Iondokorta (Arratia-Nerbioi) - Baias Ubeguia - Gorbeia - Aldamiñape

21 d'Abril de 2024

Track: Iondokorta (Arratia-Nerbioi) - Baias - Gorbeia - Arimekorta

Continuamos al día siguiente de Xuntanza Asturvasca, llevantándonos pela mañana unos meyor qu'otros, ya que les raciones de llicores varios y la llarga partida de mus, pasaron factura al día siguiente, asina que con una resaca estupenda, enllenamos la barriga coles palmeres d'Unquera y café pa espabilar y ponémonos en marcha, pa facer una nueva ruta.

Esta vegada, díbemos repetir monte, col Gorbeia, que ya ficiera munchos años que lo xubiéramos, asina que garraremos la mochila y pesie al día soleyeru, ponemos tola ropa que tenemos, ya que nótase una mañana fresca, entamando a caleyar a les 9 la mañana col envís de que dénos tiempu a facer la ruta y aportar pa tomar dalgo tranquilamente enantes de la xinta.

 

Preparativos nel refuxu del Baskonia coles banderes correspondientes

Saldremos caleyando pegaos a la muria del banzáu de Mendizabal, esfrutando de los primeros pasos pel fayéu de Iondokorta saliendo xusto al crucie cola pista que xube hacia Arimekorta, desdexándo ésta y yéndonos de frente nesti casu, pa garrar una pista maderera, que va llevanos pente pinos y fayes, hacia la faldera del Aldamin, qu'ascendiéramos hacia años xunto al propio Gorbeia.

Ascendemos hacia l'Aldamin per guapes viesques

Diremos garrando calorín nes pates y nel cuerpu, nun día preciosu pa caleyar, averándonos a la faza norte del Aldamin y al altor casi de Larregoien, vamos facer una amplia envuelta que va facenos avanzar pembaxo de les muries del Aldamin, hacia una guapa forcada, que darános paso, hacia los guapos collaos de Erigiñao, onde asítiase una ermita y dende onde tendremos vistes al Gorbeia.

Ascendemos hacia Erigiñao onde garramos el valle hacia'l ñacederu del Baias

Hasta equí, ya conocíemos en gran parte, el percorríu del día, pero darréu vamos adientranos hacia'l ñacimientu del rigu Baias, descendiendo per un valle bien guapu, enllenu de camperes y tarrén calizu, que danos alcordanza a la nuesa tierra astur, sobretou, cuando metémonos na mecedura de varies riegues, descubriendo una pequeña ayalga d'agua, fayes y caliza, nel champán onde ñaz el Baias.

Averámonos al ñacimientu del Baias, requexu de gran valir ñatural

Llueu de la visita prestosa a este rigu, que termina desembocando nel mediterráneu a través del Ebro, lo que nos fai petar la tiesta a los astures jaja, vamos tornar so los nuesos pasos y al altor de la fastera d'Urratxa vamos entamar un ascensu per un guapu fayéu, que tien de llevanos per una vallina a la manzorga del Arratebaltza, que va danos accesu a la amplia arista oeste del Gorbeia, entrando ya a tarrén de monte baxo.

Salimos del fayéu hacia la faldera occidental del Gorbeia

Equí, ensin ver entá'l cumal y cruz del Gorbeia, entretenémonos coles vistes del Lekanda, tres de nueso y ganamos vistes hacia los montes más al sur, como los montes d'Orduña, alcordándonos de la guapa ruta que ficiéramos al Ungino dende Madaria, pero tamién cola vista puesta, quiciás en dalgún día conocer más montes d'esti cordal ya incluso del saltu del Nerbioi, que prestaría conocer munchísimu.

Pali pali avanzamos con un vientu fríu hacia'l Gorbeia Mendi

Con tola ropa que tenemos puesta, vamos sofriendo tanto la panda eterna que supone xubir al Gorbeia como un vientu fríu de ñeve, qu'azótanos pasu tres pasu, hasta qu'aportamos al cumal, onde nun somos los únicos con esta sensación, ya qu'alcontrámonos con munchísima xente abrigada con tolo que tenía al alcance y faciendo la semeya enantes de salir corriendo p'abaxo.

Cumal del Gorbeia Mendi con tolos collacios vascos y asturianos

D'esti xeitu, vamos sacar la semeya de rigor cola bandera del Baskonia Mendi Taldea (nota mental: facer bandera del GM Xuan de la Borrina) y vamos escapar pela cara norte del Gorbeia, a ver si yéremos a llibrar un pocu del vientu xelao que llevaba castigándonos ya, más de lo que nos apetecía, cruzándonos con munches families montañeres nel nuesu descensu hacia la collada col Aldamin.

Baxamos del Gorbeia hacia los collaos col Aldamin a la gueta d'abellugu

A la fín alcontramos abellugu'l vientu, nunes camperes más abaxo del colláu col Aldamin y pararemos a picar dalgo de frutos secos, asina como echar unos culinos, gracies a les botelles de sidra que cargaron durante la ruta dellos collacios. Col descansu merecíu, ya que la ruta nun taba quedando tan mañanera como contábemos, entamos descensu hacia les camperes d'Aldamiñape.

Facemos el clásicu descensu per Aldamiñape hasta Iondokorta

Col percorríu más que conocíu, diremos descendiendo hasta Aldamiñape, onde atopamos bien de refuxos d'empreses y de grupos de monte, pa siguir descendiendo per Arimekorta y finalente aportar pente pinares repoblaos primeru y fayes dempués hasta Iondokorta, onde ya había ganes mudase de ropa y preparase pal vermú y xinta posteriores.

En resume, nueva ascensión al Gorbeia, faciendo un percorríu diferente cola visita hasta'l Baias y ascensión pela faldera occidental, llevándonos un total de casi 5 hores, con un percorríu de 12,5 km y un desnivel acumuláu de +/- 905 m, que nun tuvo nada mal pa sudar tola resacona de la nueche anterior.

Camudando'l Camín na faldera del Gorbeia