martes, 27 de julio de 2010

Travesera Picos (2009 - 2010)- Estaya 4: Vegas de Sotres (Cabrales) - H.idiellu - Malatas - Ándara - Sotres (Cabrales)

11 de Xunetu de 2010

Track: Vegas de Sotres (Cabrales) - Sotres (Cabrales)




Son casi les 9 la mañana, y dempués d'una nueche baxo les estrelles nas Vegas de Sotres (1040 ms), tan solo 3 de los 11 que llegamos a ser, tamos con fuercies y sin feríes pa facer esta cuarta estaya de la travesera integral de picos.

Ya yeren munches les despidíes nel día anterior en Sotres y agora dempués d'almorzar dalgún restu de los 4 díes, separtámonos de los que compartieren nueche con nós, y Fernan, Pangua y yo, empobinámonos a facer la segunda canal n'ascensión de la travesera, la canal de H.idiellu.


Entamando'l día

Como non, el nuesu Xuan de la Borrina, danos aliendu, cola ñebla anicial de la mañana, pa demientres ganábemos altor, amosanos tola canal y sos vistes, finando nun día abiertu y perguapu, que fai d'un positivu increible la decisión de siguir alantre col proyeutu.


La canal de H.idiellu nun día preciosu

Esta canal entama un pelín más abaxo de las Vegas de Sotres, poquín antes de llegar a la zona de Fresnidiellu, esáutamente na Concha'l Noru, y sigui'l cursu del ríu H.idiellu, nun ascender fácil y per senda marcada, que nos fai esfrutar pasu a pasu, escaeciendo quiciás l'esfuerzu pasáu na Canal de Dobresengros dos díes enantes.


Esi Fernan en H.idiellu

Nun caleyar rápidu a pesar del cansanciu vamos dando fin a esta preciosa canal, la cual nun díbemos finar hasta'l colláu Valdemingueru, ya que teníemos pensáu facer un par de dos miles que mos obligaben a desvianos a la mandrecha a un altor aproximáu de 1700 ms.


Casi na parte final de H.idiellu col mar de ñubes embaxo

D'equí, ensín demasiada dificultá vamos dar a la collá del H.erru d'Abaxu, onde axúntense la nuesa canal, cola del propiu H.erru al traviés de la Mah.era. Xustu nesti puntu, ye onde averámonos a facer les dos cimes de Las Malatas de 2016 y 2027 ms respeutivamente dempués dos hores y media de ruta.


"Posando" en las Malatas (2027 ms) y los Urrieles al fondu

A pesar del vientu qu'azotaba, nun pudimos resistinos a tar un bon ratu mirando pa los Urrieles y Áliva, ya que'l día yera un privilexu total, y como siempre estes vistes y paisaxes, son les qu'algamen que 3 persones superen 4 díes de travesía lloca por tolos picos d'Europa.

Ensín más, ponémonos a ganar el mayor altor del día, tirando de frente pola arista de las Malatas, hasta los Campos de Valdemingueru (2237 ms), onde tomamos un descansu bien merecíu, picando dalgo de lo poquín que mos quedaba nes mochiles.


Nos Campos de Valdemingueru (2237 ms)

Yeren 3 díes de dura ruta y 3 hores y media del día de güei los que mos poníen ya a tiru, del descensu final a Sotres, y de lo más naguao, una señora fabada o xinta caliente a poder ser nel nuesu final. Asína que decidimos baxar en mou "llama", como si tuviéramos na "travesera de verdá", y baxamos corriendo en dellos tramos por tol circu d'Ándara.


Baxando en llama por Ándara y el casetón

Nel alloriáu descensu pasamos corriendo al llau del llagu Valdemingueru, pa esta vegada nun baxar al pozu d'Ándara y caltener altor poles Mines de Mazarrasa, hasta'l colláu La Aldea, onde baxaremos del tirón hasta'l Casetón, onde tomamos la pista ancha ya hasta la Llomba la Carbonal, la cual sedrá'l nuesu caberu esfuerzu n'ascensión pa tomar baxada final ya en direición Sotres.


Sotres a lo lloñe, que pocu queda

Esta baxada faise llarga, tirando a mui llarga nuna senda que pasa polos collaos de los Texos, Cima, Mediu y per últimu Navayu, pa dempués de 2 hores y media de baxada arribar al fin a Sotres (1028 ms), fin de la nuesa travesera.


Sotres a la fin pa los tres supervivientes

Nun foi la más dura de les rutes d'esta travesera, pero si que nos tenía coles reserves enerxétiques al mínimu, namái dicir, que nun yeramos nin siquiera a falar en tola baxada, anque'l puntazu final de llegar a Sotres, dempués de 6 hores y 1570 ms d'ascensu y otros 1590 de descensu, en dalgo más de 14 kms, nun mos lo quita naide. Como nun mos quitó naide, esfrutar d'una fabada y unos escalopinos al cabrales na terraza d'un chigre, con unes clares pa enfrescar el gargüelu.

Fin de la travesera

Nesta cuarta estaya de la travesera ficimos 3 dosmiles de Cabrales: las Malatas (2016 y 2027 ms) y Campos de Valdemingueru de 2237 ms.

Ver progresos en: Retos montañeros

lunes, 26 de julio de 2010

Travesera Picos (2009 - 2010)- Estaya 3: Vega Urriellu (Cabrales) - Morra Carnizosu - Collá Bonita - Moñetas - Vegas de Sotres (Cabrales)

10 de Xunetu de 2010

Track: Vega Urriellu (Cabrales) - Vegas de Sotres (Cabrales)



Llegaba'l "descansu", na travesera. Yera'l día más floxu, pero les fuercies entamaban a tar bien xustes y otra nueche ensín descansar demasiáu va faciendo que'l cuerpu resiéntase por too. Afortunaos aquellos que duermen onde seya, porque l'eternu descansu sedrá pa ellos, jeje. Los demás vamos batiendo la vuelta rápida a cada cuartu d'hora.

Sacante d'esto, el día yera atractivu enforma, ya que da-y la vuelta'l Picu, xubir a la collá Bonita, conocer el circu del H.ou Treselpicu, yera suficiente pal tercer día, y a ello sumarémos-y una llarga baxada por las Moñetas hasta las Vegas de Sotres.


Nel Refuxu de Vega Urrielu col Neverón de fondu

Dempués d'almorzar, el día convidábanos a desperezanos y caleyar con un cielu azul y abiertu, que facía a Llorienzu pegar ya dende bien ceo. Ensín más garramos con puxu, la canal de la Celada arrodiando a ún Picu, ya estráu de xente naguando por da-y preste.


Na Canal de la Celada

Nel nuesu casu, nun la vamos tomar hasta'l final ya que teníemos un oxetivu enantes, que nun yera otru que la Morra Carnizosu, qu'al llau de los xigantes d'al lláu quédase nuna llomba, pero sus 2122 ms, márquenmela como un finxu más nos 2000 de Cabrales.


Trepando a la Morra Carnizosu

Asína qu'abandonamos progresivamente la canal de la Celada, y vamos arrodiando la Morra, ganándo-y altor poquín a pocu. Lo más normal sedría siguir xubiendo, en direición a un colláu debaxu de la Torre Carnizosu, y llueu facer la cresta ensín nenguna dificultá. Pero como suel picame, Fernan y yo tiramos trepada en direición a la cresta, al traviés de varies diagonales, ensín mayor problema qu'esfrutar de la propia trepada.


Nun momentu de la trepada a la Morra Carnizosu col grupu Areneras-Albos de fondu


A la fin, esperamos a que llegasen a la cresta tolos demás dende'l colláu, y xubimos a facenos la semeya de grupu col Urriellu, tres de nós. Les vistes del Cuera, tolos picos qu'arrodien el H.ou Treselpicu o'l conxuntu Areneras-Albos yera impresionante, al igual que la Peñe Castil, la cual dexónos fai pocu un tastu agridulce al xubila con tan mal tiempu y nun poder agüeyar nada.


Nel cumal de la Morra Carnizosu (2122 ms) col Picu de fondu


Circu'l H.ou Treselpicu al sur y el Cuera al norte

Darréu, baxamos al colláu dempués d'una hora d'andar dende l'aniciu y vamos llibrando'l H.ou y les parés que lu formen, pa dir ganando altor pente pedreros con mayor o menor dificultá sigún el momentu. Eso sí, les vistes del Picu son ablucantes enforma, y esa vía sur direuta, dame unos glayíos a la oreya, que nun se pue aguantar más. Habrá que poner fin a ese sufrimientu col picu en cuanto que xurda la ocasión.


Avanzando hacia la collá bonita

Con tol camín a la solombra, vamos faciendo pasu bastante rápidu y metémonos na xubida final a la collá bonita, ente resbalón y resbalón poles piedres, y cola Aguh.a Martínez y la Torre de las Colladetas enriba de nós. La verdá ye que ye un pasu mui, mui guapu, y al arribar, ábrese ante nós un pronunciáu descensu hasta'l corte'l riu Duh.e y el macizu d'Ándara al fondu.


Xubiendo cola aguh.a Martinez xixilando enriba

Ya tábemos nel mayor altor del día a 2385 ms, y solo llevábemos 2 hores y media de ruta, poro'l restante diba ser mui duru, polo llargu del descensu y porque agora nun había picu, torre nin morra, que nos escondiese del sol. De xemes en cuando, y nesta travesera dímonos mui bien cuenta, les baxaes son muncho más dures que les xubíes, y los motivos d'ello van dende, la falta de motivación qu'hai nelles, el cansanciu de l'anterior ascensu y sobretou pola retención de cuadriceps que se fae, cargando tol pesu nes rodilles.


Na collá Bonita (2385 ms) descansando

Asína pues (amiestu astur-vascu, jeje), tuvimos de descansu un bon ratu, xintando dalgo y falando de mil coses, nes qu'incluyimos posteriores rutes a dalgunos picos que tábemos acolumbrando. Dotramiente, otros del grupu ya taben atalantando una retirada a tiempu como posible vitoria, ya que nun diben demasiáu finos col pasar de los díes.


Descendiendo de la collá Bonita

Magar del descansu, entamamos la baxada con curiáu ya qu'al igual que la parte de la xubida a Bonita, la baxada tien roca suelto, y la pedrada de turnu al d'abaxu ta nel menú del día, asína que más val andar polo segáu.


Santana, Tiro Santiago y Tiro Navarro na primer semeya y Los Campanarios na segunda

Peña Castil y Cuchallón de Villasobrada

Como'l caminar na baxada nun ye pa tirar voladores, hai que distrayese colos paisaxes, los picos a dixebrar y los robezos qu'anden tol día enfriando'l culu nos neveros qu'inda sobreviven nesti macizu central.


Los robezos asitiaos nos neveros pa enfrescar un pelín

El camín a siguir hacia'l valle las moñetas, a dicir verdá nun ta demasiáu nidiu, a pesar de contar con dalgunos h.itos, y desviáse de la ruta preestablecía ye mui cenciellu por mor, de los milenta h.oos, llombes, etc... toos iguales. Así que pa dar un pelín d'emoción na baxada, tres de los diez del grupu tiraron pela manzorga na baxada d'una llomba y los demás pela mandrecha, y el resultáu foi nun volver a venos hasta Las Vegas de Sotres.


Valle de las Moñetas dende riba y baxo

Les distintes llamaes pel móvil y a glayíu llimpiu foron munches, así como les xubíes a llombes pa ver si nos veíemos, esperes pa ver si diben per detrás, etc... pa finalmente siguir baxando cagándose en too, xintar a mediu camín de mala hostia, hasta atopanos nas Vegas de Sotres, 4 hores y media dende la collá bonita, y probáblemente 2 hores y media dende que nos separtamos.


Las Vegas de Sotres y el riu Duh.e que les baña y a nós tamién, jeje

La cosa nun foi a más, y a pesar de mi mala hostia conocía pa estos casos, como ellos taben mui tranquilos cuando llegamos, pues dexóse'l comentar la xugada con unes cerveces en Sotres. Eso sí, enantes tuvimos un percance non esperáu y mui gratificante, como foi que'l Riu Duh.e tuviere d'un calecer pocu normal y les sos poces nesta vega, díesenos una sesión de spa, bañu y masaxe dignu de 3 díes al traviés de Picos.

A la fin, esta xornada de descansu, finó en poco más de 7 hores de ruta, na que descendimos 1440 ms y tan solo xubimos 580 ms d'acumuláo nos 8,4 kms en total. Lo corto de la ruta diónos pasu con mui bon gustu, a una tarde en Sotres, despachando xarres de cerveza como sinon costare y cenando nun chigre del pueblu, pa dir ya de nueche a vivaquear a les propies Vegas de Sotres.

Continuará.... na cuarta y cabera estaya

Nesta tercera estaya de la travesera ficimos 1 dosmil de Cabrales: la Morra Carnizosu de 2122 ms

Ver progresos en: Retos montañeros

jueves, 22 de julio de 2010

Travesera Picos (2009 - 2010)- Estaya 2: Caín (Llión) - Dobresengros - H.orcada d'Arenizas Bah.as - Arenizas - Vega Urriellu (Cabrales)

9 de Xunetu de 2010

Track: Caín (Llión) - Vega Urriellu (Cabrales)



Segundu día de travesera, alborecemos a les 7:30 p'almorzar, nel albergue, y les primeres sensaciones personales nun podíen ser piores. Nun dormí res en tola nueche, calor de coyones insoportable y sudando a más nun poder. Preparamos tou, y dempués de despedinos de Mariano, garramos les mochiles, esta vegada les de 60 litros, enllenes d'hestories pa dos díes de travesera.


Partiendo de Caín

Travesamos Caín en direición al pueblu de Sesanes, pa travesar el Cares na Ponte Grande y garrar ellí, el senderu del Seu Mabro. El día pel momentu ta murnio, lo cual agradecemos enforma, ya que sabemos que'l pesu la mochila, el calor soberanu y el desnivel a salvar, va facenos pasar un día pelín h.odíu. Colo que de primeres pensamos que tar con borrina va facilitanos la xera, pero alcontrámonos col Seu Mabro, un "senderu prestosu" que nos va dexar na canal de Dobresengros con ganancia d'altor pero tamién con una moyadura pa entamar, jeje. Eso sí, les vistes de Caín abaxo nuesa pagan la pena.


Entamando a dexar Caín abaxo nel Seu Mabro

Enllazamos cola canal de Dobresengros, dando los primeros pasos pegaos a la riega Casielles, tratando de facer furrular les pates, tovía cargaes del día anterior. Esto algámase pasína a pasu, y más nesta canal na que cada pasu y cada metru d'altor ganáu cuesta lo suyo. De los 450 ms de Caín, escaecémonos rápidu, pero tamién dámonos cuenta de que nel primer descansu nuna fonte a 700 ms, la ganancia ye insana completamente, y más camentando que l'oxetivu cimeru del día ta a 2345 ms, no que nómase la H.orcada d'Arenizas Bah.as.


Sofriendo na Canal de Dobresengros

Poca más hestoria tien la canal de Dobresengros más que baxar la cabeza, ponése en modu ciclista, y tirar de reñón y de paciencia, pa dir ganando altor pocu a pocu. Tampoco les vistes podíen distraenos de mirar continamente al suelu poro hasta los 1500 ms, concentrámonos en caleyar y xubir desnivel.


A la fin abriendo'l día pente la ñebla reinante

Magar d'esi desnivel, ya encomencipiamos a dixebrar dellos picos y parés (Dobresengros, Cabrones, Torrecerréu,...), que facíen más fácil el camín y dexáben a les clares que tábemos averándonos al colláu (1954 ms) que da pasu al H.ou Grande y da por finada lo que podría nomase Canal de Dobresengros.


H.oyo Grande con Tesoreru, Picón y Llambrión detrás

A partir d'equí tenemos dos sensaciones positives: les ablucantes vistes y que ya dibemos dexar de xubir y xubir desnivel, y una mui negativa: tolo que baxábemos diba tocar xubilo. Aún así, cola mayor sudada de la nuesa vida, el H.ou Grande foi un descansu necesariu pa xintar dalgo, quitar la camiseta que chorriaba y agüeyar en toles direiciones faciendo una cosadiella de cada picu qu'acolumbrábemos.


Baxando a descansar dempués de la canal Dobresengros cola Torre la Palanca detrás

Darréu tócanos entamar la xubida final a la h.orcada, y nun va ser fácil, ya qu'aparte'l cansanciu, el tarrén nun ye de lo más fácil. Cuando nomen Arenizas sedrá por dalgún motivu, poro tenemos que salvar casi 500 ms de desnivel al traviés, de "pedreros" mui sueltos casi d'arena, que faen dar un pasu p'alante y resbariar dos p'atrás.


Xubiendo a la H.orcada d'Arenizas Bah.as nun caberu esfuerzu

Faese pesáu, y amás de xemes en cuando hai que facer buelga por ñeveros, pero les ganes d'aportar na h.orcada, xintar y finar d'ascender son munches. Asína, que-y damos duru, y vamos faciendo camín demientres dexamos a la nuesa manzorga la Torre Coello y el Tiru L'Osu, p'averanos poquín a pocu a la propia H.orcada d'Arenizas Bah.as, pasu entre estos anteriores y los Picos d'Arenizas.


Cola Torre Coello y el Tiru L'Osu enriba

A la fin, con un cansanciu perimportante, algamamos l'oxetivu cimeru, y l'Urriellu recíbenos ente una mar de ñubes y mos diz que nos afayemos nos sos dominios. Ye un momentu mui esperáu durante tol día, y pa dalgunos de nós, durante munchu tiempu, ya que nun lu vieren en direutu enxamás.


El Picu dende la H.orcada d'Arenizas

Atrás queden 6 hores y media d'ascensión y casi dosmil metros de desnivel ganáu con esfuerzu y munchu, munchísimu sudor. Cuantayá quedó, el seu mabro o cada pasu inicial pola canal de Dobresengros, nel que xubir 100 ms d'altor yera una xera cansina y abegosa. Yeren casi les 3 de la tarde y había que ponése a facer los bocatas tiraos pente les piedres y descansar al menos un ratín, pa siguir camín hasta'l refuxu de la Vega Urriellu, 400 ms abaxo nuesa.


Na H.orcada al fin dempués de 6h y media

Pero como non, mi afán tachador de dosmiles asturianos, fae qu'esta travesera nun fuera una ruta de trekking simplemente, había que xubir dalgún picu, y nesti casu, optamos por xubir a los picos d'Arenizas o a dalgún de los 6 cumales, sigún el club 111 de Picos. Asína qu'animámonos Simón, Fernan, Pangua y yo, y entamamos a xubir al primer cumal per un de los piores tarrénes pa trepar nos que tuve. La roca ta más que rota, y cada pasu que se pon o cada agarre que se toma tien de ser sele y con munchu güeyu de nun tirá-y al d'abaxo nengún trozu argayáo.


Casi na primer Areniza y el "pasín" de la segunda a la tercer qu'acoyona

Xubimos a la primer Areniza ensín mayor problema, y su cota de 2446 ms fae'l mayor altor de la travesera, hasta qu'un cuartu d'hora dempués ponémonos ya nel primer cumal de la segunda areniza, dempués d'un destrepe pela arista de la primer y una xubida pela arista de la segunda, siempre y dígolo otra vegada con munchu curiáu, por mor del estáu horrible de la roca.

La mayor dificultá de llegar al cumal más altu de la segunda areniza ye un pasín aéreu por ambos llaos, asína que tiramos d'equilibriu o ponénse les manes pal suelu y a cuatru pates como Pangua, y p'alante. Simón tiró de sensatez, como siempre, y esperónos sentáu na más amplia y segura segunda cota de la segunda areniza.


Un poquín de cococo nel pasu a la segunda Areniza

Agora sí, los 2505 ms de la segunda Areniza facían cota superior de la travesera y tamién de Simón y de Pangua hasta'l momentu. Tornamos hasta Simón, ya que la tercer areniza yera demasiáu pa güei y ellí sacamos les semeyes de rigor nel cumal, y col Picu al fondu.


Na segunda Areniza ensín Simón y con él pa compensar, jeje

Camentando que tenemos a tolos demás collacios na h.orcada esperando, baxamos pola mesma arista hasta la primer areniza y d'ellí, atopámonos na h.orcada colos demás, que taben más que descansaos y mediu sobaos. Nós quedámonos coles vistes que tuvimos enriba y preparamos les mochiles pa siguir, ya por fin, cola baxada a la Vega Urriellu.


Vistes dende la segunda Areniza


Esta faise como toles baxaes, cuando vas ya cansáu, ye dicir dexándote dir, y eso ye hasta peligrosu, porque dexes de tar sollerte a lo que ta baxo tos pies, y tropieces ca pocu. Pero bono, pa da-y dalgo de diversión envede arrodiar el H.ou Sin Tierra, decidimos baxar "esquiando por él", y así amás de dalguna culada fina, quitámos-y tiempu a la baxada.


Baxando al H.ou Sin Tierra

En tol camín namás que tenemos una xubida que ye dende'l propiu h.ou a la gargantada del mesmu nome, la cual nun son más que 50 ms d'acensión pero dan por c... como si xubiésemos otru picu más. Ya d'esti pasu, acolumbramos a lo lloñe'l refuxu, debaxo del Urriellu, el cual a cada pasu amúesase más grande ya impresionante.


Aportando a la gargantada del H.ou Sin Tierra pa baxar al refuxu a la fin

Otres casi 10 hores facíenmos finar la segunda estaya de la travesera de Picos, dempués de caleyar casi 14 kms y superar 2450 ms de desnivel acumuláu, baxando otros 940 ms en total. La verdá ye que foi una ruta durísima, que sumada a la del día anterior, nada bono podía traer pa los músculos cansaos de les pates.

Asína, que tocaba intentar asease na fonte xelada de la vega Urriellu, camudar la ropa, echar unes cerveces, y axuntáse con dos collacios más que veníen dende Pandébano a xunise a los dos díes que quedaben de travesera, enantes de cenar y dir pal camastru, onde durmir tornóse otra vegada más dalgo imposible pa mi.

Nun pueu pasar esta entrada ensín amosar delles semeyes, nel posíblemente llugar más máxicu de toa Asturies y con meyor atapecer. Que valgan pa que la xente vea lo que se pierde ún, sinon esfruta de la montaña asturiana. Tan solo ello, fai esnalar l'ánimu pa facer dos díes más al traviés de picos.

Continuará.... na tercer estaya


El Picu y el Neverón

Atapeciendo na Vega Urriellu

Nesta segunda estaya de la travesera ficimos 2 dosmiles de Cabrales y pertenecientes al club 111: les dos primeres cumes de los Picos d'Arenizas (2446 ms y 2505 ms)

Ver progresos en: Retos montañeros