lunes, 7 de octubre de 2019

Isoba (Puebla de Lliyu) - Abedulosos - Porrón de Cerrosa - Páramu

12 Mayu de 2019

Track: Isoba (Puebla de Lliyu) - Abedulosos - Porrón de Cerrosa - Páramu


Nestos díes perllargos y soleyeros del mes de mayu, facemos revisión de rutes pendientes y decidimos averanos hasta'l pueblu d'Isoba, na fastera llionesa del cordal cantábricu, pa visitar un accesu hacia'l parque de Reres col envís de conocer la parte sur de la xerra de Príes, que tien al Cantu L'Osu como cota más nomada.

Pa ello, partiremos de Xixón garrando la autovía minera hasta Mieres del Camín, onde garramos la autovía A66 saliéndonos na salida de Morea, pa percorrer la As 112 hasta Cabanaquinta onde garraremos la AS-253 que tien d'empobinamos hacia'l Puirtu Braña pasando enantes per Felechosa, Cuevas, Roseco, Rufríu, El Fielato y La Raya.

Partimos del pueblín llionés d'Isoba (1356 m)

Ascenderemos dende Isoba, hacia'l colláu Pinzón, siempre per bon camín ancho, llibrando perfeutamente les urcies y cola vista puesta siempre nel San Justo, quiciás abandonáu dende va demasiáu tiempu, sobretou a la espera de poder facé-y una ivernal bien prestosa.

Empobinámonos hacia'l valle Pinzón

El camín se va faciendo agradable, siempre dexando a la nuesa espalda grandes montes, como'l picu Torres o el cordal del Eyu col Tonéu como proa oriental na fastera del Puirtu Braña o más al oriente tendremos tol macizu'l Mampodre, pero lo que tenemos delantre, como ye'l valle Pinzón, prestóme más entá, ya que nun lo conocía y paecióme un llugar guapísimu, que me prestaría visitar na seronda.

Pasaremos pelos Abedulosos (1845 m) ganando perguapes vistes hacia'l parque de Reres

Cruciaremos la parte superior d'esti valle, averándonos al barrancu de la riega Pinzón, lluchando col brezu pela manzorga'l rigu, pa pasar a posteriori a la mandrecha onde tendremos un bon camín qu'ascende pela Viesca hasta'l mayáu del Borugo, onde fadremos l'ascensión a los Abedulosos (1844 m) pela fastera sur.

Entrámos-y con ganes a l'ascensión al Porron de Cerrosa per un tarrén bien entreteníu

Dexaremos les amplies vistes de los Abedulosos, crestiando hasta la muezca Braga, onde garraremos un senderín qu'al traviés de les Arenes, fadrános aportar a la mayada de Busmerón, pa magar d'un pequeñu descansu, facer la guapa ascensión al Porrón de Cerrosa de 1802 m.

Vistes y cumal del Porrón de Cerrosa (1802 m)

Con pocu más que buscar el meyor sitiu pa xubir, encumamos nel Porrón, algamando unes ablucantes vistes so la vega Brañagallones asina como de tol parque Reres. Dempués d'un ratín de descansu, decidimos siguir pela xerra Pries alantre, teniendo que restolar un pelín cual ye'l meyor camín pa dir llibrando dellos torruxones hasta facer tamién la cume de Les Planes (1818 m), puntu más altu de la xerra de Príes, penriba del propiu Porrón y del Cantu L'Osu.

Crestiamos per pindiu tarrén encumando Les Planes (1818 m)

Desdenderemos de Les Planes pela fastera SO, averándonos hasta'l colláu Puercu, onde tendríemos una cómoda baxada hasta Valdebezón, pero quedándome coles ganes de conocer esta vega, nós decidimos siguir crestiando pel colláu Arenes hasta'l cumal del Altu'l Páramu (1901 m).

Despedímonos de la xerra de Príes y avanzamos hacia la fastera'l Páramu (1901 m)

Nel picu'l Páramu, tendremos unes vistes brutales de La Rapaona que ficiera va bon tiempu, impresionando los dixebraos corredores que xuben pente los peñones del Violosu. Llueu de tomar aliendo d'esta última xubida, siguimos cordal alantre pasando pel picu la Rialcada (1891 m) enantes de baxar hacia'l colláu la Muyía, onde enllazaría'l pasu dende la braña de Valdebezón.

Perpasamos la Rialcada (1891 m) pa descender hacia la llaguna Negra

Dende la Muyía, descenderemos pel Páramu hasta la cabera ayalga d'esta ruta, como ye la llaguna Negra. Personalmente, nun m'alcordaba d'esta llaguna cuando xubiera a la Rapaona, pero quiciás el mal tiempu d'aquel día xunto a la cantidá de ñeve, ficiera que nin fuéramos a vela, una pena porque ye bien guapa.

Tornamos cola calma hacia'l colláu Pinzón pa siguir hasta Isoba

Dende la llaguna, tan sólo tenemos que siguir una sienda que pente urcies y siguiendo de primeres, el cursu de la riega las Hazas, enllazará col camín que vien dende'l valle los Pozos que ya nos dexará de nuevu nel colláu Pinzón pa tornar a Isoba pelos nuesos pasos d'entamu.

En resume, ruta bien curiosa y un pelín quebrapates, que fízonos percorrer un total de 16 km, con 1065 m d'altor acumuláu durante dalgo menos de 8 hores de pateu. Con un día soleyeru de mayu, conocer tola fastera pente Brañagallones e Isoba, bien paga la pena l'esfuerzu.

 Camudando'l Camín per Brañagallones

2 comentarios:

  1. Ye una zona perguapa. Tengo munches ganes de volver visitala. Guapu reportaxe.

    ResponderEliminar
  2. Gracies Viti... ya nun s'acostumbra a recibir comentarios per equí jaja. Fizo un día de los de monte de crear afición. Un abrazu

    ResponderEliminar