14 de Xunetu de 2026
Continuamos per Picos, completando la Travesera Picos 2025-2026, dalgo recuperaos del día anterior pela increyible canal de Montestigu y el Senderu'l Gatu, pudiendo na mañana almorzar más curioso, que na cena, que tampoco pude meter munchu pal cuerpu ya que nun me sentaba del tou bien.
Nesti día, entamamos una travesía de dos díes con final nel colláu H.ermosu y con salida en H.uentedé, asina que tocaba abandonar l'apartamentu de Brez, llueu del almuerzu y recoyer la casina, pa facer per carretera'l tramu hasta l'aparcaderu de H.uentedé, onde terminamos de rematar los preparativos pa entamar la ruta.
El menú de primeru ye facer la senda L'Hacheru que conozco de varies ocasiones, anque la primer vegada ficiérala nun intentu fallíu a los Picos de Santana n'ivernal, quedándonos por mor de la ventisca na Torre las Coteras Roxas, pudiendo esfrutalalu munchísimu tamién, n'ascensión correndera con Kíla a la Peña Vieya.
Esta vegada nun vamos nin corriendo, nin n'ivernal, pero llevamos trisca nes pates de tolos díes anteriores, asina que salimos del aparcaderu pali pali, sobretou col envís d'esfrutala ya intentar poner les pates de nuevu a tonu, dempués del mal día que pasé na ruta anterior, sintiéndome tovía mui cansáu y con floxera nos primeros metros d'ascensu.
Por suerte, Carlos nun conocía esti camín, así que vamos esfrutando pasu a pasu, revisando los vestixos mineros d'antaño, echándo-y una güeyada a los pasos del teleféricu y charrando d'hestories pasaes en rutes que ficiera per equí, faciéndosenos el desnivel munchu más amable, teniendo tamién na tiesta que nesti día, la baxada nun va ser tan xabaz al quedanos a dormir n'altor nel refuxu de H.ermosu.
D'esti xeitu, van pasando los minutos y los metros y alcontrámonos ya na baxera del Cable, ganando les clásiques vistes de la Peña Remoña, pasando pembaxo del edificiu, nel que por suerte, cada día hai menos basoria, anque queden restos de cristales dende los tiempos pasaos y fadremos los caberos metros calizos, hasta salir al baruyu de xente qu'abeya peles cercaníes de la estación superior y na redolada los h.oyos de Lloroza y Covarrobres.
Nós, siguiremos a lo nueso, continuamos hasta los H,oyos de Lloroza y despedímonos de Carlos, que lleva les dees desfeches dende Arredondas y tira pela canal de San Luis hacia la Padiorna, pa siguir a H.ermosu pelas Colladinas. Pocu más alantre, na Vueltona, Montse y yo separámonos de Rubén y Mario que siguen hacia Verónica, mientres que nós tenemos l'envís d'ascender a la Morra Las Garamas, enantes de siguir a Verónica.
Caleyaremos pente los caminos de les mines d'Altaiz, hasta dar cola morra más alta d'esti mazacote calizu que son las Garamas, teniendo hasta una trepadina llambriera per onde l'atacamos encumando los 2115 m del so puntu más altu, dominando dende la so modesta altura tola fastera de los h.oyu Sin Tierra, aportando una guapa visión de tola muria dende H.orcaos Roxos hasta la Peña Olvidada.
Dende l'altor dámonos cuenta, que ye una pérdida de tiempu increyible tornar so los nuesos pasos, viendo la baxada clara hacia'l colláu de H.uente Escondida, que va danos senderu pembaxu d'Altaiz y San Carlos hacia'l Tiru Casares, pa continuar hacia la Collada Blanca. Coles coses bien clares, avisamos a los collacios pel walkie y pel móvil, pero nun tenemos rempuesta, asína que suponemos que moveránse al non venos llegar y arrancarán a la collada Blanca tamién dende Verónica p'alcontranos ellí.
Garraremos entós, el camín baxo les muries de les torres d'Altaiz y San Carlos, esfrutando munchísimu de la navegación, paeciéndonos un senderu preciosu, mui piquista, con dalgún trepe, superando dalguna llerona, terraceos y siempre bien atentos a los h.itos, hasta atopanos nel desvíu pa Casares, colos topos coloraos, que marquen el senderu a los anillistes varios.
Nesti tramu qu'avéranos hacia Verónica un pelín cruciamos a dellos montañeros, aportando al destrepe clásicu del trazu y desviándonos hacia la Collada Blanca ensin noticies de los collacios. El tiempu pasa y nun podemos esperar más, asina que camentamos que dirán per delantre, poro siguimos a lo nuesu, bordiando los h.oyos Sengros pela manzorga ensin acercanos de más a la Torreblanca y aportando per delles terraces h.itaes a los sos 2375 m.
Equí, con cobertura, lleemos que los collacios tiren per Casares ya que lleven esperando munchu tiempu por nós, dándonos cuenta que como grupu nesta ocasión nun tenemos preciu jaja. En fin, Montse y yo, tamos enfilaos na ruta y nun podemos dar marcha atrás, asina que volvemos a escribir que siguimos alantre y trazamos cola mirada tol percorríu dende la Collada Blanca hasta la baxera de la Torre la Celada.
Acolúmbrase llonxano, pero vamos con muncha fuercia y esfrutando munchísimo de tar en tol mediu del macizu central, navegando pasu tres pasu, teniendo que descender en primer términu hacia un pequeñu h.ou, dexando a la mandrecha los últimos espolones del picu Tesoreru y a la manzorga la Torre'l H.ou Grande, pa dempués remontar per tarrén bien calizu con una pequeña trepada a la collada col Picón, onde alcontramos un de los llugares marinos de Picos más ablucante, enllenu dafechu de fósiles.
Paeznos en llugar perfectu pa xintar, anque nun soi aguantame y avérome corriendo penmediu del fondu marinu hasta los 2355 m del cumal sur del Picón, que malpenes tien prominencia sobre la colladina onde espérame Montse, supongo que l'aguya norte del Picón, ya sedrá otra hestoria, pero nun tengo tiempu a arrimame a ver que tal ye l'ascensión.
Xintaremos daqué, ya que llevamos casi 7 hores ensin parar y continuamos descendiendo per una preciosidá de llambriales cola vista puesta nuna morrena que nun mos fae baxar de más al H.ou Grande y va permitimos enllazar xusto onde queríemos na faldera norte de la Torre La Palanca, a la que tendremos el placer de volver a xubir 15 años clavaos dempués, anque daquella entráremos peles puertes de Mueñu dende Caín.
La xubida a la Palanca, fáesenos pelín llarga, ya que llevamos muncha trisca nes pates, pero pali pali vamos ganando desnivel, aportando al cumal llueu d'una hora dende qu'empatáremos l'espolón norte, pudiendo esfrutar de tol espeutáculu de vistes hacia los macizos occidental y restu del central. Son les 5 de la tarde y según pensábemos, díbemos perbien d'hora pa descender al refuxu de H.ermosu cola calma.
Malpenes echamos 15 minutinos descansando y picando dalgo más, entamando'l descensu hacia la collada cola torre Diego Mella y garrando la clásica pedrera de la parte alta, que n'envueltes va dir llevándonos hacia les muries de Delgado Úbeda, onde alcuéntrense les mayores dificultaes con una destrepada pelin espuesta, anque con bona roca y agarres, de la que nun m'alcordaba dempués de tantos años.
Facémosla ensin mayores problemes y pasaremos pembaxo de la Torre Peñalba pa enllazar al fin nel h.ou Llambrión cola baxada del Tiru Callejo y desdender ya per senderu más que marcáu hacia'l camín que vien dende las Colladinas, onde ya tenemos a tiru piedra, el refuxu y un descansu con birra más que merecíu, pero lo que nun sabíemos ye qu'adelantaren la cena a les 7, quedándonos menos de media hora pa ponenos cómodos.
En resume, travesía increyible, pelos llugares más remotos del central paeciéndome una fastera ablucante, en mediu de los cumales más altos de los Picos y xeolóxicamente descomunal coles formaciones de caliza y fósiles, eso sí, los 17,4 km y un desnivel acumuláu positivu de 1900 m y 915 negativos, amuesa a les clares les 10 y 15 minutos que necesitamos pa completalo... pura navegación per Picos.
No hay comentarios:
Publicar un comentario