La Paraya (Ayer) - Peña Cuaña

23 d'Avientu de 2017

Track: La Paraya (Ayer) - Peña Cuaña

Finales d'añu, casi en nuechebona y por mor de la meteo, desplazamos ún de les rutes hasta esti finde y con bon gustu que lu facemos. Asina que, con menos altor de ñeve, vamos intentar ascender L'Esturbín que ya ficiéramos dende Tonín. 

Pero esta vegada, quiero facer l'averamientu dende Asturies, poro vamos conducir hasta'l pueblín ayeranu de La Paraya. Pa ello, facemos la ruta davezu dende Xixón, pela autovía minera hasta Mieres del Camín, onde garramos la A-66, hasta'l desvíu al corredor del Ayer.

Preparaos pa caleyar en la Paraya (657 m)

Llueu pela As-112, pasaremos per Morea, L'Escuyu, Los Estrul.lones y Cabanaquinta, siguiendo pela AS-253 per L.levinco, Entepenes y Col.lanzo pa siguir pela AE-6, travesando dellos pueblos como Cuergo, L.lamas, Rumañón, Casomera y finalmente La Paraya, onde deberemos tar sollertes pa nun liala intentando aparcar el coche nes sos estreches cais.

Magar de nun dexar entrancada la furgo nuna cai, preparámonos nun día frescu, averándose a saludar un mastín enorme que taba nos güesos y paecía cabeza namás. Coles mesmes salimos a caleyar pasaes les 9 la mañana en direición la Vega La Paraya.

Ascendemos pente pistes y brañes pela Xerra Yananzanes

Llueu, siguiremos siempre per pista embarrada hasta'l Vao onde un cachorrín tien la idega d'axuntase al grupu, saliendo d'esta braña per una viesca na que nos liamos un pelin dando al prau de Cuarta onde tornamos a garrar el bon camín nuna pista amplia.

Ensin pérdida siguiremos pista alantre per llargues envueltes hasta salir al calorín del sol, qu'aparte de danos dalgo de temperatura va amosanos les grandioses vistes a los altos d'esti conceyu d'Ayer, destacando pa nós, el nuesu oxetivu anicial como ye L'Esturbín de Valverde.

Con vistes a L'Esturbín salimos del Quentu'l Pubiyón hacia la Boya

Daremos fin a la pista, que déxanos nel Pubiyón (1243 m), magar d'una horina y cuartu de camín. Ellí, alcontrarémonos con una cacería como ye vezu nesta dómina del añu y como non, tien coyones que'l guarda avísenos de que tengamos curiáu... digo yo que sedrán ellos los que tienen qu'andar con güeyu que van armaos.

Como siempre, nestos casos, lo meyor ye tirar monte arriba, fuera de les pistes, ya que lo que vien siendo deportistes nun son los cazadores, siendo más d'apostase al llau del 4x4 = 16 y esperar pa pegá-y un tiru a lo primeru que se menee.

Aportamos al Cuetu la Boya (1771 m)

Como vemos el regueru de xilecos reflectantes, más menos pel camín que díbemos garrar, tiramos como ya dixe, monte arriba, metiéndonos nuna viesca bien guapa, pero na que calteníase la ñeve fonda y quitónos munchísimu tiempu demientres la travesamos.

Dicir que pa facer un kilómetru, echamos tres cuartinos d'hora, anque fue un tramu onde ganamos unos 300 m de desnivel. Llueu de salir a la fín de la viesca, garramos monte baxo, per onde pudimos avanzar hacia la cumera del cordal de Yananzanes.

Crestiamos hasta'l col.lá Bustroso

Los ritmos que llevamos nun paecen los más adecuaos y vemos que'l nuesu oxetivu ta per lloñe, a lo que súmase que tres compañeros del grupu, nun se ven pa siguir a bon ritmu y ta faciéndose-yos duro.

Con esti plan, charramos un ratín pa ver les opciones ya indíco-yos per onde pueden descender al val.le del Yananzanes. Demientres, los cuatru que quedamos decidimos intentar dar zapatu y al menos facer una ascensión hasta'l primer dos mil d'esta xerra, como ye'l Picu Cuaña.

Facemos la xelada ascensión al Picu Cuaña

Pa ello, tendremos que crestiar una sucesión de boyes (términu perutilizáu nesta fastera pa nomar un colláu o planos pente los montes: Pallabreru). El casu ye que xubiremos un par de cumales con esti nome, alcordándome d'otra ivernal brutal a otru Picu La Boya nel valle de Santibanes y aportaremos al col.láu Bustroso (1744 m).

Ellí, alcontramos una guapa brañina dende la cual vemos, que nun tenemos descenu hacia'l valle de Yananzanes, poro toca facer un ascensu esprés al Picu Cuaña. Pondrémonos a ello, alcontrándonos con un tarrén xeláu pero escarnáu de ñeve, siendo difícil avanzar ensin patinar.

Cume nos 2027 m del Picu Cuaña

Esto fizo qu'Haritz abandonase por nun sentise seguru y pocu más y quedo solu, nos casi 300 m de desnivel que quedábanos pa encumar los 2027 m del Picu Cuaña. Aún así, tanto Silvia, Alberto y yo, como los perrinos aportamos a esti dos mil que tien unes vistes increyibles, pero que recibíanos con un vientu xeláu que fízonos tar menos tiempu del deseyáu na so cume.

Aparte, tamos nes feches del añu que menos lluz y son casi les 3 de la tarde, lo que nos indica que como muncho tenemos otres tres pa descender, tando lo que vien siendo a tomar vientos. Ensín, baxamos lo más apriesa posible y xuntámonos nel guapu mirador que ye Bustroso onde Hartiz lleva tumbáu enriba les llábanes d'una cabaña echando un pigacín.

Descendemos esta vegada mirando pal Val.le Bustroso

Entamaremos el descensu y esta vegada vamos dexar el cordal de Yananzanes a la mandrecha nuesa y garraremos un camín que faldea penriba del val.le Bustroso. El nuesu envís ye facer esti camín abriendo buelga, lo más aina posible y una vegada perpasaos toles boyes faldiando buscar un descensu hacia La Paraya.

Los planes nun tan saliendo como teníemos pensáu pero la xente tien bon ánimu y el día ta tan guapu, que danos un pocu igual, andar a l'aventura y aportar de nueche al coche. El casu ye que plantámonos como non, n'otra Boya dende la que tenemos una visión perfeuta del valle Carrena.

Facemos tol camín hasta la mayada la Boya y decidimos baxar a pinchu al val.le Carrena

Paeznos una baxada apetecible de conocer, asína que tirámonos a pinchu hacia'l monte Carrena, pel que descendemos pela ñeve pasando un tramu realmente divertíu, anque a tramos yera pindio enforma.

Poquín a pocu, vamos saliendo del monte y alcontrámonos coles primeres cabañes y como non, colos primeros caminos que nos van empobinando valle abaxo. Simplemente, tirando d'un pocu de bon facer y orientación vamos dexándonos cayer pel valle, alcontrando llugares, cabañes, mayaos, que paguen la pena munchísimu... una pequeña ayalga esti valle Carrena.

Pasamos pel Fresnal, Cabornu y delles brañes bien guapes

Dirremos pasando pel Fresnal, Cabornu, Cándanos y per últimu na col.lá Las Piedras, entamaremos a facer envueltes pa salir de la faldera zorga del ríu y baxar a crucialu per Esfoyanas y paralelos a la Llanu'l Prau Rubiu, fadremos una pequeña últimu xubida pa salir penriba del pueblu de Casomera.

Dicir, que nesti puntu d'ascensión tamién sal un camín que va pelín más arriba de Casomera y axúntase nel Vao cola pista que garráremos delles hores enantes y que podría depositanos de nuevu nel pueblín de la Paraya.

Daremos per pistes formigonaes en Casomera y paseín hasta la Paraya

A nós, nun mos apeteció metenos en xardinos y sabíemos que dende Casomera a La Paraya malpenes tenemos un kilómetru y mediu, poro tampoco ye pa tanta patiar per carretera esa distancia. Eso sí, calcular, calculamos fino, porque según díbemos entrando en La Paraya la lluz del día escosaba y dabemos colos vehículos na más absoluta escuridá.

En resume... ruta que con ñeve ye quiciás escesívamente llarga, como p'algamar L'Esturbín, pero bono, dexándola hasta'l Picu Cuaña como ficimos nós, queda un paséu llargu igualmente pero de grandes vistes y valles bien prestosos.

Los 20 km de percorríu, 1585 m de desnivel positivu acumuláu y les 9 hores d'actividá amúesanos a les clares que ficimos tolo que pudimos... nun teníemos más hores de lluz p'aprovechar más el día ya intentar aportar más allá de Cuaña diba ser un marrón nuecherniegu.

Camudando'l Camín con esti pequeñu compañeru de viaxe