martes, 8 de junio de 2021

Ribota (Sayambre) - La Guariza - Niah.u - Pozalón - Llaete

6 de Xunu de 2021

Track: Ribota (Sayambre) - La Guariza - Niah.u - Pozalón - Llaete

Cola pandemia aselada, a la fin, pudimos axuntanos colos collacios vascos, ya vacunaos, preparando una ruta a la que-y tuviéramos ganes. Comenté-y a Fernan de dir conocer la Peña Niah.u, últimu Monte Cimeru de Picos que faltábame por ascender, así nun lo pensamos y el domingu alcontrámonos almorzando n'Oseya de Sayambre pelín más tarde de les 9 y media la mañana.

El día ta preciosu, asina que'l llargu viaxe paga la pena y eso que comentánmos que nos Beyos taba'l día pelín borrinosu, cosa que nun tuviéramos presente dellos miembros del grupu que veníemos dende Maraña d'esguilar los díes anteriores.

Partimos dende Ribota (526 m)
Magar del almuerzu, baxamos al pueblín de Ribota, onde aparcamos y entamamos a facer los preparativos. Pa cuando xuntámonos toos na puente sol rigu Seya, dellos compañeros ya fueron adelantándose, a sabiendes de la dureza de l'ascensión, intentando ganar dalgunos metros de caleyar más sele.

Ascendemos pela viesca'l la riega Igüeyo hacia la Guariza

Unes cuantes envueltes más arriba, enantes de cruciar la riega d'Igüeyo, ya los alcontramos y continuamos al so mesmu ritmu, siempre per bon camín, que traviesa tendíu tola viesca de la xerra'l Mediu hasta la nomada Guariza, onde aparte de tener fonte, tenemos unes increyibles vistes sol macizu'l Cornión coles Peñes Santes, como protagonistes cimeres.

Dende La Guariza el tarrén ponse pindiu y toca bregar duru

El sitiu ye una pasada, teniendo la oportunidá de charrar un ratín con xente llocal que diben curiar al ganáu que pastiaba en tan guapu mirador. Dende equí, ya sólo va quedanos les vistes, porque toca meter la reductora y bregar p'arriba ensin dengún senderu claru.

Les vistes continúen siendo una brutalida, al igual que'l desnivel a salvar

Tamos falando de casi dos hores d'ascensión pa salvar unos 600 m de desnivel, lo qu'indica cláramente que'l tarrén nun ye cómodu, pudiendo dixebralo nuna primer parte más amable, un tramu intermediu gafu, con dalgún pasín mui tiesu, onde hai qu'agarrase a les urcies y xubir con xeitu y un tramu final, onde alcontramos una canalina más pisada a la mandrecha, que llévanos a una preciosa forcadina na cresta, con vistes brutales a Los Beyos.

Esfrutando del crestéu hasta la Peña Niah.u
 
Llegaos al crestéu, ya sedrá un auténticu disfrute los caberos metros hasta los 1721 m de la Peña Niah.u, onde les vistes amplíense en toles direiciones, alcordándome como non de la circular a esti monte, pasando per Tolivia y Llué, qu'asítiase no más fonderu'l valle Ruaguín na meceura col rigu Canalina, un llugar xabaz enforma, como toda esta fastera de los Beyos.

Grupu na Peña Niah.u (1721 m)
 
Daremos un merecíu descansu, llueu de les 3 hores y media d'ascensión, xintando y recuperando fuercies pa entamar un prestosu crestéu hacia'l picu'l Pozalón, dellos metrinos más altu que la peña Niah.u. Sacante d'andar con curiáu de nun resbariar, por mirar demasiáu pa les vistes hacia Peloñu y les peñes de Ten y Pileñes, nun tendremos mayor dificultá que dalgún pequeñu trepe y destrepe.

Prestosa crestería hacia'l picu'l Pozalón

Nun tarrén más quebrapates, los músculos van relaxándose y el grupu llega con meyor cara a los 1740 m del Pozalón, camentando que menos mal que'l día ye fresquín pesie a la solana, porque sinon, sí que podríemos tar pasándolo mal de verdá. Nesti sen, vuelvo a da-y agua a Kíla que lleva al ralentí ya un bon ratín, ya que la xubida fue pindia pa humanos y pa perrinos.

Cumal del Picu'l Pozalón (1740 m)

Con ganes d'emprender el descensu, entamamos a baxar, viendo que'l Pozalón tampoco ye que sea un picu mui transitáu, por muncha caseta y antena que tenga, atopando por suerte na so base una charquina que fae les delicies de Kíla, poniéndose de barru hasta la zona de flotación como ye vezu nella.

Descensu hasta Llaete onde entama la baxada hacia Ribota

Poques vegaes, podemos dicir que nun hai una vista mala y nesta ruta ye asina, ya que tol descensu hacia Llaete fadrémoslu, cola Peña Mora enfrente y tol valle que xube hacia Arcenoriu, que nun puede tar más verdi nesta dómina l'añu.
 
Garramos la llarguísima pista de baxada hasta Ribota
 
La baxada per pista ya sedrá amenizada polos alderiques montañeros clásicos, ya que nun hai más quexase cayer, con vistes hacia la Torresanta dacuando, hasta aportar a un repetidor, onde toca travesar un prau y garrar un camín dalgo más tomáu hasta empatar cola mesma pista de subida que nos dexará en Ribota.
 
En resume, ruta imprescindible que nun total de 6 hores y 45 min, va facenos ganar un desnivel acumuláu de 1265 m, casi toos ellos nos primeros kilómetros de los 12 del percorríu, pa conocer dende riba, una de les fasteres más xabaces d'Asturies que Sayambre ye asturiana.

Camudando'l Camín en Sayambre

2 comentarios:

  1. Esta téngola ensin facer dende cuanta ya. Y de garrapates, bien ¿non?, ja, ja
    Un saludu

    ResponderEliminar
  2. Na media primaveral jajaja. Quitamos unes cuantes

    ResponderEliminar