H.uente Prieta (Cangues d'Onís) - Peña Cebolleda - La Fragua - H.ustigallar - Ridimuña - Pandecarme (Cangues d'Onís)

21 de Xunu de 2020

Track: Pandecarme (Cangues d'Onís) - Camín de la Maera - Gurbiñales - H.ungumia - Vegarredonda - H.uente Prieta (Cangues d'Onís)

Alborecemos penriba los 2000 m d'altor, con poques ganes de salir del sacu, ya que ta fresquín, fresquín. Sicasí, pasamos bona nueche, col mantu estrelláu enriba de nueso, lo cual fizo quedar nun sueñu fondu y placenteru achucaos nel sacu y la funda vivac.

Alborecemos na H.uente Prieta (2090 m)

Caún al so ritmu, va poniéndose en marcha y esta vegada a los 4 valientes que conocieron dalgunos requexos del rigu H.ungumia y de la fastera baxa del Cornión, van sumase'l restu del grupu vivaqueru que facieren el día anterior la Torrezuela.

Salimos de la H.uente Prieta hacia la cume Cebolleda

Col mini almuerzu nel estómagu, saldremos de la H.uente Prieta, xubiendo a pinchu hacia la cume Cebolleda, pasando per una guapa forcadina, que fainos tener que destrepar un canalizu hacia la panda que vien dende'l mosquil.

Ascendemos de la cume Cebolleda a conocer les torres de Cebolleda

Con un pocu d'ascensu per una canal aportamos a la cume Cebolleda, colláu qu'enllaza tol cresteríu de los Argaos coles peñes de Cebolleda. Nesti puntu, nel que la xente decide si anímase a facer dalgún cumal o non, ya me paro a trazar un descensu afayaizu pa completar una xornada guapa en Picos.

Ascendemos per tarrén aéreu y entreteníu a la primer peña Cebolleda

Saldremos p'arriba per tarrén cenciellu hasta un primer hombru, onde quédense dellos collacios, pa llueu bordiar el cumal pela manzorga, pasando a tarrén pelín aéreu sobre H.uente Prieta pero sin complicaciones. Llueu, garraremos el canalizu más evidente y trepes entreteníos aportaremos a la crestería p'algamar los 2330 m d'esta primer peña Cebolleda, qu'agasáyanos con unes vistes de primer orde del oriente astur.

Cume na primer peña Cebolleda (2330 m)

Yera la primer vegada que metíeme nestes peñes de Cebolleda, así que prestóme muncho l'ascensión, pero tirando'l vientín fríu que padecíemos, tocaba baxar, recoyer de vuelta a los compañeros y entamar un descensu si cabe más prestosu que la propia ascensión, ya que vamos metenos poles Barrastroses per tarrén calizu bien divertíu.

Baxando poles Barrastroses hacia'l colláu la Fragua

Lo mesmu que nun xubiera enxamás a nenguna Cebolleda, nunca me diera tampocu por meteme poles Barrastroses hacia la cume Cebolleda, así que'l descensu per esta amplia vallina, fue un placer calizu, destrepando y trepando per llambries, cruciando ñeveros, siendo tarrén aventura cien por cien, hasta la parte baxa onde alcontramos dalgún h.itu d'accesu al corredor del Marqués.

Aportamos al colláu la Fragua pa empobinanos hacia'l Resquilón

Personalmente, casi se me fizo curtiu, camentando qu'al restu del grupu tamién-yos prestó, aportamos al camín que vien dende'l H.ou Santu y ya per tarrén perconocíu averámonos hasta'l colláu la Fragua, onde, sacante Benjamín, col que voi rememorando per onde abrimos buelga n'aquella ruta al Picu Los Asturianos, el restu'l grupu va conocer un descensu alternativu hacia Pandecarme.

Pasaremos pela Vega H.ustigallar pa siguir hacia la canal de la Mostaya

Al igual que naquella ocasión, vamos pasar de la Fragua al colláu Resquilón dexando'l Cantu Llimpóu a la nuesa mandrecha, siguiendo camín hacia la Vega H.ustigallar, ún de los sitios con un encantu especial nel Cornión y mui pocu conocíu. Pasiar per esta enorme vega, ensin naide más, sabiendo lo cerca que ta de Vegarredonda, faime valorar muncho estos años de conocer y conocer, de camudar siendes perdíes por caminos trillaos.

Caleyamos sele al llau del rigu Ridimuña aportando a Pandecarme

Saldremos de H.ustigallar, llueu d'un pequeñu descansu, pa siguir descendiendo pela Vallesca hacia la tranquila y solitaria vega d'Orrial, onde ya garraremos la canal de la Mostaya, que percorre tol valle del rigu Ridimuña, el cual nos dirá acompañando nel nuesu andar hacia la vega'l Güertu onde enllazamos col camín normal que vien de Vegarredonda que va dexanos de nuevu en Pandecarme.

En resume, ruta bien interesante con una ascensión picantina, que nel día, pudiera facer una circular perfeuta, xubiendo per Vegarredonda y Mosquil, pa facer esti descensu tan prestosu de 1300 m de desnivel negativu, polos 300 de positivu d'esta xornada, teniendo un percorríu de 10 km nes 6 hores y media de ruta sele.

Camudando'l Camín nel Cornión