Cuevagüerta (Teberga) - Penaviguera - La Foceicha - Parmu

 9 de Febreru de 2025

Track: (Pendiente) 

Primer ruta del añu 2025, magar de la operación de cadera, poro preparábemos una rutina curtia pa poder probame, esfrutar y sobretou intentar caminar pel monte ensin dolores y ensin la coxera que llevaba padeciendo dende un añu y mediu aprosimádamente.

Naide quier operase tan "mozo" de prótesis de cadera, pero los dolores diben n'aumentu y nun me dexaben facer la mió vida normal, que ye tar nel monte y escalar y como dalgunos trabayamos pa vivir y non vivimos pa trabayar, lo importante dafechu yera poder facer vida normal nel monte, poro tocó pasar per quirófanu.

 

Partimos del aparcaderu de Cuevagüerta (620 m)

Nesti día, alcordéme que tenía pendiente conocer la Penaviguera en Teberga, un auténticu mirador sol rigu Parmu y la so foz d'Estrechura. Asina que magar del almuerzu en Samartín, tiramos hasta l'aparcaderu de Cuevagüerta, onde tendríemos el nuesu puntu de partida llueu de los preparativos correspondientes.

 

Salimos camín arriba per Trespresories

Saldremos de Cuevagüerta, cruciando los típicos túneles a la mandrecha la cuevona y namás salir pelas Morteres d'Arriba ya vemos al fondu la Penaviguera y el nuesu primer oxetivu, el col.láu Pando. El camín entama per pista percómoda, pa pali pali, dir metiéndose na guapa viesca de Trespresories dexando siempre'l val.le del Regueiru a la nuesa mandrecha y la fastera osera "prohibída" de Presories enriba nuesa.

Aportamos al col.láu del Pando con perguapes vistes de la Foceicha

Pesie al murniu día, vamos algamando vistes sobretou nel col.láu Pando (1148 m) onde damos vista a tola fastera que percorriéremos na nuesa ruta al Picu Piedras va dellos años, asína como al macizu de Penubina, cola fastera norte en primer planu (Amenu, Sol Tambarón). Dende Pando, siguirimos pista hacia l'antena, algamando la meyor vista del día, col pueblín de la Foceicha y la so guapa llaguna y el picu la Ferreirúa detrás.

 

Entretenida ascensión a Penaviguera algamando un paisaxe brutal

Pasada l'antena, entramos en tarré más divertíu, con un cresteríu cenciellu per monte baxo primeru, otru tramín de fayéu perguapu y l'arista final caliza hasta'l cumal de 1380 m, onde taremos colgaos sola Foz d'Estrechura y algamando vistes en tola redolada, col cordal de los Bígaros al Oeste, el puertu ventana al Sur, colos picos del Fontán y Penubina y tol cordal de Sobia al Este y Norte, col Barriscal, puntu más altu enfrente nueso.

 

Cumal de Penaviguera (1380 m)

Pesie a lo ceo del día, xintamos el pinchín y cola amenacia de lluvia, nun mos paramos muncho, poro descendemos a la col.lá Pando de nuevu, saliendo pel camín a la manzorga, hacia'l pueblu de la Foceicha, onde taremos un ratín al llau de la so llaguna, sacando semeyes y esfrutando quiciás del pueblu más guapu de Teberga.

 

Descendemos hacia la Foceicha dende Pando

Magar del paséu pela Foceicha, garraremos el camín márcáu que llévanos nel intre hacia'l sur bordiando Valdetexu, pa dir descendiendo sele con vistes a la Penaviguera y a les envueltes de la carretera de la Foceicha. Perbien señalizáu, vamos descendiendo crucie tres crucie hasta ponenos enriba la carretera'l puertu Ventana y poro, saldremos al pueblu de Parmu.

 

Baxamos hacia Parmu per caminos antiguos con vistes a Penaviguera

En Parmu, decidimos parar a echar una cervecina, ya que vamos sobraos de tiempu y paez que la lluvia va respetanos, asina que dempués del descansu, namás quédanos caleyar unos 3 kilómetros pela carretera, los cuales nun se faen pesaos, ya que diremos esfrutando de la llocura de parés de la foz d'Estrechura, una auténtica ayalga, pa la futura escalada nel conceyu, si ficiese falta equipar más, ya que Teberga caltién na foz de Valdezreizales, la meyor escuela d'Asturies.

 

Aportamos de nuevu pela foz d'Estrechura hasta Cuevagüerta

En resume, ruta curtia, fecha a un ritmu mui tranquilu (5 hores y media) pa completar los pocu más de 13 km del percorríu con un desnivel acumuláu de +/- 790 m, sirviéndonos perfeutamente de preba pa la cadera, pudiendo atalantar que tenemos menos coxera y dolores qu'enantes de la operación y tan sólo ye l'entamu de la recuperación.

La prósima más y meyor de xuru....