viernes, 24 de julio de 2020

Caliao (Casu) - Peña Riegos

31 de Mayu de 2020

Track: Caliao (Casu) - Peña Riegos


Siguimos saliendo n'Asturies del confinamientu y les ganes del GM Xuan de la Borrina de salir al monte yeren inmenses. Por dalgún motivu, tornamos pa Casu de nuevu, por tercer vegada consecutiva, teniendo como oxetivu la Peña Riegos, la cúal tenía pendiente dende va tiempu.

Partimos de Caliao (660 m) con un día murniu

Pa ello, averámonos hasta'l pueblín de Caliao, el cual cruciaremos de forma ascendente hacia l'Este, pasando del llau del cementeriu y caleyando per bon camín pela Ería Veneros hasta les cabañes de Purufieru, col envís de da-y la vuelta al xerrón pa entrá-y a la canal de Valdefaces.

Averámonos y bregamos pela canal de Valdefaces... mui tomada y con milenta cabarres

Bien ceo, el camín tórnase en sienda y entama tornase abegosu l'avance. Falamos de casi 3 meses d'encierru y la vexetación ta en plan selvática, lo que nos fai avanzar en dalgun tramu penósamente. Lo pior nun son los escayos o dalgún tramu zarráu, lo pior ye pasar pelos mayaos, onde felechos de metru y mediu dominen los praos y les cabarres entamen a aparecer a cientos.

Facemos travesía pente'l colláu d'Osu y el colláu Vedilla con accesos y vistes de Caliao

Saldremos de Valdefaces al colláu d'Osu onde paramos a quitanos decenes d'elles de los brazos y piernes. A Kíla la doi por imposibles ya que casi nun doi a basto a quitales de la cabeza. Intentamos escaecer esto y darréu esfrutaremos d'un tramu de ruta bien guapu pasando de colláu en colláu, pasando pel Mediu, el Pequeñín y el de Vedilla, toos ellos con baxada y vistes a Caliao.

Garramos la canalina de Puru Cabreru saliendo al mayáu Felgueru

Nel colláu Vedilla, baxaremos a les cabañes de Puru Cabreru, onde entamaremos a garrar un canalina, la de Puru Cabreru, más curtia y menos tomada que la de Valdefaces. La verdá ye qu'esti camín tien un trazáu bien guapu que tien de llevanos hasta'l mayáu de Felgueru onde decidimos tomar un pequeñu descansu.

Travesando'l guapu monte Felgueru

El día ta poniéndose más murniu entá y fainos pensar que vamos moyanos sí o sí. Sicasí, dalgunos como Benjamín ya venía preparáu col paragües pa ello, los demás nos tocará tirar de goretex o chubasqueru. Nel intre, nun entamara a llover hasta más tarde y pudimos esfrutar d'un increyible paséu pel monte Felgueru, un fayéu de trazáu preciosu pel que ye una gociada caleyar.

Salimos del monte hacia Farriondas pa siguir pel Tozu les Teyeres hacia'l Cobertorial

A la salida del monte ya saldremos del abellugu de la fueya los árboles y diremos moyándonos nun tramu más perdíu hacia'l colláu de Farriondas. Cola tormenta paeciéndo pasar, siguimos camín pel Tozu Les Teyeres, empobinándonos hacia la collada'l Cobertorial, xustu dempués de travesar el mayáu de les Morteres, onde queden dalgunos restos de cabañes.

Pasamos peles Morteres pa garrar l'arista oeste hasta'l cumal de la Peña Riegos

Nel collada, algamaremos l'arista Oeste, pela que tendremos una guapa ascensión, abandonándonos un ratín la lluvia escapando la tormenta hacia l'Oeste como puédese ver nes semeyes, quedando a les nueses espaldes en direición Sobrescobiu.

Cume na Peña Riegos (1385 m)

Fadremos cumal, picaremos 4 coses y decidimos descender ya que'l día sigue mui complexu, oyendo dacuando dalguna tronada de les qu'aconseyen escapar del monte. Asína lo fadremos y descenderemos un pelín pela arista, pa garrar camín en travesía hacia la vega Isornu, onde tendremos nuesa baxada hacia Caliao, teniendo tamién habría accesu a la fastera del Alba.

Descendemos hacia Isornu pa baxar per pista sele hacia Caliao

Con pocu descansu más, descendemos hacia Caliao pel Valle Isornu pasando per guapes brañes con cabañes en perbon estáu, como Cobayos y los Llanos, saliendo un sol picantón nel últimu tramu de camín, qu'al menes sírvenos pa secar un pelín la ropa moyao.

En definitiva, circular prestosa, sobretou si la facemos na dómina serondiega-ivernal onde la vexetación seya más escasa, teniendo que superar un desnivel sele de 835 m, nos casi 13 km de percorríu, too ello en menos de 6 hores de patéu casín.
Camudando'l Camín dende Caliao

No hay comentarios:

Publicar un comentario