domingo, 29 de diciembre de 2019

Tresona (Corvera)

24 d'Agostu 2019

Nun too nesta vida va ser trepar y monte, o sí, pero bono, dacuando tamién préstanos dir pa la costa a tar relaxaos y que Kíla esfruta de la mar. Nesti casu, averámonos un finde a tar tiraos en Verdicio, nel conceyu Gozón, onde la perrina ñaciera casi pegáu a Carreño, n'Antromero.

Casi pasaron 7 años dende que la garráremos y fueron 7 años enllenos de bona vida pa Kíla, con llibertá pel monte, pela playa, siempre faciendo un pocu lo que-y dió la gana. Más menos, lo qu'intenta'l so dueñu facer cola so vida, pero paezme que lu tien más cenciello ella, que nun trabaya y ta tol día perende ensin esmolecimientos de nengún tipu.

Díes de sablera en Verdicio

Nun voi dar muncha cancha a lo bien que se ta nos aparcaderos de Verdicios, cola sablera, col pedreru pa los perros, col chigre con música en direutu, proyeiciones de películes o charres astronómiques... too eso, nun sólo finde, ye normal qu'aquello tea hasta la bandera.

El casu ye que tábemos ya fartos de zanganear y alcordéme de la reequipación d'una escuelina de cuarcita en Tresona, de la qu'oyera delles hestories y que un tiempu dempués punxera dalgo d'info el collaciu Dani Asturwaterman.

Apretando un pelín nun 6b d'entamu bloqueru

Coles mesmes, fuimos Ani, Rubén y yo a conocelo y anque'l sitiu nun espeutacular, tien el so puntu, esguilar pente ocalitos y en cuarcita. Aparte, toles víes que probamos teníen la so gracia, prestándome enforma trepar con canto romo y menos regleta calicera.

La verdá ye que nun da pa munches visites más, pasa lo mesmu qu'en Panondres ya que los graos son baxos y nun da proyeutar muncho. Paez mentira, que nun mes pudiera esguilar n'Asturies en dos escueles de cuarcita, como non tirando pal occidente astur.

Kíla alcontrando sitiu y Rúben catando la cuarcita corverana

Más menos, esguilamos un montón de víes de V y sestos baxos, esfrutando d'una escalada variada, onde moverse pa facer meyor les preses ye la clave y al menos quitamos un pelín de mono escalador que teníemos nestos díes de calorón que tuviemos nesta semana.

Lo dicho, escuelina que paga la pena conocer, pa echar unes rises, tastiar un tipu d'escalada distintu y combinar con un bañín en cualesquier de les sableres del cabu Peñes, así que bon plan la escalada en Tresona.

Camudando'l Camín en corvera con Ruben y Ani

Tresona
 
Croquis modificaos por mi de la escuela d'escalada de Tresona. Gracies y col so permisu.

2 comentarios:

  1. Buenes
    Lo primero felicitarte pol blog y lo segundu ye que si quies saber delles hestories vieyes de esta escuelina ponte en contautu conmigo soy de la 2° generación de pioneros empezé a esguilar nella dende'l 93.Por cierto conocimosnos l'otru dii n'Otura tabes encadenando Cavaliere y llueu xubimos xuntos al Callejon.
    Saludos
    Luis-1975

    ResponderEliminar
    Respuestas
    1. Que tal Luis... si ho, antes de terminar de lleer el comentariu ya sabía que yeres tu. A ver cuando coincidimos y me cuentes más de la escuela. Un abrazu

      Eliminar