29 de Xineru de 2023
Track: Vil.lanueva la Tercia (Los Argüeyos) - Travesía Ivernal per Millaró
Día de ruta col GM Xuan de la Borrina, que nun sal alantre por varies baxes que-y ven les oreyes al llobu, viendo les temperatures y la necesidá d'equipamientu ivernal. Poro, terminamos por montar un grupín d'esquí montañeru, nel que decidióse dir hasta la comarca Los Argüeyos y más en concretu al municipiu de Vil.lamanín, onde asítiase'l pequeñu pueblu montañeru de Millaró la Tercia.
Ellí, entama una clásica ascensión al Cuetu Millaró, malnomáu Brañacaballo, que ficiéramos va dellos años, nuna circular seliquina pa entamar temporada. Esta vegada, l'estáu de la carretera fizo que nun pudiéramos aportar nin tan siquiera al pueblu, así que dexamos los coches al entamu la carretera y salimos portiando pel asfaltu ñeváu y xeláu, hasta alcontrar la capa suficiente de ñeve, pa preparar los trastos y foquiar o raquetiar.
Esfrutaremos del pequeñu escobiu fechu pela riega Millaró pente las xerras Blancas y Curril.los, pudiendo agüeyar carámpanos nos parés, dando amuesa de les perbaxes temperatures a les que tamos, sicasí l'ascensión hasta'l pueblu, fai que vayamos caleciendo'l cuerpu y a la salida d'ésti, a plenu sol, entamaremos a quitar capes de ropa.
Paez mentira, pero cruciar foquiando colos esquís un pueblu n'iviernu,
ye una d'eses coses que presten pola vida, asina que felices siguimos
per pista rigu alantre, hasta la divisoria de regatos, nas Regadas,
decidiendo siguir camín alantre hacia las Tablas, envede facer más
envuelta pela pista que va hacia Farramedal.
Nesi sen, tendremos un tramu de camín aceptable perpasando colos esquís d'un llau a otru d'un cierre, hasta atopar un curiosu Citroën Palas, tapáu pela ñeve hasta'l techu casi. Equí, ya tábemos demasiáu metíos nel barrancu de fuente Ruicabras, asina que tocó facer un master de foquéu pente les urcies, algamando salir del tramu con muncha dignidá, a bas de vueltas maría pelo más llimpiu, hasta aportar a la Llana de Gustomil.
Al salir de la vexetación montuna, tocó dir fino, fino coles pieles, cantiando peles plaques xelaes, con caídes pelín fees hacia'l barrancu, que pa ser la primer vegada, tengo que dicir que fuí abriendo buelga col culu apretáu, ya que nun ye lo mesmu tirar de bota y crampón, col piolé a man, que pasar aprovechando'l cantu del esquí y la fricción de les pieles.
A estos altores, ya tenía decidíu que nun diba xubir al cumal del Cuetu Millaró, ya que si teníemos estes plaques na faldera, na parte alta, más ventiada diba ser xelu puru y como veníemos a otru tipu d'actividá con foquear tenía abondo y la ventisca xelada qu'arreciaba dacuando tampoco animaba munchu a continuar cola aventura esquiadora.
D'esti xeitu, arrexuntamos tol grupu d'esquiadores y de raqueteros, al abellugu del vientu, penriba les cuadres de la Foya y xintaríemos el bocata con tranquilidá esfrutando d'unos minutinos de relaxación al sol. Del descansu salió, que díbemos continuar la mayoría del grupu pela pista hacia'l Llanu'l Prau, demientres Anna y Mario, esquiadores avezaos, diben intentar ascender al cumal a la gueta d'una baxada curiosa per ñeve polvu.
El restu'l grupu, siguimos con cuidadín per dalgún tramu xeláu de la pista hasta'l Llanu, onde vimos que tampoco teníemos una pala llibre de xelu nesti puntu, asina qu'entamamos la baxada dexándonos resbariar colos esquís pela pista, alcontrando tramos de pista con ñeve polvu mui divertida y otros de pura supervivencia pente los taludes, la ñeve costra y dalgún tramín de ñeve más duro.
En términos xenerales, la baxada per pista, al menos pa min, que nun tengo nin idega d'esquiar y baxo cuñeando intentando non matame, pasélo podre por momentos, sobre nes últimes envueltes de la pista hasta la collada Carrozal, onde la ñeve taba brutal, lo que puso la guinda a esti fríu pero prestosu día d'esquí de monte per Millaró.
No hay comentarios:
Publicar un comentario