14 de Xineru de 2023
Track: Caña Valles (Cangues d'Onís) - Uberdón - Comeya - Ercina - Mosquital - Porra d'Enol - Teón
Tornábemos al monte, con munches ganes, dempués del parón navidiegu y díbemos facelu con una ruta afayaiza, pa baxar un pocu los escesos, pero sin que fuera seliquino de más. Pa ello, apeteciónos dar un paseín pela fastera de los Llagos de Cuadonga, pisando dende cuantayá los nuesos Picos d'Europa y preparando una circular que nos ficiera tachar d'una tacada un par de montes cimeros de segunda categoría.
Ún d'ellos ye la perconocía Porra d'Enol y l'otru monte ye la Porra Uberdón, que domina penriba la preciosa Vega Comeya y con grandes vistes hacia tola fastera alta del conceyu de Cangues y Onís, colos pueblos de Gamonéu casi a tiru piedra.
D'esti xeitu motivante, magar del almuerzu de rigor na Huera en Cangues d'Onís, tiramos pa los Llagos de Cuadonga, garrando l'aparcaderu del colláu la Caña Valles como puntu d'aniciu. La idega ye facer una circular dende esti puntu, asina que preparámonos y salimos gayoleros pela pista que tira pa Comeya, pela Inh.iesta Valles, abrigaos por mor del vientu, pa bien ceo, dir quitando capes según ascendemos hacia la collada Uberdón.
Abandonamos la pista, evitando una envuelta innecesaria, pa siguir un senderu qu'avéranos a la collada Úberdón, onde algamamos les primeres grandes vistes, de les Peñes Santes y del enorme Vega Comeya pela que pasaremos dempués. El grupu va peranimáu, charrando ensin parar y ye que les nueves incorporaciones al GM Xuan de la Borrina, Vane y Sara, aparte de traer más collacios al monte, dan un aire frescu y siempre motiváu de conocer llugares y patiar.
Ensin danos cuenta aportamos al colláu Uberdón y entamamos l'ascensu baxo l'atenta mirada de les utres al Porru Uberdón, alcontrando en tou momentu, delles siendes pente la broza, que déxenmos avanzar esnin mayores problemes hasta encumar los 1054 m, atopando lo esperáu, unes vistes bien guapes de tolos cordales costeros orientales y de los pueblos más altos del conceyu d'Onís.
En menos d'un hora dende que partiéramos ya tenemos el primer finxu fechu, poro siguiremos descensu sele pela so arista este, pasando pel Cantu L'Utre, hasta aportar al colláu Llanu Cantu, onde decidimos baxar a la Vega Comeya, nun decisión quiciás equivocada, ya que sedría meyor bordiar esti antiguu llagu glacial hasta la Rondillina y llueu per L'Apretaoriu averanos hasta L'Escaleru.
Nós, ente munches rises, cruciamos Comeya, qu'a estes altures del añu, ye una auténtica llamuerga, nun llibrando nin de broma a moyanos jeje. Colos pies como truches, garramos el camín central de la vega y ya averámonos hasta La Rondiella, saliendo pela cueva a la parte baxa de les mines de Buh.errera, onde asítiense tolos edificios turísticos del Parque de Picos d'Europa nos Llagos.
Al igual que na ruta que ficiéramos va munchos años dende Cuadonga a los Llagos per Priena, travesaremos les mines aportando al Campu la Tiese pa dar vista al Llagu La Ercina. La verdá ye que facer estes rutes, fuera de temporada, percorriendo llugares masificaos en branu, ensin cruciar más qu'una decena de persones, pon en valir lo guapo del paisaxe astur, mineru, ganaderu y montañeru enforma, ya que la vista hacia les cotes más altes del Cornión, dende la Peñeblanca y Robriza, pasando peles Peñes Santes y aportando hasta la fastera d'Ordiales, ye una pasada dafechu.
Como siempre, bordiaremos el llagu La Ercina pela so mandrecha, aportando a Las Reblagas, onde entamamos l'ascensión al Cantu la Piedra'l Llagu (1282 m) con guapes vistes de la Ercina, pa siguir crestéu alantre hasta'l picu Mosquital (1284 m), onde aparte d'algamar el so vértice xeodésicu, ganamos vistes per primer vegada del llagu, la vega y la Porra Enol, l'otru monte que queremos visitar nel día de güei.
Baxaremos apriesa del picu Mosquital, colando del vientu molestu, siguiendo d'entamu'l crestéu, pa terminar por descender pela Cuenye la H.elguera, siguiendo los pasos más afayaizos hasta enllazar col senderu que vien dende'l llagu Bricial, caleyando ya con tranquilidá hasta'l refuxu de pastores de la Vega Enol, onde tenemos a bien, parar a xintar y tomar una cervecina con tola calma.
Llueu del descansu, con 4 hores nes pates, entamamos l'ascensu al otru puntu importante de la ruta, como yera la Porra Enol, l'otru monte qu'entá nun pisara y que sorprendióme pola guapu del ascensu y sobretou poles grandísimes vistes, teniendo una panorámica ablucante del macizu del Cornión más cercanu y de los Urrieles, con toles sos grandes cotes a la vista.
Si la xubida ye guapa, la baxada ye preciosa per un camín empedráu, camín de la Porra, que n'envueltes dexarános cerca del colláu Les Valeres, pa descender cómodamente hacia la mayada de Fana, pela que pasáremos va munchos años nuna travesera, desviándonos xusto antes hacia'l mayaín de Gumartini, onde siguiremos camín hacia la mayada de Teón.
Los nuesos pasos tranquilos de mayáu en mayáu, sedrá siguiendo los senderos que vamos viendo, siempre intentando llibrar la carretera, hasta qu'a la salida de Teón, baxo l'Arcu Teón, mítica peña con forma d'elefante arrescotiáu, nun alcontraremos sienda afayaiza pa travesar los h.oos de la Gallina, llugar abegosu de caleyar, hasta Dua, teniendo que facer malpenes un kilómetru d'asfaltu.
Dicir que'l track toca menos de mediu kilómetru, descendiendo hacia los h.oos, per siendes un pocu perdíes, pero quiciábes nin paga la pena facelo, ya que tamos nun tarrén caóticu y tomáu pela broza. Escayándome por testerón de nun tocar carretera, alcanzo al restu del grupu, que taba baxando pela Cueñe Valles dende Dua hasta Caña Valles, onde zarraríemos esta preciosa circular.
No hay comentarios:
Publicar un comentario