Recuerda (Tierras del Burgo) - Morales - Aguilera - Berlanga - Alaló - Brias

14 d'Agostu de 2024

Track: Recuerda (Tierras del Burgo) - Morales - Aguilera - Berlanga - Alaló - Brias

Dempués de dellos díes de folixa pel pueblu y un par de díes rodando en bici pela redolada, preparéme una ruta pa darme un pelín de caña y de pasu, tachar un par de vértices sorianos, que pocu a pocu voi completando, al menos nes comarques más averaes a Recuerda.

Como siempre digo, Soria ye un paraísu pa la bici de monte pudiendo trazar cualesquier ruta entre pueblos, per pistes de tierra ensin tener que tomar carreteres asfaltaes, anque tampoco son males p'andar en bici les comarcales, onde nun alcontraremos munchu tráficu.

 

Partimos de Recuerda (900 m) cola visión del Castillo de Gormaz

Asina qu'alborecemos mediu ceo, almorzamos y salgo del pueblu enantes de les diez, pa garrar camín hacia'l pueblu de Morales, pasando, como non, al llau de les bodegues de Recuerda, xustu enantes de garrar la rampla pela bas de la Muela, que llévame hacia un colláu dende'l baxaremos dexando a la mandrecha Valdeley, pa siguir de secute pela pista hacia'l pueblu de Morales.

Travesaremos Morales saliéndonos pel Calvario pa garrar el camino del Molino, hasta'l Alto la Mina, onde la pista va llevanos pegaos al rigu Duero durante más menos un kilómetru, pa dexalo un pelín de llau, siguiendo la pista que va llevanos hacia'l Molino Blanco.

 

Aportamos a Morales pa siguir camín hacia Aguilera al llau del rigu Duero

Pasamos pel Molino Blanco y con un pelín d'ascensu vamos ver el pueblu d'Aguilera más alantre, al qu'aportaremos llueu d'empatar cola carretera y GR-86 soriano. Dicir que'l restu'l camín veníemos del camín del Destierro del Cid, otra rede de pistes a lo llargo de les Castielles y Aragón.

Llueu d'esti tramín de carretera, aporto a Aguilera, que tien na so parte cimera, aparte d'una ilesia bien guapa que nun conocía, un vértice xeodésicu na muela enriba'l pueblu, nomada como Cabezo Grande. Con pocu más que xubir hasta la ilesia, dexo la bici y xubo nuna carrerina hasta'l vértice onde faigo semeya y tiro p'abaxo pa continuar ruta hacia Berlanga.

Pasiamos per Aguilar, visitando la so ilesia románica y faciendo cume nel Cabezo Grande (969 m)

Garraremos bici en descensu dende la Ilesia y travesamos per camín Aguilera pa salir per una pista en xubida hasta un altu (985 m) onde tendremos vistes al fondu de Berlanga y del so castillu. Siguiremos en descensu viendo les marques del GR86 y del Destierro, aportando a Berlanga, cruciando'l so porticu, pa caleyear hacia'l rigu Escalote, onde alcuéntrome cola so senda fluvial.

Pesie a tar munches vegaes en Berlanga, nun la conocía y prestóme pasiar, aprovechando pa enllenar agua nuna fonte, pudiendo ver el castillu per detrás, pa salir abandonando Berlanga, baxo la faldera del monte Coborrón, al qu'intento atopar el meyor puntu p'ascendelu d'una carrerina, alcontrándolo nuna entrada hacia una especie de mayada.

 

Fadremos la senda fluvial del Escalote pa siguir hacia'l monte Coborrón

Dexaré la bici un pelín escondida y tírome monte arriba, intentando siguir dalguna sienda de ganáu, ya llibrando dalgún vau pa nun tener que perder desnivel, per un tarrén pelín gafu de yerba, calizu y dalgún cardu pelín castrón, hasta aportar a la llanura que ye'l puntu cimeru del Coborrón de 1046 m.

A lo tuntu, 40 minutos fuéronse en facer el Coborrón ente xubir y baxar, tando de vuelta na bici casi a les 12 la tarde, entamando apretar el calor, asina que tenía que medir perbien les opciones pa nun terminar pasándolo mal, poro continué per pista hasta'l crucie cola SO-152, al llau del desaniciáu conventu de Paredes Albas.

Garramos caminos hacia Cabreriza primeru y Alaló dempués y finalmente Brías

La idega ya garrar la pista de concentración que xube a los altos penriba del valle del cañon del rigu Talegones, ascendiendo per tramos perpindios hacia'l Corral del Valle y na Cabeza de las Ánimas algamaremos descensu pelos Castillejos hasta'l cañón onde ya sigo en direición al pueblu de Cabreriza.

Pueblu, que paezme tien esta pista sólo d'accesu dende Berlanga y al que nun llego, quedándome con ganes de conocelu, ya que veo la opción de salir pel barrancu la Boliana hacia los altos, topándome un camín de monte pente sabinas, bien guapu que déxame na parte alta del pueblu de Alaló, siendo esta fastera más conocida, por mín, na ruta que ficiera andando pela zona al Cerro Abanco.

Facemos un últimu tramu superdivertíu dende Brías a Recuerda pela manzorga la Muela

Descenderemos hacia Alaló, ensin entrar nel centru, ya que tendremos al llau de la primer nave ganadera, la pista que tien de llevanos hacia'l pueblu de Brias, con un desnivel continuu n'ascensu que me funde, teniendo que parar a repostar agua y xintar una barrina na plaza'l pueblu, ya que sabía que'l tarrén que me quedaba namái salir de Brías, yera bien quebrapates.

Pelín recuperáu, salgo hacia Val de la Nava alcontrándome al pocu'l entepechu pa xubir a los Altillos, siguiendo teniendo dempués otra teúnica y pindia xubida pa baxar pel Vallejo del Madrigal hacia Val de Gormaz onde tenemos el caberu entepechu hacia los montes d'enriba de Galapagares que tantes vegaes anduve, alcontrándome ya col descensu más guapu y llargu del día, que dexaríame per Valdeaguilera a Detrás de la Muela, onde ya seguiría pista en descensu hacia Recuerda.

En resume, guapa circular de BTT de 48 km con un par d'ascensiones a pata, nun total de 4 hores y 45 min con un desnivel acumuláu de +/- 815 m que pa ser Soria, diz muncho del quebrapates pelos montes que nos metimos, pero sobretou quedándonos coles milenta posibilidaes de caminos y pueblos que quedan per conocer.