viernes, 9 de diciembre de 2022

Sorrodiles (Cangas del Narcea) - Picu Sigueiru - Val.láu - Sonande

3 d'Avientu de 2022

Track: Sorrodiles (Cangas del Narcea) - Picu Sigueiru - Val.láu - Sonande

Continuamos colos bonos vezos de dir de monte, sacando del tinteru o más bien del llistáu de Montes Cimeros d'Asturies, otra posible ruta, que llevásenos a conocer otru cachín del enorme conceyu de Cangas del Narcea, nel suroccidente astur, que tan pocu valoráu ta y que tanto tendrá que dir ufreciéndonos nos prósimos años.

Del mesmu mou, que na visita al picu'l Cabril y Rabu L'Asnu, tornamos al val.le Cibea, pero esta vegada díbemos quedanos en Sorrodiles, crucie de caminos pente la CN-4 a Xinestosu y la CN-8 hacia Val.láu, aparcando delantre'l chigre'l pueblu y preparándonos pa una xornada de monte bien fría.

Partimos de Sorrodiles (670 m) en Cangas del Narcea

La verdá ye que la meteo empobinónos hacia'l suroccidente, ya qu'en toa Asturies namái que llibraba pa esta fastera, asina qu'aportamos a Sorrodiles, magar d'un viaxe en coche lloviendo hasta Cangas de Narcea, pero a partir d'equí los claros y ñubes diben ser una costante nel día, eso sí, entamamos a caleyar de Sorrodiles hacia'l pueblu de la Riegla de Cibea, con tolo que teníemos d'abrigu puestu.

Pasamos per Cibea y continuamos per pista hacia'l pueblín de Sigueiru

Travesaremos la Riegla de Cibea, saliéndonos a la mandrecha pel PR del Val.le Cibea, el cuál fadrános caleyar cómodamente per pista de tierra, alcontrándonos con dalgún touterrenu de los cazadores, demientres el día va abriendo pocu a pocu, amosándonos vistes hacia la fastera contraria del val.le Cibea, col pueblu de Fontes de Corveiru pembaxo del Rabu L'Asnu, como notes más destacaes.

 
Averámonos hasta Sigueiru p'ascender hacia'l L.lanu la L.linde 
 
Magar de pasar el L.lanón, el Castril.lón y las Fontaniel.las facemos una cabera amplia envuelta hasta la Braña La Riegla, pa empobinanos al fín, hacia la capiel.la San Francisco, xustu a la entrada del pueblu de Sigueiru, onde a la par de los varios molinos d'agua esistentes, saldremos penriba'l pueblu hacia'l L.lanu Sigueiru.
 
 
Aportamos pente restos de ñeve al L.lanu la L.linde onde abellúgase una enorme repetidor

El camín pel L.lanu Sigueiru sedrá una llarga recta, hasta per primer vegada esti añu, pisar ñeve cayía al altor de la fonte los Pascones, pa continuar pelas Cuartas nuna amplica envuelta hasta terminar la pista nel L.lanu La L.linde onde asítiase un repetidor y el nuesu destín xustu detrás: el Picu Sigueiru, en sierru cuarcíticu qu'asoma pente la vexetación.

 
Bregamos un pelín p'acceder al cumal del picu Sigueiru

P'acceder al cumal, saldremos per detrás del casetón del repetidor per un senderu que bordea cómodamente pela fastera sur, hasta que tiramos a pinchu, bregando coles urcies, unes vegaes penriba y otres pembaxo, pa terminar trepando un pelín nes peñes cuarcítiques, dando preste a los 1502 m del Picu Sigueiru.

 
Cume del Picu Sigueiru (1502 m)

Como ya dixe, ye ún de los montes cimeros d'Asturies y pesie al día pelín revueltu, nel qu'en dalgún momentu hasta ñevónos, les vistes sol valle d'Arbas hacia'l puertu L.leitariegos son increyibles, asina como al valle de Rimulín, onde ficiéramos una increyible ruta va dellos años al Caniel.las y al Rogueiru, el cuál tenemos xustu enfrente nuesa.

 
Continuamos ruta col envís de conocer delles brañes de los pueblos d'Arbas

Nesa direición decidimos baxar, por conocer delles brañes de bon interés ya que tamién podríemos crestiar penriba'l cordal hasta Val.láu, pero paeciónos más interesante descender per L.lavandera y el L.lanu Regu hasta la guapa braña de Caldevil.la, onde garraremos la guapa pista que vien de la braña L.linde, hasta otru puntu de gran interés como ye la braña L'Outeiru.

 
Siguimos de braña en braña per L'Outeiru onde ascendemos hacia'l col.láu la Matil.la

Lo guapu d'esta faldera ye ver tolos pueblos del valle pembaxo les brañes de la so propiedá y por suerte nel intre, el día abriera teniendo guapes vistes de montes como'l Cuetu d'Arbas o el L.lanu Los Penones, al que-y vemos unes grandioses posibilidaes como monte esquiable, si la ivernada fuese lo suficientemente curiosa.

 
Descendemos hacia Val.lau pa continuar col percorríu del val.le Cibea

Nestos camientos andamos demientres ascendemos hasta'l col.láu la Matil.la, siguiendo camín a mediu altor penriba la braña L.lindouta y pembaxo'l picu Matil.la, hasta descender al L.lanu Cimeiru onde enllazamos de nuevu col PR del Val.le Cibea, descenciendo n'amplies envueltes hasta'l pueblu de Val.láu.

 
Llarguísima vueltona pel percorríu hasta L.lindeuvecha pa tornar a Sonande

En Val.láu baxaremos hasta la Chabola onde echamos una güeyadina al cartelu del PR y vemos la llarga envuelta hacia'l valle de L.lamera, más en concretu hasta L.lindeuvecha, onde nun podemos parar de mirar l'enorme val.le que xube hacia los altos y que pensamos percorrer pa otra vegada y si ye con esquís pa visitar los Penones, sería una ruta increyible.

Dende equí, descenderemos con vistes hacia los pueblos de L.lamera y Sonande, aportando hasta este últimu, escaeciendo un pelín el PR, ya qu'ascendía de nuevu hasta L'Entrao y nós preferimos garrar un camín pelas Veigas que diba depositanos de nuevu na Riegla Cibea, onde siguiríemos hasta Sorrodiles, zarrando una circular de 19.5 km, +/- 1000 m de desnivel acumuláu nun total de 6 hores y 15 minutos.

Camudando'l Camín pel Val.le Cibea

No hay comentarios:

Publicar un comentario