martes, 28 de junio de 2022

Puent de Coronas (Ribagorza) - Tuca Culebres - Tuca Vallhibierna - Ibones de Vallhibierna

12 de Xunu de 2022

Track: Puent de Coronas (Ribagorza) - Tuca Culebres - Tuca Vallhibierna - Ibones de Vallhibierna

Dempués del primer día de calecer patuques pela redolada de la estación de Sarllé/Cerler, continuamos nel viaxe pel Pirinéu, teniendo nel puntu mira pal segundu día, l'ascensión a la Tuca Vallhibierna. L'añu anterior, por mor de la meteo, quedáranos pendiente d'intentar y esta temporada díbemos bien motivaos, a completar lo qu'a posteriori, pa mín, fuera la ruta más guapa de tol viaxe.

Entamábemos almorzando nel camping Aneto, pa llueu xubir en furgo hasta'l Puent de Coronas, que seya dicho, ye una aventura en sí xubir per esta pista hasta'l refuxu de pescadores qu'alcuéntrase en Coronas y ye que la pista, ta nun estáu decente, pero mirar pal escobiu de la que conducimos pon la piel de pita.

Partimos de la Puent de Coronas (1957 m)

Llegamos sanos y salvos hasta la Puent de Coronas, alloriando cola cantidá de coches qu'alcontramos un domingu, asina que dexamos la furgo en plena pista ensin que moleste y salimos a patiar... tarde, suponemos al ver la cantidá de coches y ye que la xente nel Pirinéu madruga enforma, supongo que poles posibilidaes de tormentes de tarde.
 
Cruzamos el rigu Vallhibierna pa caleyar a la so vera con vistes impresionantes

Entamaremos a bon ritmu, pero un senderu preciosu, travesando una viesca, pa cruciar el rigu Vallhibierna, siguiendo camín a la solombra, hasta salir a unos mayaos, con vista ya a la Tuca Vallhibierna a la la nuesa mandrecha y al Cap de Llauset al llau del Coll de Vallhibierna.

Continuamos ascensu pela canal de Vallhibierna con vistes al macizu de Maladeta-Aneto

Abandonaremos los praos, superando más tarde un resalte que nos fadrá cruciar el barrancu de Tuqueta Blanca pa siguir pela Canal de Vallhibierna, pela que tocará navegar un pelín, superando bastante desnivel, siempre cola vista puesta nel Cuello de Culebres, onde tenemos programada una paradina pa xintar daqué.

Tramu final d'ascensu hasta la Tuca Culebres

Llueu de picar dalgo pa recuperar fuercies magar de les dos hores de pindiu ascensu, continuaremos, ya con ñubes amenazantes, per una canal-pedrera, hacia'l, primer tresmil del viaxe, la Tuca Culebres (3035 m) qu'aparte d'unes vistes increyibles de la fastera de Llosas y Coronas hacia l'Aneto, tendrá unes cencielles trepadines de tramu final bien divertíes.

Metémonos nel míticu Paso d'o Caballo hacia la Tuca Vallhibierna

Namái encumar los 3035 m de la Tuca Culebres, nun podemos facer otra cosa que poner la vista, na guapísima cresta caliza que tien de llevanos hacia'l Vallhibierna, asina que llueu de que garren aire los collacios (Mario y Carla) que vienen un pocu sin aire del altor, guardamos bastones y metémonos nel Paso d'o Caballo, pudiendo facese un pelín n'adherencia coles manes pol filo o sentándose na propia cresta, si se ve necesariu, como ficieron los compañeros.

Breve vidiu de l'arista hacia la Tuca Vallhibierna

La verdá ye que la bona roca y agarres na mayor parte perpositivos, fizo'l pasu de los momentos más divertíos del viaxe, aportando al cumal de la Tuca Vallhibierna (3046 m) con una sorrisa fonda nes cares de los tres, conociendo y tachando otru de los 3miles cimeros del Pirinéu, quedándome pesonalmente con un tastu a monte preciosu.

 
Semeya de grupu nel cumal de la Tuca Vallhibierna (3046 m)

La única pena, fue nun poder esfrutar tranquilamente del cumal, ya que tronaba perende y tanto nós, como otra pareya que diba per delantre, escapamos pela arista este a la carrera, baxando ya per senderu hacia l'estany Negre, corriendo dafechu y ye que naide quier alcontrase en plena arista col torbón enriba.

Metíos dafechu na negrura na baxada hacia l'Estany Negre

Nun sabemos mui bien nin por qué, la truena raspiónos y veíemos como descargaba con tola furia hacia la fastera de Llauset, demientres escapábemos casi sin poner goretex a toa priesa, pasando al llau del guapu Estany Negre, pa siguir navegando per tarrén de grandes piedres hacia l'Ibón Alto de Vallhibierna, onde tuviemos la suerte de descansar y xintar baxo'l solín.

Perguapu camin hacia los Ibons de Vallhibierna

Col sentir del trabayu bien fechu, anque con una espinina por tener qu'escapar tan aína de la Tuca Vallhibierna, vamos ya calecíos y secos pol sol, de camín pente l'Ibon Alto y el Ibón Baix de Vallhibierna, p'arrodialo con calma, hasta la mecedura de los barrancos de Vallhibierna y de Llosas, onde fórmase finalmente'l rigu.

Descensu pel rigu Vallhibierna hacia Puent de Coronas

Dende equí, cola amenacia tamién d'otra tormentina, vamos siguiendo ya'l GR que vien dende'l refuxu del Cap de Llauset, aportando de nuevu a Coronas magar de 6 hores y media d'aunténticu esfrute montañeru, ya que poques rutes circulares tan prestoses ficiéramos los collacios que nos xuntamos pa esti viaxe.

En resume, ruta imprescindible nel Vall de Benás, con un ascensu hasta Culebres mui montañeru, col míticu pasu picantón del Caballo y ya cola baxada per Vallhibierna, estrada d'ibones, riegues y barrancos que completan una ruta de díez y pol mínimu preciu de pocu más de 12 km y +/-1200 m de desnivel.

Camudando'l Camín pel Vallhibierna

2 comentarios:

  1. Ja et dic jo que fa més por eixa pista que puja a Coronas que el propi Pas del Cavall, i més si et toca un conductor d'autobús kamikaze cóm el que ens va tocar a nosaltres jajaja.
    Molt guapa i panoràmica la pujada al Vallibierna per aquesta vessant de Coronas, veig que comparteix alguns punts comuns amb la via que puja des de Llauset, que és la que vam utilitzar nosaltres quan vam pujar a aquests dos cims.
    Cóm mola tota eixa zona de Benás i les Maladetes!!!

    ResponderEliminar
    Respuestas
    1. Buah... dígotelo yo, menos mal que fuimos cola furgo nuesa. Sicasí, impresiona un montón. La ruta ya, pocu que dicir, una pasada. Un abrazu Dani

      Eliminar