viernes, 26 de mayo de 2023

Peña Manteca (Morcín)

26 de Mayu de 2022

Siendo sinceros, llueu del mes de Marzu y Abril, col bon tiempu y bones temperatures que fizo, nun contaba casi con apaecer de nuevu pela Carba. Nel mes de Febreru si que xubiera con Santos y Dani varios vienres, probando tranquilamente Distopia Primaveral (7c+/8a), ensin mayor envís que dar pegues sueltos y ver si yera a moveme nestos graos.

Llueu de munchos díes pela Cualladrona, llevándome Aker y Soul (7b+), Roca Norte (7b+/c) y dexando a puntín Esclavos del Grado (7c/+), averéme dellos díes frescos hasta la Carba, p'acompañar a Santos que taba probando Pétalos (8a), asina que volví a dar unos pegues a Distopia Primaveral, xunto a Rubén, viendo que me movía diferente, algamando munchu color nun últimu pegue del primer día. 

 
Primer tramín al bloquín d'entamu de la vía

D'esti xeitu, unos cuantos díes más, fuimos afinando la forma y los movimientos y cola motivada del encadene de Rubén, tocó dir a por ella, cola cuenta atrás del calor picando a la puerta. Un par de díes más, dexándola con una caída cola compaña d'Orlando que la probaba per primera vegada y esta selmana sentía que yera'l momentu de llevámela.

Pifiando'l bloque nel primer pegue del día

El martes, xubía con Orlando, montándola y viendo que taben munches preses húmedes poro, diba tar la cosa complicada. Baxo cepillando y dando magnesiu a les preses, dando un segundu pegue bastante buenu, cayéndome nel pasu duru pa min, aportando a cadena y dexándola una vegada más y diben 3 con una cayía.

 
Nel bloque más duro de Distopia Primaveral

El miércoles con un día frescu y sequino, nun tuve la suerte de tener compañía pa xubir, asi que tuve qu'esperar al xueves, onde al igual que cuando probé la vía per primer vegada, arrodiáu de collacios, fuimos hasta la Carba a echar la tarde, viendo que pegaba una solana de puta madre, así que pintaba fea la cosa.

 
Aguantando'l pasu final na sección más dura de la vía

Tocamos la roca, vien una ñube y entro a la vía, con sensaciones bastante buenes, nel clásicu pegue pantera, aportando al bloque y casi quedándome de la presa, pero yéndome p'abaxo. Sigo hasta cadena, pola cosa de dexala de nuevu con una cayía ya intento centrame nun segundu pegue hasta onde caiga y dexar un terceru pa marchar.

 
Placa final hacia la cadena nel pegue d'encadene

Me como un pegue colega de Silvia en Crucifixión y métese la ñube y sopla un vientu friu, asina que métome a la vía a ver que pasa, entrando al bloque con fuercia, sintiendo mi presa clave mui bien, quedándome nel dinámicu, asina que salgo p'arriba de la barriga, intentando baxar vueltes con calma nel siguiente chapaxe.

 
Encadenando'l proyectu de la Carba la Robla

Doime un airín incómodu y salgo col mió métodu, colocando pies y zarranda pinza de dreches aportando a la d'esquierdes lo más paráu posible, yendo al dinámicu final, más paráu de lo normal y yéndoseme un pie, que nun sé mui bien tovía, como aguanté la puerta.

Tuve la suerte de recomponéme y ya centrar tolos pasinos finos de pies y zarrar les preses llaterales como si nun hubiera un mañana, hasta aportar al reposu final. El restu la hestoria, la de siempre, ponese cardiacu por culpa del pasín llargu de cadena pa los baxos, pero llego bien paráu, chapando la cadena ensin problemes y llevándome Distopía Primaveral (7c+/8a), teniendo claro que depende muncho de la estatura, pero nun tengo tantes referencies pa decantame.

-----------------------------------------------------------------------------

5 Avientu de 2022

Entamamos temporada ivernal en Peña Manteca, dempués de munchos díes de branu y seronda alloñáu de los parés d'esta peña y siendo sinceros, tornamos a la Peña Manteca, porque les restricciones inxustificaes paxareres, llévenmos a la Carba o L'Argayu ante'l cierre de Figares, como másimu esponente de la llocura ornitóloga de Morcín

Y digo llocura ornitóloga, por nun llamalos paxareros ensin otra cosa que facer, ya que pieslles d'escueles como Figares, por añeramientu d'Utre ye una total estupidez, siendo un animal que ta en plenu espoxigue, sólo hai que ver l'aumento del númberu d'utres nos últimos años, conviviendo col escalador ensín dengún problema, cosa que nun pasaba cuando la cantera taba en furrulamientu.

Ambientín soleyeru na Carba

En fin, llegó l'iviernu, llegaron los pieslles per añeramientu xabaces dafechu, 8 meses y mediu en Figares, supuéstamente dinámicu, anque prestaríame ver si van trabayar los guardes y reabrir una vegada que comprueben onde añeren les utres y si se-yos molesta. El casu ye que como nun mos movemos, el coleutivu escalador, que ye'l que dexa perres a los hosteleros en Morcín, pues na, siguiremos perdiendo seutores durante meses y meses, cuando pudiera ser muncho menor los meses de regulación.

Dicir, que según el bopa espublizáu, Figares tien de revisase nos dos meses entrantes del entamu la regulación, cosa bien fácil de facer, si sólo tuviera reguláu por Zapiquera (Alimoche) , pero paezme complicáu, con tal cantidá d'utres esistentes, que vayan permitir l'apertura de dalgún seutor de Figares, ya que de xuru, que los ñeros tarán perende en tola peña, anque les víes queden mui pembaxo de les reuniones. 

 
Apretando en Crucifixión... nun tengo semeyes de la so variante Apocalypse jaja

Falando de Peña Manteca, sabé-y que queda en zona piloto, lo que significa que si los escaladores molesten a los páxaros, pueden piesllar los seutores (Carba, Ramileru, L'Argayu), asi que ya sabéis nun faigáis ruiu, nun molestar a los páxaros, que les motocicletes del circuitu del Llusuriu, eses nun fain ruiu, nin molesten nin na... somos los escaladores, tenéilu claru eh!! 

Los cazadores pegando tiros per tolos montes, esos tampoco molesten, lo que pasan que los ornitólogos nun tienen los tolanos suficientes, nin la conseyería a metese colos cazadores, eso ta claro. Asína que ya sabéis, jipis escaladores, que nun dexáis perres nel conceyu Morcín, esguilar en silenciu, na de gritos sharmáticos, tonada, cante jondo, nin flashes indiscriminaos, que los páxaros nun ponen el güevu... y quedamos sin Peña Manteca tamién.

Xavi faciéndose con ni Toro ni Titán ente otres munches del seutor
 
Polo demás, mui bien, mui centráu por Morcín, trepando lo que nos dexen, tornando a probar Ni Toro Ni Titán na Carba y llevándome al tercer pegue una variante de Crucifixión que saldrá tamién 7b, quiciás un pelín más dura que la orixinal, pero mui guapa tamién.
 
Lo dicho, vémonos nos chigres, onde nun damos perres al conceyu y nes parés nos que nos dexen tar, faciendo esti deporte, dafechu minoritariu eh, sin medallistes, nin grandes figures alpinístiques, nin rocódromos enllenos de xente... asina qu'eso piesllar seutores, pa que se masifiquen más los que queden abiertos... tais faciéndolo de puta madre conseyería y aficionaos al paxarerismu.
 
Kíla al solete na Carba la Robla
 

Peña Manteca (Seutores visitaos)

Croquis modificaos por mi de la escuela d'escalada de Peña Manteca, por mor del trabayu de Asturvertical na so mayor parte. Gracies y col so permisu.

---------------------------------------------------------------------------------

28 de Xineru de 2022 

Como non, Peña Manteca sigue siendo referente pa dir a apretar al solete ivernal, asína que nestes selmanes de fríu y díes secos ficimos delles visites sobretou a la Carba, ya que tábemos tol grupu colos nuesos proyeutinos.

A L'Argayu, la verdá ye que tuve muncho más perezosu y namáis qu'averéme un día per ellí, faciendo como siempre una vía de les "cencielles" pa calecer, como fue'l Diablo tiene cara de conejo (6c/+), bona vía mui complea, con dalgún bloquín y tramu de plaquina fina.

Llueu, metiérase muncho calor y magar de tar un bon ratu asegurando a Anna na Coco (7a+) vía na que ta proyeutando dúramente, metíme a probar la Directa a L'Argayu (7b+), la cual pente la dureza del bloque final y la solana que chupara, decidí desmontar, ya que la veía perdura pa un día de tanto calor. 

Andre tuviera, probando l'Espíritu del OI!, un 6c+ atómicu, con componente físicu y mental, al tener dellos vuelos llaterales, sobretou  na parte alta. Esta vía, nel intre, fízo-y perder muncha confianza na so escalada, cosa que recuperará aina y ye que'l componente mental de la escalada ye tan importante como'l físicu.

Sacante d'esi día nel Argayu, el restu de díes fueron dafechu fanáticos na Carba, proyeutando tol mundiu nes sos víes, ya fuera Anna na Purista del A Vista (7a+/b), Suco en Crucifixión (7b) o yo na Ventana de Eli (7b+), vía que me tenía ocupáu dende varies visites.

Díes fanáticos pela Carba

Al primer 7b d'Anna cola Purista del A Vista, vía que pa min ta na mesma dificultá de Sagitario A, hai que sumar tamién el mió encadene a la Ventana de Eli, vía que llevóme un total de 6 o 7 sesiones, algamando los 4 pegues al día, según fui ganándo-y tola resistencia a esta vía, pelín a bloque como toes les del seutor, que terminó por enganchándome enforma.

Tornando de nuevu a mi másimu grau, ya tamos en condiciones d'intentar xubir el nivel na Carba, prebando cualesquiera de los dos 7c del seutor, asína que na prósima visita tocará xubier pela vía como se pueda y prebar los pasos con tola calma del mundiu, agora sí que toca proyeutar.

-----------------------------------------------------------------

18 d'Agostu de 2021

Los díes pasen d'esti branu pelín atípicu, nel que tamos yendo a seutores soleyeros más de lo normal, por mor de lo ñublu reinante nes tardes. Poro, llugares como L'Argayu que contábemos ser d'iviernu, fueron protagonistes de varios díes d'esguilada.

Ún d'ellos tuviemos la suerte de contar col grupu de collacios d'Alex Txikón, Carlos "Snoppy", El Gitano... colos que tamién coincidimos en Figares, pudiendo recomendá-yos varios seutores onde esguilar tranquilos y probar les víes más significatives.

Ambiente fanáticu nel Argayu
 
Un placer velos trepar, apretar y motivase siempre dando exemplu d'ambiente tranquilu nel seutor, pudiendo compartir pegues, espaciu ya incluso conseyos en métodos. Nel día fanáticu, nel que cruciábemos víes y turnos d'esguilada, pude encadenar el Carro de la Vida, ún de los últimos 7a+ que quedaba por facer nesti increyible seutor.
 
Al igual que na Carba, los oxetivos entamen a ser perimportantes y ya nun me queden víes que nun me saquen del tou, d'esi espaciu de tranquilidá nel qu'alcuéntrome en dellos graos... así que va tocar apretar enforma.

-----------------------------------------------------------------

17 de Xunetu de 2021

Como tolos años, siempre garramos un seutor en branu y vamos dándo-y caña, llimpiando víes o simplemente garrando forma de cara a un proyeutu qu'illusione. Nesti sen, garramos la Carba, como campu base, nos díes ñublaos de tarde, col envís de dir tachando víes y averándonos a proyeutar en Ni Toro ni Titán (7c).

Aparte de dir encadenando víes menores, ya lleváramos pal bolsiellu La Purista del A Vista y Crucifixión (dambes 7b pelín seles) y tocara apretar en Sagitario A. Toles víes, llibren el bombu de desplome al traviés de manufactura, sacante de Crucifixión, pero los movimientos son guapos y acaben enganchando.

Apretando duro en Sagitario A

La última en cayer a la llibreta, fue Sagitario A, otru 7b, pelín más durín que los anteriores, nel que compartimos pegues de rises con varios collacios, pero que sobretou tengo qu'agradecer a Anna y Suco, xubir un sábadu a les 9 la mañana enantes de qu'entrase'l calorón del finde, pa poder encadenala.

El día anterior, ya me cayera arriba'l tou nel últimu pegue, asína que tocó volver dafechu fanáticu, teniendo que camudar métodu pa encadenala, por mor, de que l'allargue qu'usaba pa facer tol bloque del tirón, molestábame nun día sin vientu y nun podía llanzar a un invertíu... fuera allargue, asumir y encadenar.

-----------------------------------------------------------------

10 de Xunu de 2021

Continuamos col trabayu en Peña Manteca, arrequexaos poles prohibiciones temporales d'esguilada al seutor de la Carba. Dicir que ví baxar a xente del Ramilleru o L'Argayu y tengo munches dubies si entra o non, na fastera restrinxida, por si les mosques, ser sensatos y por esperar mes y mediu, meyor nun esguilar nestos seutores hasta Agostu.

Andrea probando A.Iva... un 6c+ referente na Carba

Na Carba, magar d'encadenar la Purista del A Vista, tocaba buscar otru proyeutín y aprovechando qu'Andrea quería probar la A.Iva (6c+), tando dambes víes al llau, volví a Crucifixión, que-y diera un pegue va munchu tiempu.
 
Encadenando Crucifixión na Carba... con ganes de proyeutar de verdá

A la fín, anduvimos finos y dempués d'un peguín de preba na que pringué na chorrera d'abaxo, nel segundu pegue fice tola parte baxa y salí del techu ensin fallu, pa llevame esti 7b, quiciás un pelín sele, nel tercer pegue en total, lo que diz, que va siendo hora de metese a proyeutar más en serio.

-----------------------------------------------------------------

24 de Mayu de 2021

Los llunes al sol, tan trayendo bonos resultaos, sobretou si'l domingu tocó dir de monte, ya que suelo llegar descansáu de yemes y tren superior, que de pates, suelo llegar petáu y tar munchu tiempu, aguantando posiciones de reposu esguilando nun suel dar bon resultáu jeje.

Orlando probando La Purista del A Vista
 
Un día más, falo con Suco y averámonos hasta la Carba en Peña Manteca (Morcín), onde tuviéramos probando los dos La Purista del A Vista, una vía curtia de 4 chapes intenses que rondará'l 7a+/b. Pesie a ser una vía manufacturada, los movimientos son guapos y acaba enganchando pegue a pegue.

Llevándonos otra vía apretona na Carba

Ayeri, tamién xunióse a probala Orlando que xubió con Aly a trepar y pudimos compartir pegues los tres. Al segundu pegue del día, pude enchufala, afinando un pocu el métodu de salida nun cruce, cosa que nun tenía clara'l día anterior y pringara nel mesmu pasu tres vegaes.

Trasgu posando ante la cámara

Orlando dió-y dos pegues de prueba y Suco pringó incomprensíblemente cuando ya ficiera tolo duro en dos ocasiones. Los nervios dacuando xueguen males pasaes y cayer onde nun deberíes ye parte del xuegu de la esguilada.
-----------------------------------------------------------------

22 de Mayu de 2021

Otru finde más, de furgo, esguilada y monte, averándonos el sábadu hasta L'Argayu, magar d'una mañana d'espertar, almorzar con tranquilidá y xubir hasta'l seutor a la 1 la tarde. El día taba ñublu, asina que tampoco mataba'l calor, anque l'amenacia de lluvia taba presente por mor de les ñubes que pasiaben penriba L'Aramo.

Anna sacándo-y color a la vía pegue tres pegue

Les intenciones ya son clares, nesti seutor, lo primeru tratar de tachar dalguna vía de placa de la parte alta y llueu apretar nos desplomes. Poro, entamamos faciendo un 6a arriba'l too, que dexóse trepar bien y valió pa calecer los deos un pelín, anque hai que dicir que pa facer placa, muncho meyor el seutor del Ramilleru.

Iso evolucionando en Capitán a Posteriori

Dempués, tanto Anna, como Iso como ye, nun perdimos más tiempu y metímonos de plenu a Capitán a Posteriori, un 7a+ de pasos tallaos, nos que les secuencies ganen en vistosidá a la manufactura, quedando una vía elegante na que'l final ya ye sólo aguantar magar del apretón na seición central.

Apretando y enchunfando Capitán a Posteriori
 
Por suerte, pude encadenala al tercer pegue, nuno d'esos pegues nes qu'esfrutes de la escalada, mientres Anna avanzó muncho por ella de cara al próximu día e Iso, tuve los pegues centrales nos meyores, anque nun tenía'l métodu bonu, teniendo menos pegada nos dos últimos del total de 5 que-y dió... pa morrer.

Peña Manteca (Seutores visitaos)

Croquis modificaos por mi de la escuela d'escalada de Peña Manteca, por mor del trabayu de Asturvertical na so mayor parte. Gracies y col so permisu.

-----------------------------------------------------------------

18 d'Abril 2021

Magar d'un finde d'esguilada, probando cosines per Otura y Figares, el domingu despedímonos en L'Argayu de Peña Manteca. Día fresquín pela mañana pero soleyeru, diba ser una bona preba xubir hasta ellí pa ver si aguántase a sol esguilando y la verdá ye que muncho meyor nubláu, porque pesie a tener bon tactu la roca, cuando pega duro aquello ye un fornu, anque tire una brisina.

Anna enchufando y esfrutando nel Espíritu del OI!

Sacante del calorín que pasamos, vamos garrándo-y gustu al seutor y vamos tachando cosines, siendo unos cuantos los que fuimos turnándonos nos pegues. Iso, metióse a montar Coladita que nun la tenía y al final llevósela al segundu pegue.

Orlando probando Pareja de Ases

Pela mió parte, metíme al caberu 6c que me quedaba na mandrecha, El Espíritu del OI! (6c+), vía completísima y la más guapa d'esta parte del muru ensin dubia. Ya sólo cola parte de la chorrera d'abaxo paga la pena y si-y amestamos la salida del techu, tenemos un rutón.

Progresando nel Espíritu del OI!

Pringuéla nel pegue a vista al salir del techu y ya nel siguiente encadenámosla non ensin sufrimientu, por colocame mui raru pa salir del techu pela manzorga. Anna, metió-y dos pegues tamién pa llevásela muncho más cenciello que yo, infinítamente más cenciello jaja... ye lo que tien esguilar bien.

Iso esfrutando d'un bon pegue a Coladita

Pero otra parte, pa terminar, con pelín d'insolación ya, metíme a probar Capitán a posteriori, un 7a+, mui guapu de tallaos, pero con unos movimientos mui prestosos. La verdá ye que tengo ganes de volver pa da-y un par de tientos decentes, porque diría que sale rapidín.
-----------------------------------------------------------------

13 y 14 de Marzu 2021

Tornamos a Morcín, magar de dellos findes per Teberga, echando un gabitu nel desbroze d'Entecampos y tamién per Cabrales, tanto d'esguilada per Oceño como de monte per llugares tan guapos como Rubó y Collantes.

Motivación y bon ambiente en L'Argayu de Peña Manteca
 
El primer día, averámonos hasta L'Argayu, seutor al que voi pillándo-y el puntu, pero ye que pocu tengo que dicir, el desplome y les víes físiques nun son el mió estilu, pero bono, hai que bregar y siguir avanzando en tolos tipos d'esguilada.

Les amienemigues Kíla y Senda... que cada día son más amigues
 
D'esti xeitu, fué un día mui provechosu, tanto pol ambientín nel seutor, ensin los petazos de meses anteriores y tamién por facer un par de víes qu'a lo postreru, paeciéronme bien guapes, como fué Letavia (6c) al segundu pegue por mor d'un pasu difícil de ver poniendo cintes y la Coco (7a+), tamién al segundu pegue, siendo esta una vía de continuidá saliendo d'un covachón per chorreres y con placa bien guapa na so parte final... una ayalga de vía.

Probando con Anna la Cruciva... vía bien guapa a pesar de ser una combinación

Al día siguiente, averámonos hasta la Carba col envís de facer Cruciva, una variante pente Crucifixión (7b) y A.Iva (6c+) que queda nun perguapu 7a, que paga la pena facer, porque l'enllaz en travesía pente les dos ye una preciosidá.

Caún apretando nel so grau na Carba la Robra
 
A la fín, salió al tercer pegue, por mor de pegar una pringada terrible nel tramu final de desplome del 6c+ nel segundu y magar del encadene ya que nun quedaben nin ganes nin fuercia pa intentar prebar dalgo más, sobremanera viendo que ya toca metese nos 7bs, los cuales habrá que dir catando pali pali.
-----------------------------------------------------------------

16 de Febreru 2021

Morcín, múevese y muncho, nesto de la esguilada y nun ye sólo que muévase sinon que ta de moda. Nun fai falta ser mui llistu, pa dase cuenta que nos últimos años, seutores como Figares o la Puente revitalizaron esti valle y descargaron d'escaladores escueles como Otura.

Faciendo Coladita, una vía referente del seutor nel so estilu desplomáu

Darréu, Peña Manteca ta siendo'l centru d'esta pequeña ayalga pa la escalada que ye Morcín. Falábemos n'anteriores entraes de la Carba la Robra, un seutor reequipáu d'antaño, al que se-y metieron delles víes más, asina como d'un seutor nuevu na parte alta de la peña del que tuviemos la suerte de dir probando casi toes elles.

Conociendo L'Argayu en visita relaxada de semeyes a collacios

Les navidaes, traxeron nueves espublizaciones de croquis de seutores nuevos y ún d'ellos ye de L'Argayu, xusto a la par del seutor superior de plaques Peña Manteca, onde alcontrámonos con tolo contrariu: chorreres y desplome al estilu del Laboratoriu.

Orlando y Álvaro probando dellos proyeutinos

Ye tal la cantidá de xente que ta pasando pola escuela, qu'hai díes que toca pedir turnu pa probar una vía, pero nun pasé per ellí hasta esti puente, nel que sólo yera folixa antroxera en Xixón. Poro, namás que fice unes poques víes quedándome cláramente con Coladita, un 6c+ qu'amuesa a les clares l'estilu de la esguilada, física y de resistencia.

----------------------------------------------------------------- 

7, 14 de Payares de 2020

Continúabemos de vacaciones morciniegues, tornando esta vegada hasta Peña Manteca que teníemos un pelín escaecíu dende cuantayá. Aprovechando que pasáronme unos croquis más actualizaos del seutor de la Carba La Robra, tornamos per ellí un par de díes, col envís d'encadenar el 6c+ (Arco Iris) que probara va tiempu con Ani y Rubén.

Accesu y vistes dende la Carba la Robra

El primer día, asomámonos per ellí, nun día pelín fríu y ventosu, Anna y yo que nunca esguilara na Carba y probó'l 6b de la mandrecha, pa calecer deos y yo metíme al 6c+ de frente, encadenándolo ambos al segundu pegue. La verdá ye que la vía ye mui prestosa y sirviónos pa montar dende riba un 7b (Crucifixión) que nun tuve tiempu de descifrar paeciéndome duru y finu enforma.

Kíla a lo suyu... a xugar cola cámara
 
El segundu día na Carba, xuntámonos unos cuantos collacios y fuí hasta la manzorga'l seutor, col envís de probar dalguna vía d'esa fastera, faciendo un 6b sin nombre, mui buenu, pero con tramos pelín rotos, sirviéndome tamién, pa montar Corocota Power un 7a sele mui a bloque.
 
A lo tontu, llevóme 3 pegues la vía, cambiando de métodu nel segundu pegue y saliendo al terceru bien, enmediu d'una llocura de día con vientu gafu que pesie al solete, nun dexaba tar tolo a gustu, que se podría tar.
 
Dicir, que Peña Manteca, tien pinta de convertise nuna escuela d'escalada imprescindible nel centru d'Asturies, ya qu'a los dos seutores de la Carba y el superior, llamáu el Ramilleru, ta equipándose xustu al so llau, un sectorazu nel Argayu, con vía más desplomada y graos más duros, completando col Ramilleru pa tener víes pa tolos gustos.
 
-----------------------------------------------------------------

15 y 27 d'Agostu, 14, 22 d'Avientu de 2019 y 11 de Xineru de 2020

Morcín sigue dando grandes momentos d'escalada y nun sólo momentos, sinon grandes escueles y ye que tenemos nel Monsacru y nos sos parés munchos seutores onde poder prauticar esta pasión. Pero non sólo ye'l Monsacru, sinon que tenemos tamién Figares, Laboratoriu, La Puente ... y agora tenemos un par de seutores enfrente d'esti monte sagráu, como ye la Peña Manteca que nun va muncho cabalgábemos.

Tenemos claro y vémoslu a diariu, como l'ambiente escalador nesti conceyu ye pergrande, siempre alcontrándonos con collacios trepamuros nos distintos chigres ya seya de la Foz o Santolaya y ye que la rellación de los escaladores debe ser así, col tercer tiempu en chigre y colos chigreros interesaos na nuesa actividá.

Paré y vistes dende'l seutor Arco Iris en Peña Manteca

Salta a la vista, que los deportes al aire llibre son un motor económicu pa delles zones que van perdiendo'l so texíu industrial que-yos mantuvo con vida nos últimos años. Ye d'agradecer que'l colectivu escalador eche ese cafetín enantes de xubir y esa cervecina al baxar, amosando la nuesa actividá como dalgo que valoren los vecinos del conceyu, siempre dende'l respetu y la collaboración.

Dambes escueles, na Carba la Robra (seutor Arco Iris antañu) y la más nueva en direición al colláu Bugariza, son escueles en continuu crecimientu y equipamientu, poro debemos respetar a la xente que ta faciendo un increyible trabayu, sus tiempos, sus decisiones de nun dexar esguilar si hai peligru de cayida de piedres... y siempre collaborar no que podamos.

Rubén nun guapu 6c+ sin nombre

Na Carba na Robra, tenemos una escuela más antigua, reequipada y con víes nueves equipaes siendo les víes cencielles, mui cencielles nel ales y na fastera central de la muria, ya alcontrámonos con víes de sétimu grau onde apretar fuerte.

Tan sólo xubí un par de vegaes a facer tolo cenciello, probando un 6c+ buenísimu otru de los díes, pero tengo pendiente una visitina más motiváu pa probar coses dures, ya hai delles víes pente'l 7a+ y 7b con una pinta brutal.

4 pates pa un bancu nel seutor de la Foz en Peña Manteca

Nel seutor superior, aparte d'un patéu bien guapu, tenemos quiciás, a mi mou de ver la meyor escuela pa iviernu de graos medios-baxos na fastera central. El trabayu que se fizo ye ablucante y la calidá y llargura de les víes son una auténtica pasada.

Casi tengo toles víes encadenaes na fastera principal de la muria y nun fice una vía fea nin mala, ya sea de V o lo que podría rondar un 7a como máximu grau de la escuela pel momentu. Como ya dixe, les dos escueles paguen la pena munchísimu, siendo esta última una ayalga pa esguilar relaxáu y plaquear con una calidá de roca brutal.

Camudando'l Camín col equipín escalador

3 comentarios:

  1. Todo tiene muy buena pinta tengo mucha illusion a ir!!

    ResponderEliminar
  2. Buenas, tengo ganas de visitar la zona pero no encuentro croquis, tendrás algo por ahí? Si puedes, alrali75@hotmail.es
    Gracias por adelantado!

    ResponderEliminar