H.ou Los Cabrones (Cabrales) - Amuesa - Piedrabellida - Cares - Caín (Valdión)

14 de Xunetu de 2025

Track: H.ou Los Cabrones (Cabrales) - Amuesa - Piedrabellida - Cares - Caín (Valdión)

Finábemos la Travesera Picos 2024 - 2025 alboreciendo nes tiendes de campaña del refuxu del H.ou Los Cabrones, llevantándose los cuerpos de sentires bien dixebraos, descansando dalgunos como neños y otros pasando una nueche de perros, con humedá y hasta frío, por mor de nun planificar bien el saco o ensin más acostase pelín pegañosu del día anterior.

Pero ye que'l borrín que tapecía tol H.ou Los Cabrones, nun mos permitió nin siquiera llavanos un pocu na fonte, mudándonos de ropa malpenes y guardando les mochiles, playeros y demás na tienda que nun se moyara col orpín continuu, que nun paró hasta bien entrada la nueche.

Partimos del H.ou Los Cabrones (2042 m)

Poro, col cuerpu pelín desfechu de la nueche, vamos a almorzar al refuxu, tomando dellos cafés con tostes, col envís d'intentar espabilar una migayina al menos. A dosmil metros d'altor tenemos un día perguapo, col cielu azul y dalguna ñube estratificao, lo que nun quita que los ánimos y les fuercies nel grupu nun tean pa munches hestories.

D'esti xeitu, casi ensin pensalo tengo claro, que con descender per Piedrabellida y facer el Cares vamos tener abondo, pa terminar con 4 díes siguíos de monte, de gran valir montañeru, pa muncha xente, pero yo quédome pelín atristayáu, por nun plantegar dalguna actividá qu'aportáseme'l conocimientu de dalgo nuevo, sacante de la ruta a la Peña Vallines del primer día. 

Semeyes de tan guapu llugar onde pasamos nueche

Nestos camientos ando, demientres preparo la mochila pa salir, viendo como una familia de guiris, parte hacia Vega Urriellu, col envís de llegar a H.ermosu, ruta qu'anduvieron entrugando la nueche anterior, llevando a dos neños y la muyer nun estáu físicu que pudiera ser una incógnita, poro quedo un pocu esmolecíu, pesie a envialos pelo "más seguro" téunicamente, anque non pelo más curtio.

Descendemos hacia'l sistema del Trabe y a la borrina a media cota

Nós despedímonos de Jorge y Naiara y entamos descensu hacia la Cuesta'l Trabe, pero enantes toca aidar a una chica oriental, que nun ye capaz de descender peles cadenes del pasu vertical, llevando un mochilón más grande qu'ella que tirábala pal vacíu, asina que tocó destrepar delantre della ya indicá-y onde poner los pies y les manes pa que nun se nos matase delantre nuesa.

Pasamos pente la borrina per Amuesa pa garrar la canal de Piedrabellida nel colláu Cerredu

Con esta pereza mental de los Picos masificaos de xente que nun sabe per onde anda, ya quítenseme les ganes de facer na nuevo pa los compañeros y más, viendo que tenemos borrín de la Cuesta'l Trabe hacia Amuesa, siendo la tónica xeneral hasta'l colláu Cerredu y hasta la metá de la canal de Piedrabellida, la cuál baxamos con curiáu al tener moyáu tanto la tierra como les peñes.

Descendemos pente'l borrín la parte alta de la canal de Piedrabellida

Na parte baxa de Piedrabellida, saldremos a la fin del borrín, xusto al altor del desvíu a un posible paséu colgáu sol Cares hasta Caín, como ficiera va unos años en solitariu, pero los compañeros tan abondo cansaos y tener el borrín xugando per esos pasos, nun me da confianza como pa que nos baxe dellos metros y temos navegando perdíos pente les canales d'esta fastera de los Urrieles de colláu en colláu.

Salimos del borrín con vistes al Cares parando a picar dalgo en Quintana

Ensin más, siguimos descendiendo pela baxera de Piedrabellida hasta La Quintana, onde decidimos parar un ratín a picar dalgo, como ficiera tamién n'actividá de la canal de Ría n'ivernal, quitando daquella les botes de ñeve pa poner los playeros de trail, enantes d'aportar al Cares dafechu de nueche. Esta vegada, por suerte, son les 2 de la tarde, asina que tamos hasta pensando en llegar a xintar daqué a Caín, anque seya un bocata.

Descendemos pente la broza hasta la Puente Vieya

Magar de venti minutinos de descansu, tiramos de La Quintana p'abaxo hasta la Puente Vieya, alcontrándonos pelín tomáu de felechos y dalgún escayu la baxada, pero ensin problemes damos cola puente, siempre un llugar ablucante y coles mesmes encaramos l'ascensión hasta la Sienda'l Cares, onde fadremos reagrupamientu, ya que la velocidá de baxada col pasu los díes va estremándose adulces.

Xubimos a la sienda'l Cares pa continuar el clásicu paséu hasta Caín

Con tol equipu na sienda'l Cares, toca poner les oreyeres y mirar pal suelu, caleyando la casi hora y media de sienda que quedábanos per delantre, tomándolo cola calma que permite nun chochar coles milenta persones qu'habia ya intentando que nun se ficiese mui cansino, contándo-yos les munches posibilidaes d'ascensiones per canales qu'hai a dambos llaos del Cares.

 

Aportamos a Caín col equipu nes últimes de fuercies

Con un pelín menos de 7 hores de ruta, arribábemos a Caín, terminando esta Travesera Picos con 13 km de patéu, siendo'l desnivel negativu, lo más importante del día con 1840 m, lo que dempués de 4 díes patiando, fízose pelín duro, pa tolos integrantes.

En resume, otru pateín clásicu con otra canal mítica como Piedrabellida, que diónos pa lo más importante, llegar a una hora prudente, pa poder xintar dalgo en Casa Tino, que salvónos la vida con una hamburguesa impresionante y pa poder garrar la furgoneta y volver pa casa, que tamién yera una xera cansada.

Camudando'l Camín per Cabrones