Llánaves (Tierra de la Reina) - Butrero - Peña Vallines - Valle Estremero

11 de Xunetu de 2025

Track: Llánaves (Tierra La Reina) - Butrero - Peña Vallines - Valle Estremero

Llueu del intentu fallíu de facer monte'l xueves, alborecemos en Llánaves, con munchísimes ganes de patiar, asína qu'almorzamos nel hotel San Glorio como auténticos gochos xabaces y ponémonos en marcha, pelín enantes de les 10 de la mañana, dende'l nuesu apartaderu furgonetil, magar de los distintos preparativos.

Primer día de patéu, cuesta arrancar enforma, ya que siempre dalguien escaez dalgo, poro pa cuando queremos arrancar, la verdá ye qu'hasta sentimos dalgo de calor nel ambiente, anque quiciás yera heredáu del día anterior, nel que nun pudimos facer na, más que remar en kayak en Riañu, por mor de la calufa infernal. 

Partimos de Llánaves (1396 m) en Tierra La Reina

D'esti xeitu entamamos la Travesera 2024-2025 caleyando unos cientos de metros pela carretera que xube al puertu San Glorio, pa desviános a la manzorga al valle de Culebrejas, nel que dende los primeros pasos tendremos enfrente a la mola cuarcítica de Peña Vallines, el nuesu oxetivu cimeru del día. 

Tamos xustu enmediu de los parques de Fuentes Carrionas y Montaña Palentina y el parque Regional de Picos d'Europa, poro miremos pa onde miremos, tamos acolumbrando montes bien guapos qu'apetez ascender si o si, poro dacuando echamos un vistazu atrás pa dar güeya a tolos cumales de la xerra d'Orpiñas y les sos cares nortiegues, bien afayaices pa les ivernales.

Ascendemos per tol valle de Culebrejas cola compaña de munchu ganáu y bonos mastinos

Avanzaremos pel llargu valle de Culebrejas, siempre siguiendo bon senderu y camín según en que tramu, atopando ganáu enforma, ya seyen vaques o caballos y tamién, como tien de ser, a dellos mastinos nesti casu mui mozos, que vienen saludar mediu nerviosos, siendo'l caberu de los cachorros el más animosu y aventureru, qu'ensin querelu va siguinos el restu la ratu por munchu que lu intentamos tornar al so trabayo.

 Na parte alta, na mayada Los Cantos, alcontraremos a la cabera vacada y a la que pudiera ser la madre de "Borrín", el mastín adoptáu pa esta ruta, que tampoco échalo p'abaxo asi que desmolecémonos y continuamos ruta faciendo per senderu más pindiu, faciendo una envuelta a la manzorga, hasta un altu onde tendremos calres vistes del Coriscáu, comentándo-y la xugada a los collacios, de que pudiera facese en travesía y descender pel percorríu dende San Glorio. 

Averámonos hasta'l perguapu pozu Butreru con viste a la Peña Prieta na Montaña Palentina

Les cares nun son mui amigable pa conmigo, ya que taba costando un pelín l'ascensión per mor del calor que facía, asina que tiramos de sicoloxía y digo que vamos viendo, continuando hasta'l primer finxu a conocer del día como yera'l Pozu Butrero, una llaguna n'altor que nun s'esperaben los compañeros y que fizo les delicies del día, pal nuesu compañeru Borrín, y pa nós, coles sos vistes hacia la montaña Palentina.

Salimos del Pozu Butreru hacia la Peña Vallines con apertura de vistes

Dempués del descansu a los pies de la llaguna, salimos hacia l'arista este, averándonos primeru a una cubeta, pa salir a la manzorga y garrar la propia arista, na qu'ascenderemos con un toque más frescu gracies al airín que corría. Les vistes van abriéndose, asomando pali pali, los cumales más altos del macizu Los Urrieles hasta finalmente poder acolumbrar los tres macizos de Picos d'Europa (Cornión y Andra), siendo una auténtica gociada, parar y tratar de señalar cumal a cumal.

Facemos l'arista final hasta'l cumal de la Peña Vallines 

Con pocu más, entramos nel tramu final d'arista, pudiendo esfrutar d'una peña asitiada enmediu d'un mundiu de montes brutal, teniendo tolos Picos d'Europa al norte y Montaña Palentina al sur, nesti Cordal Cantábricu que tanto nos da en tolos sentíos a los asturianos, llioneses y cántabros. A la fin, conocimos les vistes que díbemos tener dende L'Escañu, na ruta que ficiéramos l'añu pasáu, asina que completamos un pocu esta fastera y quitámonos la espina en cuanto a vistes de la travesera anterior.

Tol grupu feliz na Peña Vallines (2153 m) 

Esfrutaremos un ratín del cumal, lloñe de los mosquitada presente, que dexónos un pocu la sensación de que diba tocar tormenta durante la tarde, poro sacamos semeya de cumal y falamos qu'opciones son les meyores. Aldericamos un ratín y vemos un colláu evidente, na mayada del Tío Quico, embaxo la Peña Vallines que nos daría pa siguir un camín hacia Llánaves per tola cordelera del Altu del Valle Estremero.

Borrín el nuesu compañeru de ruta protagonizando les meyores vistes

Poro, entamamos descensu hacia la collada Vallines que daría accesu al Altu la Quebrantada, pero viendo les ñubes amenazantes, decidimos buscar la baxada pel valle Estremero, llueu de parar a la solombra d'una peña a xintar dalgo pa recuperar fuercies. Dende'l mesmu abellugu, somos a pescanciar dellos rastros de sienda, nuna especie de vira, baxo los parés de la arista SE del Altu la Quebrantada.

 

Descendemos pel valle Estremero siempre buscando una vira pegada a los parés

Descenderemos per tarrén pedregosu hacia la collada Vallines, desviándonos un pelín antes, hasta la cubeta embaxo la collada, onde atopamos dalgún rastru de senderu, que va dir llevándonos pasin a pasu hacia la faldera de l'arista, siempre evitando metese nel barrancu del regatu Estremero, ya que tien pinta de xabaz enforma y menos con amenacia de torbón, ya que la baxada d'agua pondríanos nun problema gordu si baxamos pel calce de la riega.

Esfrutamos munchísimu de la baxada pel valle Estremero

Alternando tramos de yerba pisao y otros de cuarcita, vamos faciendo esti entreteníu descensu, demientres según vamos baxando, garramos cosciencia de lo bestial del barrancu y de lo guapu del llugar, con esos colores verdosos que tanto fainos alcordanos del Curavacas por exemplu y sobretou cuando tuvimos la suerte de ver travesar el barrancu a un rebañu de cabres montunes.

Facemos la vira final baxo los parés y descendemos a la riega p'aportar a la mayada del Tio Quico

Sicasí, dicir que la parte final ye la más guapa con una cincha colgada que va dexanos nuna colladina con salida al valle de la mandrecha que baxaría de la Quebrantada, pero nós vamos facer una envuelta a la manzorga pa baxar per una rampla herbosa qu'empobínanos primeru a lo fondo'l barrancu y dempués a la mayada'l Tio Quico, que darános pasu ya, a garrar un camín con pinta de cortafueos, pel que caleyaremos hacia l'Altu'l Valle Estremero.

Caleyaremos cola calma penriba'l valle Culebrejas pasando pel altu del valle Estremero

Magar d'una primera ascensión hasta los 1700 m del Altu, ya entamaremos el descensu tranquilu con vistes hacia tol valle Culebrejas pel que xubimos al entamu la ruta y tamién a la foz de Llánaves, pero xube la carretera al pueblu, que ye un llugar tamién con un toque máxicu, por mor de nun tar los asturianos tan avezaos a estes formaciones rocoses.

Ensin mayores problemes que les ganes d'aportar a la furgo, entainamos pasu siempre pendientes de Borrín, que fai dalgún intentu de baxar hacia'l so valle, pero siempre continúa con nós, hasta qu'a la fin, el camín llévanos de nuevu al valle Culebrejas, onde dempués d'un bañín nel rigu, quédase ya con cara de pena nos sos dominios.

En resume, ruta circular a la Peña Vallines, un monte que paga la pena munchísimu, pol percorríu que ficimos, poles vistes y pol propiu monte, teniéndonos entreteníos durante 5 hores y 20 minutos, completando un percorríu de 12 km con un desnivel acumuláu de +/- 790 m.