11 de Febreru de 2024
Track: Molleda (Corvera) - L'Escañoriu - Castiellu - La Cabaña - Picu Prietu - Bango - El Pino
Día perruno no meteorolóxico, pero menos de lo que teníemos na tiesta cuando quedamos a les 9 y media p'almorzar nes Vegues en Corvera. Sorprendéntemente, tenemos un día ventosu pero con vientu ábrigu y pel momentu teníemos una ventana decente pa salir a patiar, col envís de facer el techu del conceyu corveranu. Aparte, dende les miós primeres andances pel monte, nun llibru que mercara, nomábase L'Escañoriu como un llugar a conocer, asina que preparamos esta ruta, col envís de matar dos páxaros d'un tiru.
Magar del cafetín, saldremos hasta la parroquia de Molleda, per onde percuerre la Sienda l'Agua, aparcando al llau del rigu nel barriu'l Molín. Ellí, preparámonos, saliendo con más capes de ropa de les debíes y entamamos a caleyar pela sienda l'agua, pasando per dalguna ponte curiosa y esfrutando d'una cantidá d'agua xabaz del desxelu, pero na rialidá, ye qu'atopamos muncha basoria a cada pasu que vamos dando ya seya nel propiu rigu o perende, ya seya nos praos, en cases abandonaes, etc...
Perpasaremos tol tramu más senderista pasando pelos barrios de García y L'Entrialgo y bien ceo, vamos desvianos per una pista n'ascensu a la manzorga, col envís d'averanos al rigu L'Escañoriu, el cual topámoslo con un caudal xabaz, poro esfrutaremos del camín más montañeru hasta topanos col primer tabayón represáu y por tanto artificial, que baxa con una fuercia descomanada pel canal d'agua.
Llueu d'alloriar un pocu cola fuercia l'agua, xubimos a la presa y siguimos pegaos a la canal, pa continuar per senderu pegaos al rigu, garrando ensin danos cuenta, un senderu n'ascensu per un ocalital atalantando al pocu que nun díbemos tener forma d'aportar hasta la siguiente cayida d'agua natural en baxada, ya que l'accesu yera pol propiu rigu y col caudal xabaz esistente, nun había manera de continuar pel calce.
Nel intre, decidimos que lo meyor ye siguir el senderu y salir penriba'l monte, asina que tiramos p'arriba, garrando una pindia canalina pela que bregamos un pocu con dalgún ocalitu esgonciáu, saliendo per tarrén pindiu anque factible pa xente avezao, hasta un pequeñu desplomín de cuarcita pel que pasamos pembaxo pa ya salir hacia'l cumal del Picu'l Castiellu, onde asítiense restos d'un castru astur.
Facemos la semeya nesti inesperáu cumal y pasamos pelos restos del castru, con dalguna muria visible pa garrar descensu noroeste hasta salir pelos praos de les cases d'El Castiellu, saludando allégremente a los vecinos que sorpréndense de ver baxar a dalguien del monte, ensin saber que veníemos d'un ascensu munchu pior y más pindiu que'l descensu al pueblu, que tan sólo tenía pasar pel prau de los paisanos, como fechu a resaltar.
El día va tornándose a pior, les primeres goteres van cayendo y va tocando poner chubasqueros, demientres ascendemos per carretera hacia Los Espinos, pa garrar una pista que nun sabíemos si tenía salida, faciendo un tramu bien guapu de camín hacia la parte alta del rigu Molleda o L'Escañoriu, alcontrando una puente pa cruciar el rigu y dexanos na carretera As-333 al altor del Retuerto.
Caleyaremos ya col día terrible enforma, carretera arriba, hasta'l crucie hacia les cases de La Cabaña, les cuales travesamos alcontrando un maraviyosu camín que llévanos perfeutamente hasta L'Acebo, onde tres d'unos metrinos d'asfaltu, alcontramos ya la pista a la manzorga, que va dexanos ascender pel monte Guilero, siempre con vistes pente los ocalitos a les tres figures na xerra Bufarán (Gorfolí, Campu La Llebre y Taborneda).
Por suerte tanto la pista inicial como'l senderu a la manzorga qu'asciende hacia'l picu Prietu, tan llimpios y nun tenemos que bregar cola vexetación, asina que tan sólo'l vientu infame y la lluvia a rafagues ye la única dificultá pa encumar los 366 m del picu Prietu, techu de Corvera, que tien vértice xeodésicu y cartelu d'un grupu monte y que si ficiese un día guapu y nun hubiese tres ocalitos tapando les vistes a la ría d'Avilés, hasta sedría un monte mediu curiosu pa parar a picar dalgo.
Cansaos ya del día gafientu, salimos corriendo del cumal del picu Prietu, pa baxar pela otra fastera del monte Guilero, hasta aportar a la Menudera onde ganamos camín asfaltáu hasta'l crucie que tien de llevanos hacia les cases de Bango, onde vamos tomar camín a la mandrecha hacia'l valle l'Ablaneda, faciendo al menos un bon tramu abellugaes del vientu, que nun ye tampoco a parar nin mediu segundu y a estos altores ya nun ye del sur, ya que taba aportando'l siguiente frente ivernal pel occidente.
Lo más apriesa que podemos siguimos valle abaxo, pasando per dalgunos llugares pelín turbios, teniendo un pequeñu repechu enantes d'aportar a l'Ablaneda, pa garrar camín arriba pa ganar el viaductu que pasa penriba l'autovía'l Cantábricu, teniendo esti últimu regalu a la vista, enantes de siguir carretera alantre pel Pino hasta garrar baxada ya pel Moncón hasta Molleda onde esperábanos los coches y una muda de ropa más qu'agradecida magar de la pingadura de tola segunda parte de la ruta.
En resume, circular mediu decente, qu'intentaremos meyorar nel futuru, faciendo tol escobiu L'Escañoriu, col envís de facer nuna mesma ruta quiciás el llugar más interesante de Corvera como ye esta foz y el techu del conceyu. Pel momentu, salieron nesta circular un total de 3 hores y cuartu, percorriendo 12 km y faciendo un desnivel de +/- 410 m desnivel acumuláu.
No hay comentarios:
Publicar un comentario