jueves, 26 de noviembre de 2020

Val.le (Somiedu) - Pena L.lana - Picos Blancos - Picos de la Mortera

24 de Setiembre de 2020

Track: Val.le (Somiedu) - Pena L.lana - Picos Blancos - Picos de la Mortera


Un día cualesquiera, como siempre, Ana dame un toque picando pa ver si pueu garrar un día pa salir al monte. Esti añu, pente la pandemia y demás, tengo díes sueltos a esgaya, asina que póngome a preparar dalgo pa pegar un patéu guapu, pero ensin xatada infame, ya que tenemos previsión de lluvia pa la tarde.

Va tiempu, que sé que los últimos dosmiles de Somiedu que me queden por facer, son les peñes de la Mortera, poro preparo una circular guapa y p'allá que vamos. Cuantayá que nun tuviera per Somiedu y más entá pel Val.le, asína que paezme una idega de lo más afayaiza.

Partimos del Val.le (1258 m) en Somiedu

Saldremos del Val.le so les 9 y media la mañana, cruciando'l rigu Val.le col envís d'empobinanos a les brañes de Sousas primeru y más tarde Tabladiellu, peles que tantes vegaes pasamos en delles otres rutes a la Pena L.lana o a la preciosa circular a la Peña Gúa.

Travesamos les brañes de Sousas y Tabladiellu con guapes vistes
 
Les vistes amplíense según vamos ascendiendo hacia'l col.láu Muñon, saliendo antes nós vieyes conocíes como les peñes de la Franca, Valdecuélabre y La Salgada, así como'l picu L'Altu que vien dando continuidá a la guapa Peña Gúa.

Perpasáu'l col.láu Muñón, damos vista a l'ascensión a la Pena L.lana, la cuál ascendiéramos va dellos años nuna Xuntanza Asturvasca. Ensin mayores problemes, ganamos la L.lana pela canalina y aportamos a los 2068 m d'esta prestosa cume.

Ascendemos hasta los 2068 m de la Pena L.lana

El día ta frescu, con un vientín que güel a ñeve, asina que nun paramos res y continuamos la L.lana alantre, pasando per un hombru, nomáu como Pena L.lagüezos (2057 m), pa descender al col.láu so L'Agua, onde entamaremos l'ascensu hacia los Picos Blancos.
 
Nel intre, va facésenos pelín gafa la xubida por mor del fuerte vientu y fríu que sofrimos. Sicasí, continuamos a bon ritmu y ganamos el cumal pela so faza NO, p'abelluganos una migayina nos 2065 m de los Picos Blancos, los qu'amuesen unes vistes de primer categoría miremos pa onde miremos.

 Siguimos en guapa travesía hacia l'ascensión a los Picos Blancos (2065 m)

La verdá ye que tenemos una cantidá de dosmiles babianos enfrente que nun fai más qu'aumentar el picor de siguir patiando, pero quedámonos cola alcordanza del Montigüeru que ficiéramos nuna guapa ivernal y cola mala meteo viniente, poro salimos hacia'l restu de los Picos Blancos que nun son otros que la pena Cebol.léu y los picos del Cura.
 
Ésta cresta descendiente, ye enforma entretenía y tien d'empobinanos hacia'l colláu la Paredina, dexando atrás nun guapu descensu la cota más alta de los Picos Blancos, monte guapu con forma de pirámide.

Crestiamos el restu de Picos Blancos (Pena Cebol.léu (1986 m) y Picos del Cura (1935 m))
 
Como dixe, con tan sólo crestiar, pasaremos pela Pena Cebol.léu de 1986 m y más abaxo aportaremos a los Picos del Cura (1935 m) con vistes de páxaru so la braña de Murias L.longas. En tol crestéu, toparémonos con dellos corredores que vendrien dende la braña que dexamos apuntaos nel maxín pa una ivernal a los Picos Blancos con ciertu picorín.
 
De los Picos del Cura, tendremos una baxada a pinchu, con dalgún tramu dalgo más delicáu polo pindio y por mor de la piedra suelto, hasta aportar al col.láu la Paredina. Ye mui simpática la toponimia astur, ya que la "paredina" ye una muria brutal que tenemos xustu enriba y a la que vamos ascender per una guapa canal.

Continuamos camín hacia los Picos de la Mortera
 
Col cielu ya dimpuestu a empuercase de ñubes dafechu y cada vegada más frío, vamos ganando altor a la canal, nun ascensu pindiu pero mui prestosu hasta aportar a la zona alta de las Morteras, onde garramos un canalizu pente la peña hasta aportar a los 2023 m de la pena la Paredina, con bona cayida hacia'l col.láu como non.

Facemos cume na Pena La Paredina (2023 m) col día revueltu

Nun hai quien pare ya y salimos por pates p'abaxo faciendo un pequeñu tramu de monte baxu hasta engolanos n'arista final de la peña La Mortera, onde alcontramos una de les vistes más prestoses d'Asturies diría yo, col L.lagu'l Val.le xustu embaxo nuesa, así como como de la cercana Pena Orniz penriba de tola Mortera.

Finamos con ún de los cumales más guapos d'Asturies.. la pena La Mortera (2013 m)

El día nun da pa más, llevamos a fueu tola ruta, picamos dalgo y vemos como la ñube amenacia con descargar, asina que buscamos baxada hacia'l Val.le La Mortera, dándo-y la vuelta a la peña pel Sur y ya descendemos apriesa hacia'l l.lagu perpasándolu pela so manzorga hasta'l Veneiru, onde tenemos que poner el goretex por mor del orbayu de continuu.

La meteo convídanos entamar una escapada hacia'l Val.le a ritmu gayasperu

Ensin más, garraremos la pista del GR y pel camín a la solombra (güei danos igual jeje) vamos tornando a bon pasu hacia'l Val.le de nuevu, fixándonos bien nun potente argayu que cayó dende Las Estacas, travesando les peñes hasta'l rigu, teniendo que ser brutal nel so momentu.
 
Comentando la xugada, ensin danos cuenta, tamos ya entrando pel barriu de L'Outeiru y con pocu más, aportamos al aparcaderu del Val.le, magar de 7 hores de ruta, a bon ritmu, nel que nos llevamos pal bolsu, unes cuantes cotes de dosmil nuna imprescindible circular de 20 km de percorríu con un desnivel acumuláu de 1430 m.
 
Que vos preste!!

Camudando'l Camín per Somiedu

No hay comentarios:

Publicar un comentario