La Renclusa (Ribagorza) - Tuca d'Aneto - Foráu d'Aiguallut

14 de Xunu de 2022

Track: La Renclusa (Ribagorza) - Tuca d'Aneto - Foráu d'Aiguallut

Magar del día anterior en solitariu, nel que pillara una insolación y nun pudiera cenar, llevantéme dalgo meyor, almorzando tolo que pude, a unes hores incompatibles cola vida montañera astur, jaja. Lo de llevantase a les 5 la mañana al monte faíseme bola, pero bono, tampoco ye que descansase muncho, así que meyor ponese en marcha cuanto antes.

Dicir, que fue una nueche tranquila, pero acostase de día, fizo que tolos presentes tardáremos en dormir munchísimu. Por suerte, nun hubo serenata nuecherniega, pero aún así, nun se si la fame o el mal cuerpu, nun me dexó descansar en condiciones, pa lo que nos esperaba esta mañana cola ascensión al Aneto.

Cara de vaya sueñu nesti madrugón pa salir de la Renclusa (2140 m)

Magar del almuerzu, preparamos tolos trastos, más que'l restu de los montañeros, ya que'l 90% tornaben de nuevu pela Renclusa. Nós, pondrémonos la mochilona a les 6 de la mañana en puntu, viendo como munchos d'ellos ya salieren per delantre, asína qu'intentamos garrar ritmu, cola vista puesta, nos fitos que van marcándonos el camín, hacia la cresta del Portillon Inferior.

 

Llevo los suficientes años nesto del monte, pa nun engrandecer mitos montañeros, teniendo una visión tranquila y sabiendo que me gusta del monte y que non. Asina que pa cuando aportamos al Portillón Inferior, siguiendo delles marques colloraes y vimos onde taba l'Aneto, vimos que'l tema diba pa llargu, ya que nun tábemos yendo nunos ritmos decentes y lo que llevábemos fecho yera un coñazu auténticu.

Tramo pente la Renclusa y el Portillón Superior pesáu enforma

Escaecemos la vista de la Tuca d'Aneto y continuamos crestiando, perdiendo en dalgún momentu eses marques colloraes, siguiendo una filera de fitos, que llévenmos penriba'l crestéu del Portillón, teniendo nun puntu que destrepar con curiáu pa empobinanos hacia'l pasu del Portillón Superior, una brecha penmediu'l crestón, muncho menos espeutacular de lo que Mario imaxinaba jaja.

 

Con casi 3 hores de camín, hai que tener cuidáu con dir hacia'l Pluviómetro qu'hai na cresta'l Portillón y saltase la brecha, lo que fízonos perder un cuartu d'hora más. A la fín, llueu de dar la vuelta, tocamos dalgo de ñeve nun neveru pergrande baxo'l Portillón Superior, decidiendo picar daqué pa garrar fuercies y de pasu sacar crampones y piolé.

Pasamos el Portillón Superior pa entrar a la fin nos glaciares Pirenáicos

Díbemos sólos, Carla práuticamente nun pusiera un crampón na so vida, asina que paeciónos bona opción, pero llueu de travesar esti enorme neveru, aportamos a una morrena rocosa que cae dende la Maladeta, ralentizándonos la travesía, decidiendo quitar de nuevo los crampones, cola pérdida de tiempu una vegada más.

Les prises nun yeren por caprichu, sinon porque les previsiones yeren de tormenta y anque enriba de nueso teníemos un día claru, vemos como dende'l norte y oeste, va poniéndose prietu'l cielu y eso fai  que tengamos qu'entainar y entamar a garrar ritmu sinon queremos tener qu'abortar el cumal o pasalo permal a saber en que puntu de l'ascensión.

Travesando'l cheleru del Aneto... glaciar veníu mui a menos por mor del desxelu climáticu

A la fín, travesamos la llerona y aportamos al Cheleru del Aneto, glaciar en desaniciu, que vamos cruciar poniéndonos los crampones, anque dalgunos montañeros que vienen ya de vuelta pasaren ensin ellos. Nós, diremos llentos pero vamos dir seguros, asina que salímonos del camín, pondremos la ferramienta y travesamos el cheleru, viendo como'l xelu fúndese a cada pasu que damos, con una sensación de pena pergrande.

Voi afalando, ya que veo cada vegada más prieta la cosa y con cuatru pasos que doi veo a los collacios quedase atrás, asina qu'ente mirar pa la tormenta y que nun avanzamos, voi camentando si paga la pena, que nos pille na parte alta un torbón, por facer el cumal d'esti míticu monte ribagorzano.

Averámonos hacia la cumera de la Tuca d'Aneto al alcuentru del Pasu de Mahoma

Enantes d'aportar al colláu Coronas, facemos reunión, viendo que Carla ta mui motivada por xubir a la Tuca d'Aneto y Mario vien como una locomotora'l tren, col tema de l'altitú. Aldericamos decidiendo aportar al colláu Coronas, onde tenemos escapatoria preparada hacia Aiguallut y a la mínima que póngase'l tema complexu media vuelta y nun hai res más que dicir.

 

Personalmente, venía esfrutando del camín nesta parte de la chelera y diba achisbando la parte cimera que tenía meyor pinta entá, pero'l tema nun pintaba na bien. Col emburrie de Carla, falamos y tiramos a fueu, cruciándonos con conocíos de la nueche anterior, diciéndonos que vamos mui tarde, tanto que tan sólo tenemos a un montañeru nel cumal.

Facemos la parte cimera de la Tuca d'Aneto arrodiaos de negrura per tolos llaos

Continuámos a fueu, adelantándame na parte más pindia y más guapa, na que'l percorríu pela buelga ye evidente y dalgo más téunicu, sobretou con tramos de ñeve ya resbariosa y mui blanda. Atrás, quédase Mario que nun ye a siguir ritmu y al que perdemos de vista en dalgún tramu, hasta qu'aportamos a la cumera l'Aneto, onde los crampones sobran y la mochila tamién, poro quitamos tol pesu y averámonos ensin botes hacia'l nomáu Paso de Mahoma.

Entramos y siento voces per detrás, ye Mario que tamién sigue alantre a pesar de la negrura y dalguna tronada. Pasaremos el pasu ensin mayor problema, ya que nun ye na del otru mundiu, pero da mal rollu esos blocones de granitu escolingaos como un castillo de naipes.

Cumal de la Tuca d'Aneto (3404 m)

La tormenta tenémosla enriba dafechu, poro llueu de 6 hores y cuartu d'actividá, malpenes podemos esfrutar de 5 minutos na cumera de 3404 m de la Tuca d'Aneto (monte de más altor de tol Pirinéu) y tiramos como aviones p'abaxo, destrepando'l paso de Mahoma, casi más cenciellu que pa xubilo y aportamos a les mochiles, onde tomamos dalgo d'agua y preparámonos pa poner crampones.

Demientres garramos baxada hacia'l colláu Coronas, quedamos ablucaos cola cantidá de xente que venía per detrás, entrugando munchos con cara de cansanciu, cuanto queda. Nel intre, retruques que l'últimu esfuerzu, encomiendes a facer el pasu de Mahoma, ensin mochila nin crampones y que por favor, baxen cuanto antes, pola tormenta qu'avecínase.

Baxamos esnalando pela chelera d'Aneto perdiendo desnivel aína

Colos nuesos pies nel colláu Coronas, garramos descensu a pinchu pela chelera d'Aneto, perdiendo desnivel con muncha facilidá y ye que los crampones pa baxar per tarrenes pindios de ñeve blando, tamién son una aida estupenda.

 

Nuna hora clavada d'escapatoria p'abaxo, descendiéramos casi 600 m de desnivel, decidiendo parar a xintar dalgo curioso, sintiéndonos muncho más seguros na parte baxa del monte. Tirámonos diez minutos, al llau d'un cacharru de fierru ensin xacíu, mirando tol tiempu hacia l'Aneto y nun damos créditu viendo como'l día nun acaba de torcese, aguantando con cuatru gotes y dalguna tronada.

Baxamos hacia la Basa de Salterillo de camín hacia Aiguallut

Que difícil ye xustificar decisiones, apurar al grupu, pa que llueu nun caiga denguna gota, pero esa nueche pudimos ver como de tando nuna terraza pa cenar, entró la torba y llevó per delantre terraces enteres, teniendo como non, que cenar dientro, llueu de garrar botelles de vinu, platos y demás pa echar un cable a los camareros.

 

Asina que quedámonos tranquilos coles nueses decisiones, anque fuera a posteriori, intentando ya esfrutar tola baxada hacia'l Vall de Barrancs que tenía que llevanos primero hacia la Basa de Salterillo, con un ibón cargáu pol desxelu, pa descender a la vera'l barrancu hasta la baxera onde xuntámonos col de Barrancs que baxa con una fuercia descomunal en Xunu.

Aventura pa baxar pel Vall de Barrancs hacia´´l Plan d'Aiguallut

Cuando lleves casi 9 hores y media de ruta, azotáu un pocu poles condiciones meteorolóxiques, toparte con un últimu problema, tan grande como cruciar un barrancu con tintes torrenciales, nun ye platu de bon gustu, ya que de xuru que pasar al otru llau y garrar el GR que vien de Salenques, en Setiembre, nun ye problema, pero nesta dómina l'añu, puede arrastranos ya qu'habría que metese casi hasta la cintura.

 

Como siempre, tocó mirar GPS, mapes y buscar dalguna solución que nun mos ficiese xubir hasta'l colláu de la Renclusa de nuevu, alcontrando por suerte un pasu a la manzorga del rigu, pa destrepar per un barrancu secu, que sacónos al Plan d'Aiguallut, onde les riegues dixébrense seliquino pa cruciar per pontes de madera.

Esfrutamos al final de camín tranquilu pel Plan y Foráu d'Aiguallut

Relaxaos al fin, ponemos ritmu de dexase llevar y vamos esfrutando del Plan d'Aiguallut primeru y del Foráu dempués, con vistes siempre a la Tuca d'Aneto, cada vegada que miramos atrás. Alcontramos dellos senderistes, que mirénmos con cara rara, viendo les pintes que gastamos, con botes ivernales colgando de la mochila, crampones y piolé.

Sólo nosotros, sabemos lo que vivimos y en particular, lo que viví nestos díes, pasándolo fatal na incursión pela fastera d'Alba del día anterior y tamién nesta ascensión al Aneto, nel que ta claro que nun taba nes meyores condiciones físiques, anque a tolos collacios pesie a venir más descansaos, fízosenos bola lo llargu del camín.

Aportando a la Besurta (1900 m) onde terminamos esta estresante ascensión

Sicasí, aportábemos a la Besurta, llueu de 11 hores de ruta y 15 km de percorríu, faciendo un desnivel positivu de 1360 m y 1600 negativos, números qu'avezaos a rutes n'Asturies nun son denguna xabazada, pero por dalgún motivu, l'altitú, el llargu camín... nun fizo que nos sintiéramos cómodos durante l'ascensión.

 

En resume, como ya dixera, l'Aneto dexámoslu tacháu pero tampoco ye que lo esfrutásemos, nin pola meteo, nin poles nueses condiciones físiques, quiciás mermaes por dormir pocu y siendo sinceros el percorríu d'ascensu pel Portillón ye feu enforma y facer tanto camín pa tener una trepada espuesta y dalgo malrrollera xustu enantes, nun lo fai de lo más atrautivu.

 

Como se suel dicir, l'Aneto ya lo fice dos vegaes, la primera y la última, hai milenta montes más guapos nel Pirinéu.

Camudando'l Camín a la fín na Tuca d'Aneto