24 d'Agostu de 2024
Track: Arintero (Los Argüeyos) - Peña Forqueta
Tornábemos de vacaciones per Soria, llueu de danos un pelín de caña na bici tres díes siguíos, pero como siempre, les ganes de monte yeren grandes, asina que falando con Pepa, miramos dalgo pa Llión ya que p'Asturies daben malu, como tol branu y casi tol añu.
Na ruta al Cuetu Ancino, dellos selmanes enantes, ya viéramos la crestería de la Forqueta n'Arintero y colo munchu que nos prestara'l finde pelos Argüeyos, nun perdimos la ocasión y presentamos al grupu la propuesta, xuníendose los avilesinos: Sara, Vane y Mario, fallándonos a última hora dellos interesaos más.
Quedaremos n'Arintero tol grupu, llueu d'almorzar na furgo unos y otros venir dende Avilés, con parada como non, n'Ezequiel y pa les diez y media, tamos preparaos travesando tol pueblín y sacando la semeya de rigor delantre de la crestería d'Arintero, con tolos cumales a la vista.
Salimos del pueblu per pista, garrando'l ramal drechu que nos fai baxar hacia los praos de la riega Villarias, la cual cruciaremos pela ponte, col envís de garrar una pindia vallina, qu'en curties envueltes va dexanos na faldera del espolón occidental del picu Gudín.
Podríemos ascendelu, pero nun lo vemos necesariu, asina que vamos averanos hacia la collada d'Arintero, onde tendremos vistes hacia'l pueblu de Valdegüesa onde esiste una mítica escuela d'escalada llionesa.
Nun llegaremos a la collada propiamente dicha, pero faldearemos el Gudín, averándonos per senderu hacia una canalina con una evidente aguya a su madrecha, que va facenos ascender hacia la bas de tola crestería ensin mayores problemes.
Namás que miramos pal cresteríu, ya vemos que tenemos un tramu pelín abegosu, onde tendremos que restolar ascensu, pente la broza y caliza, como meyor vamos viendo, hasta qu'aportamos al colláu enantes d'un cumal de 1671 metros, primer cumal importante d'este cresteríu d'Arintero, del que tendremos de baxar a la collada siguiente, dende onde ya sí entamaremos la crestería hacia'l primer oxetivu del día: Peña Forcada.
Entraremos de la collada directamente a una plaquina d'adherencia con increyibles vistes del Porma, que sírvenos pa calecer l'ambiente y que les compañeres Sara y Vane vayan garrando confianza na caliza. Una vegada qu'aportamos al filu la cresta, sedrá un continuu trepar y destrepar superentreteníu, con dalgunos pasinos y llugares bien guapos.
Continuaremos esfrutando de l'actividá, sacando mil semeyes y trepando allégremente, dando vista a la fin a la Peña Forcada, que vese imponente con una muria vertical sol Porma, poblada por utres viendo l'estáu de la muria en cuanto a cagaes nos ñeros. Nós, vamos avanzar hasta la collada final en descensu y tendremos los trepes finales hacia la Forcada, a la qu'aportamos con tan sólo apoyar les manes en dalgún tramu concretu.
En pocu más de dos hores y cuartu, tamos nos 1723 m de la Forcada, teniendo que fuxir del cumal, ya que nos comíen una ñube de mosquines, lo que podría facenos albidrar que lo mesmu llovíanos al final del día. Coles mesmes escapamos y metemos nel descensu de la Forcada hacia la Forqueta d'Arintero, esa clara división en mediu de la crestería.
Equí tendremos que tar sollerte, ya que la vista llévanos hacia una vira a media altura, pembaxo de la Peña Forqueta Sur, que da a una colladina a la qu'arribo pa echar un vistazu, ensin ver una baxada clara, que nun suponga peligro pa tol grupu, ya que lo veo espuesto bastante vertical, asina que decidimos descender un pocu más pela clara vallina y ya si, garrar una preciosa vira n'ascensu que déxanos na Forqueta.
Agora sí, ensin mosques, podremos descansar un ratín, na guapísima Forqueta d'Arintero, picar dalguna tontería y garrar fuercies, p'ascender a la Forqueta Norte, la que mayor dificultá téunica, entrando primeru per una canalina caliza bien protexida a pesar del ambiente pa salir a la esquierda, onde tendremos ya un amiestu de trepada yerbosa y caliza, que sácanos directamente al mesmísimu cumal de la Forqueta Norte.
Nos 1725 m de la Forqueta Norte, damos preste al puntu más altu de tol cordalín y de pasu, tendremos guapísimes vistes de tola redolada, destacando'l Susarón hacia'l norte nuesu. El grupu ta más contentu cola ruta y les cares son de felicidá y diversión nesta crestería y por suerte, nun tenemos tola mosquitada, asina que podemos echar unos minutinos mirando pal Porma, antes de dar la vuelta y ver que pol occidente hacia'l Bodón, pudiera tar viniendo un marrón curiosu.
Con esta visión, tiramos cresta abaxo de la Forqueta Norte y debemos descender hacia la fastera del Porma, ya que pola valle d'Arintero podemos meternos en un buen marrón, ya que'l tema ta pindio enforma. Asina que garramos una vira a la derecha, qu'a posteriori nun par d'envueltes va dexanos nuna pradería onde pierde la continuidá la cresta, dándonos aliendu pa continuar hacia'l so tramu final nel picu Socellerón.
Cuando camentábemos que ya teníemos casi too fechu, alcontrámonos cola increyible crestería al Socellerón, más llarga de lo que pensábamos y mui de navegar a un lláu y otru, pasando per cinches yerboses aérees en dalgún puntín y con una trepadina final pa upanos al crestón final, bien guapa y pelín vertical, aportando al cumal del Socellerón (1640 m) viendo ya como taba lloviendo pal occidente.
Nel cumal, vemos la panda que tenemos de descensu hacia la colláu de Valdemaría, la que facemos apriesa, dándonos aire, ya que pintaba díbemos pillar una moyadura fina. Nun tris, aportamos a esti colláu onde garramos el camín de Ruscayo, abandonándolu per un senderu hasta'l colláu Gatena, onde garramos camín de vuelta hacia Arintero, siendo estes pistes les que podríen llevanos en travesía hasta Tolibia d'Arriba.
Llibrando la lluvia nun sé sabe mui bien como, volveremos hacia Arintero, teniendo vistes a tola crestería recién fecha que tanto esfrutamos y nos divirtió en cada trepadina, restolando los distintos pasos pela crestería y esfrutando d'un día bien prestosu d'actividá montañera.
En resume, ruta entretenía a más non poder, na que ficimos la crestería d'Arintero nun total de 6 hores y 40 minutos, nuna circular de 10,6 km con un desnivel acumuláu de +/-650 m, anque como siempre nestes actividaes lo guapu ye la diversión de percorrer la crestería.
No hay comentarios:
Publicar un comentario