Sellañu (Ponga) - Riega Salgaréu - Ruamón - Sorbeyu - La Güerfana - Cezulia - Pandiellos

 12 de Payares de 2022

Track: Sellañu (Ponga) - Riega Salgaréu - Ruamón - Sorbeyu - La Güerfana - Cezulia - Pandiellos

Dempués del día gafu que tuviéramos na ruta per Llaviana al Corbellusu, teníemos ganes de desquitanos y llueu de dar vueltes a la tiesta, Mario y yo, punximos la vista en Ponga, cola idega de conocer pela mió parte, la Foz de Salgaréu, pasu pente les peñes del Pierzu y la Güerfana, que tien bon camín pente Priesca y la collada Llomena.

Sicasí, tardamos en decidir la ruta y nun sé por qué, punxe la vista na riega Salgaréu, restolando peles redes, ensin alcontrar información, teniendo que falar con dalgún compañeru barranquista, por si taba nel catálogu d'Asturies y nun yera afayaizu pa los montañeros.

Partimos de Sellañu (245 m) en plenu parque de Ponga

Con varios planes nel tinteru, almorzaremos a les 8 la mañana na Huera en Cangues d'Onís y ellí, ente toos, decidimos probar suerte pela riega Salgaréu teniendo un par de posibles escapaes, tanto hacia la pista que xube de Priesca pela manzorga, como hacia la mandrecha hacia Pandiellos, pero siendo too una auténtica incógnita.

Conducimos hasta Sellañu, onde preparámonos nel area d'autocaravanes y saldremos caleyando dellos metros de carretera hasta la Sota, onde un cartel alvierte de "ruta peligrosa", anque nun sabemos de que ruta trátase, ya que camiento, qu'estos cartelos punxéronse va dellos años y quedaron nel escaezu, ensin marcar y ensin tar claro l'oxetivu, sicasí vimos otru cartelu, indicando como ruta turística a Ruamón y a Pandiellos, dos llugares con contábemos conocer, pero sin saber si taben marcaos de dalguna manera, pal ampliu mundiu senderista que carecemos anguaño.

Pasamos pela Sota hacia la riega Salgaréu per bon ampliu camín

Nestes rutes la tiesta nun ye a parar y en tou momentu voi fixándome en detalles y en senderos que salen per cada fastera, pero de momentu, en nuesu pasu pela Sota y posterior camín hacia la riega Salgaréu, yera un sele y guapu camín, hasta que perpasamos una portiella, continuando l'ampliu camín, hasta un depósitu d'agua, pocu dempués de la mecedura cola vallina Refueru Espiniella (según IGN), puntu que teníemos pensáu pa salir hacia'l Valle Tanda onde garraríemos la pista de Priesca.

Continuamos siguiendo traces de senderu penmediu la riega en dalgún puntu

Continuaremos per un paraisu verde, enllenu de vida, siguiendo'l calce de la riega en dalgún puntu, pero con traza de sienda pela manzorga, hasta aportar al Covayón, onde atopamos lo que creyemos un pasu insuperable, nuna foz con una fonda poza enmediu, que fainos salir a la manzorga per pindiu tarrén.

Sedrán unos 50m d'altor, garrándonos a los ablanos hasta atopar una guapa sienda que vien dende más arriba y que va dexanos nun sedu, pel que superaremos esta pequeña foz, pa llueu baxar hacia la riega, onde caleyaremos per más increyibles llugares, onde'l mofu nes peñes, les enormes fayes, los felechos del cretácicu lo menos dan tol verdor del mundiu a un paisaxe ponguetu total.

Nun somos a parar d'esfrutar d'esta maraviya riega de Salgaréu

De vuelta nel calce, tendremos un tramu nel que vamos siguiendo traces de sienda, teniéndolo que cruciar en dalgún puntu, hasta aportar a lo que tendríemos por desvíu hacia'l mayáu de Pandiellos, onde alcontramos cláramente un senderu que xubiría pela canal que marcara penriba'l mapa, sorprendiéndome de la vista qu'algamamos col trabayu nos mapas y la esperiencia llueu de campu.

Siguimos riega Salgaréu alantre desdexando la opción de salida hacia Pandiellos

Equí, miramos hora y calculamos opciones, decidiendo siguir riega Salgaréu alantre continuando esta pequeña aventura, que tan guapos llugares t'amosándonos. D'esti xeitu, nun tenemos ya track, ya que la última escapatoria yera hacia Pandiellos, así que toca continuar un gran tramu de riega, pela que tendremos que dir siguiendo siendes a un llau y otru del calce, ensin mayores problemes que nun resbariar peles peñes de la riega.

Decidimos salir riega alantre hacia Ruamón

Esti tramu, bien guapu, finalizará n'otru puntu nel qu'anque la riega, a simple vista transitable, estréchase, al alcontrar una guapa senda a media altura pela fastera drecha del monte, continuaremos per ella, hasta llibrar l'estrechamientu y baxar a la riega de nuevu, onde ya cruciaremos y abandonaremos Salgaréu, hacia los mayaos de Ruamón, atopando la primer cabaña a unos 50 metros d'altor de la riega.

Terminamos l'aventura per Salgaréu, saliéndonos a los mayaos de Ruamón

En Ruamón, tendremos un ampliu tramu pel que caleyaremos felices de completar tola riega Salgaréu, algamando vistes hacia'l picu Pierzu, la Güerfana,... pente cabañes en bon estáu y munchu movimientu de ganáu per tola faldera, que tendremos de dir superando hasta la so parte más alta, onde toparemos una pista d'hormigón que tien de llevanos hasta la collada Piedrafita.

Conocemos el camín hacia la guapa Foz de Salgaréu dende Ruamón

Nesta collada enllazamos cola pista que vien de Priesca y tomaremos un descansu ya que son les 12 la mañana y llevamos dende les 9 ensin parar. Llueu de picar dalgo, garraremos camín hacia la Coterona, onde topamos vistes de la xerra de Siña, pa baxo les falderes del Pierzu continuar hacia la guapa Foz de Salgaréu.

Travesamos la mayada Sorbeyu p'ascender hacia'l Picu La Güerfana

Perpasaremos tolos sedos armaos, entrando na propia foz pa de secute ascender hacia la cueva Les Pallombines, dexándola a la nuesa mandrecha pa bordiar la peña que divide la riega Salgaréu de la de Sorbeyu pela manzorga, pa siguir la riega Sorbeyu hacia la mayada homónima, onde echaremos un tragu, enantes de l'ascensión al Picu La Güerfana.

Ascensión pelín abegosa hacia'l Picu La Güerfana onde tocaba parar a xintar

Atoparemos un senderín que tien de llevanos fácilmente hasta la collada Sorbeyu, onde podríemos descender hacia'l pueblu ponguetu de Carangres o entamar l'ascensión a la Cruz de Valdoré, pero nós decidimos conocer el Picu La Güerfana al qu'aportamos dempués de travesar un tarrén abegosu, con muncha cotoya baxa y yerba llargo, ensin senderu definíu lo que dificulta la progresión.

Guapes vistes dende'l Picu La Güerfana (1263 m)

Pasaes les 2 y media, consigo poner al grupu en furrulamientu, ya que tengo na tiesta, que tenemos per delantre una baxada que nun conocemos y la lluz escosa pali pali. Teniendo en cuenta la xubida a la Güerfana, camiento que la baxada nun va ser meyor y nun m'equivoco res, faciéndose tediosa y mui llenta, crestiando l'arista oeste hasta'l Foyu Estrenchu, onde intentamos salir hacia la faldera sur, que lloñe de ser meyor, siguiemos lluchando coles cotoyes y yerba, aportando al colláu la Llama, un pelín hasta'l gorru de tarrén tan malo d'andar.

Descensu mui cansino del picu La Güerfana que quítanos les ganes de siguir a la Porra'l Toyu

Equí toca tirar de guía y viendo l'ascensión a la Porra'l Toyu, que pesie a la bona pinta del monte, nun albidramos senderu curiosu, decidimos desdexala, ya que con dos hores y media de lluz y una baxada que nun conocemos nun podemos perder más tiempu, así que descendemos del colláu la Llama y bordiaremos tola Porra'l Toyu per un senderín que va llevanos ensin perder muncho altor, siempre penriba del pueblu de Carangres y con vistes a les cares norte del Tiatordos y de la Llambria.

Bordiamos la Porra'l Toyu de camín a la collada Cezulia

Finamos la sienda saliéndonos a la pista que xube a la collada Cezulia, primeru y llueu al Fitu, onde asítiense delles visibles antenes. Na collada, tendremos de garrar un bon camín que debería de baxanos hacia'l mayáu de Pandiellos, pero alcontrámonos con una caxa de dos metros de camín, dafechu estrada de cotoyes, escayos y tolos vexetales pinchudos que tengamos na imaxinación.

Baxamos de Cezulia hacia los Pandiellos per un infiernu de cotoyes y felechos

Paez mentira qu'un camín tan grande, rexistráu en tolos mapes, con unes envueltes perfeutes seya imposible de caminar y tengamos que tiranos pela vallina a pinchu, pente los felechos, por suerte secos ya nesta dómina l'añu, algamando la parte baxa del camín, más llimpia al metenos de nuevu nun guapu fayéu, pudiendo caleyar esfrutando d'esti camín hasta Los Pandiellos, onde allúgase un guapu mayáu con cabañes y vida ganadera.

La lluz escosa y tenemos qu'apurar la baxada pel monte Pandiellos

Equí se supón que ya tendremos una baxada más llimpia hacia'l rigu Ponga y la carretera, pero'l grupu va mui llentu, ensin ver que tenemos una hora de lluz y más de 400 metros de desnivel que descender per tarrén non conocíu. Alcontramos, más o menos, como descender a la parte baxa de Los Pandiellos y demientres el grupu baxa, restolo perende como garrar el camín que nos baxe pel monte Pandiellos hacia la Sota Los Tobaos.

 

Descendemos hacia la Sota Tobao per Pandiellos con sorpresa final

Pa ello, facemos un sele descensu trasversal a la manzorga, garrando la vallina Los Pandiellos ya que de frente baxa otra canal pegáu a la Picoreta de la que nun tenemos información. Una vegada que garramos el camín, dalgo abandonáu, pero bon camín, diremos baxando lo más apriesa posible, ya que la lluz abandónanos hasta aportar a la parte baxa, onde pesie a ver les envueltes de Tobao enfrente y una nave ganadera embaxo nuesa, a nós tócanos alcontrar la puente pa cruciar el rigu Ponga, atopando a la  mandrecha la vallina, una pero nun estáu mui precariu.

La puente los Tobaos en mui precariu estáu

La verdá ye que cuando la ví dende riba, nun sabría si podríemos cruciar asína que descendí primeru y col atapecer dexando pasu a la nueche, crucié la puente con curiáu, guiyando ún a ún al restu del grupu pa que pasasen hasta l'otru llau del rigu Ponga, dellos metros pembaxo de la puente y con un fostión malu en casu de que cediese tal obra d'inxeniería... pal cable guía meyor nin mirar ya que taba d'un filu sólo engancháu.

Magar d'esta aventura final, xubiremos a la carretera contentos por tocar l'asfaltu na llende la nueche, teniendo claro, que nun se puede andar xugando coles hores de lluz, pero mui contentos pela ruta d'aventura que lleváremos a bien, saliéndonos nun total de casi 9 hores y media, un percorríu de 17 km y +/-1300 m de desnivel y lo más importante conociendo la riega Salgaréu que yera'l nuesu oxetivu cimeru.

Camudando'l Camín pela Ponga desconocida