martes, 15 de diciembre de 2020

Inguanzu (Cabrales) - Seu L'Home Muertu - La Canal - El Cuetón - Ostandi - Busnuevu

31 d'Ochobre de 2020

Track: Inguanzu (Cabrales) - Seu L'Home Muertu - La Canal - El Cuetón - Ostandi - Busnuevu


Segunda fola de la pandemia del horrendu 2020, no sanitariu y no económicu a estes altures pa muncha xente, quedándonos colo únicu positivu, que ye la posibilidá de salir al monte siendo federáu ya que tamos confinaos perimetrálmente nes grandes ciudaes.

Sicasí, somos conscientes de la gravedá del asuntu, poro xuntámonos namái que seis del grupu monte y vamos en coches separaos. Nel ambiente, toos tenemos un ruxerux de que quiciás ye la última ruta que vamos poder facer nesti añu, ya seya por cierre gubernamental o por pura responsabilidá de grupu.

Partimos del guapu pueblu d'Inguanzo (315 m)

Dicir, qu'al menos vamos zarrar esti 2020 con una ruta de les que faen espoxigar l'afición al monte y nun ye otra qu'una ascensión al Cuetón, pernomáu poles sos vistes de Picos, pero ascendiéndolo dende'l pueblu d'Inguanzu a los pies de la xerra Dobros.

Preparámonos y entamamos a caleyar pista arriba dexando atrás esti guapu pueblu, col envís d'empobinanos hacia la foz de L'Home Muertu. Pa ello, primeru fadremos les envueltes per pista hasta'l colláu Sordia onde tomaremos un camín que llevarános a travesar un tramu de monte baxo, hasta dirixinos ensin dubia a la foz del rigu Burdiu o de L'Home Muertu.

Salimos per pista pasando pol colláu Sordia hacia la Foz de L'Home Muertu

Siempre que voi conocer un sedu nuevu, ya sólo l'averamientu creame ciertes espectatives y dende lloñe voi acolumbrando cual ye'l percorríu. Nesti casu, ye bien guapu ver dende'l colláu de los Cuetos Pardos como'l senderu retuércese pa baxar hacia la foz.

Ablucante paséu pel seu L'Home Muertu

Nun tengo más que pallabres bones del seu de l'Home Muertu con un percorríu perguapu y entá bien marcáu, pel que disfrutaremos de cada pasu y nun podremos facer otra cosa que sacar milenta semeyes. Pero como toles foces y sedos que les traviesen faise hasta curtiu y ceo tábemos saliendo d'ésti col envís de continuar camín hacia la vega Ternás.
 
Salimos de la foz de L'Home Muertu ascendiendo a la vega Ternás

Continuaremos rigu Burdiu alantre hasta'l so ñacimientu onde una llamarga marca un posible antiguu llagu. Nel intre, tamos nun puntu onde podríemos escapar de vuelta ascendiendo hacia'l colláu Carraceda pel recuestu la Espina pero'l nuesu destín ye pasar per Ternás, o más bien per lo pocu que queda d'esta vegona, pa facer una envuelta y garrar tou un descubrimientu: La Canal.
 
Entramos a La Canal... un placer d'ascensión hacia'l Cuetón

Enantes topámonos con unos traileros que continúen camín hacia la baxera de la Cabeza Llerosos y la Peñe'l H.ascal colos qu'entamamos un breve alderique. Nós, pasamos al llau d'una bocamina na bas de la Cabeza Las Teyeras y entamamos la perguapa Canal, qu'amuésase ante nós llarguísima hasta'l so desendolque final na Vega Los Carros.

Pasamos pela Cueva'l Campillón de visita obligada

Llevamos un par d'hores hasta la entrada la canal y tan sólo tendremos que garrar el senderu más marcáu pa dir ganando tarrén pocu a pocu. El tarrén ye agradable, anque pindio, poro dalgunos collacios van sufriendo un pocu esa falta d'actividá, lo que llévanos a otros a averanos hasta la cueva'l Campillón, uno d'esos descubrumientos maraviyosos de Picos, alcontrándonos con una doble bóveda con vistes a la Cabeza Llerosos.

Finamos La Canal na impresionante Vega Los Carros

Taremos un ratín esfrutando de la cuevona y siguimos camín pela Canal arriba, axuntándonos colos collacios al altor del desvíu a Ostandi. Como comenté, la circular tien dellos puntos estupendos p'abandonar si se nos fai mui dura, pero como vamos a perder el climax final d'aportar a la perguapa vega los Carros onde alcontrámonos con unes vistes de Picos de lo meyor.

Imposible parar de sacar semeyes en toles direiciones de camín al Cuetón

Casi 4 hores dempués, tenemos tol macizu central de frente, con una semeya épica de tola ascensión hacia'l H.ou Los Cabrones. Tanto ye así, que quedamos embobaos col paisaxe, sacando milenta semeyes caún col so móvil y albidrando que ye caún de los cumales que tenemos enfrente nueso y tamién a la mandrecha onde'l Cornión apaez tamién ablucante.

Cumal d'El Cuetón (1650 m)

Con pocu más, crestiamos sele hacia'l cumal d'El Cuetón onde alcontramos tola tranquilidá pa siguir acolumbrando los Picos y baxar un pelín hacia'l norte, pa evitar el molestu vientu y poder xintar cola calma. Darréu, tendremos un llargu descensu, pero colamos d'El Cuetón, cola sensación de tener nel bolsiellu una gran ruta, percompleta y con un toque final de los que marquen pa siempre.

Descendemos hacia Ostandi descubriendo un llugar bellísimu

Col banduyu enllenu, durante la media hora na que descansamos, desfacemos camín un pelín hacia la vega Los Carros, desviándonos enantes pa entamar la baxada pela vega Les Salgueres hasta otru requexu máxicu como ye la vega d'Ostandi, llugar guapu onde los haya nesta pequeña fastera del Cornión.

Pasamos per Dubrieyu con vistes a Portudera pa siguir hasta'l portillu Busnuevu

Magar d'abandonar Ostandi, onde dan ganes de quedase a vivaquiar, continuamos camín descendiendo pel valle Cuadriscada, hacia'l desaniciáu mayáu de Dubrieyu, aportando per guapu camín hasta'l colláu Carraceda, onde ganamos vistes a la xerra Portudera y siguimos averándonos a la xerra Dobros, la cual travesaremos de nuevu, esta vegada pel Portillón Busnuevu.

Cruciamos la xerra Dobres pel seu Busnuevu pa siguir descensu hacia Inguanzo

En Busnuevu, toparémonos con un sedu pel que baxaremos en amplies y colgaes envueltes hasta una pista formigonada que vien dende Arenas. La pista tocarémosla pocu y siguiremos per senderu primeru y llueu camín hasta la braña de Sel del Veneru onde continuamos hasta Sordia, pa garrar la pista na que piesllamos la circular de güei.

Con 8 hores y media de ritmu curiosu, aportábemos a Inguanzu de nuevu, onde esperábanos el chigre'l pueblu abiertu, pa saciar la fame y la sede que nos fizo los 16,6 km de percorríu y los 1600 m de desnivel acumuláu, lo qu'amuesa que la ruta ye aparte de guapa mui completa y esixente.

Camudando'l Camín per Cabrales

No hay comentarios:

Publicar un comentario