lunes, 12 de abril de 2021

Val.le (Somiedu) - Sousas - Faspachón - Cuevameliz - El Puntío

30 de Marzu de 2021

Track: Val.le (Somiedu) - Sousas - Faspaxún - Cuevameliz - El Gabitón


Dempués d'un día de tresvase furgoneteru dende la costa Occidental, onde tuviéramos trepando en Penouta y Panondres, aportamos a Somiedu y más en concretu al Val.le, llugar de partida de munchísimes rutes y tamién de dalgún día d'esguilar na Pena Blanca y na redolada.

D'esti xeitu alborecemos per Somiedu

El día anterior, tuviéramos trepando un pocu, poniéndose'l día pelín gafu a última hora, dexándonos claro qu'al día siguiente nun diba tar mui allá. Dicho y fecho, llevantámonos y un día murniu danos los bonos díes, asína que decidimos dar un pateín coles perretes, pa que faigan un pelín más de manada, ya que Xena nun tenía mui a bien a Rico jeje.

Almorzamos y saldremos del Val.le (1264 m)
Por suerte, llevaba dalgo preparáu nel GPS, asína que saliendo dende l'aparcaderu del Val.le, cruciamos el rigu y empobinámonos per camín hacia la braña de Fuexo, mítica con viste a tol valle de Sousas y al pueblu del Coutu, dende'l que ficiéramos va añinos una ruta increyible al picu Gúa.

Facemos camín relaxáu hacia la braña de Sousas

Continuaremos camín perconocíu hacia les brañes de Sousas y Tabladiel.lu, perconocíes y mui visitaes, p'ascender esta vegada hacia la Bobia Sañéu. Lo normal pa la mayoria los montañeros ye continuar hacia'l col.láu Muñón y ascender a la Penachana pero tenía ganes de conocer los Puertos de Cuevameliz, asina que tocaba dir un pocu a descubrir nuevos llugares.

Ascendemos per Solapeña hacia la Bobia Sañéu

Aportaremos a la Bobia Sañéu, alternando tramos con dalgo de senderu marcáu con monte baxo y pedrera que vamos llibrando como podemos, hasta dar col colláu, onde les nuesa vista quedará namorada de tan guapu llugar, allugáu pente tola xerra L.lagüezos (Pena L.lana) y los Picos del Rebezu, Faspachón y Cuevameliz.

Baxamos a descansar a la Veiga Faspachón

Descenderemos per neveru hacia la Vega Fuxadinos, onde magar de dos horines de ruta, decidimos descansar un pocu, enantes de tornar a l'actividá ascendiendo al picu Las Fanas de Faspachón, cota más alta de les cotes orientales de los puertos de Cuevameliz.

Ascendemos al picu'l Faspaxún con grandes vistes del Val.le

Con pocu esfuerzu y unes vistes brutales de tola faldera de la Pena L.lana cada vez que paramos a garrar aliendu, vamos dar preste al picu las Fanas de Faspachón, el meyor mirador de tol Val.le y de los tola redolada, dende'l cordal del Tarambicu pasando pelos Albos, la Pena Orniz y los más recientes nel tiempu, picos de la Mortera.

Facemos cumal nel Picu'l Faspaxún (1921 m)
 
Pueu dicir, que nun tengo quexa de la conocencia d'esta fastera somedana, lo mesmu que diba contándo-yos a les collacies, lo guapo de la ruta al picu Gúa o la Pena Salgada per llugares como la Franca o Valdecuélabre, el nuesu pasu pelos puertos de Cuevameliz taba siendo una gociada.

Damos preste tamién al Picu Cuevameliz (1899 m) algamando vistes del L.lau del Val.le

Magar de la semeya de cumal, descendemos hacia la Veiga de Cuevameliz, pa decidir ascender tamién hasta'l picu Cuevameliz, prometiéndo-yos meyores vistes del L.lau del Val.le, asína que xugándomela, por mor de la so posición más oriental, garramos impulsu y ascendemos tamién a los 1899 m del picu Cuevameliz, algamando eses vistes naguaes.

Descendemos de Cuevameliz hacia la vallina Los Esperones

Dende lo alto, cuénto-yos que'l plan ye siguir tolos puertos hasta Sobre L'Agua, onde ya garraríemos mítica baxada al Veneiru, pero vemos una vallina a la manzorga'l picu La Fana que paez finar nuna brañina, poro nun soi a quitar el picor de conocer dalgo nuevu y descendemos pela fastera sur del picu hasta una bona traza de senderu que llévanos a una colladina col picu L'Arcu (1697 m).

Perguapu camín pasando pelos Escalones y baxando per un fayéu hasta la pista'l Val.le
 
Munchu güeyu, con siguir les traces de los robezos, los cuales casi me fulminen na baxada anterior, pasando a dos metros ún d'ellos, ya que llevaríenmos nuna cincha con cortaos sol val.le, de los que nun sabría dicir si hai baxada, per Cuevameliz.

Enllazamos col camín a la solombra del L.lau del Val.le

Nós, garraremos tola vallina alantre, tomando un senderu pegáu a la riega que baxa dende Fonfría y siguiéndola daremos colos restos de la braña d'Arbaneicha, onde tomamos un senderín, el de los Escalones, que travesará un hermosu fayéu hasta la braña'l Puntío onde aportamos a la pista que baxa del Veneiru.
 
Sin mayores dificultaes, decidiremos continuar pel camín a la solombra que vien del L.lau, aportando de nuevu al aparcaderu del Val.le , magar de 5 hores y 40 minutinos d'increyible ruta, con 13 km y 860 m de desnivel, tan sólo pelín tapecía pol día ñublu que nun dexó tener tan bones vistes y lluz pa les semeyes.

Camudando'l Camín a lo perruno per Somiedu

No hay comentarios:

Publicar un comentario