniendo que tornar solos miós pasos hasta La Tránvia, llueu de restolar formes de baxar hacia Dobresengos . Esta vegada vamos ascendiendo, alcontrando la parte alta de Cámara bien llimpia, saliendo perfeutamente, hacia la base de la Cueva de Cámara pela qu'accedemos pel Traviesu de Cámara, un amiestu d'escaleru y canalizu que déxonos na enorme bóveda d'esti paré.
En Cámara vamos a detenernos ya que Montse nun s'alcontró bien pol calor na parte final de la canal de Cámara, parando a la solombra unos minutos, pa tomar sales y beber bien d'agua hasta que se recupere ya que tenemos cero priesa y darréu, pa min ya ye tarrén conocíu. Recuperaos, entamamos el descensu de cueva Cámara pela Tarugada hacia la canal de Trescámara, alcontrándolo recién desbrozáu con unes envueltes bien clares.
El gustu de baxar pela Tarugada tan cómodamente, ya qu'años atrás taba bastante tomáu, fízonos comprender tamién que Cueva Cámara taba tamién mui llimpia, por mor de la vuelta al pastoréu d'esti llugar ablucante. Empataremos cola canal de Trescámara que podría xubimos hacia la Cuesta Duja, pero nós ya tenemos claro el nuesu destín, así que traveseramos la canal en llixeru descensu, empobinándonos hacia'l pasu barrenáu de la Tránvia.
Esti pasu ye ablucante y conociéralo va años nuna travesía hasta'l H.ou Los Cabrones per Cuesta Duja y Piedrabellida, pero como siempre, nun defrauda y les cares de los collacios ya me val pa repetir estos pasos ensin pereza denguna. Llevamos unes horines esfrutando de la verticalidá del Cares y agora a la solombra tamos encantaos, dándonos pena que tea terminándose la ruta, ya que dempués del pasu la Tránvia, entamaremos un claru descensu hacia la sienda'l Cares que nun par d'envueltes, déxanos nuna destrepadina cerquina del puente Los Rebecos, anque tamién se puede baxar nel puente'l Bolín.
Los senderistes del Cares allorien al venos baxar dende la Tránvia, echándonos unes rises al ver les sos cares y ya garramos la senda a bon pasu, charrando animósamente, ya que'l pateín aéreu prestónos pola vida a toos, sacante'l mal momentu de Montse, aportando a Caín de vuelta llueu de 2 hores y 45 minutinos de patéu, superando un desnivel acumuláu de +/- 350 m en malpenes 5 km. Al día siguiente había trisca así que perfeuta y divertida ruta pa calecer pates y acostumase a los desventíos del paisaxe cainejo.
No hay comentarios:
Publicar un comentario