Castaedo (Villayón) - Prao Roque - Os Gargalois - Carondio

14 de Xunu de 2020

Track: Castaedo (Villayón) - Prao Roque - Os Gargalois - Carondio

Facía años, que nun volvía a preparar una ruta pa tachar dellos montes nomaos por dalgún motivu, como pueden ser los techos de conceyu. Poro, nesti casu y tamién por camudar un pelín de fastera asturiana, averámonos al suroccidente pa facer los techos de Bual, Eilao y Villayón.

Salimos de Castaedo (465 m)

Pa ello, magar de tomar un bon almuerzu en Navia, xubiremos hacia'l conceyu de Villayón pa aportar, magar d'un viaxe llargu y guapu a la mesma vegada, hasta'l pueblín de Castaedo. Aparcaremos los coches y saldremos pel pueblu p'arriba, siguiendo un camín que tien de dexanos nel Chao A Sella.

Ascendemos hacia'l Prao Roque pasando pol Chao a Sella

El día, anúncianos que nun lo diba poner cenciello de primeres, así que al par d'una cabana, Haritz y Jenny deciden dar un paséu a media lladera de la xerra del Prao Roque pa volver pol valle del rigu Cabornel. Nós, siguiremos pel chao ascendiendo per una especie de cortafueos hasta garrar un senderín que llévanos al prao Roque primero y al cumal d'esti monte de 1118 m.

Cume borrinosa del Prao Roque (1118 m)

Tamos nel techu de Bual, pero nun vemos res, dame penina, porque son fasteres d'Asturies que nun domino tanto y presta muncho intentar saber onde tamos realmente. Ensin más, descendemos y entamamos a crestiar pel cordal del Prao Roque hacia'l siguiente finxu del día, como ye'l Peneo Os Gargalois.

Siguimos pente'l borrín hacia'l Peneo os Gargalois

A tramos vemos dalgo más y llegamos al prau d'As Grovas, teniendo que mirar el gps pa saber cual ye'l penón al que tenemos qu'ascender, aportando al vértice xeodésicu del Peneo Os Gargalois (1166 m). Nún sólo ye que temos enmediu'l borrín, sinon que tira un airín frescu que fai nun parar nin media nos montes, poro toca escapar del techu d'Eilao.

Facemos cume nel Peneo Os Gargalois (1166 m)

Descendemos apriesa y siguiendo'l cordal alantre, paez que'l día quier echanos un gabitu viendo ya, el restu del cordal hacia'l Picu El Castello (1152 m), el cuál tamién encumamos, entamando ya a descender al collao Entrerríos.

Perpasamos el Castello pa descender hacia'l collao Entrerríos

Un llargu pero cómodu descensu, pelos praos segaos van llevanos a un puntu fuerte del día, como ye visitar el dolmen megalíticu de la Llastra da Filadoira. Travesaremos el colláu Entrerríos y nel chao el Pino, alcontrámonos con esti guapu dolmen, que caltiense nun bon estáu de conservación y onde decidimos parar a xintar dalgo, aprovechando que'l solín calecía y les ñubes dábenmos un respiru.

Al pasu pela Llastra da Filadoira el día abre demientres avanzamos hacia la Serra Carondio

Magar del descansu, toca ascender a otru cordal como ye'l de Carondio, el cual ta ocupáu en tola so estensión por un parque eólicu. La verdá ye qu'estos montes vivieron meyores momentos pa visitar, pero bono, son los tiempos que nos tocó vivir y con resignación ascendemos al alcuentru de los xigantes eólicos.

Guapa ascension al Picu Carondio col día más amable

L'ascensu al picu Carondio, faise entreteníu, per tarrén más vertical que nos anteriores y la verdá ye que les vistes son guapes y el cordal, con un verde bien fuerte, casi fai escaecer l'esbarrumbe ecolóxicu del parque. Fadremos el cumal de 1222 m, techu de Villayón y agora sí, descendemos ensín priesa, quiciás hacia un tarrén menos conocío polos montañeros según pude ver en dellos reportaxes.

Cume nel Picu Carondio (1222 m)

Aportamos a una llaguna bien guapa, viendo que lleguen unes tremendes pistes dende'l conceyu d'Ayande. La verdá ye que'l sitiu tien el so puntu y vamos esfrutándolos, parándonos sobremanera en cada túmulu y marca de restos megalíticos que vemos, siempre a la mandrecha d'una enorme valla que creyemos marca la llende del parque eólicu.

Caleyamos pente restos de necrópolis pela serra Carondio

Les miós intenciones, va muncho que van por percorrer tola xerra hasta'l vértice del picu Serrapio, pero según vamos averándonos, la silueta del Picuagudo, del qu'alcuérdome qu'había una reseña nel primer llibru de monte que me regalaron, va tomando muncha presencia como nuevu oxetivu.

Avanzamos per tarrén cómodu hacia'l Picuagudo, onde alcontramos sorpreses cinexétiques

Averámonos a la fastera Este del picu y alcontrámonos con un garrapiellu de robezos, mui tranquilinos, pero dende baxo, vemos unes siluetes con unes cornamentes bien dixebraes de ser robezos. Pa cuando aportamos, al cumal d'esti antaño, guapo monte, topámonos con cabres hispániques, ye dicir, lo que sería un mueñu n'Asturies, desaniciáu pola caza va decenes d'años atrás nos nuesos Picos.
 

Nel cumal del Picuagudo (1142 m)

Quedamos un pocu a cuadros y de la que vamos baxando voi dándo-y vueltes al asuntu y nun mos cuadra otra cosa, que temos en mediu d'una finca privada, onde tienes especies cinexétiques pal divertimentu de ricachones. Como lo de les llendes y prohibiciones nos montes, nun lo llevo mui allá, siguimos camín averándonos a la braña Zapurrel, onde directamente quedamos alloriaos col dineral invertíu en restaurar el palacete del dueñu la finca.

Perpasamos penriba de la braña'l Zapurrel hacia'l picu Serrapio

Al menos, decímonos en grupu, tien bon gustu la restauración, con toles cabañes revestíes de pizarra. Perpasamos penriba tol conxuntu arquitectónicu, pensando dende lo lloñe que yera un pueblu y averámonos al últimu oxetivu del día, facer cume nel vértice del picu Serrapio.

Nel casi vértice del picu Serrapio (991 m)

Cumal sí que ficimos, pero casi nun somos a alcontrar el vértice, que soi a velu dellos metros pembaxo nuesa tiráu, nun se sabe bien, si por una tormenta o polos dueños de la finca. Desfacemos camín, tornando al Zapurrel, onde agora sí, contando con que nun hai naide, nestos tiempos de postpandemia n'Asturies, que non en Madrí, podemos echar una güeyada con calma a tol palaciu del Marqués.

Facemos una visitina "alegal" a los terrenos del Marqués

A lo postreru, fuimos informándonos de la finquina del señor Marqués, del que nun pienso dar publicidá, porque nos tiempos que vivimos, que dalguien tenga una finca privada que pasa de les mil hectárees ye pa prendé-y fueu al mundu. El casu ye, que viendo como tan arreglaes les cabañes y el palaciu y viendo que tien la misma pinta que los edificios que dan cobertura al parque eólicu, paezme qu'enriba, poles molesties del parque nos sos terrenos, debió salí-y gratis la obra.

Usamos una pista de calter cinexéticu hacia'l pueblu de Auguamaroza

Abandonamos la zona habitada del Marqués y baxamos per una pista que va facenos descender al llau del barrancu Zapurrel. Dicir qu'esti tramu de baxada, sobremanera na parte inicial ye bien guapa, alcontrándonos dellos "artiluxos" de caza, comederos y demás, pa que los "clientes", que de xuru tendrán a bien, apostase a 5 m del comederu, con putes y farlopa (viendo qu'anduvo l'eméritu nestos dominios) y pegar tiros pa intentar escaecer les sos miseries personales.

Baxando a Auguamaroza con Castaedo al fondu

Como dixi, tomaremos esta pista en baxada en direición al pueblu de Auguamaroza, camentando que vamos tener salida cenciella, pero na parte baxa alcontrámonos cola valla qu'hores enantes llibráremos p'acceder al cordal de Carondio. Esta valla fízonos percorrer tola llende hasta alcontrar una pequeña puerta verde onde tuvimos salida Auguamaroza y d'ehí per carretera de nuevu hasta Castaedo.

En resume, ruta aconseyable pa conocer estes dos xerres, pero paezme que sólamente podría facese hasta'l picu Carondio, ya que'l restu nun sé si habría problemes col señor Marqués, si vos corren a tiros o que posibilidaes d'andar pelos sos montes hai. A nós, como digo, en fase 2 n'Asturies, llevónos facer la ruta unes 9 hores y media, con casi 26 km y un desnivel acumuláu positivu de 1400 m.

Camudando'l Camín nel dolmen megalíticu da Filadoira