lunes, 8 de marzo de 2021

Oceño (Valle Altu de Peñamellera)

6 Marzu de 2021

Tornamos de nuevu per Cabrales, nun finde escalador-montañeru dalgo gafo no meteorolóxicu, pero qu'a la fín, permitiónos facer les actividaes que teníemos en mente. De sábadu, averámonos hasta Oceño, una vegada más, col envís de probar los sétimos de la escuelina ya que los sestos ya los ventiláremos nos dos visites anteriores.

Calecemos manos, Anna y yo, en Roba la Fuente, ya que ta'l día fresquín, demientres llega'l restu la tropa y de secute métome a montar unu de los 7as, faciendo les primeres cintes bien, hasta un chapaxe duro que resuelvo y cuando quiero moveme pa salir del pasu, se fai de nueche dafechu jaja.

Ani apretando duro en su primer día nel seutor

Cuelgo, miro y remiro y allorio col pasu, nun veo casi preses y me digo qu'esto nun paez 7a. Revisamos croquis y me diz Rubén que ye 7c jajaja. Buena guah.e. Toca acerar y salir a reunión como pueu y de la que baxo monto lo que si yera un 7a xustu a la so manzorga.

Pente'l grupete que somos, casi petamos ya'l seutor de perros y xente, tando prestosu ver progresar a caún nes sos víes. Ye día de plumes y guantes mientres nun escales, pero aguántase bien y l'ambiente ye bien divertíu.

Orlando y Natalie nos sestos d'Oceño

Demientres, prueben el 7a que dexé montáu Rubén y Xavi, Anna anímase a montar l'otru 7a, aportando perbien al bloque de techín, que nun ye a resolver nel so primer pegue. Darréu, tiro yo y pringo na placa del mediu, asina que miro'l bloque d'arriba, termino de montala y dexámosla pa un segundu pegue.
 
Los encadenes nun tan baratinos precísamente y la roca pel momentu, tien de sanear y nos sestos llevamos dalgún sustín con dalguna peña que ruempe. Aún así, hai motivación y los pegues son bien divertíos, viendo dalguna bramada de les buenes con volátiles incluyíos.

Xavi apretando nes plaques d'Oceño

Los segundos pegues van siendo más definitivos y sí que los encadenes van xurdiendo, tanto Xavi como Rubén en Coyugu, como Orlando y yo en Sobrelacueva. Anna, tamién-y mete un pegón encadenando hasta'l bloque y dexándolo matizáu pa otra visita.

Habrá que tornar y siguir probando cosines...

Oceño
 
Croquis modificaos por mi de la escuela d'escalada de la Oceño, por mor de la Revista INUA. Gracies y col so permisu.

----------------------------------------------------------------------------------------------------------------- 


19 d'Avientu de 2020

Otru finde qu'escapamos del centru pa Cabrales, col envís de trepar un ratín, siendo la meyor opción pal sábadu, con lluvies recién cayíes, tirar hasta Oceño, onde podemos comprobar que ye un paré que seca bien ceo.

Nun vamos volvenos llocos y decidimos continuar pelos graos más baxos, encadenando a vista otru 6a que nos quedaba, un 6b+ cabrón, de pasu raru y pel momentu la meyor vía de les que probé na paré La Madera n'Oceño, La Quintana, un 6c/+ llargu y mui intensu a la manzorga'l paré. 

----------------------------------------------------------------------------------------------------------------- 

2 de Payares de 2020

Selmana de vacaciones y con un mínimu requexu de bon tiempu na mañana pa facer dalgo, nun se nos ocurre otra cosa al Tres Pates pa un Bancu Team que dir hasta Cabrales, ya que diba tardar más en venir un frente lluviosu y eso que tuviéramos fai dos díes de monte per Cabrales, cola guapa ascensión al Cuetón pel Seu de L'Home Muertu.

Vistes bien guapes del escobiu del Cares y del Forcáu del Cuernu

Esta vegada queríemos trepar y queríemos conocer una escuelina nueva, como ye la d'Oceño nel Valle Altu de Peñamellera, con croquis recién espublizaos na revista INUA. Va pocu que tuviéramos na Rumiada prestándonos el sitiu pola vida, pero a día de güei llegónos la noticia de que'l Parque de Picos, ya tuvo tocando los coyones como siempre, porque facer una escuelina d'escalada ye malísimu pal mediu ambiente, pero petar de Alsas los Llagos o la sienda'l Cares, eso ye perbono pa la fauna y la flora.

Andrea aprovechando los rayinos de sol de la mañana

Nun voi entrar en temes políticos, porque la xestión de los parques nacionales y naturales, al menos n'Asturies nun ye que seya nefasta pa colos los deportistes, sinon que tamién lo ye na mayor parte de los casos pa colos propios vecinos de los pueblos abellugaos nellos. Nesti casu, estes pequeñes escueles traen un turismu de calidá, respetuosu col mediu ambiente y que siempre dexa perres y nun engochez el monte na mayor parte los casos, non como los carrapetaos de xente que van pel Cares en manaes durante'l branu.

Esguilando un puquiñín tastiando la pinchuda roca d'Oceño

D'otra miente, el llugar onde asítiase esta escuela, na Peña La Madera, ye una pequeña ayalga con vistes al escobiu'l Cares y a la xerre de H.uanrobre, onde ta'l mayáu de Nava, llugar onde podría esistir una escuela d'escalada perguapa nun entornu d'ensueñu, con posibilidá inclusu de facer un refuxu d'escaladores, en dalguna cabaña abandonada.

Anna trepando fino peles regletes nesta nueva escuela

La meteo nun nos dexó tastiar la increyible roca con tiempu, pero al menos, ficimos un par de víes cencielles caún y sacante de los milenta pinchinos que dirán rompiendo col pasu de los escaladores, les víes son de calidá y les más dures tienen una pinta brutal. Poro, si nun la zarren tamién, tengo pendiente una visita sele onde probar munches más víes y faceme una idega más fonda de la calidá del llugar.

Kíla collaborando n'asentar el pié de vía

Con pocu más, tuviemos que colar pa Oceño a Casa Alfonso, cola idega de xintar pero ya taba'l gobiernu asturianu piesllando los chigres por mor de la pandemia y nun teníen más sitiu. Eso sí, fueron tan amables sacándonos de pinchu un pocu de pastel de cabrachu y unos tortos, pa nun tener que tirar la comida supongo qu'acompañáu d'un par de botellines de sidre fue un vermú de restallu.

No hay comentarios:

Publicar un comentario