8 d'Agostu de 2023
Track: Brías (Berlanga de Duero) - Cerro Abanco
Continuamos de vacaciones per Soria y como tolos años en branu, toca madrugar pa facer dalgo d'actividá ya que'l calor, a partir de les 12 fai imposible actividá física curiosa. Otros años, tocaba meter kilómetraes corriendo o bici monte, pero de momentu, lo únicu que pueu facer ye dar pateínos curtios, poro, continúo tachando vértices averaos al pueblu mió pa, Recuerda.
Asina, que llevantéme prontín, almorcé y miré como taba la bici, viendo que nun taba pa munches hosties, eché un vistazu a los mapes de la zona al alcuentru d'otru vértice y monte sorianu que tachar. D'esti xeitu, averéme hasta Brías, pueblu que pertenez a la comarca de Berlanga de Duero, anque llenda col municipiu de Recuerda y tengo bien pateáu los accesos pel monte pente dambos municipios, pero nunca saliera dende Brías a dar una vuelta pela so redolada.
Despedirémonos de la plaza de Brías y la so imponente ilesia y per un pequeñu tramu carretera averámonos hasta la Ermita de la Virgen de la Calzada, onde pocu más alantre ya alcontraremos los cartelos del GR-86 que vien dende Recuerda pel arroyo Fuente Arenaza y el pueblu de Galapagares.
Continuaremos pel GR-86, qu'empobínase hacia Retortillo, ascendiendo cómodamente pente sabinas y enebros hacia Las Majadillas, siempre per camín amplio con estrada de llábana caliza en dalgunos tramos, qu'amuesa'l so calter carreteru d'antaño.
Ascenderemos al Tallar, onde ya tamos na parte cimera del cerro Abanco, siguiendo'l GR que llévanos a faldiar la parte sur, pudiendo descender per camín hacia Saquillo de Paredes, continuando hasta topanos con otra amplia pista, que ya va facenos ascender finalmente a los 1281 m d'altor del cerro Abanco, onde asítiase caseta de telefonía, vértice xeodésicu y paez ser que los restos de la talaya d'Abanco, pero nin siquiera dime cuenta de velos, lo que dame un pocu pena.
El día ya entama a calecer, alcuéntrome meyor que'l día anterior de la cadera, pero va siendo hora de baxar, poro continuamos pel GR-86 que cuesta un pocu siguir pente los enebros, garrando una vallina que va llevanos pelos Laderos hasta una pista rural que vien dende Sauquillo, la cual empobínase hacia la Sierra de Enmedio, la que desdexo conocer tanto pol calor como por nun calentame de más físicamente.
Nós, nel primer crucie abandonamos la pista rural, garrando otra que va llevanos hacia Abanco, teniendo vistes a la fastera más cortada del cerro, con dalgún murín curtiu qu'habría que llibrar si quixéramos descender a pinchu del cerro al pueblu d'Abanco.
Con vistes a la Ilesia y el Palacio, pasaremos al llau d'esti pueblu nel que quedaba un habitante en 2020, siguiendo camín, ya que nun m'apetez muncho pisar carretera pa volver a Brías. Poro, dexaremos el pueblu a la manzorga y garraremos camín hacia la majada de la Teja, la cual vemos a lo lloñe na faldera de los altos del Encinar, a la qu'aportaremos pela Vereda Real, al llau del arroyu de la Hoz de Miguel.
Dende La Teja, meteremos un pocu desnivel más a la ruta, ascendiendo a los Altos del Encinar, siempre per bon camín, hasta facer una envuelta de 90º a la manzorga, pa garrar otra pista que va llevanos en sele descensu hasta garrar un camín a la mandrecha, que ya sí, definitivamente, va llibranos de tocar carretera, descendiendo per Villolengo hasta aportar a la llanura de la Dobera, onde tendremos guapes vistes del Otero, monte con cierta presencia enriba de Brías.
En resume, aportaremos a Brías entrando pel camín del cementeriu, con pocu más de 2h y media de camín, un percorríu de 12 km y un desnivel acumuláu de +/-230 m y como con un calufa penriba ya de los 30 graos a les 12 la mañana.
No hay comentarios:
Publicar un comentario