Camín de la Molina - Banduxu (Proaza) - Picu'l Vialar - Valle'l Robledal

27 de Payares de 2022

Track: Camín de la Molina - Banduxu (Proaza) - Picu'l Vialar - Valle'l Robledal

Llevábemos dellos findes, intentando preparar dalgo pa festexar el XIII Aniversariu del GM Xuan de la Borrina, pero la meteo fue arrequexándonos hasta decidir facer un día solu d'actividá, preparando una xinta a posteriori y mira per onde, nun mos salió mal, ya que xuntámonos casi 20 persones pa l'actividá y la fartura.

Poques vegaes pasa qu'escoyemos la ruta, magar de ver un menú, pero esta vegada asina fuera, poro col llugar escoyíu nel Sabil, tocaba restolar que facer pel valle'l Trubia. Como siempre, tuve preparando milenta tracks, algamando unes posibilidaes perbones pa rutes potentes pel Cordal de Caranga u otres cola idega de conocer valles pente los conceyos de Proaza, Tameza, Grau y Teberga.

Semeya de grupu na Senda L'Osu (280 m) en Proaza

Pero pa una mañanera rápida, ocurriósenos visitar el pueblu de Banduxu y que meyor qu'intentar facer una circular, asina que tuve buscando la manera, como non, entamando pela mítica ascensión pel Camín de la Molina, qu'entá nun conociemos, asina qu'aparcamos nel PK 21 de la As-228 y preparámonos pa caleyar tol grupu.

Esfrutamos del camín empedráu de la Molina al so pasu per Covanera

Cruciaremos la ponte hacia la Senda L'Osu y pocos metros en direición Proaza, ya saldrá'l camín empedráu que tien de xubinos hacia Banduxu. Son d'esos díes, que vas más pendiente de charrar colos collacios que del paisaxe, pero'l camín ye guapu y bien curiáu, con tramos como'l de Covanera y dellos saltos d'agua que van faciendo l'andar mui entreteníu.

Vamos caleciendo'l cuerpu llegando a Banduxu con una bona sudada

Ensin danos cuenta, vamos faciendo desnivel (340 m) saliendo per varies envueltes, pente una guapa viesca hasta garrar camín hormigonáu na parte baxa del pueblu, saliendo peles primeres cases del Palaciu, algamando vistes hacia'l cordal de Caranga y al conxuntu hestóricu de Banduxu, al que continuamos a conocer.

Paseín per Banduxu parando nel torruxón y la ilesia ente otros llugares

Daremos un paséu per tol pueblu, pudiendo esfrutar de toles edificaciones, bastante bien conservaes, con bones paneres y horros, el torruxón y la placina la ilesia, pa siguir camín peles cais, atopando'l chigre, anque decidimos non parar, ya que la siguiente parte de la ruta nun la conocemos y nun sabemos que vamos a alcontranos, poro continuamos al barriu del Campal, onde tenemos una vista perguapa de Banduxu.

Baxamos de Banduxu hacia la Molina pa ascender pel valle L'Abechara

Saldremos del pueblu pela Molina, garrando una pista que tien de facenos ascender pel valle L'Abechara, tenienbdo ciertos problemas pa siguir el camín que teníemos trazáu, ya que reciéntemente desbrozóse'l monte abríendose creyemos una nueva pista, que lloñe de ponelo díficil, sacante del barru, diónos la oportunidá d'ascender tranquilamente hasta'l colláu col Picu'l Vialar, el cuál nun teníemos pensáu ascender pero vimos un cartelín y nin lo pensamos dos vegaes.

Ascendemos al Picu'l Vialar que sorprende poles guapes vistes de Banduxu

Nun lo pensamos dos vegaes, pero'l picu tien una trepadina per cuarcita, mui pocu adherente y que sin l'aida de dellos raigaños d'urcia hubiera sida más bien complicada. Asina que tiramos de recursos vexetales y trepamos hasta la cumera del Picu'l Vialar, onde alcontramos un buzón de cumes y lo meyor de tou, grandes vistes del pueblu de Banduxu y de tola redolada montañera de Proaza.

Cuma'l del Picu'l Vialar (714 m)

Pero les grandes vistes, nos lleven a ver que vien una ñube prieta dende Teberga, asina qu'entainamos y descendemos del Vialar pa continuar travesando, pela pista maderera, tol carbayéu hasta'l colláu'l Robledal (758 m) onde teníemos pensáu ascender al picu'l Robledal, pero viendo la pinta abegosa y tomada del cumal, quedámonos col Vialar y entamamos el descensu pel valle'l Robledal.

Descensu per pista del Valle'l Robledal hacia la Senda L'Osu

El descensu per esti valle sedrá cenciellu y mui rápidu, per un camín qu'en varies pequeñes y pindies envueltes, fadrános travesar un xoven fayéu, demientres la ñube entama a orpinar sele, dexándonos descender hasta un depósitu de borrafes sólides, onde damos por termináu'l descensu.

Empatamos cola senda L'Osu pa continuar en direición Proaza hasta l'aparcaderu

Pa finalizar la nuesa ruta circular, tendremos que caleyar unos pocos metros de carretera hasta retomar la Senda L'Osu, pela que caleyaremos pocu más d'un kilómetru tranquilu hasta atopar de nuevu la ponte, pela que travesaremos el ríu Teberga de nuevu y aportaremos hasta l'aparcaderu que teníemos dafechu completu, zarrando una ruta de 9 km, +/- 650 m de desnivel acumuláu nun total de 3 hores.

Banduxu pueblu hestóricu nun día de ñubes y claros

Cambiarémonos de ropa pente dalgo d'orpín y tocará dir hasta Proaza a tomar el vermú primeru y dempués hasta Villanueva en Santu Adrianu, onde ya sentámonos a la mesa a degustar un ricu menú, pente rises y munches alcordances de los cientos de rutes que llevamos nestos trece años de GM Xuan de la Borrina.

Cellebrando'l XIII Aniversariu del GM Xuan de la Borrina