7 de Marzu de 2021
Track: Trescares (Valle Altu) - Rubó - Carraspión - Collantes - Oceño (Valle Altu)
Finde pel oriente, na bas de los Picos d'Europa, nel que magar d'escalar per Oceño de sábadu, vamos tener tamién esti pueblín del Valle Altu de Peñamellera, como fin de la nuesa travesía. El entamu sedrá dende Trescares, poro madrugaremos un pelín los furgoneteros pa xubir a Oceño una furgo y descender a Arenas a almorzar col restu del grupu monte.
Llevamos tiempu con ganes de tornar a conocer un pocu más esta fastera
de Picos, ya que la última vegada bregáramos como nunca pela foz de Mildon y cuantayá que tuviera con Fernan pela Cabeza Viguera, quedándonos xustu enmediu por conocer la canal de Rubó.
Partimos de la ponte la Vidre en Trescares (80 m)
Ensin mayores miramientos, cruciaremos la ponte la Vidre, al llau de
Trescares, pelín enantes de les 10 de la mañana, adientrándonos pali
pali nuna preciosa viesca, moquetada de mofu, hasta topar con un crucie
de siendes, teniendo que tomar la más baxa a la manzorga, ya que sinon
garraremos la d'ascensu al colláu Trespandiu, xustu pela que baxáremos
nel descensu de la Cabeza Viguera.
Preciosu camín hacia la canal de Rubó
D'esti xeitu, bordiaremos un pocu penriba'l Cares, hasta ganar una
colladina con cabañes, onde ya empobinámonos hacia la canal de Rubó. Son
d'esos llugares que tenía pendiente y que faime especial ilusión,
siendo'l primer tramu'l más guapu pasando a pocos metros del rigu hasta
crucialu per una ponte hacia la manzorga'l rigu.
Percorremos la Canal de Rubó esfrutando de cada pasu
El dia ta murniu, pero con una temperatura afayaiza, lo que nun quita que l'ascensión per Rubó, faiganos sudar enforma. Nun soi a parar de mirar pa los pasos y canales que salen al nuesu alcuentru en dambes fasteres, pero'l nuesu destín va hacia la mandrecha, poro cruciaremos ya pel calce secu del rigu y diremos dando vista primeru a la canal de Natareños y a la del Fresnu la cual ye nuesu destín.
Vamos saliendo del rigu Rubó p'ascender la canal del Fresnu
Abandonaremos el valle de Rubó, que siguiría hasta'l colláu La Galabín, quedándome con ganes de conocelu enteru y entamaremos una penosa xubida a pinchu pela canal del Fresnu. Por suerte, reciéntemente hubo "quemes controlaes" y les nueses pates nun tienen que sofrir les cotoyes que tapicen estes vallines. Sorprende nel nuesu ascensu, l'enorme paré de la Peñe Tarasiellu, que diremos dexando a la nuesa mandrecha, hasta aportar a les cabañes de Sobreviña, que pudieren dexanos ya avanzar per meyor senderu a les puertes del colláu y mayada de Trespandiu.
Pasamos per Sobreviña penriba'l colláu Trespandiu
Les nueses andances, teníen de llevanos a l'ascensión del Cuetu Las Vacas, pero según vamos ascendiendo dende Sobreviña per Llau, ensin baxar a Trespandiu, diremos garrando'l suficiente altor, pa ver que la borrina nun mos va dexar ver res, poro al aportar a la pista que xune Trespandiu con Carraspión, ya decidimos continuar la travesía ensin encumar dengún monte.
Travesamos per Carraspión hacia'l Colláu Llamea
Caleyaremos a bon ritmu, tola pista hacia'l mayáu Carraspión, dexando pente la borrina, el Cuetu Las Vacas a la nuesa mandrecha y el cuetu Carraspión a la manzorga, pa continuar pelas Cupriceras hasta'l colláu Llaméa, onde entamará de nuevu otru tramu ilusionante de ruta, al nun conocelo, non como l'anterior que ya lu ficiéramos tamién nel descensu dende Tah.adura a Trespandiu naquella xabazada que nos metiéramos.
Esfrutamos d'una guapa baxada pela canal de Collantes
Dicir, que nun tenía referencies dende Llamea hasta la mayada de Collantes, pero namái entamar a caleyar ya alcontramos restos de senderu y la baxada sedrá guapa enforma per un fayéu y siempre con vistes a los pericuetos y canales que cayen dende los Traviesos de Llamea, pelos que pasáremos a toa priesa.
Garramos la Senda Collantes con vistes hacia'l xabaz mundiu del rigu Mildón
Esfrutaremos esta cómoda baxada, parando a picar daqué enantes de la mayada Collantes, pa topanos colos restos d'esta guapa mayada y con un pastor y sus milenta mastinos, col que charraremos, interesándose por Kíla y polos nuesos siguientes pasos, que diben llevanos hacia la nomada Senda Collantes.
Averámonos hacia'l Cuetu la H.oradá... míticu pasu na senda Collantes
Montse y yo, únicos miembros del GM Xuan de la Borrina, que tuviéramos na aventura pelas Peñas Cabriegas y pela foz de Mildón, nun podemos parar de mirar pa toles riegues y canales a transitar, esperemos nun futuru non mui llonxanu. Estes coses piénsense demientres la senda Collantes nun tien tanto atrautivu hasta qu'aportamos al pasu del Cuetu la H.oradá onde entamen les fostilidaes y la belleza d'esti senderu.
La senda tórnase más guapa a cada pasu... con dellos tramos colgaos increyibles
La verdá ye que dende este arcu de roca, el camín tórnase ablucante y vamos dir travesando la enorme canal que cae hacia'l rigu Mildón, per pasos colgaos, más espeutaculares que difíciles. Pena que'l día, nun acompañe y les ñubes tórnense amenazantes, porque la ye un camín preciosu y esfrutámoslo como guah.es, hasta aportar al colláu Trasllué, onde la meteo ya tien pinta de torcese del tou.
Terminamos la senda Collantes nel colláu Tresllué enantes del descensu final n'Oceño
Fadremos reunión final en Trasllué, aprovechando pa poner dalgo d'abrigu y apuraremos la baxada hacia Oceño, baxo les primeres goteres d'un finu orbayu y con un vientu fríu que xela. El descensu per bon camín, líase un pocu nes cabañes de Roza, pero salímos al pueblu ensín mayores problemes, onde damos fin a esta afayaiza travesía.
En resume, ruta imprescindible, a poder ser con un día más soleyeru pa ganar vistes, na que conocimos un pocu más d'esti pequeñu mundiu que ye Peñas Cabriegas, faciendo un total de 11.3 km, con un desnivel positivu de 1200 m nes 6 hores y cuartu que duró la travesía.
Camudando'l Camín nes fasteres xabaces de Peñamellera
No hay comentarios:
Publicar un comentario