Isoba (Porma) - Runción - La Raya - La Guaría - Entrevados

17 de Marzu de 2025

Track: Isoba (Porma) - Runción - La Raya - La Guaría - Entrevados

Dempués del repunte ivernal de Marzu, con díes mui fríos y ñeve, teníemos ganes de facer dalgún cumal col mantu blancu, asína que cola previsión perfría que teníemos, tampoco quiximos dir mui lloñe, poro averámonos hasta Isoba, na comarca del Porma, pocu más alantre del Puirtu Braña, a la gueta d'un monte cimeru de la Cordelera Cantábrica, el Runción.

Esti hermanu menor del Peñón San Justo, ye un gran escaecíu, nesta fastera, de grantes montes ivernales en tola redolada, asina que rescatámoslu d'esi escaezu y preparamos una circular prestosa dende'l Llagu d'Isoba, al qu'aportamos cayendo dalgún falisgu, demientres garramos la mochila y abrigámonos pa salir a caleyar.

Partimos del Llagu d'Isoba (1415 m) col día bien prietu

Llueu de la semeya col llagu y el picu Runción al fondu, salimos per camín que va hacia la mina San Andrés y bien ceo vamos abandonala pa garrar l'arista Oeste de la xerra de las Porracas, entamando una sele ascensión, un pelín abellugaos del vientu pela fastera norte, algamando guapes vistes del llagu d'Isoba.

Ascendemos pela vallina noroeste de la xerra de las Porracas

Con bona vista, dexáramos nos coches tol material innecesariu, ya que vimos que'l monte andaba peláu de ñeve y yera polvu, poro nin los crampones nin los piolés yeren necesarios y casi nin les polaines, que metimos na mochila por si acaso. D'esti xeitu diremos ganado altor, hasta aportar a la propia arista oeste, onde algamamos vistes al picu Susarón y al banzáu del Porma.

Algamamos el cumal de la Peña Los Niales col día prietu enforma

Con pocu más, siguimos camín, siempre llibrando'l brezu ñeváu, hasta dar preste al primer cumal d'esta pequeña xerra, como ye la Peña Los Niales (1753 m), dende onde vemos el nuesu oxetivu, el cuarcíticu cumal del picu Runción, que tien un semblante bien guapu, cola ñeve, sobretou pa la so vertical faza norte.

Descendemos al colláu pa siguir nel ascensu hacia'l picu Runción

Descenderemos hacia'l colláu del cordal, atopando dalguna trinchera nel nuesu camín y siguimos ensin nenguna dificultá, hacia'l Runción, hasta la parte final, onde tendremos que restolar pente les peñes cuarcítiques, p'alcontrar el camín más cenciellu hacia'l cumal, poniendo les manes malpenes nun par d'ocasiones.

Encumamos los 1789 m del Picu Runción nun ambiente ivernal dafechu

En 1 hora y 40 minutinos, facemos el nuesu oxetivu demientres ñeva sele, dándo-y un puntu ivernal bien guapu a l'ascensión, pero nun ta pa munchos parones, asina que xintamos media barrina enerxética y tornamos so los nuesos pasos, hacia la bas del Runción y entamamos a descender hacia'l colláu La Rasa (1565 m), alcontrándonos nun sitiu bien curiosu, na parte alta d'un fayéu, que tenemos l'envís de conocer.

Baxamos al colláu la Rasa pa descender pel fayéu del monte la Guaría

Enfrente tenemos el picu la Granda, que nun tien una pinta mui atrautiva, asina que dexámoslu pa prau y entamamos a descender pel fayéu de la Guaría, alternando tramos de ñeve con tramos de muncha fueya, dándo-y un puntu perguapu al nuesu paséu pel fayéu, dándonos a entender que ficimos bien en allargar la ruta.

Descendemos tol monte la Guaría hasta garrar la pista que lleva a Cofiñal

Del fayéu de la Guaría, saldremos pel Prao Nuevo, onde garramos pista en descensu hacia'l pueblu de Cofiñal, al qu'intentaremos evitar dir, ya que tenemos l'envís d'arrodiar tola mola del Runción pel Este, atopando una pista a la manzorga, que va llevándonos en sele ascensu hacia'l valle d'Entrevaos, teniendo nel tramu final vistes al cumal del Peñón San Justo.

Averámonos hacia'l valle d'Entrevaos arrodiando'l picu Runción

Na realidá, pintara nel track un caleyar más baxo que la pista que vamos conociendo, pero tenemos una clara dulda, que ye como vamos a cruciar el rigu Isoba y más cola fuercia cola que creyemos va llevar del desxelu. Aportaremos al final del ascensu d'esta pista, viendo'l Pozu La Leña del valle d'Entrevaos, faciendo un intentu de cruciar el rigu, viéndolo dafechu imposible y peligrosu.

Cruciamos el rigu Isoba por onde podemos col agua pelos muslos

El día, a la fin albancia y tendremos solín, poro decidimos parar a xintar pa garrar fuercies, ya que tolo que baxamos hasta'l pozu, tendremos que recuperalo hasta la pista, pa baxar n'amplies envueltes hasta la vega'l rigu Isoba / Porma, onde tendremos un bon ratu a la gueta d'un vau onde poder cruciar el rigu, echándonos unes bones rises, ya que col sol caleciendo, fue menos traumáticu de lo que podría llegar a ser.

Ascendemos pel valle d'Entrevaos hacia Isoba de vuelta

Por suerte, sabía que nuna hora más menos, taríemos de vuelta a la furgo, asina qu'echámos-y valor, cruciamos el rigu xeláu moyándonos enforma, ya que llegaba pela parte alta de los muslos, algamando namás cruciar el rigu el camín d'Entrevaos, pol que fadremos tol ascensu valle arriba, coles pates bien fresquines.

Aportamos a la parte alta del rigu Isoba y al so llagu con un día espléndido

Con esti valle ya conocío de la ruta al San Justo, diremos a bon ritmu ascendiendo, pa calecer los pies, ya que pesie al sol, sabemos que nun pasa la temperatura muncho más allá de 5 graos, ñevándonos en munchos tramos de la ruta, esfrutando muncho de tol valle y sobretou de la parte alta, onde les vistes hacia'l picu Torres son increyibles.

Nel intre, fadremos el tramu final, cruciando'l rigu Isoba pela puente y caleyando pelos praos cercanso al llagu d'Isoba, al qu'aportaremos 6 hores y media dempués de la nuesa partida, con un total de 13 km de percorríu y +/- 730 m de desnivel acumuláu, restando casi dos hores perdides na nuesa visita al Pozu La Leña col envís de cruzar el rigu.

Camudando'l Camín pel Porma