4 de Setiembre de 2025
Aprovechando una guapa tarde d'esti final de branu, xuntámonos Carlos y yo pa dar un pateín pel Monsacru y charrar de les mierdes de la vida, asina que tiramos hasta Otura, pueblu morciniegu más que nomáu pol so allugamientu na faldera del Monsacru y trazo cola tiesta un percorríu circular que-y pueda prestar al collaciu.
Debe ser el monte pel que más vegaes anduve, ya qu'uselu munchu pa entrenar pa les carreres pel monte y pa esguilar, como non, asina que salimos en direición a la nomada Canal, pela que tantes vegaes xubí ya fuera cargáu col mochilón pa esguilar o mediu corriendo pa entrenar.
Tiramos canal p'arriba, dexando a la nuesa mandrecha'l camín hacia'l Cantu La Sierra y entamamos la pindia cuestona, algamando les clásiques vistes de la Foz baxo la crestería de Peña Manteca col Llusuriu detrás como fondu de pantalla.
Vamos falando y ensin querer voi metiendo ritmu, ya que toi alcontrándome bien ya del cadril y toi con ganes d'entrenar y siento l'aliendu entrecortáu de Carlos, asina que baxamos ritmu, demientres voi contándole hestories esguilando nel seutor de la Canal.
Pesie al esfuerzu pela pindia canal, ta prestándo-y munchu tola xubida y bien ceo, vamos dando fin a la canal p'averanos al colláu d'Entrepuertes, non ensin antes, parame a echar un vistazu a los caberos espolones de la canal onde atopo un par de víes de recién equipación, a les que nun termino d'alcontrar munchu xacíu polo alloñáu del muru como pa facer deportiva.
Ensin más, facemos el tramín final de la canal, onde coménto-y el xaréu que móntase nel Trail Afuega'l Pitu colo ánimos de la xente, aportando hacia la fastera d'Entrepuertes, per onde xube la pista dende Los Llanos, escapándome unos minutinos hacia la Granda Entrepuertes (915 m), cumal que nun me diera por xubir enxamás y que tien guapes vistes del valle de Morcín.
Desciendo corriendo al Quentu Entrepuertes, pasando al llau del llagu y na Vega'l Pozu, tirámonos hacia la faza norte del Monsacru, pa garrar un preciosu camín colgáu con vistes a Uviéu, que va dexanos na entrada del mayáu Les Capiyes y nel final de la mítica ascensión al Monsacru dende la Collá.
Llueu d'esti tramu tan guapu, ya caleyaremos pel mayáu de capiya en capiya, hasta salir pela Muezca, escaeciendo un par de cumales como ye'l picu Marieyu y sobretou la Fayona, que bordiaremos pel sur, garrando la sienda Grandarrallá, perguapu camín armáu, que fadrános pasar pela cueva Xuanín, enantes de meter l'arreón final hacia'l cumal del Cuitu Rumiru (1052 m).
El día ta poniéndose pelín prietu y entainamos el pasu, dexando'l cumal más clásicu del Monsacru, p'averanos apriesa hasta'l Llenu Vellar (1057 m) puntu cimeru del Monsacru, anque la mayoría la xente, faiga'l Cuitu Rumiru, por mor de tener el buzón y vértice xeodésicu. Facemos a la fin el Llenu Vellar y restolamos baxada cómoda hacia la campa Valdeoveyes, onde alcuéntrase un pequeñu llagu amuriáu, atopando bien de ganáu.
Dende Valdeoveyes garramos dellos senderos que van dir faciéndonos baxar hacia la Covarriella, llugar tamién bien conocíu polos escaladores de la fastera centru, onde tenemos unos cuantos seutores y tamién trabayu abondo pa siguir ampliando esti increyible llugar. Pasaremos pembaxo de la Pena la Covarriella, caleyando pela Sienda Cimera y aportamos a la Covarriella, cola ablucante vista de Viapará, enllena d'autocaravanes y furgonetes por mor de la vuelta ciclista.
Col cielu bien prietu y cayendo dalguna gotera, nun vamos facer denguna tontería más y descendemos ya con calma hacia Los Llanos per pista formigonada, siempre cola vista de los cimeros cumales del Monsacru y dende Los Llanos siguimos per carretera hasta Otura onde teníemos aparcáu'l coche na so parte alta.
En resume, ruta bien guapa pa conocer casi tolos cumales del Monsacru, pudiendo meter milenta variantes dependiendo de si queremos facer dalguna cume en concretu o conocer meyor siendes prestoses, saliéndonos a nós 3 hores clavaes de patéu, con +/-695 m de desnivel en 7.5 km.
No hay comentarios:
Publicar un comentario