Oseya (Sayambre) - Arcedianu - Pica Ten - Fonseya - Vierdes

17 de Xunetu de 2024

Track: Oseya (Sayambre) - Arcedianu - Pica Ten - Fonseya - Vierdes

Terminamos a la fín cola Travesera Picos con un sestu día, nel que ya quedaba yo sólo, pero como siempre tuve ganes d'ascender a la Pica Ten y una ruta mañanera, pa poner el colofón a tantos díes de patéu, me parecía afayaizu, anque les pates pidieren un pocu de clemencia.

Sicasí, cansáu pero contentu pol bon facer del cadril y de les pates, tenía que probame y facer la Pica Ten dende Oseya en Sayambre, sobretou por algamar una guapa circular como la que preparara y non tan sólo, facer l'ascensión dende l'aparcaderu que construyeron a los sos pies.

Partimos d'Oseya (780 m) en Sayambre

Poro, llevantéme cola calma, tomando un cafetín nes Bedules, enantes de salir cais arriba d'Oseya a la gueta de la sienda L'Arcedianu, pela que diba percorrer gran parte de la ruta. Malpenes alcuérdome de percorrer a cachinos esta sienda, asina que voi esfrutando, pasando en primer llugar penriba d'Oseya del área recreativa pa siguir ya dempués del primeres envueltes n'ascensu hasta'l mirador pembaxo del pica'l Burdiu.

Voi esfrutando munchísimu esti guapu día y nel intre alcuérdome d'esti tramu que ficiéramos en baxada dende'l H.ariu nel trail de Sayambre, van ya unos cuantos añinos. Continuaré caleyando pela sienda, aportando al crucie hacia Panderruedas, garrando nel mió casu les indicaciones hacia'l Pontón, faciéndome descender pasando a llau d'una bona fonte, onde recargo agua y desciendo hacia los Pontigos, onde tendré'l crucie cola carretera.

 

Esfrutando de la sienda L'Arcedianu con vistes a la Pica Ten

Namái cruciala, travesaremos una ponte sol rigu Los Pontigos y entraremos nun tramín de sienda l'Arcedianu que nun conocía y ye dafechu preciosa, pembaxo d'una viesca, que n'ascensu y faciendo dos llargues envueltes va averanos hasta'l nuevu aparcaderu nos Trabanzos, onde entamaría l'ascensión a la Pica Ten, qu'anguaño ta "facilitada" con escalones de maera, barandiyes, un área recreativa y un mirador nel propiu cumal.

 

Cruciamos nos Pontigos la carretara pa siguir pela sienda hasta'l aparcaderu Los Trabanzos

Sacante de tola ferralla y maera, qu'albidro sedrá de difícil caltenimientu col pasu los años y llueu llevará a accidentes pa los menos avezaos al monte, sorpréndeme lo guapu del ascensu, esfrutando d'una xubida corriendo, con vistes dacuando hacia montes bien prestosos como'l Pozúa, Peña Mora, Niah.u, etc... quedándome claro, que la fastera Sayambre-Ponga-Valdeburón ye una pasada. Dempués de facer en menos d'hora y media la Pica Ten dende Oseya, toméme un pocu con calma xintar una barrina y esfrutar de les merecíes vistes.

 

Ascensión adominguerada a la Pica Ten con delles facilidaes

Dame un pocu pena, qu'en plenu mes de Xunetu nun me cruciara con naide, aparte del operador que taba igüando unes cadenes y baxé de la Pica Ten, camentando'l por qué del desaniciu llionés na so fastera, cuando dame la sensación que son los que meyor lo trabayen, en comparanza con Asturies y Cantabria, que viven de la masificación d'un par de llugares (Llagos, H.uentedé...), pero bono, siendo egoistes meyor esta tranquilidá, pero tamién querrán vivir nestos pueblos.

Cume de la Pica Ten (1225 m)

Llueu de saludar al operador, sentime bien y baxé corriendo de nuevu hasta l'aparcaderu, pasando pela guapa area recreativa a los pies de la Pica Ten, dando col aparcaderu, perpasándolo pela mandrecha, decidiéndome a descender per un prau, con comodidá, hasta salir a la pista que vien pegada a la riega Fonseya, evitando así, xubir per carretera pa poder tomala al altor de Trambasriegas.

Descendemos hacia'l valle la riega Fonseya

Llueu d'empatar cola pista, diré caleyando cola calma a la solombra la viesca, topándome con unos senderistes de frente, cosa que sorpréndeme, travesando un par de guapes pontes penriba'l Fonseya y dando vista al escobiu Fonseya pente la Pica Ten y el Cuetu Prietu, echando un vistazu pa ver si ye transitable, pero veolo complexu, paeciendo un bon barrancu pa facer, siguiendo camín tranquilamente pela pista, onde toparéme un tunelín pa travesar el Cuetu Prietu.

 

Perguapu camín pegaos a la riega Fonseya pa tornar hacia los pueblos sayambriegos

Llueu d'esti curiosu pasu pel túnel, baxaremos ya hacia Pío per camín, ensin llegar a él, ya que toparémonos cola carretera enantes, tomándola en descensu unos pocos metros, pa salir per senderu a la manzorga hacia Vierdes, onde tendremos otru antiguu camín en ascensu que dexarános de nuevu en Oseya, onde piesllaremos esta guapa circular.

Na realidá, nesti día, tiré de carretera 2,5 km hasta garrar un camín que déxanos n'Oseya tamién, pero paezme más adecuáu, facer el track que vos propongo pa caltener los caminos pente los distintos pueblos sayambriegos, como facía'l Trail. En resume, non por curtia, ye menos atrautiva esta circular a la Pica Ten, qu'en malpenes 3 hores de camín, fadrános patiar casi 12 km y superar +/-780 m de desnivel acumuláu.

Camudando'l Camín per Sayambre