Po (Cabrales)

29 d'Abril, 1, 2 de Mayu de 2022

Continúabemos de puente de Mayu per Cabrales, esfrutando d'unos díes maraviyosos d'esguilada y rises, cola idega de visitar varies escueles, pero sacante del día de las Llucias, engorilámonos en Po, pasando tres díes bien guapos apretando nesti estilu trepaor más bloqueru.

La tarde del vienres, xubiremos Anna y yo, demientres el restu del grupu avérase hasta Las Cabadas, escuela que por suerte, ya terminé d'encadenar entera. Mirando'l nivel de moyadura chorreril, nin mos planteamos para na parte baxa nin na más alta, asína que tiramos hacia'l seutor onde la Imnominata, vía que tenemos pendiente los dos.

Llibru n'honor de los aperturistes del Picu Urriellu

Personalmente, quiero probar el deu, ya que'l día anterior desficiera una yema y tocaba trepar con esparadrapu pa protexer un pelín esi deu, asina que munchu regletéu nun quería. Desdexamos la Imnominata, mientres Kíla fai del pié de vía'l so llugar de xuegu y nós restolamos cola guía, que vía podemos prebar.

 

Miramos pa Led Zeppelin y probámosla sacando como meyor podemos los pasos, con una secuencia atroz per romos y enantes un pasu de techu qu'hai que controlar. Por suerte, nun segundu pegue soi a facela, yendo de dos romos en dinámicu a una regle y posterior xarru salvador.

Esfrutando de grandes pegues a la Imnominata (7a+)

 

El tiempu nun dió pa más esti primer día, pal domingu, llueu del nuesu pasu pelas Llucias, xubir con Suco al líu, montando nun primer pegue, onde nun se puede acerar más pasos, la Imnominata y Púlpito de Levitación que comparten reunión.

Con un día nubláu, maraviyosu pa esguilar, vamos turnando pegues compartiendo métodos y pasos, nun trabayu colectivu onde les rises y los ánimos son la tónica del día. La verdá ye que la motivación yera alta y los pegues fueren fanáticos.

Encadenando la Imnominata nun pegue apretón

Personalmente, magar de montar la vía viendo que nin me movía, nun m'esperaba pa na, facela al segundu pegue, notándome mui fuerte nel bloque, pero tocó xestionar y sufrir tol restu de la placa, con munches posibilidaes de pringala na parte alta, paeciéndome una vía mui dura pa 7a, siendo pa mi idega 7a+ claramente.

Demientres Anna y Suco, siguíen dando pegues y sacando métodos, col día claramente fechu por mi parte, animéme a da-y un pegue a vista a Púlpito de Levitación, anque ya veía un pasu que dábame un pelín de terror y nel que nun se podía cayer de nenguna manera, xustu pa llevantase al Púlpito.

Pegue a vista a Púlpito de Levitación (7a+)

Nun sé mui bien cómo, tiro p'arriba, meto un talón nel Púlpito y salgo medio manteleando a chapar la cuarta, garrando aliendu al ver que ya nun me mataba. D'equí p'arriba, reposáu, salgo a vista, sacando les sencuencies pasando a un tramu de placa onde cierro regletes ensin xacíu y meto un dinámicu a una presa que nun sabía como yera, quedándome cortu por cms, a lo qu'a posteriori ví que yera un cazu que daría pasu posíblemente a mi primer 7a+ a vista... pero nun pudo ser.

Tovía tuviera tiempu a da-y otru pegue más nel que líome na parte de placa y nun soi a chapar, llanzando dinámicamente al cazu ensin garralu y pegando un volatil de los bonos, jeje. Dafechu reventaos, colamos los tres, felices magar d'un día fanáticu apretando en víes mui prestoses.

Álvaro un "local" de Po esfrutando del mundiu chorreril

Al día siguiente, llunes, espertamos nel mirador d'Asiegu, llueu d'una tarde de chigréu en Casa Niembro y furgonetéu, almorzando cola calma y viendo como la xente va cayéndose de los planes esguiladores. Nós, sentímonos obligaos a trepar ya que venía Álvaro dende Caravia, pero pa lo que nun tábemos preparaos yera pa xubir orbayando hasta'l seutor, teniéndonos qu'abellugar nel más desplomáu, en Chorreras.

Casi, ensin ganes d'esguilar y pelín resacosu, preparámonos p'asegurar a Alvarín que vien atómicu y calienta faciendo dos mítiques como son Alanvista y Entre Medusas, pa siguir faciendo Infiltrados, un 7a que sí qu'animámonos a probar Anna y yo.

Anna progresando per Infiltrados nel seutor Chorreras

Yo namái que-y dí un peguín y notéme tan cansáu que nun quise da-y un segundu, metíendose Anna a dar un mui bon segundu pegue, quedando lista pa otra visitina. Nel intre, el día ameyorara munchísimu y casi saliendo'l solete, averámonos hasta Púlpito, ofreciéndose Álvaro a montala, pudiendo yo dempués encadenala nel primer pegue del dia y probándola Anna, teniendo toos claro que ye más dura Imnominata.

Pa terminar, el xabalí d'Álvaro terminó metiendo otru pegue brutal a California Blues, otru 7a+ que completa la triloxía del seutor, pero que ya cola fundida que llevaba nun se pudo llevar. Darréu tocaba recoyer y baxar tranquilamente hasta l'aparcaderu, onde esperábanos la cervecina pa zarrar un puente mui positivu, llevándome un sétimu al día.

Po
Croquis modificaos por mi de la escuela d'escalada de Po, por mor de Entretenimiento Vertical. Gracies y col so permisu.

---------------------------------------------------------------------------

6 de Xineru de 2019

Dempués d'una selmana llarga per Cuenca diónos la ventolera de colar la nueche de reis hacia'l país, pero entá quedábemos con ganes d'esguilar más y envede empobinanos pa Xixón, tuviemos la brillante idega d'averanos p'Asturies per Cantabria y trepar en Po a la mañana siguiente.

Aportando al pueblín cabraliegu de Po... con una xelada brutal

Durmiríemos finalmente, con una xelada brutal n'Unquera y desmpués del almuerzu, saldríemos hacia Panes pa siguir camín hacia Po en Cabrales. Dicir que la entrada n'Astureis nun pudo ser más ablucante y ver tolos valles de Peñamellera a Cabrales totalmente xeláu a su pasu pel Cares fué increyible dafechu.

Encadenando la California Blues... perguapa de movimientos

Cola mañana fría enforma, esperamos a que'l sol caleciese los parés de la escuela de Po y xubimos cola calma hasta los seutores superiores onde esperábanos tolo contrariu a lo que tuviéramos esguilando per Cuenca, vía corta y esplosiva de movimientos.

Kíla con su clásica presión... dame arrgooo payo

Nun se m'ocurre otra manera d'acabar el viaxe que metiéndonos Orlando y yo en proyeutos que teníemos que probar y a ver si tovía quedábanos fuelle pa intentar dar bonos pegues. La sorpresa fue, que los dos fuimos a enchufar la California Blues (7a+/b) al tercer pegue y nun salió al segundu por nun tener pilotáu la parte de placa d'arriba.

Felino dando un pegón a Lord Byron

A esto sumámos-y los encadenes de Cris y Nico a la Innominata (7a/+) na que tuvieron una llucha bien guapa, dándonos a entender que vinimos fuertes del viaxe y menos cansaos de lo que de primeres pudiéramos camentar.

Colamos de la escuela de Po col tótem asturianu

Per últimu, tuviemos la suerte de ver dos pegues perbonos de Felix a Lord Byron (7c+) que nun la enchufó por mui pocu y como ye él, prefirió venir a tomar unes birres a H.ortigueru pa despedir el viaxe, ya que teníemos prisa nós, qu'esperar y da-y otru pegue onde de xuru que la encadenaba.

Al final... los collacios y les rises siempre tan penriba de los encadenes

---------------------------------------------------------------------------

11 de Xunu de 2016

A primeros de Xunu, entamaba lo que diba ser una gran constante nel nuesu branu particular asturianu y nun fue otra cosa qu'esguilar y dir d'acampada los findes, p'aprovechar al máximu estos mesinos del añu.

Vista de la escuela de Pó en Cabrales

La primer escapada ficímosla hacia Cabrales, agospiándonos nel camping d'Arenas y yéndonos Richar y yo, el sábadu pela mañana hasta la escuela de Po, na qu'aparte d'esistir grandes víes y un grau que nos supera, lo que llama l'atención son les vistes de Picos dende'l paré.

Abulcando col increyible paré

Ye ablucante finar una vía, aportar a la reunión y tener al Urriellu, los Albos y la Torre Cerredu de frente, asina qu'anque seya a menease lo que se pueda nos poco graos asequible qu'hai, el paséu, el pie de vía y les vistes ya pagan la pena.

Aprovechando la tarde lo meyor posible... apretando fino

Nós, anduvimos entreteniéndonos cola Prima Juana (V+), una variante nomada Canorín que saldrá 6a, pa llueu facer Surprise y Harakir qu'anden pente'l 6a+ y el 6b y Nacho que ye un 6b+ bien curiosu, qu'a parte del tramu de techín duru, tien una placa de salida a reunión pa cagar trito.

Despedímonos col Picu, Albos, la Torre Cerredu... tela les vistes

Colos deberes fechos y l'atapecer avanzáu, baxamos a Arenas, onde tovía taben los traveseros aportando a les 10 de la nueche a meta magar d'un esfuerzu descomanáu. Lo nueso, ya yera más cenciello, sentanos a tomar unes cerveces demientres sumábense a la folixa nuecherniega Zori, Pepa y Jose.