miércoles, 4 de noviembre de 2009

Retos montañeros, xeres pal futuru

Actualizáu (3 de Mayu de 2013)

Como siempre qu'ando preparando rutes, acabo barruntando nuevos retos, quiciás tamién porque asína ye'l mio xeitu de ver la vida: Un continuu retu o desafíu a llevar alantre. De ehí, que la mio afición al monte y la escalada, vaya empobinándome a dar preste a dellos oxetivos y d'ehí foron saliéndome les siguientes llocures:

La primer xera que tuvi en mente, foi facer toles mayores cotes de cada conceyu asturianu, pero quedábase un pelín corta polo qu'al final pasó a ser les 4 mayores cotes, guiándome por un documentu de la Federación de Montaña d'Asturies.

Mirando según que conceyu, nun tien na que ver col montañismu al ser munches cotes mui baxes, pero paecióme que podía ser prestosu faceles, unes de monte y otres de btt, poro pue ser una actividá increible preparar rutes pa la bici por conceyos costeros faciendo a poder ser eses 4 cotes baxes na mesma ruta.

Retos nel País Astur

4 Cotes, 78 Conceyos
Algamaos (Conceyos):
AyerBimenesCaraviaCasuColungaCuideiruLlaneraLlaviana
NavaOnísParresPongaRibeseyaSieroSomieduXixón

Completando dalguna manera, estes cotes a tachar, tamién puen facese los vértices xeodésicos d'Asturies, que faen perinteresante dalgunes rutes pela costa, atopando vértices en cabos onde les vistes de l'Asturies mariñana ye too un espeutáculu.

Vértices Xeodésicos d'Asturies
Algamaos (Conceyos):
Cangues d'Onís (3)Caravia (1)Cuaña(3)Llanera(3)Navia (2)
Sobrescobiu (3)Ponga(3)Proaza (1)Xixón (4)Yernes y Tameza (2)

Los siguientes retos son de montaña dafechu e inclusu d'escalada na mayor parte, ya que foi na cabera ruta de montaña, per Peña Ubiña o Pena Ubina, cuando tando nel refuxu de Meicín vimos un papel coles 58 cumes de 2000 ms d'altor del Macizu d'Ubina. Lo cual como non, fizo que picáseme'l niki p'algamar dalgún día toes eses cotes.

Club 58, Macizu d'Ubina
Algamaos (Cumes): 19 de 58

Llueu, restolando pela rede, alcontré otru club más en Picos d'Europa nomáu, el club de los 111 picos, pero paecióme una pena desperdiciar dalgunos dosmiles, ya qu'entamaban les cotes sigún el macizu (Cornión, Urrieles, Ándara) en 2300, 2400 y 2200 ms respeutivamente.

Club 111, Picos d'Europa
Algamaos (Cumes): 40 de 111

Debíu a esto, ocurrióseme facer a mi, Los 2000 d'Asturies, que nun ye nin menos nin más, que facer tolos picos de 2000 ms qu'hai n'Asturies, como non, separtaos por conceyos. La teoría ya ta fecha, agora solo queda da-y preste na práutica.

Los 2000 d'Asturies
Algamaos (Conceyos):
Cangas del Narcea(1)
Casu (2)
Onís (3)
Ponga (3)

Restolando pela rede alcuéntrense coses como esta, que nun se quien lo fadría, pero qu'apórtame dalgún monte más que nun entraba nos planes de los otros retos, asína que afayamos esta llista nel mio haber y bautizámosla de la siguiente manera:

100 montes más prestosos d'Asturies
Algamaos (Cumes): 71 de 100

Retos nel estranxeru

Como non, la mio primer visita a Pireneus, tendría que dar col resultáu bien conocíu, d'intentar facer tolos 3 miles. Anque nun ye'l desafíu que más tenga na tiesta, siempre presta dir tachando montes algamaos y fuera d'Asturies más de lo mesmu.

Pireneus 3000
Algamaos (Cumes): 30 de 243

Otros retos que tamién púseme últimamente foi facer los dosmiles de les provincies averaes al pueblu del mio pa en Recuerda (Soria), anque nun me quiten el sueñu la verdá, pero siempre presta al tar de vacas per Castiella, quitar un pocu'l monu montañeru:

Soria 2000
Algamaos (Cumes): 8 de 25

Sinceramente, si soi a facelo o non, si llegaré a tal nivel pa dalgunos d'ellos o non, si tendré tiempu durante mio vida a facelo o non, me da igual completamente. Simplemente poder intentalu y tachar los que vayan cayendo d'estes xeres particulares mies ya ye dalgo qu'ilusióname fonderamente.

Con ello, como siempre, namás que pretendo da-y un puntu de diversión y desafíu más, a esta gran afición que ye'l montañismu. Poquín a pocu, podréis dir güeyando cual ye l'estáu de cada retu, ya que diré actualizando los archivos que dexo pa descargar.

Espero tener collacios que me sigan acompangando nestes aventures.


Nun 2000 algamáu (Pena Ubina de 2420 ms)

13 comentarios:

  1. Sospréndeme enforma que, faciendo tol blog n'asturianu, sigas calteniendo la forma castellana Peña Ubiña y, amás, per delante'l topónimu llariegu Pena Ubina.
    Nesti sen, la forma Les Ubiñes tampoco ye asturiana. Ye una asturianización del neoloxismu Las Ubiñas, afamáu nos caberos años polos llibros pero non faláu nos pastores que siempre dixeron y dicen Pena Ubina (La Grande y La Pequena).
    Ánimu na xera de los 2.000.

    ResponderEliminar
  2. Bones anónimu, que nun pasaba na, si decíes el to nome.

    Nun creas que non tuve intentando informáme del tema de Pena Ubina, pero nun alcuentro nada. Paezme un tema mui interesante'l de la toponimia, y como non el de les montañes muncho más pa mi.

    Por eso, aparte de facete caso, y camudar mis erros toponímicos, prestaríame que me allumases un pelín y dixéses onde alcontrar dalgo d'info sobre'l topónimu de Pena Ubina.

    Quédome con que ye Pena Ubina (grande y pequena), pero a tol macizu como se-y noma???
    Macizu de Pena Ubina??

    ResponderEliminar
  3. Hola!. Nun sabes como me presta'l to blogue. Norabona y ánimu na xera: pasín ente pasu... esa ye la téunica. Nun hai más secretos.

    El tema la toponimia tamién me interesa abondo y ye daqué tradicionalmente marafundiáu polos propios montañeros, anque paez que últimamente van camudando les coses. Depende de la perceición que caún tengamos de la montaña.

    Polo xeneral, los grandes macizos nun reciben un nome determináu en llugar del mundu dalu. Somos los montañeros y xeógrafos los que-yos ponemos nome nos mapes. Los tradicionales habitantes de los espacios de montaña moviéronse davezu en fasteres perconcretes (valles, puertos) y la so perceición nun va más allá d'eso. D'ehí, el vezu de llamar con un xenéricu "el puertu" (El Puertu Sueve") o "la peña" (nel casu los Picos d'Europa) al macizu au s'alluguen o mesmo a una sola parte. Nel casu del Macizu d'Ubina, el puertu sedrá "Los Puertos d'Agüeria", "El Puertu la Val.lota", "El Puertu la Cubiel.la" o "El Puertu Pinos", según mos averemos a les cumbres dende Quirós, L.lena o Llión.

    Sicasí, la nuesa actividá ye bien nueva (s. XIX) y el nuesu averamientu al monte precisa d'una nueva cultura que ameste la conocencia y el respetu pol mediu cultural xeneráu nesi entornu (non sólo al mediu natural), cola adaptación a les nueves necesidaes: cuido que falta entá abondo por facer nesta estaya...

    Apúrrote dalgo de info:

    http://www.espeleoastur.as/toponimia/indice%20toponimia.htm
    http://www.espeleoastur.as/toponimia/Topubina.htm

    Estes dos páxines tan allugaes na web xeneral del grupu d'espeleo al que pertenezco, el G.E. Gorfolí: www.espeleoastur.as

    El Diccionariu toponímicu de la montaña asturiana de Julio Concepción Suárez: http://www.krkediciones.com/fichaLibro.php?l=156

    La páxina peronal d'esti autor: http://www.xuliocs.com/index.php?pagina=http://www.xuliocs.com/bibltpaast.htm

    Un saludu y más nada, presta pola vida. A trabayar!

    ResponderEliminar
  4. Acabes de dexame acoyonáu.

    Por favor, cuando lleas una entrada nun tengas problemes en recoxime lo que veas, que de lo que más me presta nesta vida, ye deprender coses nueves.

    Gracies por tola info y un abrazu fuerte

    ResponderEliminar
  5. L'anónimu d'enriba, Berto Xuan, amás de corroborar tolo que te dixo Xosepín puntu per puntu, quier recordate que ye'l mesmu que yá te fizo dalgún comentariu na ruta de L'Arcón de Peña Mea. Llámase Bertu y dexóte ellí mesmo l'email por si quies contautar con él.
    Un saludu y a siguir.

    ResponderEliminar
  6. Apéndiz: Tocántenes a lo que dixo Xosepín, no de Puertos d'Agüeria yo creo que ye más válida la voz Puertos de Güeria. Y n'El Puertu Pinos tamién val Puertu Mieres.
    Bertu.

    ResponderEliminar
  7. Ta prestándome pola vida tolos comentarios que facéis, porque quier dicir qu'hai xente esmolecío polos mesmos temes que tamién danme que rucar la tiesta.

    Esi mail al que te refieres ta guardáu a bon recaudu. Gracies

    Namás, davos les gracies a toos, simplemente por saber que dalguien lleeme, y qu'esti blog sirva pa igüar temes toponímicos ye pa mi dalgo importantísimu.

    Un saludu y gracies polos comentarios, igües y conseyos.

    ResponderEliminar
  8. Dafecho d'acordies coles puntualizaciones de Berto y un saludu fuerte pa los dos. Por cierto, esti fin de selmana axuntámonos los espeleólogos asturianos en Benia (Onís) y el sábadu de 16 a 20 h. nel centru municipal de Tullidi espondremos dalgunes de les campañes d'esploracion qu'entamamos esti añu 2009. Si vos peta pasavos per allí, equi teneis el programa completu: www.espeleoastur.as La entrada ye de baldre y ta convidada tola xente interesao. Tamos en contautu!.

    ResponderEliminar
  9. Persé que los espeleólogos astures tais faciendo un trabayu mui bonu. Fai falta, si nun me tracamundio, "sacalu a la lluz" con un bon llibru. Apocayá tuve güeyando ún nuna llibrería de les cueves del Mediterráneu (fala de la fastera mediterránea española dica francia), y me paez que taba fechu por un catalán. Un trabayu con unos testos afayadizos y unes semeyes perguapes. Encamiéntovos lleelu si nun lo ficistis (anque con eses indicaciones nun sé si vais atopalu -si vos interesa vuelvo onde lu vi y miro la editorial y autor) y en casu de facelu emular unu n'asturianu.
    No que cinca a la invitación pues munches gracies nin, anque me prestaría muncho nun pueo dir. Hai que tener munchu valor pa furar per ehí.
    Un saludu y suerte, Bertu.

    ResponderEliminar
  10. Yo hasta abril-mayu nun tengo la posibilidá de desplazame, poro, quédame mui lloñe benia de xixón, sinon si que sería mui interesante tar d'oyente.

    gracies pola invitación y que vaya bien la xuntanza d'espeleo.

    Saludos

    ResponderEliminar
  11. Gracies a los dos. Sí que conozo'l llibru que cites y al so autor. Equi'l llabor que llevamos ta muncho mas orientáu a la esploración de verdá en sí... tenemos la suerte de tener entá tantísimu trabayu -en cantidá y calidá- per delantre que malapenes agora entamamos a pensar en "salir del pozu" pa que mos vea la xente. Tenemos delles prioridaes (iguar el desbarafuste la Federación, por exemplu) anque tamién dellos proyectos en marcha nel sen más divulgativu, mesmo cola productora d'Al Filo de lo Imposible pa esta temporada anque tardarán unos mesinos en poder vese pol públicu en xeneral na tele. Y lo d'un llibru d'eses carauterístiques diba prestar pola vida; ya tenemos a dellos collacios fotógrafos especializaos n'espeleo rucando'l tema, ya igual s'animen a dir esparexando la cosa tres d'acabar colos proyectos nos qu'agora anden metíos. Sicasí, una idea perguapa que yá-yos refiertaré bien pa que nun la dexen de llau :-)) Salu2

    ResponderEliminar
  12. Como será que nun furrula ninguno de los enlaces de los retos que pones :)

    ResponderEliminar
  13. La páxina onde cuelgo los archivos: tracks, documentos de los retos, ta de mantenimientu,...

    Siéntolo, pero gracies por avisar, que nun me diera cuenta.

    Un saludu

    ResponderEliminar