La Concha (Valles Pasiegos) - Fayéu de Zamina - El Toral

3 de Mayu de 2024

Track: La Concha (Valles Pasiegos) - Zamina - El Toral

Continúabemos de vacas pel Miera y a la espera que llegasen dalgunos collacios más pa esguilar el restu la selmana, decidimos de mañana salir a dar un patéu y conocer el recomendáu fayéu de Zamina, poro averámonos hasta'l barriu La Concha, pelín más arriba de Sanroque Riumiera, en direición al puertu Lunada.

Entamamos la ruta a la Zamina dende la Concha (575 m)

Ellí, aparcaremos la furgo y echamos un vistazu al cartelu indicativu, viendo que vamos tener que facer la circular completa, ya que dir ver el fayéu y volver diba ser igual de llargu, asina que baxamos dellos metros pela carretera y salimos pela manzorga nun camín n'ascensu, llueu de visitar un pequeñu y guapu tabayón na riega Los Pontones.

Salimos pegaos a la riega los Pontones hacia las Garmas Blancas

Saldremos entós camín arriba, per un camín pegáu a esta riega, pa salir a una fastera de praos y cabañes, nomada como Garmas Blancas, onde na parte superior aporta una pista que vien pel barriu del Ahorcado y que continuaría hasta'l cumal del Coteru del Teju. Sicasí, nós, siguiremos les marques del senderu y pasaremos pembaxo d'esti cumal, pela faldera de las Garmas Blancas, hasta una antigua braña, onde ya entamaremos un sele descensu hacia Zamina.

Averámonos hacia la viesca de Zamina con grandes vistes

Nel intre, vamos dir averándonos hacia'l fayéu de Zamina, pero nun podemos otra cosa que dar la vuelta dacuando y echar un vistazu a les grandes vistes que tenemos de tol valle del ríu Miera, d'estos valles pasiegos, con montes pelín allombaos pero de grandes praderíes que faen un paisaxe bien guapu, quedándonos con ganes de conocer importantes cumales, como la Porracolina enfrente, Peña Cabarga al fondu del valle o Castro Valnera al final del valle.

Entramos al fayéu de Zamina onde esfrutamos d'un paséu aseláu y mui disfrutón

Siguiremos caleyando cola vista puesta, nel próximu fayéu y pali pali, vamos adientrándonos pente'l verdor de les fayes y como non, pente les peñes calices, ya qu'esti fayéu ye'l típicu requexu calizu, onde les fayes ñacen pente les resquiebres de la peña y el camín que traviesa la viesca, antaño pa sacar maera camiento, ye una gociada, con armaures pente los foyos y percorríu bien guapu, anque digámoslo too, mui curtiu pa tan llargu camín hasta la Zamina, poro oxalá la viesca siga recuperando camín, pa facelo más grande.

Salimos de la Zamina con vistes al sur de valle de Miera

Magar de travesar Zamina, saldremos ya per camín cómodu en descensu hacia'l valle del Miera, faciendo na parte final delles envueltes pente guapes cabañes de La Peña, con vistes hacia'l sur pudiendo acolumbrar dellos montes con restos de ñeve cayida va un par de díes, como'l Picón del Fraile y restu de montes de la xerra de Valnera.

Finalmente, cruciaremos la carretera y baxaremos al valle, pa caleyar per pista, pegaos al ríu Miera, pasando al llau de la ermita del Toral, siguiendo'l cursu del rigu hasta La Concha de nuevu, onde zarramos una circular de casi 9 km y  +/- 380 m de desnivel acumuláu que ficimos en tres hores tranquiles de mañana.

Camudando'l Camín pelos valles Pasiegos